2025 2nd Quarter Teenager Zirlai-9-na

Zirlâi 9-na                                May 31, 2025

tawntirh hmangaihna ni lo

Chângvawn: “Matthaia ina zanriah a kîl lâiin, ngâi teh, chhiahkhawntute leh mi sualte tam tak an lo kal a, Isua leh a zirtîrte chu an kîlpui hlawm a. Pharisaite chuan chu chu an hmuhin, a zirtîrte hnênah chuan, ‘Enga ti nge in zirtîrtuin chhiahkhawntute leh mi sualte hnêna a ei le?’ an ti a,” (Matthaia 9:10, 11, NIV).

Chhiar Tûr: Matthaia 9:9–17; Marka 2:14–22; Luka 5:27–39.

Zir Zauna:  Chatuan Nghahfâk, bung 28.

Thu Êng

“Hei hi Krista hnathawh kalphung târ lanna a ni a, khawvêl chhandam nân a nun a hlân zo vek a ni. Thlalêra thlemna a. tawhnaah a ni emaw, Matthaia ruai thehnaa chhiahkhawntute nêna einaah a ni emaw, boralte tlan nân A nun a pe zo vek. Lungngâi hmêlpu taka awm ringawt te, inngaihtlâwm âwm taka inlantîr te, thilpêk chi hrang hrang hlanna te hi, inpêk zawhna dik lantîrtu an ni kher lo. Pathian leh mihringte rawngbâwl tûra lâwm taka inhmanna hi inpumpêkna dik lantîrtu chu a ni.”—Chatuan Nghahfâk (2nd Edition, 2014),  pp. 299, 300.

Engtin Nge I Ngaih? 

Kum 2001-a sum tihchingpenna namên lo taka inhnamhnawih pâwlte târ lan a ni a. Thawktu tam takte chuan chêng maktaduaih têl an chheprelh lâiin, thenkhat chu kut bêngin an awm thung a, an pension hlawh tûr leh in leh lo chenin an chân a ni. Khatiang mi dangte nun tihchhiatsak thiam loh chang zînga pakhat kha in kohhranah lo lâwi ta se, engtin nge i tih ang? A hnuaiah hian duhthlan theih tûr hrang hrangte târ lan a ni a. Nambar 1 hi i tih dân tûr ni âwm ber niin, nambar 5 chu tih âwm loh ber tûr anga ngâiin, han chhâng teh. Rilru taka chhân tûr a ni tih hre reng ang che:

___Nangmah nêna inkaihhnawihna nei lo an nih avângin i hlamchhiah hmiah ang.

___Thinrim taka inchhîr lehna tûr thil sawi hlauvin, i inthiar fihlîmsan daih ang.

___Thinrim takin an rilru tûr dâwnpui lo lêkin i âng chhuak deuh phiar phiar ang.

___Hmêl hlim tak hmuh chungin, i inthiar fihlîmsan ang.

___Anni chu pawmin, an tâna thuhretu thâ nih tumin i bei ang. An rawn inkhâwm ve tawh a, danglamna neih an duh ve tawh pawh a ni mahna.

I Hria Em? 

Isua hun lâite kha chuan, chhiah khawntute khân Juda-te huat an phur hle a. Mahse, Juda-te pawh chu chhiahkhawntuah an tang ve tho si a ni. Hnam phatsantu anga ngaih an ni a, tu mahin an hnimhnâi duh ngâi lo. Chutiang a nih avâng chuan, Isua’n chhiahkhawntute a kawm pawh khân Juda-te chuan an lâwm lo rêng a. Tûnlâi hun thleng pawh hian chhiahkhawntute chu an hmu sir–hê deuh tlat. An hna chu mimal leh sumdâwng pâwl, chhiah pêk tûr rûl duh mai lote leibâ thîn a ni. Thawnthu lamah chuan anni hi mi sual anga ngaih an ni thîn a, a tak ramah pawh chutianga ngaih chu an ni tho. Chutih lâiin, hêng IRS leh an hnuaia thawkte pawh hi eng nge an nih chuan bîk?

Bible Thawnthu

“Chûng zawhah chuan a chhuak a, chhiah chawina hmuna thû, chhiahkhawntu         pakhat         a hming Levia a hmu a; a hnênah, ‘Mi rawn zui rawh,’ a ti a. Tichuan, engkim a kalsan a, a tho va, a zui ta a.

Levia chuan a inah Isua tân ruai ropui tak a theh a; tichuan, chhiahkhawntute, mi dangte nên, mi tam takin anmahni an kîlpui hlawm a.  Pharisaite leh lehkhaziaktute nên chuan a zirtîrte chungah an phunnâwi a, ‘Engati nge chhiahkhawntute leh mi sualte hnêna in ei a, in in le?’ an ti a.

Isua’n an hnênah, ‘Mi hrisêlte chuan daktawr an ngi lo va, mi bawrhsâwmte zâwkin an ngâi a ni. Mi fel takte lam tûra lo kal ka ni lo va, mi sualte lama simtîr tûra lo kal ka ni zâwk,’ a ti a, a chhâng a.

Anni’n a hnênah, ‘Johana zirtîrte’n chaw an nghei fo va, an tawngtâi thîn;  Pharisai zirtîrte pawhin chutiang bawkin an ti thîn; nimahsela, i zirtîrte hian   an eiin an in thîn,’ an ti a.

Isua’n an hnênah, ‘Mo hruaitute hnêna a pasal tûr chu a awm chhûng zawng mo hruaitute chu in ngheitîr thei thîn em ni? Nimahsela, a pasal tûr chu an hnên ata hruai bo nite a la thleng ang a, chu mi        ni-ah erawh chuan an la nghei ang,’ a ti a.

An hnênah tehkhin thu pawh a sawi a: ‘Tu ma’n puan thar pawt thla-in puan hlui an bel ngâi lo, bel ang sela, a thar chu an titet ang a, a thar them leh a hlui chu a inpâwl bawk hek lo vang. Tu ma’n uain thar savun uain peng hluiahte an thun ngâi lo, thun ang sela,   uain thar chuan savun pengte chu a tâwn puak ang a, a bua ang a, savun pengte pawh chu a lo chhia ang. Uain thar chu savun uain peng tharahte an thun zâwk tûr a ni. Tu ma’n uain rei in zawhin a thar an duh ngâi lo; ‘A rei a tha zâwk,’ an ti si a,’ a ti a.”

(Luka 5:27–39, NKJV)

Thawnthu ATangin

Engati nge Isua’n chhiahkhawntu a pawm avânga Pharisai hote kha an thin a rim viau?

Engati nge chhiahkhawntute khân khati taka huat rawn an hlawh?

Engati nge Isua’n Matthaia hnêna, “Min zui rawh,” a tih khân Levia khân phû lo riaua inngâi tûra i ngaih? I chhânna sawi fiah la.

Khatiang mi hnâisâi lo tak tak, chhiahkhawntu angte Isua’n thiana a siam mi dangin an lo sawisêl luai luai a engto-pui lutuk loh chhan kha eng ni tûrin nge i ngaih? Eng nge a chhan?

Isua’n, “Puan tharin puan hlui an bel tha ngâi lo, chutianga an tih chuan a thar chuan a hlui chu a kâi thlêr zâwk ang; chutiangin peng hluiah uain thar an thun ngâi lo, chutianga tih chuan peng hlui chu a tâwn puak mai ang,” a tiha a sawi tum tak chu eng nge ni le?

Levia nêna an intawn hmasak tum khân Isua’n eng nge hmua i rin?_

Thu Pawimawhte 

“Nangni hmana in thiltih sualnaah khân ama lakah thenin in lo awm a, in rilruah chuan a hmêlma in lo nih bawk kha; nimahsela, tûnah zawng, a hmaah chuan thianghlim tak leh, hmêlhem lo leh, sawisêl bova a dintîrna tûr che uin, a thihnain a tisa taksaah chuan amah nên a inremtîr tawh che u a ni; nghahchhan neia nghet taka awm a, Chanchin Tha in hriata beiseina atanga sawn bo thin lova, rinnaah hian in awm rêng phawt chuan: chu Chanchin Tha chu vân hnuaia thil siam zawng zawngte zînga tlângaupui a nih kha; kei Paula hi chu mi rawngbâwltua siam ka ni” (Kolosa 1:21–23, ESV).

“Ka rîruang la famkim lo chu i mitin a hmu a, i lehkhabuah chuan ka pengte zawng zawng hi ziak vek a ni a, a ni têla siamin a awm zêl a, a pakhat mah la awm hmain” (Sâm 139:16, ESV).

“Nimahsela, Lalpa chuan Samuela hnênah, ‘A hmêl lam emw, a sân lam emaw en suh; ani hi chu ka duh lo a ni; Lalpa chuan mihring en dân angin a en ve si lo va; mihring chuan pawn lam lan dân an en thîn a, Lalpa erawh chuan thinlung lam a en zâwk thîn a ni,’ a ti a” (1 Samuela 16:7, ESV).

“Chuvângin, Krista chuan Pathian tihropui nân a lâwm che u ang bawk khân inlâwm tawn rawh u” (Rom 15:7, ESV).

“Pain mi pêk zawng zawng ka hnênah an lo kal vek ang; tu pawh ka hnêna lo kal chu ka hnawt chhuak tawp lo vang” (Johana 6:37, ESV).

Hriat Zui Atân

“Pathian mite chu dik taka piangthar an nih a, an kiang vêla mite tâna rawngbâwlsakna chu an kova awm a nih tih mawhphurhna dik taka an hriatthiam a, hmêlmapa thiltihtheihna laka mi sualte chhanchhuak tûra hmanraw awm thei apiang an hman phawt chuan, kohhrante laka sawi chhiatna chu lâk bo vek a ni ang.”—Ellen G. White, Testimonies for the Church, vol. 7, p. 11.

Mahni Nun Nêna Dawh Zawm Tûr

Sabbath

Chhiar tûr:  Johana 6:37 

Kohhran hi taksa pakhat member peng hrang tam tak, hnam tin, chi tin, tawng tin, ze tin rêng atanga koh mi lian leh mi tê, sâng leh hniam, hausâ leh rethei, a hmei a pa thliar chuang lo, mi inang lo tak takte lungrual taka inpâwl khâwmna a ni. Krista-ah chuan intluk tlâng vek, Thlarauvin amaha a thlun khâwmte kan ni a; hleih neihna tel lo leh khêk nei hauh lo va rawng inbâwlsak tlâng theuh tûr kan ni bawk.” (Fundamental Belief 14, Unity in the Body of Christ). Isua’n, “Pain min pêk zawng zawngte chu keimâ hnênah an lo kal ang a, tu pawh ka hnêna lo kal tawh phawt chu engti kawng mahin ka hnar lo vang,” (Johana 6:37, ESV) a ti a. Ani chuan mi sualte zawng chhuakin, a pawm vek a. Vântlâng huat phur ber berte pawh a zawng chhuak zêl a. Mi hausa leh Juda hruaitute’n an zahte ina mite âiin, mi sualte leh khawtlâng endawng tuarte inlêng nih chu a duh zâwk a; chu chu chhandam beiseina chu a pêk theih nân a ni.

Mi dangte pawm ve tûra Isua tih dân i entawn theih dân tûr kawng thumte chu ziak chhuak teh:

1. ____________________________________________

2. ____________________________________________

3. _____________________________________________

Sunday

Chhiar tûr:  2 Chronicles 7:14

Eng emaw thilah tling lo deuh riauva inhriat chângte i nei ve tawh ngâi em? Mi dangte thang tlâwm deuh hleka chhuah chunga zahngaihna leh ngaihdamna dawn lêt chângte i tawng tawh ngâi em? A hnua thiam lo deuh riaua inhriat leh hnuhnawh chângte i nei em? Levia pawh kha chutiang deuh chu a ni ve mai thei e. Khatianga Isua’n a pawm tâkah khân, mahni nun inen lêt a, tling lo intih deuh riau chângte a nei ngei ang. Chuti chungin a nun hlui lama a tlin lohnate chu Isua’n en khûmsak a, zirtîr zînga tel tûrin a pawm a ni tih inhriatna pawh a nei mai thei bawk. Vawiin Bible châng thlan khi chhiar la, ngaihdamna leh pawm nihna chungchâng sawina Bible châng tam thei ang ber hmuh chhuah tum ang che. Chûng zînga pawimawh bîk deuha i hriat pathum chu i chhinchhiah tha dâwn nia.

Thawhtanni

Chhiar tûr:  Jakoba 5:20

Kan zînga tam zâwkte hi chuan mi hming thâte zînga awm kan duh thîn a. Mahse, Isua erawh kha chu chutiang a ni ve lo. Kan chunga hû tha lo nei, mi tha lo deuha kan hriattte hi chu kan kal pel deuh tlângpui a. Isua erawh kha chuan, “Mi hrisêlte’n doctor an ngâi lo va, mi bawrhsâwmte zâwkin an ngâi a ni. Mi fel takte lam tûra lo kal ka ni lo ve, mi sualte zâwk lam tûra lo kal ka ni,” tiin a sawi (Luka 5:31, 32, NIV). Fîmkhur taka thian kawm tûr thlang tûr chu kan nih tho lâiin, ‘doctor mamawhtute’ kan hlamchhiah mai chuan, Isua hmangaihna leh amaha beiseina awm chu mi dangte hnêna hriattîr tûrin, engtin nge thuhretuah kan tan theih ang ni? Kâr leh chhûng chu Isua tih dân zui a, thim zînga lêngte tâna êng nih i tum dâwn nia. Vawiin Bible châng hmanga Pathian min fuih phûrna chu eng nge ni?

Thawhlehni

Chhiar tûr:  Johana 10:11

Pathian duhzâwng ti tûr chuan inpêkna leh mahni inthihsanna neih a ngâi. Isua nun pumpui kha inhlanna hlîr a ni. Pathian hnêna inhlanna nei tûr chuan inngaihtlâwm pawh a ngâi a. Mi tute emaw ‘tling lo’ riaua inngâi, kan ngaihsak ngâi tak tak an awm. Mi dangte tling lova kan ngaih loh nân kan tawngtâi a, Pathian hnênah inngaihtlâwmna kan neih a, ama hnêna kan inpêk pum hlûm a ngâi thîn. He mi chungchâng hriat chian nân Chatuan Nghahfâk, bung 28 chhiar chhuak ang che. Vawiin châng thlanah hian Isua’n engtin nge ama chungchâng a insawi? Mi dangte tâna nun hlân ve tûra beisei kan ni em? Chu chu engti zâwngin nge ni ang?

Nilaini:  Chhiar tûr:  Jakoba 4:11, 12. Mite pawnlam lan dân âiin an thinlung leh chhûnglam mâwina hmuh kan tum zâwk tûr a ni. An pâwn lam lan dân ang angin mite chungah rorêlna leh ngaihdân kan siam mai thîn a. Mahse, pawn lam lan dân chauh kan thlîr chuan engtin nge an nihna dik tak kan hriat theih ang ni? Tlin lohna eng emaw chu kan nei ve theuh a; mahse, Isua zârah mi sualte kan ni chungin mi dangte chhandam nân kan thawk thei a ni. Ni tin hun serh hman nân tûn kâr zirlâia chanchin tha thenkhat hi chhiar la, Isua’n mi sual leh tling lote pawh a pawm dân kha entawna hman dân kawng hriat i tum dâwn nia.

Ningani

Chhiar tûr: 1 Samuela 16:7

Kan tûn lâi hun leh khawvêl kan khawtlâng nunah hian milem hi a pawimawh a. Hemi chungchâng hi hmun tinah sawi a ni thîn a; chanchinbu leh lehkhabu lamah te, TV leh media hrang hrangah pawh milem chu târ lan a ni nasa hle bawk a. Chûng chu nungchang puthmang entîr nânte pawh hman a ni hlawm. 1 Samuela 16:7-ah hmêl lan dân hmanga duhthlanna siam mai laka vaulâwkna eng thu nge kan hmuh? Mite dik lohna leh hmêl lan dân bâk thlîra an mamawh tak hmu thei tûrin Pathian tanpuina dîlin tawngtâi ang che.

Zirtawpni

Chhiar tûr:  Johana 6:37 Khawvêlah hi chuan kan awhna tûr thang kam tam tak kan hmachhawn ang. Kan ngaihtuahna tibuai tûr pawhin beihna chi hrang tam tak kan hmachhawn bawk ang. Mahse, Isua kan chelh tlat phawt chuan, hmêlmapain chutiang thil kan hmaa a rawn chhawpte chu kan hneh thei zêl ang. Isua’n a hmangaihna thu chu a lo ngâithla duh apiangte hnêna puang zêl tûrin min duh a. Thilthlâwnpêk min pêkte hi eng mah lova tân a ni lo va, Pathian lamram mite an nih ve theih nâna khawvêl hnêna hmuhtîr tûr kan ni. Khawi hmun leh rama mi nge i nih kha a pawimawh ber lo va, Isuaa chatuan nunna thutiam chu i pual a ni ve thei tho a ni. Vawiin Bible châng thlan thute hi târ lang ang che.