RAH RAWH U

Matthaia 3:10 – Tun apangin thing bul tinah hreipui an dah ta; chutichuan, thing tin rah thaa rah lo apiang an kit a, meiah an paih thin.

Bru thawnthu pakhat ka hriat dan chuan BC hun lai daih tawhah khân India ramah hian Bandu leh Dusera te unau an lo awm ve a, unau panga an ni. An lal dan chu an in hlan chhawng ve zel a, lal 360 an inhlan chhawnna chu a tawpna a ni ta a ni.

Burma lama lal pakhat Aluchindramang-a chuan Bru nula hmeltha tak mai Uchima-i chu rawn dilin an innei a. Uchima-i chuan a nuta pa pawh a hruai tel ve a ni awm e. Tichuan, tum khat chu Uchima-i chu lu haiin a awm reng a; tichuan, an bawlpu leh zawlneite chu an rawn a. Uchima-i ui ngainat em em mai chu mulukawlh hian ram hla takah a pu bo a, chu ui lu bung chu bung zarah a hnutchhiah a, ui lu ruh awmna bung chuan a than hnan ta a. Chu bung kung chu thliin a chhem chet apiangin Uchima-i lu chu a lo hai ve zel niin an sawi a ni. Tichuan, chu bung chu ram hla takah chuan an va zawng ta a, an va kit ta a ni. Uchima-i pawh chu a lo dam ta mai a ni awm e.

An lo haw kawngah chuan Aluchindramang-a chuanna lawng chu tuifinriatah a che sual a, a pil dawnah a lal zungbun chu Uchima-i unaupa chu pein, “I dam chhuah takin ka aiah i u kha lo lal rawh se,” tiin thu a hnutchhiah ta a ni. Tichuan, Uchima-i unaupa pawh chu dam chhuakin khaw mipuite chuan an lal Aluchindramang-a chu thah ni ngeiah ngaiin an lalnu chu lal ber atan an ruat ta a. Amaherawhchu, an lalnu chu an ram lal ber atana pawm thei leh pawm thei lo an awm a, buaina a lo chhuah phah ta a.

Uchima-i leh a hote chu an chak loh zawk avangin an ram atangin an um chhuak ta a. Mizoram tawp Betsuri phaiah rawn tlanchhe thlain, Tuichawng dung zawh thla zelin Tlabung lamah an chawl thla a, Tripura thleng thlain awm hmun an khuar nghet ta a ni. Lal ram ropui tak dinin Reng lal in ropui tak an din a. Agartala-ah pawh hmuh theihin a la awm a, a hmingah Nirmahal an ti a.

British hun lai khân Missionary hmasate chuan Reng lal chu an va bel hmasa a; mahse, an thuchah chu an lo duh lo nasa mai. An lal chuan, “Kan chhak lamah khian Mizoho an awm a, lu la hnam an ni a, anni khi han hrilh rawh u,” an lo ti a ni awm e. “Keini chuan sakhaw dang kan mamawh lo e,” tiin CHANCHIN |HA chu an lo hnar a ni.

India-in zalenna an hmuh hnu rei lo teah chuan an lal hnuhnung ber Bergigom-a a lal a, vanduaithlak takin a lal atanga rei vak loah a boral zui mai a. A aiah chuan a nupui Kanchandevi chuan lal ram chu kaihruai ve mah se a enkawl thei lo a. India hnuaiah chuan an intulut ve ta mai a ni awm e. Tichuan, East Pakistan leh West Pakistan buai avangin Tripura-ah chuan raltlan tam tak awmin a ram neitu hmasate chu chim ral an lo ni ta e, an ti. Tun hma chuan Tripura ram mipui 90% khu Bru an ni a, tunah chuan 30% chauh an tling tawh.

An Reng lal in ropui tak mai te chu tunah chuan luahtu awm tawh loin a ding vel ta mai mai a. An sawi dan chuan, heng zawng zawng hi Krista chanchin tha an lo hnawl avanga an tawrhna niin an sawi thin a; Mizote aia hnam fing hmasa ni mah se chanchin tha an lo hnar avangin an thiam an finna zawng zawng chu an hloh a, ram pawh nei loin an vakvai kual a ni. Tin, kan finna zawng zawngte kha Mizote hnenah hlan chhawn a ni ta e, an ti a ni awm e.

Aw le, he thawnthu atanga kan zir theih chu – Lal lsua lo hnawltu apiangte chu Lal lsua paw’n a hnawl zel thin a ni tih hi. Mi tam tak chu Lalpan talent tha tak tak a pek, Lalpa rawngbawlna atana hmang loa khawvel lama tlan ta, tla chhe ta em em pawh sawi tur an awm nual mai. Mi tam tak chu Lalpan min sawm a, min koh rengna pawh hre duh loin kan ngaihsak duh lo a. Keimahni duh zawng, tuina leh nuam kan tihna ringawt kan buaipui thin. Chutianga Lalpa kohna leh sawmna kan hnar fo chuan Thlarau thianghlim chu kan hnar a lo ni thin. Thlarau Thianghlim kan hnar fona leh rah kan chhuah lohna avang chuan eng tik niah em maw kih leh paih chhuah kan la ni ve dawn a ni.

Matthaia 21:43 – Pathian ram chu in hnen ata laksak a ni ang a, a rah chhuah tur hnam hnenah pek a ni ang.

A ziaktu: Evangelist Laljohnsona hi Mizo Conference hnuaiah field evangelist hna thawk a ni a. Tunah hian Kolasib Circle, Kawnpui khuaah an awm mek a ni.