• pinky Hauhnar

Asia rama cheng mi \henkhatten kan ei nasat tak chawhmeh tui em em mai chu Rawtuai (Mautuai) hi a ni. Tun tumah hian Rawtuai um dan chikhat (pickle) kan tih mai a siam dan kan sawi dawn a ni. Rawtuaiah hian ril tifaitu fiber a awm \ha hle a, hei mai bakah hian Vitamins B6 leh Vitamin E leh A te leh chi dang tam tak a awm a ni.

Mamawhte:

1. Rawtuai – Kg. 1
2. Tel – no 1 (pava 1- A theih chuan an\am tel ni thei se)
3. Aieng – Thirfian lian 1
4. Pickle Masala – Thirfian lian 1
5. Chi – No chanve
6. Purun var – 50 gms (pack 1)
7. Kurtai/Chini – Thirfian lian 3
8. Sawhthing – Fian bial tiat 1
9. Vinegar/Ser tui – Thirfian lian 4
10. Hmarcha sen dip/chilli powder – Thirfian lian 2

A siam dan:

1. Rawtuai chu sin te tein chan la, tui alah chhum so bawrh bawrh hnuah thlit hula, pho hul deuh hnuah tel no chanvein kan tur a ni.
2. Masala leh a behbawm zawng zawng hi rawt sawma, sawhthing leh purun te nen chawhpawlha rawt sawm vek tur a ni. Tel no chanve la bang khan masala leh a behbawmte kha i kang hmui anga, a tihnawng turin tui tlem i telh dawn nia. Tichuan, rawtuai kan tawh te chu telh la, kurtai/chini telh bawk rawh, uluk takin i chawk dawn nia.
3. Minute 2-3 vel i chhuan hnuin sertui emaw vinegar emaw telh la, bur fai thianghlim takah thun ang che. Darthlalang um i nei thei a nih chuan a \ha ber.
4. Nisaah ni 4 vel i pho hnuah chuan a lo in um ta a, pickle tui tak i nei ta.
   Ei tur hrisel chauh eiin, lo hlimin, lo hrisel la, Krista hmangaihnaah lo \hang lian deuh deuh ang che. Maranatha