MI PHUNCHIAR

Pastor Lalrintluanga Tlau

Thuf 19:13 Nupui ân \hinna chu eng lai pawha ruah far reng ang a ni. Thuf 21:19 Hmeichhe ân hmang leh phunchiar nena awm ai chuan Thlaler rama awm a \ha zâwk. Num 14:27-30 Heng mi suaksual pung khawmho ka chunga phunnawi \hin hi eng chen nge ka dawh ang? Israela thlahte phunnawina, ka chunga an phunnawinate chu ka hria e. An hnenah, “Ka nunna chhâlin ka sawi e, ka beng hriat ngeia in sawi ang takin in chungah ka ti ang, in ruangte chu he thlalerah hian a awm anga, in zinga mi chhiar tawh sa zawng zawng kum sawm hnih achin chung lam mi ka chunga phunnawiho zawng zawngte chu, bân phar meuhva, “Ka awmtir ang cheu: ka tih ramah chuan Jephunea fapa Kaleba leh Nuna fapa Josua chauh lo chu in lut tawp lo vang.

 Phunchiar hi mi rilru tê leh puitling lo nihna a ni phawt mai. Mi phunchiar bula awm chu a ninawmzia sawi fiah thiam a har hle a ni. Mi suala ngaih an ni a, an ninawm a, phûngsahmim ang maia rimchhia an ni.

Pu Khawngaiha chu \hiante zingah hlim takin a awm ve hlei thei lo va, mahse \hian a duh a, a lêng chhuak reng lawi si a. A \hiante chuan natna benvawn rûk eng emaw a neiah an ngai ru deuh va, an khawngaih ru hle \hin a, mahse a nun ram chauh chhan chu a chhungkaw hrehawmna a ni reng si a. An nu chu nu fel tak, rorêltu ber nih tum tlat reng a ni a, a taima a, a phunchiar hle bawk a, an pa \hu hahdam hi a hmu thei hlawl lo, a tîr reng mai bawk a. Phun theihna remchâng a hmuh ang angah chuan a phun char char a ni ber mai. Kohhran thawhlawm khawn nikhuaah pawh a lo phun peih êm avangin an ina kal tur pawh Deacon-ho chuan an inhnawn kual laih laih thin. Phun tama hausak theih chu ni sela, an hausa tawh ngawt ang. Hna thawh pah te hian a phun reng a, a pasal fanaute chêt pawr deuhna lai a hmu thei hle a, a ânpui bawrh bawrh zel bawk a. A fate lah chuan an ei rawngbawlte chu sawiselsak an hlauh avangin ei rawngbawl pumpelh tumin an lêng an inhaw tlai siak a. Chaw ei khamah lah thleng silfai loh lai hauh leh ân khum hlau vin thil dang tih laklawh tur an dap ru reng bawk a.

 Nu fel na nâ nâ chu kohhranah pawh rawngbawltu a ni ve a, a sermon thiam zâwng chu kohhran chaklohna te, tlâkbalna laite phawrh a, sawisela, pholan lam hi a ni \hin. Rual a pâwl thiam a, lamtang pawh a siam thiam khawp mai. A fate chuan an rawn tleirawl chuan an ning ve \hin khawp mai; Mahse, an lo nulat meuh chuan an ning tawh lo va, an chhûn tawh zâwk a. An tlangval pawh chhungkuaa a thu loh leh \angkai loh êm avangin sual rawng bawlin awm lo mahse kohhranah pawh rintlak tak chu a ni chuang lo. An chhungkaw nun dan chu pain sawisel ta sela chuan insiam \hat a hnehin an buai zual anga, nupa in\henna hian a thlen phah emaw a ni âwm si a; Chuvang chuan a puitling zâwk leh dâwn thui zawk chuan hrehawm teh mahse ngawih a chuh ta mai a ni. Pu Khawngaiha nun chu \henrual zingah te hian pheikhawk tâwt bun ang tlat hi a ni a, mi hriat loh hian a hrehawm tlawk tlâwk reng hi a ni ber mai.

Mi phunchiar hi chu an ninawm hle a niang, Pathian meuh pawhin a hlahthlem hlei thei bik lo a ni, Israel te pawhin thlalerah khan lawmna tur aiin phunna tur an hre thei zawk a, harsatna a thlen deuh apiangin an phun mur mur zêl a, hruaitu an sawisel a, ngeiawm tak takin an \awng \hin a, Lalpa chuan a dawh peih lova, puitling zawng zawng chu, Josua leh Kaleba tih loh chu Kanaan ram thleng zo lovin thlalerah a tlûk hlumtir ta vek a nih kha.

Mi phunchiarte hri hi kohhran pawhin a chauh phah fo \hin. Mi hna thawh sawisel tur hre thei deuhte hi belhchian chuan an lo fel bik chuang lêm lo, a fel lo zâwk an ni duh hle lehnghal a. Mahse, inthlahrung taka theih tâwp chhuahte a tichau va, an phurna a tibo \hin a ni. Phunchiarte hian siam \hatu emaw an inti fo va; mahse, an ni lo; tihnualtu leh tibeidawngtu an ni fo zâwk \hin. A siam tha zâwnga sawisêltu chuan thuhnuairawlh takin a sawi thin a, a ngaithlatu tan pawh hai rual a ni lo. A tichhe zâwnga sawisêltu ngaithlatu erawh chuan chungtlâk takin a sawi a, fakna a nei lova, chu chuan mi a tinâ a, a ti inthlahrung bawk a, mi chak lo phei chu a tichau der thei a ni.

 Mizote zingah chuan phun chiar hi upat lamah a tamin natna chi khat ang maiin a lo lang \hin a; nu hrawn nuam leh pa hrawn nuam takte pawh hi an lo upat chuan an rawn phungchiar thar leh duh khawp mai. Phunchiar 18 hi upat lam hri chi khat pawh chu lo ni teh rêng mah se, sual hna thawh upat lama lang thin tal chu a ni tho ang. Kan upat huna kan phunchiar loh nan ka chak \hat lai te, rilru fim laite hian Pathian \anpuina i dil \hin ang u. Daniela pawh khan a lo dil lâwk \hin a ni. Mipa phunchiar phei chu hmeichhe phunchiar aiin hrawn an hrehawm daih zâwk lehnghal a. Phunchiar rêng reng hian an phunchiar an inpawm mawh hle lehnghal a, thil \ha duh vanga sawisel \hinah an inngai hlauh \hin, mahse phunchiar chu hai rual an awm si lo. Piansualna kawng khat emaw mi an lohna deuh chi khat emaw a nih loh chuan sual ze chi khat chu a ni hrim hrim mai.

 Chuvangin, chhungkuaah a ni emaw, kohhranah a ni emaw, khawtlangah a ni emaw phunchiar lo turin mahni inveng \ha ang u. A dik apiangte, a thangmawi apiangte zawng tur leh thlang tur kan ni si a. Pathian leh mihringpuite tân mi hrawn nuam nih i tum tlat ang u