MINISTERIAL TRAINING A TIAK TA

January 7-11, 2026 chhunga Mizo Conference hnuaia rawngbawltute Pastor, Commissioned Pastor, DPCH Evangelist leh  Lay Preacher te tana buatsaih Ministerial Training chu January 11, 2026 hian a tiak ta.

He training-ah hian Dr. Chawngdinpuii Schaffer PhD (Biblical Theology) chu resource person atana hman a ni a. A ni ho hian Daniala bung 11 thu chipchiar taka zirho a ni. Dr. Chawngdinpuii hi khawvel puma Adventist kohhran hmunpui Maryland, USA-ah  Dialogue Magazine, Managing Editor hna thawk lai a ni a. Tin, Seventh-day Adventist kohhran chawlhni zirlai (Sabbath School Lesson) endiktu committee (manuscript reading committee) member ni mek a ni bawk.

A ni bakah hian Mizo Conference President, Executive Secretary, Treasurer leh Department Director ten kohhran inkaihruaina hrang hrang an zirtir bawk.

He traning kharna inkhawm January 11, 2026 zan khan neih a ni a. Hw inkhawmah hian Mizo Conference President Pastor Rodingliana, Ministerial Secretary ni bawk chuan Commissioned pastor te tirhchhuahna (commissioned) hun a hmang a. Commisioned Pastor 25 te he hunah hian Pathian hnena hlanin tirh chhuah an ni.

Commissioned Pastor te hian an bial chhung theuhah mitthi vui hna leh Lalpa zanriah kilna hun (Communion Service) an kaihruai thei ang.

He training kharnaah hian Pastor Rohlua Fanai Executive Secretary chuan Pathian thuchah tawi sawiin, rawngbawltute tibuai thei thil chi hrang hrangte lak atanga fimkhur turin a chah a. Pathian rawngbawlna hna thawktu zawng zawngte chu Pathian hnena inhlan lehzual turin a fuih a ni.

Tawngtaina Urhsun hmangin he training hi khar a ni ta a ni.