CARDIOPULMONARY RESUSCITATION (CPR) (Thawchham Leh Lungphu Chawl Thut Enkawl)

Hriselna Huang

– Dr. Vanlalsiama, MD (Aneast)

Khawvel hmun hrang hrangah ni tin hian chauh thut leh lungphu chawl thut hi a thleng \hin a, CPR hmang hian nunna tam tak chhanchhuah an ni thin a ni. CPR tih hmasak ber a an sawi fo thin chu zawlnei Elija’n hmeithai fa a tihdam kha a ni a. Elija kha hmeithai fa chungah khan vawithum a bawhkhup hnuah a lo dam leh ta a nih kha (I Lalte 17:21).

Hma sawn zelin vawiin thleng hian tihdan tha zawk dapin nikum 2010 thleng khan tihdan tur an la siam thar zel a, 2010 guideline-ah phei chuan a hma a tihdan hun rei tak lo pawm leh zawm tawh ABC (Airway, Breathing, Circulation) chu thlakin CAB (Chest compression, airway, breathing) an lo ti ta hial a ni. CPR hi doctor leh nurse, damdawi lama thawk zawng zawng leh police leh sipai te, leh tlawmngaia mi chhan chhuak thin te hian an hre tur a ni a, zau leh thiam zawka kan in zirtir hi a pawimawh hle a ni. CPR tihdan hi awlsam thei ang berin sawi tum ta i la:

|ANPUITU KOH: Mi nikhawhrelova a tlukin emaw, a thawk lohin emaw, a lungphu a chawl emaw a nih chuan a hmasa ber in \anpuitu koh tur a ni a, kan velah midang min \anpui tu kan ko vat anga, damdawi lam thiam koh vat a tha hle a ni. Chumi hnu ah chauh damlo chu kan buaipui ang. Hei hi a chhan chu mahni maiin hetianga damlo na te hi enkawl an theih lo a ni. Tin, min tanpuitu tura kan sawm te khan midang zel an ko thei ang a, keimahni khan damlo buaipui chauh kan ngaihtuah thei bawk dawn a ni.

AWMA NEM: Kan damlo bawihsawm chu kan mut zangthaltir ang a, a awm lai takah kan nem nghal zawt zawt tur a ni. Awma nem na tur lai hi hnute inkar ruhah a ni a, minute 1-ah vawi 100 tal a tam, inches 2 a thuk nem tur a ni (Puitling ah). Awma vawi 30 nem zel hnuah damlo hi thawk vawi 1 pek tur a ni ang. Awma nem hi a pawimawh em avangin chawlh loh tur a ni a, tihtur pawimawh dang tam tak awm mah se second 6 aia rei chawlh loh tur a ni.

THAWK KAWNG ENFIAH: Awmah vawi 30 nem hnuah hian damlo thawk kawngte enfiah tur a ni. Damlo thenkhat chuan mahni a thawk an tum a, mahse an hrawkah an lei emaw, thil dangin emaw a hnawh thin a, hetiang damlo te hi an khabe atangin an lu kawih dak tur a ni. Tin ka leh hrawkah hnawhtu a awm chuan lak chhuah ak te pawh a ngai thin bawk.

THAWK TIR: Âwmah vawi 30 nem zawh veleh hian damlo chu vawi 1 thawktir zel tur a ni ang. Damlo chu a thawk miau loh avangin thawk hi a chhanchhuaktute hian pek a ngai dawn a ni.

Thawk pek dan: Damlo lu kawih dak deuh tur a ni a, kut lehlamin a hnar hmeh pin a, kut lehlamin khabeah dawm a, kain thawk pek tur a ni. Rawmawl pan deuh chhanah thawkpek hi a him a, a tenawm loh phah bawk. Damlo kaa kan thawk loh hian a pawimawh ber chu damloin thawk a dawng ngei tih hriat nan damlo awm a insep kang ngei tur a ni ang.

CPR hi a pawimawh em em a, awlsam tea mi nunna chhan theihna a nih avangin thiam a tha hle. Hriat belh duh tan doctor-te hnenah zawh theih reng a ni e.

(He hriselna thuchah hi Mizoram Health Department Website
https://health.mizoram.gov.in a\anga lak a ni – Editor)