Commisioned Pastor Roneihkima Chawngte A Retired Ta:

Vawiin, September 29, 2025 hian Commisioned Pastor Roneihkima Chawngte chu active service atangin a lo chawl ta.

Commisioned Pastor Roneihkima hian kum 1988 atangin kohhranah rawngbawlna hna a lo thawk tan tawh a. Section Office, Pinehill Adventist Academy leh Helen Lowry School-ah te a thawh hnuin Spicer Memorial College ah theology a zir zawm leh a. MA (Religion) a zir zawh hnuin field rawngbawlna lamah a lut leh a. Kohhran pali, Chhingchhip, Thingthelh, Suangpuilawn leh Melthum kohhrante a enkawl leh a. Mission ah hian kum 29 zet a thawk hman a ni.

A pension thlahna inkhawm hi Mizo Conference Commitee Room-ah neih a ni a. Upa Lalnilawma Colney chuan inkhawm a kaihruai a. Pastor Rodingliana, Mizo Conference Executive Secretary chuan a service record leh a chanchin tawi sawi na hun a hmang a. Upa Lalbiakdika Ralte Mizo Conference Treasurer chuan kohhran atanga hamthatna awm thei angte hlanna hun a nei ve leh a. Tin, Field Worker Welfare Chairman Pastor Lalnghakliana Colney chuan welfare-te atangin ngaihhruihna thilpek a hlan a. Rawngbawltu nupui (shepherdess) pawl aiawhin Pi Lalsangpuii Renthlei chuan a thiannu Pi Lalrintluangi hnenah thilpek a hlan ve leh a. Tin, kohhran hnathawktu hrang hrangten thilpek an hlan bawk a ni.

Pastor Roneihkima Chawngte hi pa inngaitlawm leh tumruh a ni a. Kum upa lam a nih hnua lehkha zir tha leh a ni a. Tin, rawngbawlna lama mi tui leh midangte ngaichang thiam mi a ni a. Mizo Conference chuan ui tak chungin active service atangin a thlahliam ta a ni.