DONALD TRUMP A KAIHHRUAI AMERICA RAMLEH SUNDAY LAW
Pastor PL Thlenga
America ram hi Europe rama Roman Catholic tihduhdahna leh awpna hrehawm lutuk duh loh avanga tlan chhuakin an hmuh chhuah ram a ni a. Vaukamah an tawngtaina ah “Lalpa he ramah hian Pope awm lo kohhran min pe la, Lal(king) awm lo sawrkar min pe rawh” tiin an lo \awngtai a ni.
An dil ang chiahin, Roman Catholic hi an haw em em a, pem luh pawh an phal lo. Tin, Sakhuana leh politic-ah zalen takin duh duh an zawm thei a, mipui sawrkar Democracy ram an lo din a. Tunah chuan khawvel sawrkar chak ber leh ropui ber a lo ni chho ta a ni. He America ram hi, Bible-in a lo sawi sakawlh lei atanga lo chhuak, mi zawng zawng, sakawlh hliam dam leh (Roman Catholic) chibai buk tirtu tur a ni a (Thupuan 13:11-13). USA hi Roman Catholic nen an la \angkawp dawn a ni.
USA an hmuhchhuah tirha an duh loh em em Roman Catholic-ho chu zawi zawiin USA ah an lo lut a. Kum 1961 a lo nih meuh chuan, Roman Catholic mi leh sa, John F, Kennedy chu US president atana thlan tlin a lo ni ta a. Tunah ngat phei chuan, USA-ah hian Roman Catholic mi hi an tam em em tawh mai a ni. Donald Trump-a thlan tlin a nih hnuah phei hi chuan Roman Catholic mi leh sa, Donald Trump-a sawrkar hnuaiah nihna pawimawh tak tak nei an awm ta nual mai. US rorelna sang ber Supreme Court-ah hian kum 1981 kha chuan justice pakua awmin, pathum chu Episcopalians, pahnih chu Presbyterians leh Catholic pakhat, Lutheran pakhat, Methodist pakhat leh Protestant pakhat an ni a. An inpawlh mawi tawk viau mai a ni. Mahse, tunah chuan justice mi pakua zinga parukte chu Roman Catholic mi leh sate an ni ta a. Justice pakhat Niel Gorsuch hi Anglicanism leh Catholicism inpawlh a ni a. Roman Catholic âwn mi kan ti thei ang chu. Justice pakhat hi Elena Kagan a ni a, a ni hi Judaism a ni. A dang pakhat Ketanji Brown Jackson hi Protestantism a ni ve a. Mahse, eng kohhranah mah ka awm lo a ti a, duh duh zâwm thei tur a ni. A awmzia chu justice pasarih lai mai hi Roman Catholic mi leh sa an ni tihna a nih chu. An chief justice John Roberts ngei pawh Roman Catholic mi a ni. Pope thu awih vek turte an nih chu.
Donald Trump-a chu USA president 47 na atan lak luh a ni ta a. Tun tum America ram President Donald Trump’an a thawhpui tura a thlanho zingah hian Roman Catholic member 9 lai mai an awm a. “One of the most catholic administrations in American history” an ti hial a ni. Chungho chu lo en leh lawk ila:
- Vice President Elect : JD Vance
JD Vance-a hi a naupan laia baptisma chang loin Biak inah a inkhawm reng \hin a. A lo tleirawl chhoh chuan Dominican puithiam ho nen inkawmin, a hnuah chuan Roman Catholic-ah a inpe ta a. August 2019-ah Dominican puithiam Father Henry Stephen an baptisma a chantir ve ta a ni. St. Augustine hi a ngaisang em em mai a. “St. Augustine hian ka rinna nasa takin min ti nghetin min ti puitling a ni”, a ti. - Secretary of Transportation Nominee: Sean Duffy
Sean Duffy hi a naupan tet a\angin Catholic ruh tak a ni a. Minnesota-ah St. Mary University-ah a kal a, chutah chuan tuna a nupui Rachel Campos-i nen an inchhara, an in nei ta a. Ani hi MTV-ah te “The Real World” television serial-ahte a lo chang tawh a. Fa pakua an nei a. An fate chu mass te an eipui \hin a. Zan tin \awng\aina a neih pui \hin a, roman catholic ruh tak an ni. - Secretary of Health and Human Services: Roberts F. Kennedy Junior
He pa hi USA Ex -President John F. Kennedy a tupa a ni a. Ani hi roman catholic ruh tak mai a ni a. A rinna hi public-ah a puang fo mai. “Kan nun pumpui mai hi Roman Catholic rinna hian min tuam bet tlat a. Ni tin Rosary \awng\aina kan nei thin a. Chaw ei hma leh chaw ei hnuah kan \awng\ai ziah a, bible hi zan tin kan chhiâr thin a. Mi thianghlimte nun hi kan zir nasa \hin a, biak inah kan kal deuh renga, a châng chuan ni khatah vawi hnihte kan kal \hin” a ti. Kennedy hian Mithianghlimte zingah Francis of Assisi hi a ngaisang em em a. Kum 2004 khân, ‘Saint Francis of Assis: A Life of Joy’ tih lehkhabu a ziak nghe nghe. - Secretary of State: Marco Rubio
Rubio hi Roman Catholic chhungkuaa piang a, seilian a ni a. Kum sawm pahnih vel a nihin Last Vegas-ah The Church of Jesus Christ of the Latter – Day Saint-ah a inkhawm \hin a. Kum 1984-ah a vawi khat nan Lalpa zanriah a kîl a. Kum 2016 a president ni tura a in-candidate ve \um khan heti hian a rinna a sawi: “I was fully theologically, doctrinally allied with Roman Catholic.” (Roman Catholic theology leh doctrine nen hian ka pumin kan inzawm a ni) - United Nation Ambassador Nominee: Elise Stefanik
Elies pawh hian a rinna hi a sawi chhuak vak ngai lo a. Mahse, Roman Catholic ruh tak a ni. Congress-ho zinga naupang ber a ni a. A Catholic nihna hi a sawi chhuak vak ngai lo a, kan la hriat zel turah beisei ang. - Secretary of Education Nominee: Linda McMahon.
A tirah chuan Baptist ruh tak a ni \hin a. Mahse a upat hnuah Roman Catholic-ah a inlet ta a. Catholic rinna chuan a nun pumpui a thunun a, a hlutna te, a chhungkua hlutna te pawh a tizual niin a sawi. - Boarder Czar Nominee: Tom Homan
Roman Catholic ruh tak mai a ni. A sawi dân chuan, “unau pasarih kan ni a, Sunday ni apiangin mass ti turin biak inah kan kal ziah a ni” a ti. - CIA Director Nominee: John Radcliffe
John Radcliffe hi Catholic a nihna hi a zirnaah leh a nunah a lang thei. University of Notre Dame-ah lehkha a zir a. He zirna in hi Catholic zirna in pawimawh tak a ni. Mipui hmaah a puang chhuak ngai lem lo a, mahse, Catholic a nihna hi a zirnaah leh a hnathawhnaah a lang chiang hle \hin. - Press Secretary Nominee: Karoline Leavitt
Karoline hi White House Press Secretary awm tawh zawng zawngah, naupang ber a ni dawn a. Tun hnaia interview a neihnaah Catholic rinnain a nun a hnehzia heti hian a sawi:
“Ka nu leh pate hian Catholic High School a min dah tur hian nasa takin tan an la a, Central Catholic High school chu hmun nuam tak a ni. Ka nun a siam \haa, Pathian nena inhnaih turin min kaihruai nasa a. Public service pawimawhziate min zirtîr a, veng chhungah mahni community tana thawh thatziate pawh min zirtir a ni” a ti. Engtin nge buaina leh harsatna i hmachhawn ang? tia an zawhna chu, “ka rinnain min \anpui ang. Zing tin rosary tiin \awngtaina ka chham thin a. Pathian hnenah ka mamawh chakna min pe turin ka dil \hin a ti.
Hetiang hian President Donald Trump-a sawrkar thara a thawhpui turho hi, Roman Catholic ruh pui pui mai an ni. Hetiang hian, America sawrkar-ah Roman Catholic-ho hian engtik lai mahin hûhâng an la nei ngai lo an ti hial a ni.
PROJECT 2025
Democrat hoin an hlauh em em mai chu, Project 2025 hi a ni a. Project 2025 ang hian ram an kal pui mai ang tih hi an hlau a ni. He Project 2025 rawn duangtute hi Heritage Foundation an inti a. Washington DC-ah headquarters neiin, Kristian conservative intêl khâwm an ni a. Chungho chuan, “America ram hi kan kal sual nasa tawh a, Bible-ah kan lêt leh tur a ni. Kan ram sawrkarna lo duangtute kha Pathian ring mi, Pathian leh Bible a innghat tlat mite an ni a. Kan ram constitution pawh Bible behchhanin an lo duang a. Pathian dan sawmte pawh an lo ngaihlu em em a ni. Tunah chuan kan kalsual zo ta. Kristianna-ah kan let leh a ngai a, Pathianah kan kîr leh a ngâi a ni” an ti a ni.
Chungho chuan “Mandate for Leadership: The Conservative Promise” an tih lehkhabu phek 920 lai mai hi an siam a. Chutah chuan kum 2025-a Republican sorkar tharin a tih tur an duang a, chu chu Project 2025 an ti a ni.
He Project 2025 hi Presidential campaign a neih lâi khân Donald Trump hian Project 2025 a an duan angin ram hi kaihhruai a tum tiin an bei nasa a nih kha. Trump-a chuan “Project 2025 nen hian engmah inkungkaihna kan nei lo. Eng nge a nih ka hre lova, tute nge an nih tih pawh ka hre lo. Chhiar pawh ka la chhiar lova, chhiar pawh ka tum lo” a ti. Mahse, an lo inhrechiang em em mai a.
He project 2025 duangtu Heritage Foundation president Cavin Roberts nen Donald Trump a lo in hmu daih tawh a. Chuta an inhmuhnaah chuan President thar tur Donald Trump-a chuan “Project 2025 hi a vai vai chuan kan ti thei lo a nih pawhin, eng emaw zât chu kan tipuitling ang” tia a tiam thu Cavin Roberta a hnenah a sawi a ni.
PROJECT 2025 LEH TRUMP ADMINSTRATION
Trump-a hian Project 2025 hi engmah ka hre ve lo. Tute nge an nih pawh ka hre lova, eng nge an tih tum pawh ka hre lo tiin presidential campaign aneih lai khan a sawi a. Mahse, a lo hre chiang khawp mai. An han inthlang a a tling ta chiah a. December 13, 2024 ah chuan, “Project 2025 hi a lo fîr \hain a lo \ha khawp mai (Very Conservative and very good) a ti zui nghal a. Tunah hian thawhpui tura a thlan ho zingah Project 2025 a a kûl a tâia \ang mi pasarih lai chu a telh ta chiah mai a. Tute nge an nih tih pawh ka hre lo a tih chu, Trump hian a lo hre chiang kher mai an tih phah ta a ni. Chung Project 2025-a a bul tumtute, tuna Trumpa’n thawhpui tur a tana a ruatte chu lo en lawk ila:
- Russell Vought
Russell Vought-a hi “Mandate for Leadership 2025: The Conservative Promise” tih lehkhabu ziaktute zinga mi lar tak a ni a. Chapter 2-na hi ama ziah a ni. Chutah chuan, Executive Office of the President of the United States of America tih a ziak a ni. Tunah hian Trump chuan Russell Vought a hi Director of Management and Budget-ah a ruat a ni. - Stephen Miller
Stephen Miller hi Project 2025 Advisory Board member a ni. “Mandate for Leadership 2025: The Conservative Promise” tih Chapter 4-naah, Department of Defence tih hi a ma ziah a ni a. Tunah hian Trump-a chuan, the Deputy Chief of Staff and Homeland Security Advisor a tan a ruat a ni. - Brendan Carr
Brendan Carr hian “Mandate for Leadership 2025: The Conservative Promise” ah chapter 28-na Federal Communication Commission (FCC) tih ziaktu a ni. A awmzia chu “US president tur chuan Tiktok-te leh social media \henkhat ho hi a ti tawp tur a ni” titu kha a ni a. Tunah hian ani pawh hi Trump-a hian Chairman of Federal Communications Commission atan a ruat a ni. - Tom Homan
Tom Homan hi Project 2025 support tu a ni a. “Mandate for Leadership 2025: The Conservative Promise” lehkhabu lo chhuah theihna tura theihtawp lo chhuah puitu a ni a. Trump-a chuan Nation’s Border (the Boarder Czar) atan a ruat hmiah bawk. - John Radcliffe
John Radcliffe hi Project 2025 a lo puitlin theihna tura theihtawp chhuaha thurawn lo petu a ni a. Tunah hian, Trump-a chuan CIA (Central Intelligence Agency) director atan a ruat bawk. - Pete Hoekstra
Pete Hoekstra pawh hi Project 2025 contributor pakhat a ni a. Tunah hian, Trump-a chuan US Ambassador to Canada-ah a ruat bawk. - Caroline Leavitt
Caroline Leavitt pawh hi Presidential Campaign hma zawng kha chuan Project 2025 ah hian a thawk ve a. Mahse, Democrat hoin Project 2025 kha an sawisel nasat tâk em avang khan a chhuak ta ni awm a ni. Chu chu Trump-a chuan Press Secretary tan a ruat a ni.
Hetianga Project 2025 a \hahnemngai taka contributor lo ni tawhteho hi an han thawk ho dawn a ni a. Theihtawp chhuahin an project chu tihhlawhtlin an tum ngei ang tih a rinawm. Tunah hian, House-ah leh Senate-ah Trump-a pawlte’n ro an rel mek a. Supreme Court-ah pawh Trump-a pawl an tam zawk bakah, Roman Catholic an tam zawk daih bawk a. Tin, America rorelnaah ni danga awm ngai miah lo, Trump-a Cabinet-ah Roman Catholic mi leh sa pakua(9) lai an awm bawk si a ni.
Project 2025 leh Sunday law
Project 2025 ah hian Adventist-te’n kan hriat tur thil pawimawh deuh pakhat a awm a. Chu chu he lehkhabu phek 589-naah chawlhni chawisanna thu a awm a ni. Chu chawlhni chu sabbath tiin ziak mah se, an sawi tum chu Sunday hi a ni. Sunday chawisanna a inziak a ni. Sunday nia hna thawh khap an duh a ni. Sunday nia hna thawkte chu ni danga an hlawh aia tam (ni khat leh a chanve hlawh) pek tur an ti a. Chutia Sunday ni a hnathawkte chu ni tina an hlawh \hin aia tam pek tur a nih dawn chuan, company hoin an chhawr thei dawn lova. Chuvang chuan Sunday niah chuan company ten tuman hnathawk an ruai duh dawn lo a, Sunday ni chu an chawl vek mai dawn a ni an ti a ni. Hetiang hian Sunday ni tih thianghlimna hi nasa takin kalpui an tum a. Chuchu keini ho hriatthiam dan chuan Sunday Law lo chhuahna tur bul a ni thei mai thei a ni.
Trump-a hi a tling mai mai a ni lova, hneh takin a tling a ni. House of representative-ah leh Senate-ahte supreme court-ahte pawh Trump-a lam \ang an chak zawk vek bawk si a. Tin, Kristianna lak luh leh tum rânna Project 2025 lo buaipuitu mi eng emaw zât chu Trumpa’n a thawhpuiah a ruat \euh bawk si. Trump-a hian Sunday Law rawn propose thut mai sela, “Awle” ti vek mai tur hlîr an nih hmel. Trump-a hun chhung tluka Sunday Law lo chhuah remchan lai hun hi a la awm kher awm lo e. Engtin tak ro rawn rel chho zel ang maw, i lo thlir zel phawt teh ang.
A ziaktu: Pastor PL Thlenga PhD hi Mizo Conference hnnuaiah department director hna a thawh hnuin, AIIAS Phillipines ah theology subject-ah PhD a zo leh a. Tunah hian USA-ah pastor hna a thawk mek a ni.