Editorial

Mizo Conference chuan chak taka rawngbawlna a kal theih nan Project 30,000 chu a duang chhuak ta a. He project hi General Conference-in rawngbawlna pui “One Voice – 2027” hnuaia Mizo Conference-te’n rawng kan bawl vena tur a ni dawn a ni.

He Project 30,000 hi thuang thumin a kal a – Harhna (revival), Hruaikir lehna (retention) leh mimirte rawngbawlna (TMI) te a ni a. Chumi bawhzui chuan kohhrante kan che chhuak chho tan ta hi a lawmawm em em a ni.

Tum danga rawngbawlna movement kan neih thinte nena a danglamna chu mimir (laymen) ten Circle Board kaihhruaina hnuaia rawngbawla an kal pui tur hi a ni a. He mi atan hian Mizo Conference chuan a senso za zela sawmsarih sen a inhuam nghe nghe a ni.

Rawngbawlnaah hian a rah chhuah a pawimawh em em rualin memberte rawngbawla kan che chhuak hrim hrim hi a pawimawh lehzual em aw tih theih a ni a. Kan goal kan siamte kan tlin ta lo a nih pawhin mimirte leh rawngbawltute kut insuiha rawng kan bawl ho hi a hlu hrim hrim tawh a ni. Hnungtawlh tawh leh hawikir tawhte hruai kirna program leh inchawm seilenna program a tel hi he project tihlutu hi a ni bawkin a lang a. Pawn lama rawngbawl chhuah kan uar viau lai hian bel mawng pawpa tui thun ang chauh kan ni thei a. Chuvang chuan a pawp hnawh phui hi a pawimawh em em a ni.

Engpawh ni sela member tinte hian “he project-ah hian chanvo ka neih ve a tul a ni” tih rilru kan put a pawimawh hle dawn a. Mi dangte tih tura dah mai lovin keimah ngei a taka ka chet chhuahna hi Lalpa’n a phut a ni tih hriain theih tawp chhuahin Lalpa ram zau nan kan theihna leh thiamna zawn theuhah i thawk chhuak ang u.