Editorial – August, 2024

Lalmuansanga Khiangte

Summer Olympic – 2024 chu a lo zo leh ta a. He sawi hlawh infiamna kut pui-ah hian Kristiante hnena ngaihdam dil ngai khawpin a hawnna boruak a awm a. Mahse, heng boruak \ha lo tak tak karah hian thu lawmawm tak tak hriat turte pawh a awm bawk a.

Brazilian gymnast Rebeca Andrade chuan a vawihnihna atan Gold Medal a dawng a. Olympic medal hrim hrim hi vawi ruk a dawng tawh a ni. A lawmman dawn hnu lawk hian CazeTv ten an kawm a. “Pathian hnenah lawmman min dawn tir turin ka dil ngai lo a. Lawmman dawng thei tura inel thei tura hun \ha min siam sak avangin lawmthu ka hrilh zawk a. Thlan tui nen rim takin ka thawk a, \ah chângte pawh ka nei hial a ni.” tiin a chhâng a ni.

Van lam pana kan zin kawngah Kristiante hian rilru dik leh paukhauh kan neih reng hi a \ul em em a. Olympic medal la turte mahin nasa taka an bei a nih chuan keini pawhin nasa lehzuala kan beih a \ul ang. Tin, Rebeca Andrade-i chhânna ang khi kan mamawh tak chu a ni bawk. Pathian hnenah hian kawng awlsam leh a lawmmante ringawt hi kan lo dil \hin ang tih hi a hlauhawm hle a. Harsatna kan tawh changte a min lak kian sak tura dil ngawt ai chuan, harsatna tawk thei leh a rawngbawl theia min siam avanga lawmthu sawi nun kha kan neih atana \ha chu a ni awm e.

Kristian dâwm ngai leh hriatthiam reng ngai nih bik hi a \ha lo a. Sawisel dâwl, fiah dâwl kan nihte pawh hi a \ul awm e. Kristian dimdawi reng ngai nih chu rinna lamah kan \hanglian lo hle tihna a ni thei ang. Kan thlarau nun leh kan thlen chin hi Pathian hnena kan thlen, kan dilna hian thui tak a lantir theiin a rinawm. Chuvang chuan eng nge kan beisei a. Van lam kan hawi hian eng nge kan dil tih hi i chhût ngun \hin ang u.

BACK