Editorial – October 2025

Ringtute hi he khawvela kan cham chhung hian ni tina hma lam pana khualzin kal mek ang kan ni a. Kan zinkawng kan zawh lai hian, mahni chak lohna te, famkim lohna te hi hmasawnna kawng min daltu atan kan hmang tur a ni lo. Ni tinin Krista anna kawngah puitlin lam pan zel tur kan ni.

Kan kova tihtur awm hi inpumpekna nena kan thawh hian Pathian kan chawimawi tihna a ni. Siamtu Pathian hian mihringte chak lohna a hria a, famkim lo kan nihzia pawh a hre chiang a. Tihsual leh tluk chang nei chunga rilru chhungril tak a\anga ama hman tura kan inpek a. Theih tawp kan chhuah vena hi rimtuiah min pawmsak a ni tih hi kan hre reng tur a ni.

Kan \awngtainaah a ni emaw, chanhaite \anpuiina kan pen chhuahnaah a ni emaw, kan eizawnna hna kan thawhnaah a ni emaw, kan thiltihna kawng engkimah hian eng rilru puin nge kan tih, tih hi a pawimawh a. A rah seng tur chu eng pawh ni se, chi \ha ber chu tuh tura koh kan ni. Kan hmaa hna thawh tur awmte hi pawlawh taka thawk mai mai tur kan ni lo.

Kohhran tan, chhungkaw tan leh, \henawm khawvengte tana rin tlak ni la. Chauh phah viau dawn anga i lan chang awm mah se, i theih tawp chhuah tlat la, tlem viau angin lang mah se, mi \anpui nan i sum leh pai chu pe zel la, miin hre dawn lo angin lang mah se, lungngaite hnemna thu leh mi fuihna thu chu sawi zel ang che.

Rinna zinkawng hi simna leh tih thar lehna nena zawh tur a ni a. Kan tum anga kan hlawhtlin loh pawhin beidawng mai lova bul \an \hat leh zel tur a ni.

Kan theihtawp kan chhuah tur a ni tih hi, \ha famkimin kan awm tur a ni tihna a ni lo va, inngaihtlawmna rilru nen kan theih tawp chhuahin Lalpa rawng i bawl ang u, kan tihna a ni e.