KAN FATE HI KHAWI KAWNGAH NGE KAN HRUAI? ~Thanzuali

Hman ni lawkah ka fanuin an naupan laia ka saktir thin hla kha a rawn sa chhuak leh a, ka rilru a tithar hle mai. Ka rilruah nu leh pa, naupang enkawltute pawimawhzia a lo lang chhuak uai uai a, han sawi chhuah ve min tichak a ni.

Min hmangaihtu nu leh pa, In chetzia ka thlir reng fo;
Ka entawn ka hmuh apiang, In duhzawng ka duh zel a;
Inkalna kawng tinrengah Hlim takin ka lo kal ve,
Kawng dikah min hruai ru”

Min hrilh ru chanchin mawi,
Ni tinin Lal Isua,
Ka nghilh lo’ng ka dam chhungin,
Van kawngah ka kal zel ang

Kan Pathian Lehkhabuah pawh Thufingte 22:6-ah, “Naupang chu a kalna awm kawngah chuan zirtir ula, a upat hun pawhin a thlah lo vang” a ti a. Bible thawnthuah pawh hruaitu ropui Mosia nu Jokebedi te, Zawlnei Samuela nu Hani te chanchin kan chhiar ṭhin. Khatiang mi ropui chhuah thei tur khan an fate an naupan tet aṭangin Pathian hnena hlan chungin, fimkhur takin an enkawl ngei ang tih a chiang a ni.

Mosia kha a nu hnenah kum 12 chhung chauh a awm tih kan hria a, chumi hnuah Aigupta lal inah, milem biakna hmunah lal ni tura an hun laia zirtirna changkang ber berte zirtirna hnuaiah a seilian a. Kum 40 a nih khan a mite Aigupta mite laka chhanchhuah tumin hma a la tan tih Bible-ah kan chhiar a. Hebrai 11:24-27 kan en chuan Mosia rinna thu kan hmu. “….rei lo te atana sual nawmna hlimpui ai chuan Pathian mite nena tihduhdah tuar a thlang ta zawk a. Krista an hmuhsitna chu Aigupta ram rote ai chuan sum ropui zawkah a ruat a, lawmman pek tur chu a thlir thin avangin…… hmuh theih lova chu a hmuh avangin a tuar tan tan a ni.”

Samuela kha a hnute hnek banah Siloh-ah Puithiam Elia hnenah hruai a ni a, kum eng zat nge a nih chiah hriat ni lo mah se a la naupang viau ang tih a hriat. Israel mipui nungchang kha lal awm lo, mi tin mahni ṭha tih zawng zawnga ti mai an ni (Roreltute 21:25). Puithiam Elia fate lah kha an sual em em a, mipuite inthawina sa atanga mahni duh duh la lui mai thin, rawngbawltu hmeichhiate lo mutpui mai thin, Lalpa hre lo Beliala fate an ni lehnghal. Chuti chungin Hani chuan Lalpa a ring tlat a, a fapa neih chhun kha Lalpa inah a seilentir phal a ni.

Tun laia kan chanchin thar ngaihthlakte hi a va ngaihnawm lo em! Naupang te te, jail ṭang tham lo te te thil sual tih rapthlak tak tak chanchin kan hriat te hian eng nge min hriattir? Tlangval leh patling, upa lam chenin thil sual rapthlak tak tak an tih thu kan hre ta zel mai. Kan fate hi Krista hnen lo hruai thleng ṭheuh ila chuan hetiang thil hi a thleng lo tur! An tet lai aṭangin mobile phone, media hmangin kan awm tlei a. Eng nge an en ṭhin tih pawh kan hriatpui leh mang si lo. Mipa naupangte lawmzawng chu tharum thawhna te, inbeihna te a ni tlangpui. Krista hriatna kawnga min hruai reng reng lo thil tea awmtlei naupangte hian engtin nge nun dan ṭha an nunpui theih ang?

Nu leh pa ṭhenkhat phei chuan kan fate hriatah kohhran hruaitute tlin lohna leh rawngbawltute famkim lohna laite sawi nuam kan ti ṭhin. Engtin nge kohhran hruaitute leh rawngbawltute an ngaihsan theih tak ang? Sual kawng an han zawh a, kan han zilh ve a. Zawngrengtea serthlum veng ang chauh kan ni ṭhin; kan nunah Isua an hmu bik si lo. Kan mangang a, camping-ah, Home-ah kan ti, an rilru a lo khauh tawh, beisei angin a sawt thei lo. ”Ka entawn ka hmuh apiang, in duh zawng ka duh zel a; in kalna kawng tinrengah hlim takin ka lo kal ve’ an ti asin. Kan faten zawh se kan duh loh tur kawngah kan lo hruai reng a ni lo maw? Naupan laia kan enkawl dan ṭhat tawk loh hi a chhan pawimawh tak niin ka ngai.

Min hruai dâwn em van ram nuam, Chhandamtu lennaah chuan; Chu hmun thlen chu ka chak hle, Min hrilh ru ka lo ngaithla; Min tlantu Kalvaria Kraws chunga thi a ngei kha, Chatuana nung reng chu. Chhandamtu hmuh ve ka duh, Entirin min kawhhmuh ru; Chhung kimten chatuan ram mawi, Kan zain leng thei ila; Kim lova Lalpa tawh zawng Nuamin kei ka ring si lo, Ka nu leh pate u.

Josefa kha a uten an hralh a, Aigupta rama bawiha hralh a ni a. A tirah chuan Potiphara inah khan harsatna tam tak a tuar ve ngei ang. Chuti chungin engtin nge a tuar chhuah a, a puin engkim a chunga a nghah ngam khawpa a ṭhatzia a lo lan theih? A naupan laia a pa hnena a awm laia Pathian a lo hriat tawh vang a ni tih a chiang a ni. Gen 39:5 “Tin, heti hi a ni a, inah chuan hotuah a siam a, a neih zawng zawng chunga hotua a siam achinah chuan, Josefa avangin Lalpa chuan Aigupta mi chhungte chu mal a sawm ta a..” A nun khan a pu nun hnehin a in chhung leh a neih zawng zawng chunga hotuah a siam a, chumi achinah chuan Lalpan Potiphara chhungte pawh mal a sawm a ni.

Lalpa chu Abrahama Pathian, Isaka Pathian, Jakoba Pathian angin a inpuang ṭhin. Abrahama khan a fapa Isaka kha Pathian rinna kawngah a hruai a, Moria tlanga halral mai tura maicham chunga a pa a inphuartir te kha a va ngaihnawm em! Isaka ngei pawhin a pa Pathian chu a Pathianah a nei a ni. Jakoba pawhin Pathian kawng zawhin a thu a awih a, Jabbok lui kamah buanin hming thar a hlawh chhuak a, Israela a lo ni ta. A pa leh pute Pathian chu Jakoba Pathian pawh a ni ve. Nu leh pate hian kan Pathian hi kan fate Pathian ni ve tura kan kaihhruai a va pawimawh em! Fa nih mai avanga an sakhaw tawmpuitu ni lo va, kan Pathian a nih ve theih nan fate pawhin mahni ngeia Lalpa kan buan hi a pawimawh. Chutiang tur chuan kan faten kan nunah Lalpa hi kan Pathian a ni tih hmu a, an Pathian ni ve tura amah an thlan theih nan thahnemngai taka kan ṭawngtaisak fo a pawimawh a ni. An lu chunga kut nghata kan ṭawngtaisak hian Thlarau Thianghlim zarah thiltihtheihna mak tak a lo thleng ṭhin.

Nu leh paten Pathian tihin kan fate Pathian duhzawng kawngah hruai ila, kan fate nun atangin miten Pathian malsawmna dawng ve sela a va ropui dawn em! Chutiang ni thei turin kan faten nu leh pa min beisei a, Chhandamtu chu entirin kan kawhhmuh thin em le? Kalvaria kraws chunga thia kha thlarauva kan hmuh loh chuan kan fate kan kawhhmuh ve thei lo, kan neih loh chu kan pe thei si lo va. Pastor KC Laltanpuia te unau ka hmuh hian ka hriat chhuah ziah chu an nu Pi Biaksangi kha a ni. Ani kha ṭawngtai mi a ni a, thahnemngai taka ṭawngtaiin a ṭhingthi ṭhin. A nu ṭawngtai laiin nau te kha a lo ṭhingthi ve ṭhap mai. A fate nun en hian Pi Biaksangi entawntlakzia leh a hlawhtlinzia ka hmu ṭhin.

Pathian hmaa kan din hunah Lalpan zawhna pawimawh tak min la zawt dâwn a, “Beram rual ka pek che kha khawiah nge?“ tih chu. (Jeremia 13:20) Lalpan enkawl tur fanau min pekte hi ama hnena kan hruai theih hun chu tun hi a ni. “Chatuan hmun i thlenpui theihna tur, i chak lai hian thawk la, Lalpa chakna ringin”. “I fate zawng zawng chu Lalpa zirtirin an awm ang a, i fate thlamuanna chu nasa tak a ni ang’ (Isaia 54:13). Nu leh pate hian Lalpa hi kan nuna Lalberah nei vek ila, aman min tiam angin Lalpan kan fate pawh min hnehsak thei a ni tih i ring tlat ang u. Tichuan, ‘Chhungkim tein chatuan ram mawi kan la leng’ ve ang. Lalpan kan thuchahte mal min sawmsak rawh se.

A Ziaktu: Pi Thanzuali hi Bilkhawthlir kohhranah hian Family
Ministries Leader a ni a, deaconess a ni bawk. Kolasib Bial Danial
Pawl Chhantu Advisor a ni a. Kohhran tana mi \angkai leh an
kohhran ngulpuite zinga mi a ni.