KHAWI NGE I LO CHHUAHNA?

– Pastor R. Lalchhanhima

“Isua hi Pathian Fapa a ni tih ringtu chauh lo chuan tuin nge khawvel ngam \hin le?” 1 Johana 5:5

Kawvel a kan awm chhung hian harsatna te, manganna te, buaina ten min chimbuai \hin. Chutih hunah chuan tu nge kan pan \hin a? Tu nge kan rilru hah inhnemna atan kan hman \hin? Mihringah hian huai tak tak leh hlauh nei lo kan tih \hin te pawh an awm \euh mai. Mahse, chung mi huaisen kan tih leh Bible-in huaisen a sawi te pawh hi a inang lo deuh awm e, a enga pawhchu ni se a tawpkhawkah tu nge kan pan thin?

Nang leh kei hian kan mamawh ber mai chu Isua Krista a ni. Eng tikah nge a lo kal leh dawn kan hre lo, a lo kal leh dawn tih chu chiang takin kan hnaih zel a ni. Matthaia 4:16 leh Matthaia 24:27,31-a kan hmuh dan chuan a lo kal leh hunah chuan mi zawng zawngin a ri an hria ang a. Mi zawng zawngin an hmun bawk dawn a ni. Amah avanga hrehawm lo tuara, rinawm taka lo awmte chuan chu Pathian chenna hmun Vanram chu luah lumin, \ahna te a awm tawh lo vang a, in\hen a awm tawh hek lo vang. He khawvel hi zawng thihnaten thla an zarna hmun a ni miau si a. “Aw thihna khaw nge i tur chu, aw thlan khawiah nge i hnehna chu?” Thihna ngei pawh a thih ve hun chu thlen hlan a nghahhlelhawm ngei e. Chu mi hmun chang ve tur chuan engtia nasaa kan beih nge ngai ang le? Zam lovin Pathian rinchhan chung zelin hmalam i pan zel ang u.

Kan inrin loh lai leh kan chauh chang ni te a lo awmin, sual thlipuiin min nuai vel a, min rawn nam sawk sawkin min theh kual vel \hin. Chutih hunah chuan kan beiseina a lo chuai a, kan beidawngin kan chuanna lawng chu sual tuipuiah a lo pil mai dawn \hin. Tuipui chu hrangin, tuipui thuk tak chungah min nuai vel \hin mah se damna leh himna atan chuan a \awngkam khat pawh a lo tawk reng si. Amah hlat leh bansan thei kan lo ni reng reng lo, lawma chhandamna kulhpui a ni tih ring chunga ban phar tur kan lo ni zawk a ni. Tu mah hian kan hma hun tur kan hre lo, a pawimawh ber chu Pathian nen inzawmna \ha kan nei em, keimahah hian a awm awm em? Mihring rilru hi a huangtau hma em em a, chuvang chuan setana chuan thil zawng zawng hi a duh anga awm turin a bei \hin, chung thlemna doa thil \ha titu apiang hnenah chuan ropuina te, chawimawina te thlamuanna te nei turin Pathianin a ruahman \hin.

Kristian nun hi indona a ni Ephesi 6:12-a kan hmuh ang khan, “Kan buante hi tisa leh thisen an ni si lo, lalna te, thuneihna te leh, he thim chunga khawvwl roreltute leh van hmunahte thlarau sualho awmte an ni zawk e,” tiin a inziak a ni. He dikna leh sualna indona karah hian Pathian puihna nen chauh kan hlawhtling thei dawn a ni. Sual leh \ha indona hi leia Isua awm lai ai khan a la nep chuang hauh lova, vanram kawng lah tunhma aiin a rualrem zawk chuang hek lo. Sual lo \hang zel tur danna \ha ber chu a tona tur lei \ha a thil dang lo chin khah hmasak hi a ni.

Ringtu nun chu a \hang a nih chuan thlemna leh harsatnaten a bawh \hin. Chutih hun pawh a bei fat fat a, Isua chauh entu chuan Isuaah thlamuanna an nei a, an atna te pawh a finna nen, an theih lohnate pawh a theihna nen a lo infin khawm \hin a ni. Petera’n Isua a en chhung zawng tui chungah a kal a, nimahsela a en loh veleh a pil dawn ang khan, amah kan en chhung chuan kan kal dik a. Khawvel thil kan belh a, mahni nawmsakna kan zawn veleh kan pil leh dawn mai \hin a lo ni. Khawpui ri fa Johana meuh pawh Pathian nungchang amaha tihlan a lo nih zet chuan Hmangaih Johana tih a lo ni zawk ta ang khan nun danglam chu keini pawh hian kan nei thei a ni. He leiah chawlhna zawng \hin mah ila; Isua hnenah chauh lo chuan lawmna, hlimna dang reng a awm lo.

A ziaktu: Pastor R. Lalchhanhima Ralte hi tunah hian Saitual biala Ngopa Kohhran enkawlin a awm mek a ni.