KOHHRAN LEH POLITICS

Lalhmingsanga

Kan tet lai chuan (han ti ve ngial ila) mi tu pawh Politics ah a inhman tawh chuan kohhrana mawhphurhna pawimawh leh rawngbawlna pawimawh chu khawih ve lo tur leh inkhawm mawl ve tawp turin ka lo beisei \hin. Chu ngaihdan chu tu min pek nge ka hre lo, mahse chu ngaihdan chu ka \hanlenpui tlat.

Mahse, zirna avangin mahni khua chauh lo deuh kan dai ve zel a, kan tet lai ngaihdan ang kha chu a lo ni vek lo deuh tih kan hre chho a, rawngbawlna pawimawh leh nihna pawimawh chelh em lo mah se, pulpit rawngbawlna thlenga khawih – politics a inhmang tho si an awm ve ta nawk mai (A dik e dik lo e – tih pawh sawi huai ngam a ni ta law).

Ka hriat sual loh chuan kum 2018 chho a\ang khan politics leh kan social media platform hi a inthlunzawm nghet chho khawp mai a, kum 2023 kan chuankai meuh chuan social media chu politics game khelhna hmun (platform) pawimawh berte zing ami a lo ni ta tih hai rual a ni ta lo.

Vawiinah phei chuan politics hi mi dangte tan emaw kan tih laiin kan tan, kan kohhran tan pawh a lo ni ve ta reng mai a. Politician lawk ber ber-te zingah pawh kan mi leh sa an awm ve ta nawk mai. A \hente phei chu kan mi hriat chian an lo ni a (Kan kohhran chu kan tlem hrim hrim a, kan inhre \him \hem hrim hrim a), kan tet deuh laia politics kan en sir ang ai tak chuan kan thinlung hian a pawm chho ang reng khawpin ka hria.

Kan hmelhriat pakhat hian heti hian a sawi fiamthu a – Politics-te chu, kan chhawr phak loh avangin kan sawisel mai mai alawm, kan chhawr phak chinah chuan kohhran pawh hian a pawm lutuk – tiin.

Ni e, kohhran hian politics hi a hnawl a ni lo a, a pawm pawh a ni ngawt lo a, kohhran leh politics inthlunzawm dan tur thurawn \ha tak tak kan nei zawk a ni.

Tun \umah hian chung thurawn zawng zawng chu rawn thur chhuah ka tum lem lo a, ka tar lan tum ber zawk chu – kohhranah hian inzirtirna nasa zawk kan inpek a hun mek a ni – tih hi a ni.

Kan kohhran lawina \heuh han ngaihtuah ila, kei chu ka la vannei deuh nge ni? Kan lawina kohhran pulpit a\ang hian politics lam rawngkai han khak tel hi a la awm meuh lo. A sawi ri chhun te pawhin tu politician-te thusawi nuihzatthlak leh dik leh \ha ang reng deuhte han sawi chhawn hi a ni deuh mai a. Chu pawh chu fimkhur a ngai viau mai.

Kohhran unau dang zingah chuan Pathian lalram leh Khawvel lalram hi inzawm tlat anga ngaihna a nasa em em a, chuvangin he kan chenna, kan ram siam \hatna tur atana pawimawh tak takte sawi rik nasat a ni a. Keini kohhran pawhin kan sawi ve ngai lo phei chu a ni hauh lo a; mahse, kan sawi dan erawh a inang lo deuh mai niin ka hria.

Chutah tak chuan a ni fimkhur ngai ta chu ni. Khawtlang inrelbawlna leh kan ram inrelbawlnate, chhungkua leh kohhran inrelbawlnate nen lam hian a inzawm deuh vek mai a. |hahnemngaih luatah hian party politics tak maia thu leh hla neih hi a awl bawk a niang, hmun \henkhatah chuan thusawituin tute emaw party a kap riau nia ngaih theih a awm ta fo mai.

Tuna kan rawngbawltute hi chuan an ching ve kherin ka ring lo, mahse \halai zawkte, nakin lawka kan hruaitu leh kan rawngbawltu \ha tak tak la ni mai turte hi, politics boruak ngaihven leh hre ve tak tak, ram pawh vei ve tak tak an tam tawh tih hi kan ngaihtuah ngai em?

Hmanlai ang kha a ni tawh lo a, thu leh hla kan inhre pawh tawn zung zung tawh a, politics boruak ngat phei chu kan duh emaw duh lo emaw kan social media platform hman zin em emah te a ri chhen tawh mai si a, a hre lo ber pawh hian thinlung tak chuan \an deuh riau hi an nei fur tawh asin.

Tun laiah \an mumal pawh nei em em lo, neutral tak zet zeta inchhiar, ngaihven lem lo leh hriat nei ve vak lo chu thil dangah leh rawngbawlna kawng dang dangah pawh lak tlak viau leh hawih-hai viau hi an tam tawh lo viau zawk awm e. Tlema hawi vengva ve deuh tan chuan tlem te tal chu kan hriat ve fur tawhna khawvelah kan cheng tawh tlat.

Kum 10 dang hi han ral leh chiah se chuan tun ai hian a letin ram politics hi kohhran member-te hian kan tuipui dawn tih a lang reng mai. Kohhran mi politician pawh kan ngah belh dawn tih a rin hriat ruak theih bawk a. Inkhawmpui ni khua leh thil lian tham tih dawn nikhua a lo thlenin kan politician-te lam atangin puihna leh eng fund fund emaw kan beisei chho zel a nih phei chuan politician-te hi kan dah pawn (OUT) tak tak thei lo telh telh dawnin a lang.

Elen G. White-i thurawn hrang hrang kan chhiar chuan Politics hi chu mei alh (fire) ang a ni a, mei alh chuan mi a tilum thei a, a \angkaina a tam em em mai a, chutih laiin a kan tawh chu a kang na em em mai a, a kang chhe duai duai thei thung a ni. Chuvangin, mei alh chu a awmna tur hmun leh a hmanna tur hmunah fimkhur takin kan hman thiam a ngai a ni. Nang leh kei hian kan hmang thiam sa ngawt dawn lo a, kan inzirtir nasat lehzual a ngai a ni.

Lo chik ve mah rawh, kan \hut khawm laih tawh chuan ram politics leh kohhran politics hi sawi khawm a nuamin sawi khawm pawh a hlawh ber tawh mai thei asin. Tun a\anga rei lo teah chuan tute emaw thusawi khan tute emaw a kap riau anga hriatna tur hi a lo awm ve thuai mai thei a nia.

Kohhran rawngbawlna hian Krista hmangaihna aia Ram hmangaihna a lansarh tir zawk hunte hi a la thleng ve thei tih kan hriat a hun ta hle mai. Krista hmangaihnaah chuan ruam khatah kan luang za thei a, ram hmangaihna zawnah erawh chuan ruam khatah kan luang za thei kher tawh lo vang.

A ziaktu: Lalhmingsanga hi Lunglei Chanmari Kohhrana lawi a ni a. AYF Lunglei South President a ni bawk.