KRISTA INNGAIHTLAWMNA
Pastor Remlalnghaka
Key Text: Matthaia 11:28, 29
“Nangni thawk rim leh phur rit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi; tichuan, in thlarau tan chawlhna in hmu ang.”
Philipi 2:5 - “He rilru, Krista Isua pawha awm bawk kha, nangmahniah awm rawh se.”Introduction: Kum 2013 khân Science Fiction film pakhat chhuak a awm a, chu chu Elysium tih a ni a. Matt Damon-a channa a ni. Chutah chuan a changtu pa thluak chu computer nen thlun zawm theihin an siam a. Tichuan, data pawimawh tak mai chu thunin mi rethei zawk leh chanhai zawkte chu an chhan chhuak thei ta a ni. Hetiang deuh hian em ni Krista rilru chu keimahniah a awm ang? Zawhna pawimawh tak chu eng tin nge chu Krista rilru chu kan neih ang tih hi a ni. NIV Bible-ah chuan, “In your relationship with one another, have the same mindset as Christ Jesus,” tiin a lo sawi a ni. Midangte nena kan chen honaa inkungkaihna kan neihah hian Krista rilru put hmang ang kha kan pu tur a ni, a lo ti a ni.
Mathaia 11:28-ah chuan “Nangni thawk rim leh phur rit phur zawng zawngte u” tiin kohna a siam a ni. Bible Commentary kan en chuan heti laia ‘thawk rim leh phur rit phur’ a tiha ‘thawk rim’ a tihte chu khami hun laia thil tih avanga felna lo zawngtute kha an ni a. Juda, Pharisai leh lehkhaziaktute, leh khawtlang kaihruaitute khân an zirtir ber chu thil tha tih atanga hamthatna dawn kha a ni a. Chumi hlawh chhuak tur chuan an thawk rim em em mai a ni. Phur rit phurte a tihte chu – mihring zawng zawngin phur rit lian tak kan phurh, ‘mi sual nihna’ hi a ni. Chumi bakah chuan Pharisai leh lehkhaziaktute khân dan tesep midangte phur rit siamtu siam belhin midangte chu an delhtir thin a. Mathaia 23:4 kan en chuan “Phur rit hrehawm takte an siam a, mite an bel thin a, anmahni erawh chuan an kut zungtang pawhin an tisawn duh lo,” a lo ti a ni.
Chungte avang chuan Krista chuan, “Ka nghawngkawl bat ula, ka hnenah zir rawh u,” tiin sawmna a lo siam ta a. Nghawngkawl tih hian rit phurh inchhawk tawnna tur a ni tih kan hriat tel a pawimawh hle a ni. Seventh-day Adventists Believe (English) phek 129-naah chuan, Pathiana innghat chungin nun thianghlim leh fel, hmangaihna nung chu a lo nun chhuahpui a, chu chu kan felna kawrfual niin khawlohnaa khat pawh ni mah ila kan thinlung kan zawm tlat chuan ama duh zawng chu kan duh zawng lo niin Krista, he khawvela a nun dan khân mihringte kan nun dan tur min kawhhmuh a ni.
‘Thuhnuairawlh leh rilrua inngaitlawm ka nih hi’ tiin a sawi chhunzawm a, chu a nihna chu a nun atang chuan kan zir ho dawn a ni. Krista inngaihtlawmna chu eng tin nge a lo lan chhuah i lo en ho ang u:-
- Daidanna bangte thiatin: A pawimawh hmasa ber chu min daidangtu emaw, min then hrangtu emaw dah sawn hi a ni. Philipi 2:6, 7-ah chuan “Ani zawngin Pathian anga awm a, Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlawm ta zawk a,” tih kan hmu a. Mihringte leh Pathian mi daidangtu chu sual a ni a. Chu chu hneh a nih theihna tur atan chuan chhanchhuaktu kan mamawh a, keimahni angin a rawn insiam ta a ni. Luka 19-ah Zakaia chhiahkhawntuin, puithiam leh Pharisai-te thinhrik inah a lut a. Mathai 15-ah zirtirte kut sil lo thlavang a hauh leh a. Johana 4-ah Samari hmeichhia chu a kawm bawk. Keiniho pawh hian daidanna bang thiah tur hi kan va ngah em ti rawh u. Krista inngaihtlawmna ang nei tur hian daidanna bang chi hrang hrang paih thlak tur leh dah sawn tur hi kan va’n ngah em!
- Kanmawhphurhna te hlenin: Krista khân a tih tur hlen chhuak tur khân a bei nasa hle a. Mathai 3:13-17 kan en chuan baptisma a chan thu kan hmu. A hnena lo kalte hnenah chuan tisa leh thlarau damna a lo pe a. A zirtirten phatsan mah se nang leh keia sual ngaihdam nan a thi ta a ni. A tawrh tur chu rapthlak hle mah se a tihlawhtling a ni. Keini pawh hian kan mawhphurhna hi kan tihhlawhtlin a ngai a ni. Chu chuan kan inngaitlawmna, Krista rilru kan put leh put loh min fiah thin a ni.
- Thuawihna: Luka 2:52-ah chuan Isuan a nu leh pate thu zawmin a awm a ni tih kan hmu a, thuawihna hi inngaihtlawmna atang lo chuan a har hle a. Inngaihtlawmna chi khat a ni bawk a ni. Nu leh pate chu hmuhsitawm pawh an ni thei; mahse, an thu zawm hi kan tihmakmawh a ni. Mathai 23:1-3-ah kan hmuh angin Pharisai leh lehkhaziaktute chu Mosia thutphahah an thu a, an hrilh apiang chu ti ula, zawm zel rawh u. An tih ang erawh ti ve suh u, a ti. Kohhran leh khawtlang hruaitute thu zawm tur kan ni. An tih ang kan tih ve loh tur chu chang 4-naah khân kan hmu a ni.
- Min nghawng dan ngaihtuah lovin: Mathaia 20:28 “Mihring fapa hi rawngbawlsaka awm turin a lo kal lo va, rawng bawl tur leh mi tam tak tlan nana a nun pe tur zawka a lo kal ang khân.” Johana 13-ah Isuan a zirtirte ke a silsak atang khân inngaihtlawmna tak tak, miten eng tin nge min hmuh tih thlir lovin a silsak mai a ni tih kan hria a. Kan nihna leh dinhmun hi kan inzahsak theuh tur a ni. Chutih rual chuan ‘ani hi chu kei aia naupang a nia, hetia ka tih chuan min en hniam ang’ tih te, ‘kei aia junior zawk a nia’ tih te kan ching duh khawp mai.
- Midangteah rah \ha chhuahin: Johana 10:10-ah chuan Isuan, “Ruk hmang chu ru tur leh tihlum tur leh tichhe tur lo chuan a lo kal lo; kei zawng nun an neih nan, tam taka an neih nan, lo kal ka ni,” tiin a lo sawi. Keini pawh hi midangte nun an neih theihna tur atana kohte kan ni. Mi thenkhat chu miten hlawkna leh hmasawnna an neih hmu thei miah lo kan awm thin. Kan thawhpuite kan hnuaia thawkten hmasawnna an neihte lawmpui a hnehin ‘eng tin nge an neih bik’, ‘a hna a thawk tha lo a niang’ ti tein kan chhui kur dup zel. Keini chu midangte hamthatna lawmpuitu tur leh chatuan nun an neih theihna tura thawktu tur zawk kan ni.
A tawp kharna: Eng nungchang pawimawh tak tak mai Krista Isuaa kan hmuhte hi nei ve thei tura tan kan lak a pawimawh hle a ni. Tichuan, midangte hnena eng chhitu kan lo ni thei dawn a ni. Inngaihtlawmna hi Isua hmanraw pawimawh tak a nih ang khân keini a hnungzuitute tan pawha hmanraw pawimawh ber te zinga mi a ni.
A ziaktu: Pastor Remlalnghaka hi Mizo Conference hnuaiah field pastor hna a thawk a. Tunah hian, Champhai South Circle, Khuangleng khuaah a awm mek a ni.