Pastor Malsawma Tochhawng a pension dawn ta:

Mizo Conference of Seventh-day Adventists hnuaia Sabbath School & Personal Ministries Department director hna rei tak lo chelh tawh Pastor Malsawma Tochhawng chu Nov 1, 2025 atangin a pension dawn ta. A thlahna inkhawm hi October 28, 2025 khan Mizo Conference Commitee Room-ah neih a ni.

A thlahna inkhawm hi Pu Lalhmangaiha Chhangte chuan a kaihruai a. Pastor Rodingliana Executive Secretary chuan a service chhunga a hnathawh dante sawiin, a ui tur zia thu a sawi a. Upa Lalbiakdika Ralte chuan mission atanga hamthatna awm thei angte hlanna hun a hmang a. Mizo Conference Office Staff welfare aiawhin Pu Emmanuel Lalremruata chuan thilpek a hlan a. Tin, a thawhpuiten thlahna thilpek an hlan hlawm bawk a ni.

Pastor Malsawma hian kum 1981 atangin kohhranah hna a thawk tan a. Zirtirtu niin bul a tan a. School Principal hnate thawkin Mizo Conference ah Director hnate leh Nurture & Retention enkawltu hnate a thawk thin a ni. Mission ah hian kum 44 leh a chanve a thawk hman a ni.

A thawhpui tawhten an ui zia thu an sawi hlawm a. Tin a thawhrimna avanga an zah zia leh an ngaihsan zia an sawi deuh vek hlawm a ni.

Pastor Malsawma hi pa taima leh fiamthu duh tak a ni a. Pension hun thlenga a thawk thei chu Pathianah a lawmzia thu a sawi a. Mission ah thawk ve theia Lalpa zahngaihna a chang chu a lawm zia thu te a sawi a ni.