Pastor Zirlawma Ralte a pension ta:
Mizo Conference of Seventh-day Adventists field pastor hna thawk mek Pastor Zirlawma Ralte chu active service atangin a pension ta a. Vawiin March 25, 2026 hian a thlahna hun Mizo Conference Committe Room ah neih a ni.
A thlahna inkhawm hi Pastor Sabbaththanga Chhakchhuak, Circle Leader Aizawl East chuan a kaihruai a. Pastor Rohlua Fanai, Mizo Conference Executive Secretary chuan a service record leh rawngbawlnaa a sulhnute a sawi a. Upa Lalbiakdika Ralte, Treasurer Mizo Conference chuan pension te tana hamthatna awmtheite hlanna hun a nei ve leh a. He mi hnu hian pawl leh mimal anga thilpek hlanna hun awmin Mizo Conference, Field Worker Welfare, Aizawl East Circle Board, Ramhlun kohhran, Pastor nupuite leh mimal hrang hrangten thilpek an hlan a ni.
Pastor Zirlawma chuan thusawina hun a hmang a. Lalpan a kaihruai tawhna zawng zawngah lawmthu a sawi a. Adventist kohhrana a luh dan a sawinaah chuan, “Ka pu Remmawia kan khuaah lokalin Bible min zirpui a. Kan pastor te hnenah kan zawt a, chu zirtirna chu Bible nen a inmil thu a lo sawi mai a. A dik zawk si engvanga khalama min kaihruai lo nge a nih kan zawt a, ‘a.. kan laklawh zo tawh a nih hi’ a ti a. Keini chuan laklawh ve kan duh lo a. Adventist-ah kan lut ta a ni” a ti a.
Pastor Zirlawma hian sawrkarah zitirtu hna a thawk thin a. Mahse, Pathian kohna chhangin Champhaiah kohhran sikula thawk turin a inpe ta a. Sawrkarah Rs. 3000.00 a hlawh tawh hnuah Rs. 900.00 hlawh turin rawngbawlna nei turin a inpe ta a ni.
Kum 1990 ah kohhranah a thawk tan a. Mi 900 chuang zet baptisma a chantir a, naute hi Pathian hnenah 492 zet a hlan hman a. Tuak engemaw zât a inneihtir bawk.
Pastor Zirlawma pa taima leh Pathian tana inpe tak mai rawngbawlna atanga a chhuan ta chu a thawhpui leh a awp thin kohhranten an ui hle a.
Pastor Rodingliana, Mizo Conference President chuan a thlahna hun thuchah sawiin active service atangin chawl tawh mahsela rawngbawlna lamah inhmang chhunzawm zel turin a fuih a. A kalzelna turah duhsakna a hlan nghal bawk a ni.