PATHIAN KHAWNGAIHNA(GRACE)

– Pastor Lalrintluanga Tlau

Ephesi 2:8,9 Rinna avanga khawngaihnaa chhandam in ni si a; nangmahni thawh chhuah a ni lo va, Pathian thilpek a ni; thiltih avang a ni lo ve; chuti lo chuan, miin a chhuang dah ang e.

Tita 3:7 Chutichuan, a khawngaihnaa thiam chantira lo awmin chatuana nun beiseina ang zela ro luahtu tura siamin kan awm thei ang.

Chhandamna siamtu, a bulpui ber chu ‘Khawngaihna’ hi a ni. Hmangaihna hi chu mawina te, \hatna te, duhawmnaten a siam ve fo \hin a, khawngaihna erawh hi chu thil \ha engmahin bul a \an ve lova, a neitu rilruin a khawngaih apiang chu khawngaih an ni mai a ni. Rethei zawng zawngin khawngaih an hlawh lo va, chan chau zawng zawng pawhin an hlawh lo va, khawngaihna hlawh tur hian engmah bituk a awm bawk lo. Eng vangin nge mihringte hi Pathian hian min lo khawngaih ngawt mai le? Pathian khawngaihna lo insiam \an dan hi a chepakaia sawi thei chu awm se, hriatna ril ber lawmman pêk tlak a ni ngei ang. Pathian chuan a duh apiang a khawngaih a, a duh apiang chungah zahngaihna a lantir bawk \hin a, tuman an khap thei lo va, an hnial thei bawk hek lo.

Vawi khat chu roreltu pakhat hian khawngaih thilpek hlu tak mai hi tu emaw pek a duh tlat mai a. A khawngaih thil pek dawn beisei chuan mi tam tak an lo kal a; Piangsualte, kebai te, mitdelte an lo kal a, tumah a lo pe lo va. Mi rethei te, kut dawhte an lo kal leh a, tumah a lo la pe lova; a hmelhriat rethei ve tak tak te, a chhûng hnai rethei ve tak takte pawh an lo kal a, tumah a lo pe bawk si lo va. A tawpah chuan zu ngawl vei, mahni inchhung tlan ral vektu, tu mahin an ngaihsak duh loh chu a hmu ta a, a khawngaih ta êm êm a, a thilpek tur ken chu a pe ta mai a. A \huihhruaite chuan roreltû thil tih dan chu mak an tiin an hrethiam lo hle mai a, “Hotupa, piangsual leh rethei tak tak te, kut dawh te, i hmelhriat leh chhûng hnai te pawh khawngaih lova, he zu ngawl vei, mahni neih zawng zawng ei ral a, chhungkaw ti\iau vektu hi eng vanga khawngaih thilpek hlan ta mai nge maw i nih mai chu le? an ti a. Roreltu chuan “A chhan ka sawi thei lo, ka hmuh khan ka khawngaih thilpek hlan ta mai nge maw i nih mai chu le? an ti a. Roreltu chuan, “A chhan ka sawi thei lo, ka hmuh khan ka khawngaih ta êm a, thilpek hi pêk ngei ka duh ta mai a ni,” a ti ta a.

Pathian khawngaihna mihringte chunga a awm tlat mai pawh hi tu man an sawi fiah thiam lova, vana Vantirhkohte pawhin mak an ti a ni. A khawngaihna chuan a hmangaihna a chawk tho va, a hmangaihna chuan engkim a huamtir ta bawk a. He thu hi a sawi ta a; “Pathianin khawvel a hmangaih êm êm a; Chutichuan, a fapa mal neih chhun a pe a,” (Johana 3:16) tiin. Khawngaihna chuan engmah a ui thei lo, a khawngaihte tan chuan a pe mai \hin. Chutiang chuan Pathian khawngaihna chuan mihringte tan ui a nei lova, a fapa mal neih chhun, van ro hlu ber pawh a pe ta mai a ni. Chu khawngaihna behchhan lo chuan Mihringte tan Pathian hnaih ngam chi a ni lo va, beisei rual a ni lo lehzual a ni.

Vantirhkohte chuan kum tam tak a rawng an lo bawl tawh \hin a, mahse suala an tlûk khan thim hnuaiah khar hnanin an awm ta mai a, khawngaih rawngbawlsakna rêng an dawng tawh lo. Hmelmaa puan an ni a, Pathian thil tum chu thiam loh chantîr a tihboral vek tur an ni ta a. Mahse, keini mihringte hi chuan rei pawh a rawng kan bawl ve lova, a tan kan rinawm thei thlawt bawk si lova; keini pawh a hmelmaah kan insiam a, kan dodal a, a hmêl hmu duh lovin kan kaikûn tlat lehnghal a; mahse enga ti nge min khawngaih tlat mai chu le? Khawngaih thlala lo lutuk leh phu hlawl lo kan ni si a; mahse, min khawngaih miau si chuan lawm taka ringa, pawm mai tur kan ni. Phût leh man nei tur chu ni sela chuan van thil hlutna chu lei tangka hian a lei zo awm si lo va. A hnen a\anga thlarau pawlna rêng rêng te, venna leh hruaina rêng rêng te, malsawmna leh duhsakna rêng rêng kan dawnte hi a khawngaihna kan dawn vang chauh hi a ni.

Khawngaihna a pêk ropui ber mai chu ‘Ngaihdamna’ hi a ni. Pathian thianghlim laka mihring suala tenawmzia chu mihring \awng hai a sawi fiah zo lo va; phar natna leh hmeichhe taksaa tenawm lo chhuak \hin te hi kan \awngkam neih theih chhun a ni mai awm e; mahse, chûngte pawh chuan a hril zo lo a ni. Pathian ngaihdamna chuan chûngte chu a pawm a, a fawp bawk ; a va mak êm! Hring nun hi chuan a phak ve hlawl lo a ni. A hmangaihna leh khawngaihna thinlung chuan mihring tenawmna zawng zawng chu a silfai vek a, hmelma chu a chhungkuaah min fawm a, a fa, a chatuan ro khawmtu atan min siam leh ta nghal a. Khawngaihna mak, mawi leh duhawm chu ava ni tehlul em.”

Thilmak dang awm leh chu mihring chak lohna a hmuh a min khawngaih ta êm êm hi a ni. Sual hnuaia mihring chak lohna chu: Nausên tam laka kalsan, engmah ti thei lo, \anpui mamawha \ap, thli leh ruah leh, dai leh khaw vawtin a hmeh hlum mai tur emaw, ransaten an ei mai tur ang hi kan ni. Tih theih nei lo, kaih leh pawm ngai, êk leh bal tinreng kai, \anpui lohva thi mai tur chu en zo lovin, min khawngaih ta êm êm a; a lal lukhum leh Lal puan a hlip a, Lal\hutthleng chu a kalsan ta mai a. A ropuina nen a lo kal chuan ka lo dawngsawng thiam dawn si lova; chuvangin, mi hnuaihnung ber angin hring-nun bul a rawn \an ve ta mai a, kan nihna chu luh chilhin min \anpui a tum ta a ni. Mihringte chunga thleng ang zawng zawng a chungah a thleng ve vek a, natna te, lungngaihna te a tuar a, dodal leh tihduhdahin a awm a. Min \anpui theih nan hrehawm a tuar a, rei tak tak a \awngtai \hin a. Sual hrênga tangte chhuah nan a vei a, a \ap a, mut mû a tuah hlei thei lo a. A hnena lo kalte chu a tawpkhawk thlenga chhuah zalen lovin a kalsan ngai hek lo. Van mi lian chu leiah mi satliah aia tlawmin a nung a; silhfen man to a inbel ngai lova, ei tur tuihnai a hmu pha hek lova; Mahse, mihringte chu a hruai a, a fuih a, sual hneh dan a zirtir a. Thutak chu ngunhnam angin a tihriam a, tlawmna nun silhfen anga inbeltirin ral do turin a tir chhuak \hin.

Khawngaihna avanga chhandam hna thak a nih avangin a hnung zui tura inbuatsaihte hnenah chuan “intheihna duh lovin khawngaihna ka duh e,” tih hi a awmzia va zir rawh u, “ (Mat 9:13) a ti \hin. Khawngaihna hi Pathian thinlung tiche lo thei lotu chu a ni a, a khawngaihna beiseitute zawng zawng chuan thupuiah an nei ve tur a ni. “Mi khawngaih thei takte chu an eng a thawl e; Khawngaih an lo hlawh dawn si a,” (Mat 5:7) tiin khawngaihna thinlung nei ve turin min fuih \heuh bawk a ni. Mi chak chu a khawngaihna vanga chak a ni a, mi chak lo pawhin hlau leh khur chung pawhin i pan lui tlat ang u, a khawngaihna chu kan chhandamna bulpui a ni si a.

*A ziaktu: Pastor Lalrintluanga Tlau hi Aizawl South Circle Leader a ni a. Mizo Conference-a pastor thawk laiah chuan a senior ber te zinga mi a ni.