SAKAWR THATCHHIA

Khaw pakhatah hian sumdawng ngilnei leh thawkrim tak mai hi a awm a, chi a hralh \hin a. Chu sumdawng chuan Sakawr thatchhe tak mai hi a nei a, a sakawr chuan hna thawk peih lovin pumpelh dan a zawng tang tang \hin a ni. Sumdawngpa chuan a sakawr chu an khaw \henawm khawpuia hralh tur chi a phurhtir \hin a, nilengin kein an kal ngat ngat \hin a ni.

Ni khat chu sumdawngpa chuan a chi hralh turte chu bag-ah a khung khawm a, a sakawr thatchhe taka muhil thlurh thlurh hnenah chuan, “Tho rawh le. I hnungah khan heng chi bagte hi ka lo phurhtir ang che. Lui lian tak piaha khawpui ah sawn i va hralh teh ang,” a ti a.

A sakawr chuan, “Vawiin chu ka chau lutuk a ni. Nilenga hahdam taka mut veng veng ka chak hle asin. Mahse, heng chi bag rit tak takte hi ka phurh a ngai si,” tiin a phun nung nung a. Peih lo tak chung hian a tho chhuak a, a pu chuan a hnungah chi bag chu dahin a phuarbet mawlh mawlh a. “Khai le, ka sakawr, kal tan rawh le. Lui chunga lei(Bridge) i kan chhungin ka ei tur ka lo pack ang e,” a tih hnu chuan sakawr chu a kal ta chhut chhut a.

Zawi nen nawn tak mai hian sakawr chu a kal zel a, a pu sawi lei kan tura a kal lai chuan tihpalh thilthu hian a ke a rap tleu a, luiah chuan a tla ta bawrh mai a. Tuia a tlak avang chuan a chi phurh chu tuiin a chiah zawp ta a. Lui a\anga a chhuah hnu chuan a bag phurh rit tak chu a lo zang ta vek mai a. Sakawr chuan mak ti tak hian a bag phurh chu a en a, tuia a tlak vang khan a chi phurh chu zawp ralin a zang ta vek tih a ngaihtuah chhuak ta a.

E heu! Thil \ha tak a nih dawn hi. Tuia ka tlak apiangin ka chi phurh hi a zawp ral anga, tichuan bag rit tak tak hi a lo zâng ziah tawh dawn a ni. Thil rit tak tak ka phurh a ngai tawh lo vang. He thil hi ka tih fo a ngai tawh dawn a nih hi, ka puin min lo en reng loh ka beisei,” tiin a kal ta turh turh a.

Nakinah chuan a pu a lo thleng a, khawpuiah an chi phurh chu an hralh ta a. Chi an han buk chuan in a\anga a phurh chhuahtir rihna zatve zetin a lo zang reng mai! Sumdawngpa chuan a hma khan a lo chhut sual palh a nih ringin chi tuia inchiah ral lo tlemte chu a man zatve lekin a hralh a, a sakawr nen chuan a chenna in panin an haw leh ta a.

Zanah an mu a, khua a lo var leh chuan sumdawngpa chuan chi bag chu sakawr a phurhtir leh a, a ei tur chaw a fun leh ta bawk a. Chutia a chaw tur a fun lai chuan a sakawr chu hma lam panin a kal zel a, a pu lo thlen hma chuan lei chu a thleng leh ta a ni. Lei a thlen leh rual rualin sakawr thatchhe tak mai chuan, “Ka pu lo thlen hmain hetah hian ka tlu der anga, luiah hian ka pil leh ngei tur a ni,” tiin a ngaihtuah a. A ke chu rap pial luiin tuiah chuan a pil leh ta bawrh mai a. Rang tak hian tui a\ang chuan chhuakin chi zawp ral chu a en a, fing inti tak hian thawveng takin a thil phurh chu a kalpui vawk vawk a.

A pu a lo thleng a, khawpuiah chi chu an han hralh leh ta a. A hmaa mi ang bawkin chi chu in a\anga an chhuah lai ai khan a lo zâng leh vek tawh. Sumdawngpa chuan a chi lo zâng leh ta vek chu mak ti takin a en ta reng a.

Ni tin hian sakawr chu leiah chuan tlu luiin tuiah chuan a inchiah pil ta ziah a, chuvang chuan a chi phurh pawh a zang zual telh telh mai a ni. Chutiang hlira a tih ziah hnu chuan ni khat chu sumdawngpa chuan a sakawr chu a zui ru ta a, thingbuk phena biru chungin a sakawr chu a enthla reng a. Sakawrin lei a thleng a, amah hmutu an awm leh awm loh a en hnuah tuiah chuan a tla lui leh ta bawrh a. Thil thlen dan sumdawngpain a hmuh chuan mak a ti em em a, “Aw, he sakawr thatchhe tak hi zirtirna ka pek thuai a ngai dawn a nih hi,” tiin engmah thleng lo ang mai hian sakawr awmna chu a pan ta a.

A tuk khua a lo var leh a, sumdawngpa chuan chi bag-ah chuan chi aiah lapua(cotton) a dah ta thung a. Sakawr chuan a pu thiltih chu engmah a hre lo. A puin a hnunga bag a phuar beh zawh hnu chuan khawpui panin a kal leh ta a, a bag phurh chu ni dang aiin a zang riau hian a hria a. Tichuan, a kal zel a, lei a thlen chuan tlu lui lehin tuiah chuan a pil leh ta bawrh a.

Fing inti taka nui sang chung hian tui a\ang chuan a chhuah a tum a, mahse eng thil nge thleng ta hi! A bag phurh chu a hma aiin a let hnih vel zet hian a rit zawk ta tlat mai. Mak ti em em hian tuiah chuan a inchiah nawn leh a, a inchiah nawn tam poh leh a thil phurh chu a rit zual ting mai a. A bag phurhah chuan chi ni lovin lapua a awm tih a hre si lo.

Tichuan, harsa takin lui a\ang chuan a chhuak a, chau leh hah takin lei chu a kan ta tuih tuih a. Thui lote a kal a, hah lutuka thaw hlui hlui chung hian a chawl a. A bag phurh chu a rit telh tleh mai bawk a. Nakinah chuan a pu sumdawngpa kha a lo kal a, hah taka a sakawr lo thaw hlui hlui chu enin a nui a.

Ka sakawr, kei hi i pu ka ni a, i hna chu chi bag \ha taka phurh kha a ni. Hah takin hna ka thawk a, hna tawk lova ka awm theih nan chhuanlam ka siam ngai lo va, hahdam ka duh vang leh hnathawh pumpelh ka duh vangin mi dang ka bum ngai hek lo. I hnathawh tur pumpelh i duh vanga min bum vang khan zirtirna ka pek che a ngai ta a ni kha. Tunah chuan hnathawh peih loh vanga mi tihder leh chhuanlam siam i sim tawh ang chu. Ti nawn tawh reng reng suh ang che,” a ti ta a.

Chumi hnuah chuan Sakawr chuan a zirlai zirin hna a thawh peih loh vanga mi dang tihder leh chhuahlam siam a chin thinte chu a sim ta a ni.