Zirlai-1 2024 2nd Quarter Craddle Roll

ZIRLAI 1-NA

PATHIANIN NOVA LEH RAMSATE A VENG

CHANGVAWN : “LALPAN anni chu A \anpuia……. A chhanhim \hin.” Sam 37:40.

BIBLE CHANG: Genesis 6; 7; 8; 9:8-17.
ZIRLAI TUM: ISUAN min hmangaih avangin min vêng renga, harsatna hunah pawh min awmpui zêl ang.

NU & PATE TAN: Nu leh pate u, Pathianin Ama anpuia A siamte enkawl puitlin hna hi in koah A nghat a ni. “Nungchang chher chhoh nân hian chhungkua aia thawkhlâwk thei dang a awm lo.” (Ed. p. 283). In fate Ama hnêna hruai theihna ham\hatna Pathianin A pê che u a ni. Chatuan atâna in fate in hneh theihna chu engmahin a tluk thei lo. Tuna in fate chunga in tihin, anmahnia hû a neih thûk ang khan tu dang mahin an ti ve thei lo a ni.
In faten Pathian leh A thute an manthiam hma hauhin awmdan an lo zir \an theia, an fingin, thil an manchak phian anga, an vêla boruak awmdan azir zêlin an awm ve mai ang. Kohhran leh chhûngkua a ngaihdan pawh a hmuhdan azir zêl a ni ang. Nu leh paten an hmangaiha, an enkawl \hat chuan, a khawvêl chu chênna tûr hmun \ha a ni anga. Biak In pawh a lawina tûr hmun \ha a ni ang. Zirtirtute pawhin hmangaih leh nêlawm takin an lo chhawnchhaih chuan, inkhawmna pawh nuam an ti hlê mai ang. In chhûng chu nuam leh inhmangaihna hmunah siamin, hlim hmêlpu takin be \hin ulang. In hlimna chu in fate-ah ênchhuahtîr \hin ang che u.

TIH TUR: Tunkar chhûng hian in naute hnêna Isua hmangaihna leh enkawlna in zirtirnaah hêng hi telh hrâm ang che u:

  1. Pathianin ramsa leh nungcha dangte A enkawl dan i hrilh pahin an bu/chênna hmunte enpui pahin lênpui ula, a lemte entir u la.
  2. Kum 2/3 mite chuan ramsa lem en leh an hming sawi pawh an thiam thei a. “Pathianin ramsate A vêng \hin” titein sawitir ula.
  3. Nova lawng chanchin ngaihnawm taka sawi theih nân a tam thei ang ber zaizir pah leh ramsa lemte lakkhâwma, lawnga luhtir nise.

BIBLE THAWNTHU: Nova chuan lawng lianpui mai chu a tuk tlut tlut mai a. Nitin hian a fate pathumin an tukpui \hin a. Midangte pawhin an tukpui ve bawk \hin a ni.
Khawvel mite chu an sual êm êma, Isua pawh an hmangaih ve lo. Nitin hian thilsual hlir an ti \hin a ni.
Nova chuan Isua a hmangaiha, A thute a awih êm êm a ni. Pathianin lawng tuk tura A tih pawh, a zawm nghâl maia. Kum tamtak a tuk hnu chuan a tuk zo ta a. Pathianin Nova hnenah chuan, “Lawngah hian chaw tamtak chhek khâwl la. Nangni leh ramsate tân pawh dah khawl \euh ang che,” A ti a. Nova chuan Pathian thu ang zêl chuan a ti a. a inpeih ta diam mai a ni.
Nova chuan lawnga lût ve turin mite chu a sâwm vela, mahse an lût ve duh si lo. An lo nuihzat mai maia. Nakin lawkah chuan ramsa tinrêng te, sava leh nungcha dangte chu Pathianin Nova lawngah lût turin a rawn kaltira. A lo lût ta nguai nguai mai a ni. Tam hle mahse an intibuai reng reng lova, mite chuan makti takin an lo thlir \huap ta mai a ni.
Novan, “Ruah a sûr dawna, tui a lo lêt dawna, chuvangin lo lut ve rawh u” a tih pawhin an nuihzat mai mai a. “Van a\angin tui a luang ngai lo, enge ruahsur chu?” titein nuihza siam nan an zâwt vêl a.
Nova lawnga lut nungcha leh ramsate, a lema mi hi a hming hriat theih in nei em? Chik deuhin han en leh teh u. Saite, sazukte, satel te, sakei te leh a dang tamtak an lût a ni.
Lawnga an luh fel vek hnu chuan Pathian vantirhkohin lawng kawngkhar chu a khar a, a kalh ta hmiah mai a ni. Tumah luh leh chhuah a theih tawh loh a nih chu!
Ni a lo chhuaka, a tla leha, chutiang chuan kar khat lai a la awm a. Mahse chumi hnu chuan nidanga an la hmuh ngai rêng rêng loh, chhûm dum pui pui a lo let ta but but maia, thlipui leh kâwlphe leh lirnghing leh khawpui ri ring êm êm mai nen. Ruah leh rial nên a lo thawk ta chiam maia, a râpthlâk êm êm mai a ni.
Lirnghingah chuan lei a lo khi phuk phuk maia, chung lei-khi a\ang chuan tui a lo chik chhuak zur zur maia, hmun tinreng mai chu ti chuan a chim ta pung pung mai a ni. Mite chuan an hlau êm êma, a chîm-pil zêl mai si. A \henin Nova lawnga luh an dila, mahse a luh theih tawh sî loh, tui an hâk bawrh bawrh mai a ni.
Ruah leh thlipui chu ni sawmli leh zan sawmli chhûng, châwl miah lovin a lo thawka. Khawvel zawng zawng chu a chimpil ta vek a. Misual leh ramsate, lawnga lût ve lo zawng chu an thi fai ta phiar mai a ni.
Isua chuan A Vantirhkohte chu Nova lawng vênghim tlat turin A tira, an vênghim ta tlata, lawnga awm tumah an thi ve lo a ni. Ni tamtak chhung chu tui chuan khawvel hi a chim renga. Kumkhat vêlah chuan tui chu a lo kâm leh ta a ni.
Tui a kâm vek hnu chuan lawng chhuahsan a lo hun ta a. Vantirhkohte chuan lawng kawngkhar chu an hawng leh ta a. Nova leh a chhûngte leh lawnga ramsa awm zawng zawngte chu hlim takin an lo chhuak leh ta duah duah mai a ni.
Nova leh a chhûnge chuan vanlama chhûm an han en chuan, chhûmah chuan CHHIMBAL mawi tak mai hi a lo zâm ruih maia, mawi an tiin, hmuhnawm an ti hle mai. Chhimbal hi tui a lêt leh tawh ngai dawn lo tih entirna a ni. Chhimbal in hmuh chuan tui a lêt tawh dâwn lo tih in hrechhuak \hin dawn nia!
Isuan Nova leh a chhûngte leh ramsate chu A hmangaih êm êm a, A vêng reng \hin a ni. Chutiang bawkin nangni pawh in nu leh pate leh unaute nên Isuan A hmangaih che u a. A vêng zêl dawn che u a ni. A nih leh Isua chu in hmangaih ve tlat a ngem le?