Zirlai-1 2025 2nd Quarter Puitling Zirlai
Zirlâi 1 March 29–April 4
Hrilhlâwkna Hrilhfiah Dân Thenkhat
Sabbath Chawhnu
Chhiar tûrte: Jer. 29:23, 24; Sam 139:1–6; Dan. 12:4; Thup. 22:10; 2 Tim. 3:15–17; Heb. 4:12.
Chângvawn: “‘A chhuang apiang erawh chuan hei hi chhuang rawh se, kei Lalpa hi ngilneihna te, rêl dikna te, felna te he leia hmang thîntu chu ka ni tih mi hriata, a hriatthiamna chu. Hêng thilte hi ka lâwm zâwng a ni si’ tih hi Lalpa thu chhuak a ni” (Jeremia 9:24).
Bible-ah hian Kristiante’n ngaihdân thuhmun an neih tlânna ni lo thu tam tak a awm a, chûng zînga pakhat chu hrilhlâwkna chungchâng hi âwm e. Hetianga ngaihdân inang lo tak tak kan neih avâng leh, dik ber nia kan inngaih theuh bawk si hlawm avâng hian mi tam tak chuan Bible-a hrilhlâwkna thu kan hmuhte hi zir tûl lo, hun khawhral thlawnna mai niin an ngaih phah fo rêng a. Vânduaithlâk takin, ringtute zîngah ngei pawh mi tam tak chuan Bible-a lehkhabu thenkhat, entîr nân, Thupuan bu angte hi chu hriatthiam theih loh niin a ngâi sa tawp mai bawk. Pastor thenkhat, hrilhlâwkna thute zir chu buaina zakhua thlentu mai nia ngâite’n an lo fuih thîn bawk si a; chuvâng chuan, chhiar enah an en lo tawp mai niin a lang.
Hetiang hi hmânah chuan thil nih dân a ni ngâi lo. Kristian kohhran chanchin kal tawha kum zabi hmasa sâwm leh pariat vêl chhûng zawng kha chuan Kristiante zînga a tam zâwk daih khân Bible-a hrilhlâwkna thute hi an ngaihsakin an ngâihlu hle thîn a, hrilhlâwkna thu hrang hranga thuchah pawimawh tak tak inphûmahte pawh hian ngaihdân thuhmun an lo nei tlâng hle thîn bawk. Pathianin ringtute hnêna hrilhlâwkna thute a pêk chhan leh a ruahman dân ni bawk chu: “Tin, unaute u, in zain thu thuhmun in sawia, in zînga inthenna rêng a awm lohna tûrin, rilru hmun khat leh ngaihtuahna hmun khata fel taka in in zawm tlat zâwkna tûrin, kan Lalpa Isua Krista hmingin ka ngên a che u” (1 Kor. 1:10) tih hi a ni a.
Tûn kârah hian hrilhlâwkna thute hrilhfiahna rintlâk leh nghet tak min neihtîr thei tûr thu pawimawh thenkhat kan zir ho dâwn a ni.
Sunday March 30
A chhiar apiangin a awmzia hrethiam rawh se
In vêngah/khuaah Kristian lehkhabu dâwr a awm em? A awm a nih chuan, lêng lût la, Bible-a hrilhlâwkna thu hrilhfiahna lehkhabute kha han thlêk kual thuak thuak teh. Chûng lehkhabu ziaktute chu an ngaihdân leh hrilhlâwkna thu an hrilhfiah dân a inang lo hlawmin, inkalh tak takte pawh a ni hlawm tih i hre thuai ang a, Thupuan bu-in a sawite hi a awmzia hriatthiam tak tak theih loh nia ngaihna pawh i neih phah hial maithei nghe nghe bawk. Entîr nân, ziaktu pakhat chuan Krista dodâltu tih hi chu eng dang ni lovin, entîrna emaw, tehkhin thu emaw mai niin a sawi ang a; ziaktu dang pakhat chuan nakîna lo la chhuak tûr niin a sawi thung ang a; tin, ziaktu dang leh chuan milem be mite’n Rom Lalram an awp lâi vêla mi tu emaw kha sawina niin an ngâi bawk ang. Hetiang teh nuai hi a nih avângin, thuhriltu upa lam deuh tawh pakhat chuan heti hian a lo sawi rêng a: “Bible hi chu tingtang hlui deuh tawh ang a ni a; i duh ang thlûk mil tûr zêlin i perh thei ang” a ti.
Nimahsela, amah Bible hi chuan chutiang ngaihdân chu nei tûrin min râwn hauh lo thung a. Ngun taka chhiara, Pathian chuan thil a sawi liam ve mai mai ngâi lo va, a Thu kal tlanga thutak a sawite chu a awmzia kan hrethiam thei a ni tih ring chunga zir tûrin min sâwm zâwk a ni.
Matthaia 24:15; Thupuan 1:3; Matthaia 11:29; leh Jeremia 9:23, 24 te hi chhiar la. Hêng thute hian Pathianin ama chungchâng kan hriatthiam theihna tûra ruahmanna a lo siam chu eng tin nge min hrilh?
Sap rama zirna in sâng (university) tam takah khuan Bible hi subject pakhat anga zirtîr niin, an zirtîr dân erawh thu leh hla mâwi tak tak dah khâwmna lehkhabu a nihna angin a ni tlângpui. Mahse, ringtu tha tak tân chuan, zirtîrtu-in hmâsâng milem be mite’n an lo ziah thawnthu phuahchawp ngaihnawm tak si a zirtîr dân ang chiah thova Bible an zirtîr lâi lo ngaihthlâk chu mak tih loh a har ngawt ang. Mi thiam tam takin Pathian thu a ni tih ring ve hran chuang miah si lova Bible an zir emaw, zirtîr emaw ve chhan chu Bible-a kan hmuh thawnthu hrang hrangahte hian nungchang dik leh tha min zirtîr thei “thu” hlu tak tak a awm vâng a ni a. Nimahsela, anni ngaihdân chuan, Pathian thâwk khum a ni tia zirtîr chu thil nuihzatthlâk tak a ni.
Chutiang chu a nih avângin Bible hi chhiar nasa ve viau tho mah se, Bible kal tlanga Pathianin thil a sawite chu a awmzia an hrethiam thei ta lo thîn rêng a. Mi thenkhat dang lah chuan Bible thuchah kalh zâwng chiahin an lo zirtîr ve bawk si nên. Lalpa hnêna intûk luhna tel lo leh, thutak zir tûra thinlung inhawng miah lote chuan Bible hi han zir han zir ve thîn mah se, a thuchah laimu tak an man theih dâwn loh mai bâkah, hêng Bible phêk tina Pathian nungchang thianghlim leh hmangaihna târ lana awmte hi a hmu thiam thei dâwn rêng rêng lo va. Hei hi mi tam takin an lo rin âia thleng awlsam a ni nghe nghe bawk. Chuvâng chuan, a hmanraw dik nên ni lo leh rilru dik pu lo (Thlarau Thianghlim kaihhruaina ni lo) chunga Bible chhiar/zir ve ngawt chu thil hlauhawm tak a nih thei rêng a ni.
Mi pakhat, sakhaw mi êm êm nia hriat pawh ni lo hian Bible a lo chhiar ve tlat mai a. A chhiar chhan an han zawh chuan, “E le, a sawi dik tâwk lote ka zawng kual maw le” a ti pek a ni âwm e. Eng vângin nge hetiang hi ngaihdân leh rilru put hmang dik lo tak a nih?
Thawhtanni March 31
Pathian hian amah hrethiam tûrin min duh
Ram/state dang khawiah emaw, chumi hmuna an tawng hman i hriat ve si lohnaa i awm lâiin damdâwi zawrhna dâwrah emaw, dam lo inentîrna hmunah emaw i kal tawh em? Dâwr nghâktu emaw, doctor emaw hnênah chuan i sawi duh ang i sawi chhuah theih si loh avângin hrehawm i ti ngawt ang ti raw?
Pathian pawh hian kan hnênah thu sawi duh hle mah se, harsatna hmachhawn a nei ve tho mai a. Chuvâng chuan, “Vân khi lei âia a sâng zâwk angin, ka awm dânte hi in awm dânte âiin a sâng zâwk si a, ka ngaihtuahte pawh hi in ngaihtuahte âiin a sâng zâwk bawk” (Isaia 55:9 tiin a lo sawi sâwi rêng a ni. Nimahsela, a harsatna tawh hi kan hnêna thu sawi nân mihring tawng hman a hrethiam lo lam a ni ve lo va; keimahni zâwk hian a famkima amah hrethiam tûrin ngaihtuahna emaw, tawngkam emaw kan neih phâk loh vâng zâwk a ni.
Hêng a hnuaia Bible chângte hian eng tin nge Pathian ngaihtuahna leh keini ngaihtuahna inthlauhzia an sawi?
Sam 139:1–6 ___________________________________
Sam 147:5 _____________________________________
Rom 11:33 ____________________________________
1 Johana 3:20 ___________________________________
Thil nihna dik tak kan hriat reng tûr chu, Pathian rilru leh ngaihtuahna hi eng tikah mah a famkimin kan hre thei ngâi dâwn lo tih hi a ni a, a chhan pawh ani chu tâwp chin nei lo leh eng kim hria a nih tlat vâng a ni. A thil siamte pawh hi a zavâi chuan kan hrethiam sêng lo hrim hrim bawk a. Chuti a nih lâia amah lo hriatthiam kîlh kêlh tum chu tih sa loh loh a ni lo vang em ni? Thil theih loh tawp a ni.
Amaherawhchu, thil zawng zawng hi hrethiam vek ngâi dâwn lo mah ila, kan chhandamna atâna tûl leh tangkâi chinte chu kan hrethiam thei zêl thung (2 Tim. 3:14, 15 en rawh.) Tirhkohte’n an thu sawi ngâithlatute hnêna chanchin tha awmzia an hrilhfiah khân, hrilhlâwkna lo thleng famkim tate chu an sawi chhuak thîn a, hêngte atang hian hrilhlâwkna thute pêk a nih chhan chu chhandamna ruahman kan lo hriatthiamna atân a ni tih kan lo hre thei thîn. Hetiang chiah hian, khawvêl tâwp dâwn hnaihah chuan Bible-a kan hmuh hrilhlâwkna thute hian eng emaw ti kawng tal chuan Isua hnênah min hruai thleng nge nge dâwn a, mihring zawng zawng hnêna a pêk chhandamna thutiam chu hrethiam tûrin min tanpui ang.
Lalpa, amah hmanga khawvêla thil zawng zawngte siama an lo awm tâkna chu (Kol. 1:16; Johana 1:1–3 en la) he leiah hian lo kalin, mi zawng zawng sual thâwina atân krawsa thi tûrin a rawn inpe a, kha a inthâwina siam khân mi sual ber berte pawh a huam vek. Chutiang tak chuan Pathian hian min lo hmangaih a ni a. Kan tân eng kim a lo tih tawh avângin mi zawng zawng hi—mi sual ber berte pawh tel vekin—Isuaa min pêk chu hre tûrin min duh ang tih a chiang a. Chumi kan lo hriatthiam theihna tûr atân chuan hrilhlâwkna thute pawh hi pêk kan ni rêng bawk a ni.
Bible-ah hian kan hriatthiam loh thu tam tak awm tho mah se, eng vângin nge kan hriat chinah kan rilru kan pêka, chûng kan thu hriatte chu kan zawm bawk a pawimawh le?
Thawhlehni April 1
Daniel, thu chu thup tlat rawh
Daniela 12:4 chhiar la. Pathianin Daniela hnêna a sawi chu eng nge ni? (Thup. 22:10 nên khâikhin ang che.)
Thuhriltu tam tak chuan Daniela 12:4 thu hian Isua Krista lo kal leh hma lawkin khâwl lam leh science thiamna lamah hmasâwnna nasa tak a thleng dâwn tih a lo sawi niin an ngâi a. Thenkhat phei chuan tûn hnâi kum za liam ta chhûnga zin vei vahna hmanraw chi hrang hrang—motor, thlawhtheihna leh lawng leh a dangte—chak tak tak siam chhuah lo ni ta hi a lo sawi niin a ngâi bawk. Adventist-te ziah lehkhabu tam takah pawh hetiang zâwng hian thu an kalpui ve tho mai a. Hrilhfiahna âwihawm leh âwm ang tak chu ni ve ngei tho mah se, Daniela 12:4 thuin a sawi hi chu thil dang zâwk a nih maithei.
Hemi châng hi i han chhiar nawn leh teh ang. Vântirhkohin Daniela hnêna a sawi hi “thu chu thup la, lehkhabu chu châr tlat rawh” tih thu-in a intan a. Heta a sawi hi Daniela lehkhabu chungchâng a ni tih hria ila. Chuti a nih chuan, tâwpna huna lo pung hluai tûr hriatna a tih hi thil dang ni lovin, Daniela lehkhabu awmzia hriatthiamna a ni thei mai zâwk ang em?
He thu vântirhkohin a sawi hian Daniela lehkhabu hi Thupuan bu nên a inan chiah loh dân a târ lang a, Johana kha chu a lehkhabu châr/zêp lo tûrin hrilh a ni ve thung a nih kha (Thup. 22:10). Thupuan bu hi chu a bul rêt atanga a awmzia hriatthiam tûr a ni a, a chhan pawh “a hun chu a thlen hnaih tawh êm vâng a ni. Hetih lâi hian, Daniela lehkhabu erawh hi chu nakîn hnua a awmzia la hriat fiah thiam chauh tûr a ni ve thung.
Kum za eng emaw zât liam ta chhûng khân Kristiante zînga mi thiam tam takin Daniela lehkhabu hi hrilhfiah an lo tum nasa tawh thîn a, thenkhat phei chu an hlawhtling viau nghe nghe. Amaherawhchu, Daniela lehkhabu hriatthiamna hi kum 1798-a lo tâwp ta kum 1,260 hrilhlâwkna tâwp hnu khân nasa taka lo pung chhovin, khawvêl hmun hrang hranga Bible hrilhfiahtu tam tak chuan kum 1843 vêlah khan thil pawimawh leh ropui tak eng emaw a lo thleng dâwn niin thu an keuh thlu deuh thup a. Chûng zînga mi hriat hlawh ber ni ta chu William Miller-a kha a ni âwm e. Ani thu hril avâng hian kum zabi sâwm leh pakuana lâi vêla thleng, Isua lo kal lehna atâna inbuatsaihna ropui tak, “Great Advent Movement” tia hriat ni ta kha a lo piang chhuak hial a. Hemi hnu hian thil pawimawh dang eng eng maw pawh lo thleng ve lehin, chu chuan “a la bâng” kohhran hi a hrin chhuah bâkah, chiang taka vântirhkoh pathum thuchah awmzia hriatthiamna pawh an lo nei ta bawk a ni.
Khawvêl puma inzâr chhuak vek kan kohhran lo pian chhuahna hi tawngkam danga kan sawi dâwn chuan, Daniela lehkhabu-in tâwpna huna hriatna pun tûr thu a lo sawi a thlen famkim tâkna a ni ti pawhin kan sawi thei ang.
A leh lamah, mi dangte thiam loh chantîrna rilru pu miah si lovin, “thim” hnuaia Kristian kohhran tam zâwkte an la awm tlat si dân hi ngaihtuah la. Bible thu bul thenkhat, entîr nân, Eden huna din lo ni daih tawh ni sarih ni Sabbath te pawh ngaihthah niin, a âiah milem be mite Rom atanga lo chhuak Sunday zâwk an han châwisâng ta tlat hi chu a mak a ni. Tin, mitthite awm zui zêl dân an hriatthiam lohzia pawh hi ngaihtuah bawk la, Kristiante zînga a tam zâwk daihte hian milem be mite zirtîrna, mitthite chu a hnuk a chah veleh khawi hmunah emaw an kal nghâl zêl a—thenkhat chu vânramah nuam taka han awm ta-in, thenkhat dang erawh chatuana kâng tûr hremhmunah an kal thung niin an ring a ni.
Hetih lâi hian keini chuan thu dik kan hre bîk a, he thu dik kan hriatna avâng hian kan lâwm mai bâkah, kan inngâitlâwm tel bawk tûr a ni ang.
Nilaini April 2
Thu chu zirin
Seventh-day Adventist-te’n Bible-a kan hmuh hrilhlâwknate hriatthiamna kan neih theih chhan chu William Miller-a’n kawng a lo sah kuak tawh vâng a ni a, a hnênah khân lawmthu sawi kan ba nasa hle a ni. Bible châng pawimawh thenkhat (entîr nân, Daniela 8:14 thu) a hriatthiam dân kha dik tâwk lo deuh mah se, a zir dân phung erawh a pawimawh êm êm tho va, a chhan chu ni hnuhnûng kohhran lo pian chhuah theihna atâna kawng lo sialtu a nih tlat vâng a ni.
Matthaia 5:18, 2 Timothea 3:15–17, leh Luka 24:27 te chhiar la. Hêng chângte’n Bible hrilhlâwknate kan zir dân tûr nia an sawi chu eng nge ni?
Kawng thenkhatah chuan, Bible thute zir hi milem zai sawmte rem khâwma intihsiakna neih nên pawh a danglam vak lohna lâi a awm thei ang. Milem them pahnih thum lek hmang chuan milem pum pui lan dân tûr suangtuah chhuah thiam a harsa hle dâwn a. Chûng milem them pahnih thum i kenahte chuan sakawr taksa bung a ni ngei tih i hriat i hmu a; tichuan, sakawr lem i rem khâwm niin i ngâi ta mai rêng bawk a. Nimahsela, milem them thenkhat dangte chu âr te, bâwng te a ni ve leh bawk si. Milem them zawng zawngte i han rem khâwm zawh vek hnu chuan khawi emaw lâia ram lem (landscape) i lo rem reng a ni tih i hre ta a. Chutah chuan khawpui te, ran vulhna hmun te, a piah deuhah tlâng dung mâwi tak tak te a awm bawk.
Kristian thenkhatte’n Bible an zira tih dik/fuh loh an neih thin pawi tak pakhat chu Pathian Lehkhabu hi eng emaw atân bîka hman theih thu sawi tha tak tak leh thu fing chi hrang hrang dah khâwmna nia an ngâi hi a ni. Entîr nân, mi thenkhat chuan Gideon International buatsaih, Gideon’s Bible phêk hma lama Bible zir kaihhruaina tâwi tê leh hriatthiam awlsam tak ni bawk si an lo dah hi an hmang rim êm êm mai a. Hetah hian thupui hrang hrang atâna chhiar tûr Bible chângte dah zêl niin, chu chu kan thil zir tûr apiang atâna Bible zirtîrna pum pui khâikhâwmnaah an ngâi hial thîn.
Vânduaithlâk takin, hetiang ngaihdân hi hrilhlâwkna thute zirnaah pawh a rawn chhawm lût bawk a. Bible châng khawi emaw lâi hi—a chheh vêl thute ngaihtuah tel miah lova la chhuakin—chanchin thara an puan thil thlengte-ah an lo hmeh bel zung zung mai thîn a, Bible châng dangte’n an lo sawi ve-te chu an ngaihtuah chang tawh ngâi rêng rêng lo. Hei hian hrilhlâwkna chungchâng chhuina lehkhabu tam tak hring chhuakin, chûng lehkhabute chu kum tam vak lo a liam hnu-ah ziah danglam deuh hret emaw, siam that emaw a ngâi tlângpui hlawm nghe nghe a. A chhan pawh, thil lo thleng tûr nia an sawite chu a lo thlen leh tâk si loh avâng leh, a lo thlen hun tûr nia an sawiah a lo thlen tâk loh thin vâng a ni.
Chuvâng tak rêng chuan, kan thu zir tûr chungchâng inziahna Bible châng thenkhat chhiara duh tâwk mai lovin, chumi chungchânga Bible-in a lo sawi zawng zawngte chu ngun taka zir kim vek a pawimawh êm êm a. Tin, a sawina boruak leh a chhehvêl thilte pawh kan ngaihtuah tel a tûl thîn bawk. Bible thute hi ziah a nih hun leh ziah a nih chhante ngaihtuah chang miah lova lo hrilhfiah ve ngawt a awl khawp mai a. Mahse, chutiang chu tih hauh loh tûr a ni.
An rin dân, entîr nân, thih hnua kan awm zui dân chungchâng emaw, Chawlhni chungchâng emaw nem nghehna atâna Bible châng thenkhat chauh la chhuaktute nên Pathian thu in lo sawi dûn/ho ve tawh em? Chumi tuma i thil tawn chu eng nge ni? Chutianga ti thînte chhân lêt dân tha ber chu eng nge ni ang?
Ningani April 3
Tehkhinna anga ngaih tûr nge a ngialngana pawm tûr?
Hrilhlâwkna thu zirtute’n thil pawimawh tak an ngaihtuah tûr awm chu, Bible-in tawngkam a hmante hi a ngialngana lo lâk tûr nge ni a, entîrna emaw, tehkhinna emaw anga lo ngaih zâwk tûr tih hi a ni. A ziaktuin entîrna tawngkam a hmang a ni tih chu eng tin nge kan lo hriat theih ang a, tin, chu tawngkam a hmanin a entîr chu eng tin nge kan lo hriat theih bawk ang? Chumi hriat theihna kawng pawimawh tak chu, eng tin nge a entîrna tawngkam hman chu Bible hmun hrang hrangah hian ziaktu dangte pawhin an lo hman ve hlawm tih en kual a ni a, chu chu tûnlâi huna kan hman dân nêna inang lo mai pawh ni lovin, inpersan daih pawh a ni hial maithei nghe nghe bawk. Entîr nân, mi thenkhat chuan Daniela bung 7-a a tawngkam hman “savawm” tih hian Russia a entîr niin an ngâi a, a chhan pawh tûnlâi hian savawm chu Russia ram chhinchhiahna atâna hman a nih ve fo vâng a ni. Mahse, hetiang hi hrilhlâwkna thua entîrna hrang hrang awmzia hrilhfiah dân him leh rintlâk chu a ni hauh si lo.
Hêng Bible chângte hi chhiar la, Bible thute hi Bible thu vêk hmanga hrilhfiah tûr a ni tih hre reng chungin i chhiar dâwn nia. Hêng Bible châng hrang hranga entîrna tawngkam thuhmun lo lang vek chu eng nge ni a, chu tawngkam chuan Bible-ah hian eng nge ni a entîr thin sawi ang che.
Dan. 7:7, Dan. 8:3, Dan. 7:24 ______________________
______________________________________________
Thup. 1:16, Eph. 6:17, Heb. 4:12 ____________________
______________________________________________
Thup. 12:1; Thup. 21:2; Eph. 5:31, 32; Jer. 6:2 __________
_______________________________________________
Dân zawm awlsam êm êm, “Bible-in tawngkam a hmante hi Bible tawngkam vêkin a hrilhfiah kan phal tûr a ni” tih hi kan zui a nih chuan, hrilhlâwkna thua entîrna leh chhinchhiahna tawngkam hrang hrang an hmante zînga a tam zâwk daihte hi a awmzia kan hrethiam ngei ang. Entîr nân, “kî” tih chuan sawrkâr thuneihna emaw, ram emaw a entîr tlângpui a. “Ngûnhnâm” tih chuan Pathian Thu a entîr tlângpui a. Tin, “hmeichhia” tih chuan kohhran a entîr thîn tlângpui bawk. Hêng atang pawh hian Bible thute chu Bible thu vêkin a hrilhfiah nghâl zêl a ni tih kan hre thei ang.
Zawhna chhân ngei ngâi la awm erawh chu, eng vângin nge Pathian hian a thil sawi duh chu tawngkam pângngâi hmanga sawi ta mai lova, entîrnate leh chhinchhiahnate hmanga a sawi kher le? tih hi a ni a. Entîr nân, eng vângin nge Petera hian khatih hun lâia Rom khawpui kha “Babulon” tiin a lo sawi le? (1 Petera 5:13 en la)
Pathianin entîrna emaw, chhinchhiahna emaw hmanga hrilhlâwkna thu a lo sawi thîn hi a chhan hrang hrang a awm ang a. Entîr nân, Thuthlung Thar kohhran chungchângah, Thupuan bu hian khatih lâia Rom sawrkâr kha thil sual râpthlâk tak titu tiin lo sawi ta bawl bawl mai se chuan, kohhranin tihduhdahna nasa tak a tawrh mêk kha a zual leh sauh ngei ang. A hman chhan chu eng pawh lo ni se, Pathian hian entîrna leh chhinchhiahna a hmante hi a awmzia hrethiam tûrin min duh a ni tih kan ring ngam tûr a ni.
Bible ziaktute’n entîrna tawngkam an hmante leh hrilhlâwknate hi a zawng a za chuan a awmzia hrethiam vek rih lo mah ila, eng tin nge kan hriatthiam theih chintea rilru kan pêkna chuan kan rinna a tih chak sawt theih tho le?
Zirtawpni April 4
Zir belhna: Ellen G. White-i lehkhabu, Indona Ropui bung 18, “America-a Siamthatu” (phêk 317–342) chhiar ni se.
“Pathian thu hriltute leh mi tam tak chuan Daniela lehkhabu leh Thupuan bu-a hrilhlâwknate hi mihringte hriatthiam theih loh tûr thurûk ril tak niin an sawi thîn a. Nimahsela, Krista khân a zirtîrte chu anmahni hunlâia thleng tûr nia zâwlnei Daniela’n a lo sawite kha ngaihven tûra hrilhin, “A chhiar apiangin a awmzia hre rawh se” (Matthaia 24:15) a ti a nih kha. Tin, Thupuan bu hi chu thurûk a ni a, mihringte hriatthiam tûra ziah pawh a ni lo tih ang ngaihdân hi chu a lehkhabu hming, ‘Thupuan’ tih nên pawh a inkalh nghâl hrim hrim bawk a. Heti hian a thuhmahruaiah kan hmu nghe nghe: ‘Isua Krista thupuan chhuah, Pathianin a bâwihte a hriattîr atân a hnêna a pêk, thil lo thleng thuai tûr thu chu. . . . He hrilhlâwkna bu thu chhiartu leh ngâithlaa, a chhûnga thu ziak pawmtute chu an eng a thâwl e; a hun chu a hnâi tawh si a’ (Thupuan 1:1–3).
“He thu hi Pathian thâwkkhumna changa a lo ziah a ni a, chuti a nih chuan mihring ve mai ni site hian eng tin nge Thupuan bu hi thurûk, mihringte’n a awmzia an hriatthiam phâk ngâi loh tûr thuril a ni an tih mai ngam zâwk le? Thurûk hâi lan tawh, lehkhabu inkeu sa a ni. Thupuan bu kan zir hian kan rilru chu Daniela lehkhabu-a hrilhlâwknate lamah hruai kîr a ni thîn a, hêng lehkhabu pahnihte hian zirtîrna thu pawimawh ber, Pathianin mihringte hnêna a lo pêk, khawvêl chanchin tâwp dâwn hnaiha thil thleng tûrte chungchâng a lo sawi chu min hriattîr a ni.
“Johana hnênah khân kohhranhote’n an la tawn tûr thil chi hrang hrang, phûrawm tak tak ni bawkte chu puan chhuah a ni a. Pathian mite dinhmun, an tâna thil hlauhawm awm, buaina an hmachhawn tûr leh a tâwpa chhanchhauha a awm tâk dân te chu a lo hmu lâwk vek a ni. Thuchah hnuhnûng, leia rah seng tûrte rawn ti hmintu tûr chu a lo ziak a, chûng zînga thenkhat chu vânram buhzêma dah tûr buhphalte niin, thenkhat dang erawh chu boralna meipuia tuah tûr thingfâkte an ni ve thung ang. A hnênah khân thil pawimawh tak tak, kohhran hnuhnûng ber tân phei chuan pawimawh zual êm êmte chu puan chhuah a ni a. Dik lohna hawisana thutak lam rawn hawitute chu buaina leh boralna lo thleng mai tûr chugchângah an mamawh tak zirtîrna thu pêk an ni ang. Lei chunga thil lo thleng tûrte hi hre lovin tu mah an awm tûr a ni lo.”—Ellen G. White, Indona Ropui, pp. 340, 341.
Sawi ho tûrte:
1. Hrilhlâwkna thu zirin kan rinna a tih chak sawt theih dân kawngte chu eng nge ni? Hrilhlâwkna thute—thenkhat phei hi chu kum sâng eng emaw zât liam taa ziah, thleng tûr nia a sawi thilte pawh a thlen hma daiha lo ziah tawh ni leh nghâl a ni a—zînga engte hian nge Bible i rinna ti nghet sauh a, chu âi pawha pawimawh zâwk a ziaktute thâwkkhumtu Pathian i rinna ti zual sauh le? Entîr nân, Daniela bung 2 hian eng tin nge Pathian a awm ngei tih ni mai lovin, Pathian chuan nakîna thil lo thleng tûr pawh a lo hre sa vek bawk a ni tih rin ngamna tûr chhan tha tak min pêk?2. Hrilhlâwkna thute hrilhfiah tumna huaisâr leh rinhlelhawm tak tak lak atanga kan lo invên theih dân tûr kawngte chu eng nge ni? Keimahi kohhran chhûng ngei atang pawh hian hrilhfiahna dangdâi tak tak a lo chhuak fo tawh a ni tih kan hria em? Eng vângin nge eng kim kan fiah a, a tha apiang kan pawm tlat theih nân kan fîmkhur hle a tûl (1 Thes. 5:21)?