Zirlai-10 2024 2nd Quarter Craddle Roll

ZIRLAI 10-NA
NEHEMIA |AWNG|AINA

Changvawn: “Aw PATHIAN, ka \awng\aina ngaithla ang che,” Sam 61:1.

Bible Chang: Nehemia 1:1,2, 9.
ZIRLAI TUM: ISUAN ka awm a ngaihthlak \hin avangin Amah biak zel ka duh a ni. Ka \awng\ainate A ngaithla \hina, min \anpui dan tur pawh A hria.
NU & PATE TAN: Naupang kum 2 mi lek hnenah Isua chanchin zirtir hi pawimawh tak meuhin i hria em? Ani chuan a manthiamin, hrilh tlak a ni meuh dawn em ni ang? Hei hi lo hre teh: “Naupangten an rilrua an ngaihven hmasak ber tur pakhat chu ISUA HMING HI a ni a, an tet te lai a\angin \awng\aiin Isua hnenah hruai \hin ang che u, \awngkauchheh an zir chhoh \an mek laiin an tana sakhuana manthiamtir theiturin Isuan A siam si a” (AH 321).
SIAMTU tih thu angte an tette lai a\angin Pathian nihna an hriat makmawh chu a nidawn lo’m ni? Chutiangin thudangte pawh hriattir fo ni ta se.
Zawhna awm thei chu, engtinnge naupang tete hnenah sakhaw thil i zirtir theih ang? Thurinte chu a hrethiam teuh si lova. Nileng lenga sermon sawi khum tur zawng an ni hauh lovang. Tih dan tur Pathian min hrilh chu: “In ina in \hut laite, kawnga in kal laite, in mut laite leh inthawh laite pawhin (Pathian Dan) in hrilh mawlh mawlh mai tur a ni” (Deut 6:7)
Chumi awmze pakhat chu, nilengin chutiang tihna tur remchang chu in zawng reng tur a ni. Sakhuana thil hi chibaibuka kun lai emaw Chawlhni inkhawmlai emaw chauha hman tur a ni lo. Krista hnen lama fate hruai tih awmzia chu an hnena hun remchang apianga Isua an hriat theihna tura tih hi a ni.
A awmze dang leh chu Isua awmna hmuna mahni ngei cheng tihna a ni a, in chhungkaw pumpui enkawltu, hmangaihtu Isua bula awm an nih an inhriat theihna tura tih a ni. Naupangte hian Isua awmdan lak leh A tihdan zir hi a awlsam em em thei a ni.

TIH TUR: I faten Isua an biak pawh theihna tura \anpui hi i tan ham\hatna duhawm tak a ni. Heng thilte hi i \angkaipui mai thei:
1) Isua biak hi telephone-a mi biak ang deuhin an hmel hmu loin kan inbetawn theia, Amah biak nan phei chuan hmanrua kan mamawh lova, a awlsam lehzual. Chutiang chuan i fa chu tihtir la, rawn chhang lo mahse A ngaithla reng tih hrilh ang che.
2) A \awng\aina chu Isuan A lo ngaithla reng tih hrethiam turin \anpui ang che. An thildil an hmuh nghal mai lohin an hrethiam lo mai thei e, kan dil zawng zawng kan duhdan kherin min chhang lo tih pawh hrilh la, Isuan kan tana \haber a hria tih hrilh la.
3) Naupang i \awng\ai puiin \awngkam mawl leh tluangtlam thei ang ber zel hmang ang che. Tawi fel tak, an manthiam ngei tur angin i tihpui \hin dawn nia!

BIBLE THAWNTHU: Nehemia chu Pathian thuawih \ha deuh mai a ni a. Thil a ngaihtuah nasa em ema, a hlim thei lo a ni. Zanah a muhil thei lova, chhun lamah pawh chaw pawh a ei thei loa, a hmel chu a lungngai hle mai a ni.
Nehemia lungngaih chhan ber chu an khawpui Jerusalem tihchhiat a nih vang a ni. Hmelma, misualhoten an hala, mite an thata, inte a chhe vek a ni. A \hiante leh a chhungte chuan in an mamawh a, a hmunte a bal em em a, tihfai a ngai bawk a. Khua pawh chu kulha hung a ngai bawka, mahse titu tur an awm bawk si lo. Tihna tur pawisa pawh an nei lo a ni.
Nehemia chuan Jerusalem kal vea, inte chu va sak a duh em ema, mahse ram hla deuh maiah chuan lal chaw petu a ni si. Lal bula a awm loh chuan lalin chaw a nghei thei bawk si lo. Engtinnge ka tih ang aw? a ti a. Nakinah chuan Pathian hnenah a \awng\aia, tihdan tur hriat theihna a dil ta a ni. Isua chu amah \anpuitu atan a sawm ta a. Tihian a ti a ni: LALPA, khawngaih takin ka dilna hi lo ngaithla ang che. Jerusalema kan mite leh chhungte \anpui ka duh a, tihngaihna ka hre si lo. In sak te, khawpui tihfai te, hna tamtak thawh a ngai a; tihdan tur min hrilh ang che. Ka \awng\aina min ngaihthlaksak avangin lawmthu ka sawi e” tiin a \awng\ai a.
Zingah te, chhunah te, tlaiah te, zanah te, a remchang ang angin a \awng\ai fo \hin a. Vawi tamtak a \awng\ai a ni. Isuan a \awng\ai A chhan hma chuan a \awng\ai zui zel thova, a beidawng duh miah lo a ni.
Nakin hnuah chuan Isuan Nehemia \awng\aina chu A rawn chhang ta a ni.
Lalber chuan Nehemia hnenah, “I hmel a va ngui ve, i lungngai deuh em ni?” a ti a, Nehemia chuan, “Ka lungngaih deuh chhan chu ka chhungte leh ka \hianten chenna tur in an nei lova, kan khawpui Jerusalem lah chu a chhe veka, a ram vek mai si a” a ti a.
Lalber chuan, “Engtinnge ni ang le? Engtinnge kan tih tak ang?” a ti a. Nehemia chu Isua hnenah a \awng\ai leh vata, lalber hnena thil sawi dan tur min hrilh rawh tiin a dil a ni. Isua chuan a \awng\aina chu a chhang a, Nehemia hnenah chuan lalber hnena thil sawi dan tur a hrilh ta a ni. Nehemia chuan Lalber hnenah chuan “Khawngaih takin Jerusalemah kal min phalsak la, ka chhungte leh \hiante tan in ka saka, kulh te pawh kan din theih nan pawisa pawh min pe hram ang che” a ti a.
Isua chuan Nehemia chu A \anpui a. Lalber chuan Jerusalema a kal chu a phalsaka, pawisa a mamawh zat tur (tamtak) a pe ta bawk a ni. Chubakah chuan kalkawnga vengtu turin sipai pawh a rualin a kaltir bawk a. Nehemia chu a lawm em ema, Isua hnenah lawmthu a sawi a ni.
Tichuan Nehemia leh Juda mi tamtak leh sipaite chu Jerusalem khawpui lamah chuan an kal ta a. Pathianin A veng zela, tluang takin an thlenga, an tihtur hrang hrang chu an va ti zo thei ta a ni.
Nangni pawh Isua hnenah in mamawhte in hrilh khan Isua chuan A lo ngaithla renga; a chang chuan rang takin A pe che u a, a chang chuan lo nghak rih lawk rawh te a ti a ni. A chang leh “Hei hi chu i tan a \ha lovang, ka pe lo mai zawk ang che” te a ti \hin a ni. Mahse in mamawh apiang chu in dil phawt chuan A pe zel dawn che u a ni.