Zirlai-10 -2024 2nd Quarter
Zirlai 10 June 1–7, 2024
thlarau biakna Hâilan
Chângvawn: “Lalpa ngêi chu âu thâwm nên, vântirhkoh chungnung ber âw nên, Pathian tâwtawrâwt rî nên, vân a\angin a lo chhuk dâwn sî a; Kristaa thi tawhte chu an tho hmasâ ang a; chu mi hnû-ah chuan keinî nunga lo la awm rengate hi, boruâkah Lalpa hmuâk
tûrin, anmahnî ruâlin, chhûm zîngahte khian lâk chhohvin kan awm ang; chutichuan kumkhuain Lalpâ hnênah kan awm reng tawh ang,” (1 Thesalonika 4:16, 17).
Sabbath Chawhnû June 1
Chhiar tûr: Isaia 8:19, 20; Thuhriltu 9:5; Matthaia 10:28; 24:23–27; Johana 11:11–14, 21–25; 1 Thesalonika 4:16, 17; 2 Thesalonika 2:9–12; Thupuan 16:13, 14.
Chhuân eng emawti liam ta a\ang khân ‘thih dâwn nuntawng’ (Near Death Experiences, NDEs) chungchâng a lo lang \an a; chutah chuan mî an lo thî emaw/nîkhaw hre lova an awm emaw hnûah an lo nung/harh chhuak leh a, chumi chhûnga an thil hmuh leh hriat niâwm thil ngaihnawm takte an sawi a. Chutiang chungchâng sang tam tak chu ziah chhuah leh zir chianna neih a ni a. Khawvêl pum puiah, Kristian khawvêlah meuh pawh, mi maktaduai têlte chuan mî an thih hian an thi tak tak lo tih \anchhanah an hmang a. Hê thlarau biakna lungphûm hi Setana bumna zînga darh zâu leh hlawhtlinpui ber a ni.
Dik takin, thlarau biakna hian Edena rûlpuiin Adama leh Evi-te hnêna, “In thi ngêi ngêi hauh lo vang” (Gen. 3:4) a tih a\ang khân bul a lo \an tawh a. Khawvêl hun inher zêlah, thih hnû pawhin nun hi engtin emaw a la awm zui zêl niâwmin kawng hrang hrangin a lang chhuak a. Hê ngaih dân hian kum zabi 19-na laia sâkhaw pâwl chêtna danglam tak mai lo awmin, Fox sister-te khân mi thi thlaraute hnên a\angin an zawhna chhânnate an dawng theiin an inchhâl a ni.
Lei lama inbeihnaah, Setanan thlarau biakna thiltih hmangin mi maktaduai têlte chu a bum dâwn a. Thupuan bûin a târ lan angin, hei hi amâ thuneihna hnuaia khawvêl dah tuma a beihna tûr kawng khat a ni.
Hê zirlaiin a tum chu, tâwpna huna Setana bumna laka kan invênhim theihna kawng awm chhun chu Krista nêna mimal taka inlaichînna neih leh, Bible zirtîrnatea dinngheh a ni tih hi a ni. Hetah hian kan mita thil hmuh leh kan benga kan thil hriat chu eng pawh ni se, thihna chungchâng zirtîrna pawh a tel bawk dâwn a ni.
Sunday June 2
Thlarau Biakna Nghawng |halote
Thihna hi nun rahbi thara chuânna anga sawina hi mihringin thih theihlohna nei sâ rêng anga ngaihna behchhan a ni a. Hetiang ringlote ngaihdân hian kohhran hmasâah khân bû rawn khuârin, Rome khawvêl zâu zâwka mîten rinna an hriatthiam theih nân, Bible lungphûm pênsan nâna tih a ni: “Thlarau thi thei lo a awm anga zirtîrna hi thurin dik lo, Rome-in ramhuai beho a\anga a lâk chhâwn, Kristian kohhrana a rawn zeh luh zînga pakhat a ni.”—Ellen G. White, Indona Ropui, p. 549.
“Taksa tihluma thlarau tihlum thei lotûte chu hlâu suh ula; Gehena-a thlarau leh taksa tiboral theitu erawh chu hlâu zâwk ang che u,” (Matt. 10:28). Thlarau thithei lo awm anga rinna chungchângah, hê châng chauh pawh hian eng nge min zirtîr tûr ni ang le?
Lalpan A mîte chu thlarau biakna ang chî rêng rênga inhman a khap tlat a. An zînga chutiang lam chî “dâwi-ât te ramhuai zâwl rawih te, dâwithiam te, mitthi biak chîng mîte” (Deut. 18:11) neih a khap a. Chutiang mîte chu lunga den hlum tûr an ni (Lev. 20:27). Hremna chu khauh hlê angin a lang a ni thei; mahse, chû chu Israelten pathian dik lote an biakna tûr laka vên nâna ruâhman a ni.
Dâwithiamna hi ramhuai lam thil a ni. Mipuite chu Pathian nêna inlaichînna dik lo nei tûr leh, chibaibûkna suak lamah a hîp a. Mahse, chû chuan thinlung duhna ril ber chu a pe thei sî lo a ni. Thlarau biakna hi khawvêl sala man nâna Setana thil ruâhman a ni a. Mahse, Isuan, a khawngaihna leh thiltihtheihnain, anmahni phuârtu thil \ha lo khaidiat phuârna a\angin A chhuah zalên \hîn a ni.
Chhiar tûr: Thuhriltu 9:5; Joba 7:7–9; Isaia 8:19, 20. Hêng Bible chângte hian thihna chungchâng leh mi thîte nêna inbiakna chungchâng eng nge min zirtîr?
Mî a thih vêleh vâna lâwn nghâl anga rinna hi Bible zirtîrna kalh, Sunday-serhna ang deuh niin, hun rei tak kalpui lo ni tawhin, bû a khuâr nghet hlê bawk a; mîte thinlung a\anga thinthlâk pawh harsa tak a ni. Bible châng sawi tum ni hauh lo vin mi \henkhat chuan an rinna \anchhana hman an tum \hîn a. Mahse, hê zirtîrna dik lo hian Setana bumna, a bîkin tâwpna huna buaina tûr laka invênhimna tûr rêng a hnutchhiah lo a ni.
Kristian dangte hnêna mi thi dinhmun hrilh fiah i tum chânga i nuntawng chu eng nge ni? Tih dân \hâ hriat i neih chuan, chû chu eng nge ni?
Thawh|annî June 3
Thuthlung Hluia Thihna
Chhiar tûr: Sâm 6:5; 115:17; 1 Lalte 2:10; 11:43; 14:20. Mi thîte dinhmun chungchâng eng nge hêng chângte hian an zirtîr?
Thuthlung Hlui hian thlarau thithei lo chungchâng a zirtîr lo va. Thih hnûah pawh, rinawmte thlarau chu chatuan vân nuâm lama chho emaw, mi rinawm lote pawh chatuana kâng tûra hremhmun lama liam nghâl angin a zirtîr lo hek lo. Thihna chu ‘muthilhna’ angin a zirtîr mai zâwk a ni. Lalte bû chuan hetiang \awngkam hi a hmang a, “an thlahtûte hnênah an châwl (muhîl)” tiin thlahtubulte thihna chungchâng kha a sawi a. Sâm chuan “thihna muthilhna” (Sâm 13:3; 90:5) a ti a. Thihna chungchâng chu Joba chuan ‘tho leh lova muthilhna’ angin a sawi a (Joba 14:12). Sâm-phuahtu chuan heti hian a sawi belh a, “Kei erawh zawngin felna neiin i hmêl ka hmû ang a, Nangmah anna nei a ka men hunah chuan ka lungâwi tâwk zet ang,” (Sâm 17:15) tiin.
Assuria sipai rualte hneha tihboral an nih khân, sipai hote thihna chu ‘muthilh dêrna’ (Sâm 76:6, CJB) tiin a sawi a. Thihna chu thlarau chhuaka mi nungte hnêna thû sawi tûra thlâwk kuâl vêl anga ngaihna hi Bible zirtîrna ni lo vin, ringlo mîte a\anga lo chhuak a ni.
Thihna chungchang thutak hriat thiam lohna hian Setana bumna atân kawng a hawnsak a. “Mi tam tak chuan lainâte leh \hiante anga ramhuai bawlhhlawh rawn inlârte hi an la tawng dâwn a, chûng thlaraute chuan rinna hrang hlauhawm tak takte an rawn puâng ang. Mi khawngaih theihna kan
neihte hi an hêm thlâk nân an rawn hmang ang a, nia an inchhâlte chu pawm nahawm tak a nih theih nân thilmakte an ti bawk ang. Rawn inlârte chu ramhuai bawlhhlawh an ni tih leh, mitthîte chuan eng mah an hre lo tih thu dik Bible-a kan hmuhte hi hmangin, [thlarau] bawlhhlawhte chu do zo tûrin kan inpeih reng tûr a ni.”—Ellen G. White, Indona Ropui, p. 560.
Chhiar tûr: Daniela 12:2; Joba 19:25, 26. Hêng chângte hian mi thîte dinhmun chungchâng eng nge an sawi belh?
Thihna hi thawhlehna thlenga muhîla chawlhna a ni. Mi nung damte hnêna thu sawi tûra thlarau thlâwk kuâl vêl hi chu a awm lo. Ramhuaibe hoten thlarau khawvêl hi awmin an ring nâin, Israelte kha chuan thihna hi thawhlehna zîng thlenga muthilhna angin an hrethiam a ni.
Thihnaah hian kan insûn \hîn nâin, Krista-a thi tâte chungchâng hi heti zâwng hian han ngaihtuah teh: thihnain an mitte an chhîng a, chutah, Isuâ lo kal lehna chu lo thleng nghâl mai lo pawh ni se, thil an hriat leh hmasak ber chu Isuâ Lo Kal Lehna a ni dâwn tho a ni. Thawhlehnaa an thil ngaihtuah hmasak ber tûr chu: ‘Isua chu A lo kal leh thuâi a nih hî!’ tih a ni tho dâwn a ni.
Thawhlehnî June 4
Thuthlung Thara Thihna
Chhiar tûr: Johana 11:11–14, 21–25; 2 Timothea 1:10; 1 Korin 15:51–54; 1 Thesalonika 4:15-17. Engtin nge Thuthlung Thar ziaktûten thihna chungchâng an sawi dân leh Thuthlung Hluia mî chu a inmil?
Thuthlung Hlui leh Tharah hian thihna entîr nân muthilhna hman a ni a. Bible hmun 53-ah ‘thihna’ sawi nân ‘muhîl’ tih hi hman a ni a. Bible ziaktûten an sawi nâwn fo chu thih vêleha taksa chhuahsan tu thlarau thithei lo a awm lo tih hi a ni.
Thuthlung Hlui lamin a lo sawi thâwi deuh tawh chu Thuthlung Tharin a sawi belh a: chû chu Kristâ lo kîr leh huna thawhlehna ropui tak awm tûr chu a ni.
Chanchin |hâte hian Kristâ zâr chiaha chatuan nunna chu uâr takin an sawi a. Ringtûten chatuan nun rinngamna an neih chu hremhmun ramhuai zawng zawngte pawhin an chhuhsak thei lo. Kristan kraws-ah thihna chu A lo hneh tawh a. Thlân pawhin a mi mante chu a chelh hlen thei lo. Kristâ thawhlehna kha A lo kal leh hunah chuan ringtu zawng zawngte chu thlân a\angin an tholeh dâwn tih a tiamsak a ni.
Hêng Paula thusawite hi ngaihtuah teh: “Mitthîte kaihthawhin an awm sî loh chuan Krista pawh kha kaihthawhin a awm lo vang; Krista kha kaihthawhin a awm loh chuan in rin chu eng mah lo a ni ang a, in sualnaah chuan in la awm fo a ni ang. Chuti a nih chuan Kristaa muhîl tawhte kha an boral ta a ni ang,” (1 Korin 15:16–18). Mî an thihin vân nuâma awm tawh an nih sî chuan, hêng chângte hian eng awmzia nge an neih tâk ang le? Vâna lo awm tawh ni ta se, Paulan “anni chu ‘an boral ta’ a ni ang” a tih hi eng a tihna nge ni ang?
Paula thil sawi tum tak chu, Kristâ thawhlehna kha keini thawhlehna tûr lungphûm leh, thawhlehna tel lo chuan ‘in rinna chu eng mah lo niin, in sualah in la awm reng a ni ang” a, mi thîte pawh thlânah an boral ta a ni ang a tihna a ni.
Hêng chângte hi Isuâ lo kîr leh huna thawhlehna beiseina kan neih sawina Bible chângte nên a induh a, chutih hunah chuan “rochan chhe thei lo, bawlhhlawh kai lo, chuai thei lo, vâna in tâna khêk chu in hmu” (1 Pet. 1:4) dâwn a ni.Chutih laiin, mi thîte chu tûna vâna awm tawh lo ni ta se, engati nge Peteran kan tâna rochan tûr ‘vâna khêk’ chu a sawi ang ni? Thuthlung Thar ringtûte chuan Kristâ lo kal lehna leh mi thîte thawhlehna tûr chu nghâkhlel takin an thlîr a, hê beiseina avâng hian nuna harsatna hnuaiah pawh rinawm takin a awmtîr tih a chiang hlê a ni.
Engati nge thawhlehna hi Kristian rinna atâna beiseina thiltithei tak a nih? Kraws neiin thawhlehna awm ta sî lo se, engtin nge ni ang? Eng beiseina nge kan neih theih ang? Chuti chu, thawhlehna hi kan rinna pêng pawimawh a ni em?
Nilâinî June 5
Hun Hnuhnunga Thlarau Biakna: |hen 1
Chhiar tûr: Matthaia 24:5, 11, 24; 2 Thesalonika 2:7–9; Thupuan 13:13, 14; 16:13, 14. Eng bumna ang chîte nge mîten tâwpna hunah an hmachhawn dâwn?
Isuâ lo kal leh hmâ lawkin mipuite bum nân Setanan “chhinchhiahnate leh thilmakte” bâkah, thilmak tihna a hmang dâwn a. Thlarau bawlhhlawhten mî bum tûra thiltihtheihna an neihzia chungchângah, Ángel Rodríguez chuan thu pawimawh tak min hrilh a: “Mî an hneh theihna chu an thuchahah ni lo vin, thiltihtheihna chungchuâng an neih an lantîrna ‘chhinchhiahnate’ emaw ‘thilmakte’ emaw an tih theihnaa a ni zâwk a. Anni chuan chhinchhiahnate (poieō) an ti a, an finna leh thusawi thiamna ni lo chutiang hmang chuan mihring nihna lamah hian a thawk chak êm êm a ni.
“Hêng chhinchhiahnate hi ramhuai tih a nihnain a târ lan chu, hêng ramhuai chi thum [dragon, sakawlh leh zâwlnei der] \huikhâwmtu thuchah chu a nihphungah chuan thlarau lam thil a ni nâin—an \obul erawh chu Pathian a ni lo tih hi a ni. Lei leh vân huâpa inbeihna khârna hun a lo hnaih zêl lai hian ramhuai thiltihtheihna chu beisei loh dân daihin mihring chanchinah hian a lo lût dâwn a. Thlarau biakna lungphûm dik tak chu thlarau thithei lo chungchânga Bible zirtîrna pâwn lama mî niin, hei hian khawvêl chu a la bâwih dâwn a ni.”—“The Closing of the Cosmic Conflict: Role of the Three Angels’ Messages,” unpublished manuscript, p. 6.
Engati nge kan rilru sûkthlêk rinchhan mai hi a hlauhawm? Kan rinna nuntawngah a chhe zâwng leh \ha zâwngin eng pawimawhna tak nge an neih? Engtin nge Setanan kan ngaihtuahna kal hlên a kan rilru sûkthlêk lamah min hîp leh tlat \hin?
“Khawvêl bum tûra a beihna hnuhnung ber atân Setana chu hun rei tak a lo inbuatsaih ta. . . . Thlarau biakna \hang zêla bumna atân zâwi zâwiin kawng a lo buatsaih tawh a. A thil ruâhmante chuan an vâwrtâwp an la thleng lo va, mahse hun tâwp rêtah chuan an la thleng dâwn a ni. . . . Pathian thûa rinna azâra Pathian thiltihtheihna humhima awmte chauh lo chu, khawvêl pumpui hi he bumnaah hian hruai luh vek an ni ang. Muân sualnaah hian mipuite chu awlsam takin awih-mutin an awm zung zung a, Pathian thinurna leih buâknain a rawn tiharh leh chauh dâwn a ni.”—Ellen G. White, Indona Ropui, pp. 561, 562.
Kan himna awm chhun chu Isua leh A Thû chu a ni. Mi maktaduai têl, vaibêlchhe têlten mihring thih hnu awm dân an hriat chian loh vânga mî an thih hnûah eng emaw nung la awm renga rinna tuipui len bo an ni thei tûr hi a mak lêm lo.
Tûnlai hian, eng bumna thu tlânglâwn takte lakah nge mi thi dinhmun hrethiamte chu vên him an nih?
Ningânî June 6
Hun Hnuhnunga Thlarau Biakna: |hen 2
Chhandamna kan beiseina hi Krista-a zungkâi a ni a. A kut-thisen kâi chu kan lama phar chhuakin, man tam tak sênga a inhlanna chu pawm tûrin min sâwm a. Amâ tâte lam tûrin Krista chu a lo kîr leh thuai dâwn a. Tita 2:13 chuan Kristâ lo kal lehna tûr chu “Beiseina lâwmawm” tiin a sawi a ni.
Setana thil tum chu hê beiseina tihchhiat hi a ni. Ani chuan Bible thutak leh Krista-a chhandamna laka mîte hruai bo tûrin thilmak te, chhinchhiahna leh thilmakte a ti dâwn a ni.
“Hetah hian mi thianghlimte chu an awm a, hetah hian Pathian thupêkte leh Isuâ rinna vawngtûte chu an awm e,” (Thupuan 14:12). Buaina hnuhnungah chuan, mîten Pathian thupêkte” emaw, “Isuâ rinna” emaw chu an vawnna dâl tûrin Setanan a tih theih apiang a ti dâwn a. Chuvângin zirtîrna eng pawh, chhinchhiahna te, thilmak emaw tih mak emaw hmanga a la bângte nihphung chi hnih hawisan theihna tûr ang chî lakah chuan kan fîmkhur hlê tûr a ni.
Chhiar tûr: Matthaia 24:23–27; 2 Korin 11:13, 14; 2 Thesalonika 2:9–12. Hêng chângte hian Setana mi bum hmanzia leh chêt dân chungchâng eng nge min hrilh?
Hun hnuhnung tâwp dâwnah, Setanan a bumna hnuhnung chu a la ti dâwn a: “Thilmak ti \hîn ramhuai thiltihtheihna lantîr nân, vânahte chuan mihring thiltihtheihnain a phâk rual loh thilmak râpthlâk pui puite a lo lang ang a. Ramhuai thlaraute chu, leia lalte hnênah leh khawvêl pumpuiah, bumnaa anmahni phuâr nghet tûr leh, vân sorkâr dova Setana indona hnuhnung bera tel vê tûra fuihpawrh tûrin an kal chhuak ang.
Hêng Setana palaite hmang hian, rorêltute leh mipuite chu thuhmun renga bum an la ni ang. Mi tam tak, ‘Krista ngei chu ka ni’ tia inchhâlin, khawvêl Tlantu chauhvina nihna leh chibai bûkna a chan tûr rawn chuhpuitute an lo chhuak ang a. Tihdamna thilmak ropui tak tak an ti ang a, Pathian Lehkha hriattîrna thu kalhin Pathian hnên atâ thu puan tûr neiin an insawi bawk ang.
“Setana ngêi chu Krista ang tak maiin a la inlantîr dâwn a, chu chu a bumna hnâa a thiltih ropui ber tûr a ni. Kohhran chuan a beiseina zawng zawng ropui taka a lo thlen famkim theihna tûrin, Chhandamtû lo kal lehna chu thlîr tûrin hun rei tak a lo puâng tawh a. Bumtu ropuichuan Krista chu lo kal ta ngêi angin a lantîr ang a. Khawvêl hmun hrang hrangah, Johanan Thupuan-a Pathian Fapa lan dân a sawi ang tak khân, mihring zîngah Setana chu ropuina êng tle sûra inthuamin a rawn inlâr dâwn a ni. Thupuan 1:13–15.”—Ellen G. White, Indona Ropui, p. 624.
Engati nge Kristâ lo kîr leh dân tûr leh, mi thi dinhmun hriatthiamna hi bum nih pumpelh nân a pawimawh viâu?
Zirtâwpnî June 7
Strobel harsatna erawh chu, thih hnû lawk-nun chungchâng leh Bible zirtîrnain Kristâ lo kal leh hunah chiah Kristianten an lâwmman an la dawng chauh dâwn tih sawi rem chu a ni.
Hetiang hian vaulâwkna pêk kan ni: “Lainâte leh \hiante anga ramhuai bawlhhlawh rawn inlârte hi mi tam takin an la tawng dâwn a, chûng thlaraute chuan rinna hrang hlauhawm tak takte an rawn puâng ang. Mi khawngaih theihna kan neihte hi an hêm thlâk nân an rawn hmang ang a, nia an inchhâlte chu pawm nahawm tak a nih theih nân thilmakte an ti bawk ang. Rawn inlârte chu ramhuai bawlhhlawh an ni tih leh mitthîte chuan eng mah an hre lo tih thu dik Bible-a kan hmuhte hi hmangin, bawlhhlawhte chu do zo tûrin kan inpeih reng tûr a ni.
“Leia awmte fiah tûra khawvêl zawng zawng chunga fiahna hun lo thleng tûr” (Thupuan 3:10) chu kan hmâ lawkah hian a awm ta. Pathian thua an rinna inphun nghet lote chu bum leh hnehin an awm ang. ‘Fel lohnaa bumna tinrêng nên’ mihring fâte hi a thuhnuaia dah vek tûrin Setana chu a thawk mêk a, a bumnate chuan punlun lam a la pan ta deuh deuh zêl a ni. Mahse mîten an duh thua Setana thlêmnaa an inpêk chauhvin a tum chu a hlen thei.
“|hahnemngai taka thutak hriatna zawngtu, thuâwihnaa an hun tihthianghlim tumtute leh, buaina lo awm tûr do zo tûra lo inbuatsaihte chuan thutaka khat Pathian-ah chuan himna an hmû ang. ‘Ka chhelna thû i pawm avâng khân … kei pawhin ka hum ang che,’ tih hi Chhandamtu thutiam chu a ni. Amaha rinna nghattu mi pakhat chauh pawh Setana saseh atâna hnutchhiah âi chuan, A mîte hualhim tûrin vâna vântirhkoh zawng zawngte tirh chhuah nghâl chu Chhandamtun a duh zâwk a ni.”—Ellen G. White, Indona Ropui, p. 560, 561.
Sawi Ho Tûr:
Kan rilrû min hnehsak tûrin engtin nge Setanan verther taka thlarau biakna ziârâng hi a hman theih ang? Tûnlai thiamna (changkâng) hian eng dinhmun nge a luah? Engtin nge mahnî hmangaihte chân (lusûn), an sûn tâkte chu tûna vâna awm ta anga ngai hnênah i rinna thû i hrilh theih ang? Eng thil nge sawi âwm ni a, eng chu nge inhmeh lo thei bawk ang?