Zirlai-13 2024 2nd Quarter Junior Zirlai
JUNE 29, 2024
ZIRLAI 13–NA
ISU, KAN LO LÂWM A CHE!
CHÂNGVAWN: “ ‘Galili rama mîte u, engati nge vân lam ena in din reng? Hê Isua in hnên atâ vâna hruai chhohva a awm hi, vâna a chho in hmû ang bawk hian Amah ngêi hi a lo kal leh ang,’ an ti a” (Tirhkohte 1:11).
Chhiâr Tûr: Tirhkohte 28:1-10; Tirhkohte Thiltih, pp. 445, 446; Kan Thurin Bulpuite, No. 25, 26, 28.
Chakna Thû: Isuâ lo kal leh thuaina tûr beiseina lâwmawm chungchâng mi dangte hnêna hrilh tûrin Pathian Thlarauvin min tichak \hîn. Zirlâite Puâl: Chhûngte thihsan nih in tawng tawh em? Eng ang takin nge in rilrû a awm? Wesley-a chuan a vawi khat nân chhûngte thihsan a tuâr a. A lungngâi hlê chungin, Isuan beiseina A rawn thlen chungchâng mi dangte hnêna hrilhna remchâng a ni ta hlauh zâwk a!
INA a nû a rawn hâwn leh chuan, Wesley-a chuan a hlâuthâwngin a meng râng nasa hlê mai a. “Ka nu, eng nge lo thleng ta? Ka pû chu engtin nge a thih? Engang hmêl nge a put? Tûnah hian engtin nge ni zêl?” tiin a lo zâwt a.
Hlâuthâwng taka a fapa kum 10 mî kâ a\anga chûng zawhna lo chhuak zawng zawng avâng chuan a nû chu a nui var var a. A fapa Wesley-a kuah tûrin a kûn hniâm a. A \ah nasat avângin a mît chu pâwngin, a sen deuh rûm bawk a.
“Ni e, a pû chu a lung a phu tawh lo va. Lungphu châwl natnain a tlâkbuâk leh a, tûn \um phei chu a tuâr na zuâl a ni. A thihpui ta thut mai a ni. A hmêl ka hmuh khân tui taka muhîl siâi siâi hi a ang ber mai. A thlamuân hmêl khawp mai,” a ti a.
Wesley-a chuan, “A pi chuan tûnah eng nge a tih ang?” tiin a zâwt a.
A nu chuan, “Amah maiin a khawsa tawh dâwn a. A lungngai hlê mai a, a khua harin a ngâi hlê dâwn dih ka hre mai. Anni hi kum 50 chuâng mah an lo innei tawh sî a,” a ti a.
Makti takin Wesley-a chuan, “Chû chu a rei hlê mai!” a ti a.
A nu chuan, “I pû chu tlangvâl leh hrisêl \ha taka siam tûra Isua chu a lo kal leh thuai tawh dâwn avângin ka lâwm hlê mai. Tûn hnâi kum eng emawti chhûng chu hrisêl lohna neuh neuh hi a ngah riâu mai a, nâa pui hi a ngah hlê a ni. Isuâ lo kal lehna tûr chu ka nghâkhlel hlê mai,” a ti a.
Wesley-a chuan, “Kei pawh! Vânram kan thlen hunah chuan a pûin amâ chunga min chuântîr \hîn anga min phurh leh ka duh a ni!” a ti a.
A nu chuan nui var var chung hian, “Chutianga insakawr chungchuân leh chu a tihpui duh ngêi chein ka ring!” a ti a. Chutiang thil ngaihtuahin Wesley-a chu a phûr hlê a ni.
A nu chuan, “Hetia a thi thut mai hi chuan min \hâwng hlê a ni,” a ti a.
Chawlhkâr lehah chuan Wesley-ate biak ina a pû vuina inkhâwm hmang tûrin an chhûngte mi tam tak an lo pung khâwm a. |henkhat chu Wesley-ate inah an thleng a, chûng zîngah chuan a nî Jane-i leh a pami Steve-a, Kristian pawh ni vê lote chu an tel a.
Vuina inkhâwmah chuan kohhran member leh lainâ leh \hian \hâ tam tak an lo kal a. Biak in kawt lam phei chu pangpâr mâwi takin an chei a. Biak in a\ang chuan rimâwi ngaihnawm tak a lo ri chhuâk riâi riâi a.
A pami John-a chuan a pû chanchin—a pianna hmun leh khawsak zuina, chhiarkawp zirtîrtu a nih thû te, sakawr a ngainat leh apple pies tui a tihzia te, college lama a nupui ni ta nêna an inchhar dân te, tû leh fâ tam tak a neih thûte nên lam a sawi a.
Pastor William-a chuan Isuan hê leia lo kîr leh A tiâm ‘beiseina lâwmawm’ chungchâng bâkah, a pû chu Isuâ lo kal leh huna a thlân a\anga Isuan A kaihthhawh ngei a beisei thûte chu a sawi a.
Mipui chuan, “Beiseina Nung Reng Thinlungah Kan Nei” tih hlâ an sâ a; Wesley-a chuan a thû chu \hâ a tiin, rimâwi pawh chu ngaihnawm a ti hlê mai. Beiseina an neih chungchâng an sawi nasa hlê mai tiin ani chuan a ngaihtuah zui neuh neuh a. Wesley-a chuan a pami Steve-an a pû thihna chunga a ngaih dân a sawi chu mak a ti hlê mai. Pastor William-a thil sawi zawng zawngte kha, a engah mah a ring vê lo em ni le âw. A pami chuan a thinlunga beiseina rêng a nei vê lo em ni dâwn le âw tiin a ngaihtuah bawk a.
Chûmi ni chawhnu lamah chuan Wesley-a leh a chhûngte chuan kohhrana an chhûngten chawhlui an buatsaihsak chu an kîl tlâng a. An zâ chuan chaw tuihnâi tak chhum chawp ngai lova an hlui chu ei manhlâ an ti tlâng hlawm hlê mai a. Mahse, a pû leh a chhûngte chungchâng ngaihtuah lêt nân ngawt chuan hun an hmang bîk lo.
Mi \henkhat chuan ramhnuaia an riah chhuah \uma zan khat an bûk a sawp thûte chu sawiin, hlim takin an nui bâwk bâwk a. |henkhat chuan a pûin a dam laia in leh a vêl a enkawl \hin dân anga ti tûra pî ber chu an \anpui dân tûrte an sawi bawk a. A pami Steve-a chuan khâmi nîa lîrnghîng na tak avânga mi sâng tam takin an thihpui chungchâng kha hria an la awm em tiin a zâwt a. Pi ber chuan a lû thingin, “Âih, mahse Isuâ a lo kal leh thuai dâwn tih chhinchhiahna a nih avângin LALPA chu fakin awm rawh se! A pu chu nakin lawkah kan la hmu leh thei dâwn a ni!” a ti vê thung a. An zâ chuan pawmpui takin an lû an lo bu nghat nghat hlawm a. A mittui lo hnâm \iâm \iâm chu hmûin, \henkhat chuan an lo kuah thung a.
Wesley-a chuan a pami Steve chuan engtin nge a ngaih tih hriat tumin a lo en rân a. Ani pawhin a lû a lo bu vê nghat nghat tih a hmuhin mak a ti hlê zâwk a. Wesley-a chuan a nû chu a nêk deuh tâlh tâlh a. “Ka pami Steve-a hian Isua a ring vê lo emaw ka ti a,” tiin a nû beng bulah a phun sâ sâ a. A fapa chu siâi zauh pah chuan a nui var var a.
A tûka mi tinin an \însan dâwn chuan, Wesley-a chuan Zirtâwpni tlâiah “Isu, Kan Lo Lâwm A Che” tih party a huaihawt thei ang em tiin a zâwt a. A nû chuan makti deuh takin, “Chû chu eng nge ni?” tiin a zâwt a.
Wesley-a chuan thla eng emawti liam ta khân an Sabbath sikul zirtîrtuin Isuâ lo kal lehna chungchâng a sawi a, chû chu A lo kal leh huna Amah lo lawmna tûr anga hun hlimawm tak an hman theih tûr thû a sawi tih a hrilh a.
A nû chuan, “Teh rêng mai, kan ti thei ngêi ang,” a ti a. Zirtâwpni tlâiah chuan a nû chuan an choka dawhkân chu puân rawng mâwi taka khuhin, bati tlêm a chhî a, zanriah kîlna thlêng ilo vêk kiangah chuan kut-hrûkna lehkhate pawh a chhawp zêl bawk a.
Wesley-a chuan baloon eng emaw zât hâmin bangah leh remchâng laiah chuan a târ bawk a. “Isu, Kan Lo Lâwm A Che” tih chu hmun uâl-âu leh langsâr lai takah chuan a târ bawk a.
A nûin eitûr eng ilo dawhkân lama a chhawp chhuah mêk lai chuan Wesley-a chu hlim takin a lo âu chêlchûl a.
A nû chuan, “Party-naa hetiang thil chhawp tel hi i duh a ni lâwm ni kha!” a ti a.
“Kan ei hmâin Bible châng ka’n chhiar \hâin ka hria,” tiin 1 Thesalonika 4 kêuvin Wesley-a chu châng 13-18 chhiar tûrin a sâwm a. “Nimahsela, ûnaute u, mi dang beiseina reng nei lote anga in lungngaih loh nân, muhîlte chanchin in hriat loh kan duh lo ve. Isua a thî a, a tholeh ta tih kan rin sî chuan Isuaa muhîl tawhte chu Pathianin amâ rualin a rawn hruai vê bawk ang. Hei hi LALPÂ thûin in hnênah kan sawi a ni. ‘Keini LALPÂ lo kal thlenga nunga lo la awm rengate hian muhîl tawhte chu kan lehkhalh tawp lo vâng,’ tih hi. LALPA ngêi chu âu thâwm nên, vântirhkoh chungnung ber âw nên, Pathian tâwtawrâwt rî nên, vân a\angin a lo chhuk dâwn sî a; tin, Kristaa thi tawhte chu an tho hmasâ ang a; chu mi hnûah chuan keini nunga lo la awm rengate hi boruakah LALPA hmuak tûrin anmahni ruâlin chhûm zîngahte khian lâk chhohvin kan awm ang; chutichuan kumkhuain LALPÂ hnênah kan awm tawh ang. Chuvângin, hêng thû hian inthlamuan tawn rawh u.”
Wesley-a chuan Bible khupin a nui var var a. “Isuâ lo kal lehna chungchâng hriat hi nuâm ka tiin, ka nghâkhlel hlê mai. Beiseina min neihtîr a ni,” a ti a. A nû pawh chuan pawmpui tih hriat taka nui var var chungin, “Aw, ka theihnghilh hman \êp. Ka pîin Isuâ lo kal lehna thû a sawi chhuah lai khân ka pamî Steve khân engtin nge dawngsawnga i hriat?” tiin Wesley-a chuan a zâwt a.
A nu chuan, “A thinlungah beiseina chî chu tuh a nih ka ring a. Chumi chungchâng chu ka nî Jane-i hnênah pawh ka sawi a. Ani hian kum eng emawti chhûng chu a lo \awng\aisak tawh \hîn a ni. A hnû deuh fêah khân zawhna zâwtin, Isua pawh hi a tuipui vê \an niin a lang. Kan zâin a tân kan dîlsak zui zêl dâwn nia,” a ti a.
Wesley-a chu a nui var var a. “Hlim taka Isua hmu tûra ka duhsak avângin ka lo \awng\aisak zui zêl ang. Vâna kan chhûngkaw zînga tel vê ngêi tûrin ani hi ka duh a ni,” a ti a.