Zirlai-2 2024 2nd Quarter Craddle Roll

ZIRLAI 2-NA

PATHIANIN BERAM VENGTU NAUPANG A VENG

CHANGVAWN: “Lalpa chuan ‘Ka awmpui zel ang che’ A ti a,” Rorêltute 6:16.

BIBLE CHANG: 1 Samuela 16:11-28; 17:34-36.
ZIRLAI TUM: Isuan min hmangaih vangin ramsa hlauhawm lakah pawh min vêng zêl ang.

NU & PATE TAN: Engemaw châng chuan chhungkuaah harsatna danglam deuhte a lo thlenga, chinfel mai a harsa \hin. Nuten an fa awmlaite ninhlei leh dehkhirh deuh riaua hriat chângte an neia, rilru hrehawm taka fate an lo kilkawi lai mêkin, paberin chaw tuihnai tak a rawn beisei ve bawk si! Chutih nâka laiin, sum lama indaih lohna leh thlatin bil pêk tur lo tam nên, a luhai thlak viau mai thei e! Hetiang hun harsat lai tak hian THLÊMTU a lo che ve vat bawk si nên! Kristianna theihnghilha, thinrim engphiara, intitaurau hial tur pawhin a thlêm \hin ang che.
Mahselang Pathian hian mitin tawrhtheih bâk thlêmna tawrh A phal ngai lova, pumpelhna kawng A buatsaihsak fo \hin a ni. “In chhûngkua kha Van chhûngkaw entirna a nih theihna tûrin, nangmahni \anpui turin A vantirhkohte A rawn tir zêl ang.” “Van angelte chuan rim taka thawk nute chu an vil renga, ni tina an phurrit phurh chu an chhinchhiah vek a ni. An hmingte chu khawvelah hian hriatlâr a ni kher lo thei e, mahse Beram No Nunna Bu-ah chuan in la hmu thei dâwn si a ni.” Adventist Home, p. 244.
Pathianin harsatna tawh hauh lohna tûr nite A tiamsak loa, mahse ni tin harsatna hneh zêl tura min awmpui A tiam a ni. Chuvangin in harsatna hunah pawh, a thutiam ringin, kawng A sialsak zêl ang che.

TIH TUR: I fate hnêna Isua hmangaihna zirtir turin thil danglam tehlua a ngai lo. Ni tina thilthlengte i hmachhawn dân kha a pawimawh ber a ni. Thlarau lam thilte zirtir i tum phawt chuan, remchang i hmu zar zar ang. Ei leh bar thawh chhuah theihna te ni-êng, ruah leh boruak Isuan A pêk che u leh, i fate tana thil i tihsak a\angte pawhin i zirtir thei ang. Isuan min enkawla, fanaute kan enkawla, chutiangin annin thildang duat taka an enkawl lehchhâwn theihte kawhhmuh la.

BIBLE THAWHTHU: Davida chu mipa nau-pang fel tak, beram vêngtu a ni a “Dumi, dumi, Vari, vari, a, a, a” tiin a beramte chu duat takin a ko \hin a ni. An awmna huang a\angin a ko chhuaka, a hruai duah duaha, hnim hring \ha awmna lamah an zui dum dum mai \hin a ni.
Beram rual chu an inzui duah duaha, an kal ri thlak thlak hlawma an Pu Davida hruaina apiangah an zui zêla. Ani chuan hnim hring tamna lamah a hruai zêl a. Beramte chuan hnim hring chu an pet ri hmiar hmiar maia. Tui ti êm êmin, an pum puar nawlh khawpin an pet \hin.
Chhûn thlenga hnim hring an peh hnu chuan Davida chuan tui awmna lamah a hruai kawi leh ta dum dum maia. An vai chuan tui awmnaah an kala, tui chu an dâwt khawlh khawlh a. Chaw an pet hnem tawh si a, duh tâwka tui an han in leh phei chuan an puar êm êm a. Berampu chuan chawlh hahdamtir turin thingbuk awmna lamah a hruaia. An kalpah chuan beram notete chu an limin, an \um \ek \eka, an hlim hle mai a ni. Davida pawh chuan chutiang chu hlim takin a thlir \hin a ni.
Chhûnah chuan an chawl a, beram \henkhatte an bawka, an hnim peh khawl sa kha an \hial niau niaua. Tui leh nuam ti takin an mit an chhing diar diar mai \hin a ni.
Beramno-tête chuan nuam an ti hle maia, an tlân vêla, an \um \ek \ek mai a ni. Berampu Davdia chu thingbuk hnuaiah a \hu a, beramno hlobet hmuna infiama tlân vêl chu hmuhnawm ti takin a thlir a. Chutih lai chuan beram puitling thingbuk hlima bawk \huap pawh chu a vêng reng tho \hin a. A beramte hi Davida chuan a enkawl ngun hlê a. Nilêngin a vêng renga, nuam pawh a ti hlê \hin.
Beram vên bâkah beramnote te nêna infiam pawh nuam a ti a, hlobet hmun leh thingbuk hlim pawh nuam a ti a. Vân dumpâwl ruih leh ni-êng pawh nuam a ti tho bawk. A rilru a nawm viau chângte hi chuan zai hi nuam a tihzawng a nih avangin a zai a zai \hin a ni. A zai pah chuan a \ing\ang chu mawi takin a tum \hin a, \ing\ang rema zaite chu nuam a tih pawl tak a ni.
Savawm lianpui mai hian beramno chu man tumin a lo seh dâwn mêk a ni a. Beramno chuan a hlau êm êma, a thaw dêp dêp mai a ni. Davida pawh chuan tlêmin a hlau ve deuha. Pawngpaw hlauh loh ngawt chuan a lo seh mai anga, beramno pawh chu a seh mai dâwn si a ni. Mahse Pathianin A \anpui ang tih a ring a, Isuan beramno pawh chu chhanhim tûrin A \anpui thei ang tih a ring bawk. Davida chu A \anpui ta ngei a ni. Isuan A vên avangin savawm buang thur mai chuan Davida leh beramno pawh a seh ta lo a ni.
Chutiang bawk chuan sakeibaknei pawh a lo kal a, beram rawn seh a tum a. Chu sakeibaknei pawh chuan Davida chu a seh miah lo. Isuan a \anpui zêl avangin Davida chuan savawm leh sakeibaknei chu a tihlum a ni. Isuan A chhanhim avangin Davida chuan Pathian hnênah lawmthu a sawi a, fakna hla a sa bawk a. “Isu, beram enkawlthei tura min \anpui avangin ka lâwm êm êm e. Kei pawh min vên zêl avangin ka lawm e,” tiin a \awng\ai a.
Nangni pawh Isuan a vêng reng che u a. Isuan Davida leh a beramno A vênhimsak ang khan A vêng reng che u a ni. Nilêngin in bulah A awm reng a. Hlauhna hmunahte in awmpawhin “Isuan A vêng zêl dâwn che u” tih in hrereng dawn nia! Zanthim te in hlau \hin em? Hlau tawh miah suh ang che u. Thim hnuaiahte, hmun hlauhawmahte pawh Isuan A vêngin A awmpui zêl dawn che u tih in hrereng dawn nia. Hlauhna in neih châng chuan Davida ang khan Pathian hnenah in \awng\ai thuai zêl anga, Isua chuan vantirhkohte a rawntir nghâl zêl dawn a nih chu!!