Zirlai-2-na 2025 2nd Quarter Puitling Zirlai
Zirlâi 2 April 5–11
Thupuan Bu Innghahna: Genesis Bu
Sabbath Chawhnu
Chhiar tûrte: Isaia 40:7, 8; Gen. 22:1–13; Joh. 3:16;Thup. 5:5–10; 1 Kor. 15:15–19; Thup. 12:1–9.
Chângvawn: “A tûkah chuan Johana’n a awmna lam pana Isua lo kal chu a hmu a, ‘En teh u, Pathian Berâmno, khawvêl sual kal bopuitu tûr saw!’ a ti a” (Johana 1:29, NKJV).
Tûnlâi huna mite’n Bible hrilhlâwkna—a bîk takin, Thupuan bu-a kan hmuh angte hi—hrilhfiah kawnga harsatna an tawh langsâr tak pakhat chu hmâsânga lo ziah tawh lehkhabu eng eng emawa zung kaih a ni tih an hre tlat lo mai hi a ni. Thupuan bu ziaktu hian Thuthlung Hlui lehkhabute hi ngun takin a chhiar thîn niin lang a; tin, a lehkhabu ziah lo chhiartute’n an hriat bel êm êm tûr Thuthlung Hlui lama thupui hrang hrangte pawh a hmang nual bawk. Entîr nân, Thupuan bu-a thupui eng emaw ber hi kan lo zir ta a, chu kan thupui zir mêk nêna inang leh inkaihhnawih châng dangte chu Bible hmun hrang hrangah kan han zawng kual a, chûng châng hrang hrang zîngah chuan châng dang zawngte âia kan thupui chai lâi hriatthiamna min neihtîrtu châng thenkhat a lo awm thîn. Chumi kawngah chuan Genesis bu hi a tangkâi leh zual hle a, he lehkhabu hian sualna leh buainaa kan khawvêl hnuh luh a lo nih tâk dân chiang takin min hrilh a. Thupuan bu-a thupui pawimawh tak tak târ lan zawng zawng deuhthaw hi Bible-a lehkhabu hmasa berah hian—eng emaw ti zâwng talin—a lang vek a ni.
Tûn kârah hian Thupuan bu-a thupui pawimawh leh lian tham tak tak tlêm azâwng kan zir dâwn a. Chûng thupuite kan hriatthiam theihna tûra min tanpui thei tûr chu Genesis bu-ah hian tam tak awm mah se, tlêm tê chauh kan thur chhuak dâwn a ni. Kan thur chhuah chhunte erawh a pawimawhin, Thupuan bu-a châng inang tak takte hi a danglam hret hret dân pawh min hriatthiamtîr thei dâwn a. Chûngte chuan zirlâi pawimawh tak tak—mihring nihphung chungchâng te, Pathian nihna te, lei leh vânah leh keimahni nun ngei pawha thleng mêk indona ropui chanchin pawh min zirtîr bawk dâwn a ni.
Sunday April 6
Sawi lan a nihna hmasa ber ngaih pawimawh tûr
Zirna in sânga lût zirlâite chuan an zir tûr subject chu a tlângpuia thlîr kual thuakna nên bul an tan tlângpui thîn hlawm a (chutiang chu number pe-in, “101” an ti mai thîn). Chutah chuan thûk zâwk leh zau zâwka an la zir chhoh zêl theihna atâna hriat tûr tûlte chu zau tak leh hriatthiam awlsam deuh zâwkin an lo zir hmasa phawt thîn a ni. Chutiang deuh chuan, Genesis bu-ah hian Bible-a lehkhabu dang awmte’n an sawite kan hriatthiam theihna tûra hriat hmasak ngâite chu Pathianin a lo dah vek mai a. Amaherawhchu, hêngte hi a sawi hawnna ang chauh niin, Bible hmun dangah chipchiar zâwka sawi leh vek a ni hlawm thung.
A tlângpui thu-a sawi chuan, Bible-ah hian thupui hrang hrang kan hmu hnem hle a. Chûng thupuite chu sawi lan a nihna hmasa ber zêl kha chumi chungchâng kan hriatthiam theihna tûr leh, a hnu zêlah pawh eng tiangin nge hman a nih tih kan hriatna tûra a lûngphum pawimawh tak a ni thîn.
Hei hi Bible zirtute zînga thenkhat chuan “law of first mention” (Mizo tawng chuan, “sawi lan a nihna hmasa ber ngaih pawimawh tûr” tihna a ni mai âwm e) tiin an sawi a. Mahse, dân ti lovin, inkaihhruaina (entawn tûr ziarâng) te pawh ti ta zâwk ila, a dik zâwk maithei; a chhan pawh a zawng a zaa hman vek theih loh a nihna chin a awm vâng a ni. Bible zirna hrim hrim mai bâkah, Bible hrilhlâwkna zirnaah pawh thil pakhat lo awm zêl nia lang chu, Pathian hian a mite hnênah zâwimuang leh a tahtawl tê tê-in an hriat atâna tûl thil chi hrang hrang chu a pe thîn tih hi a ni a. A tîrah a thu bulbâl leh bulthûm hrilh phawtin, hun a lo kal zêl a, chiang leh thûk zâwk, zau zâwkin a hrilh chho ta zêl thîn a ni.
Isaia 40:7, 8; Malakia 3:6; leh Hebrai 13:8 te chhiar la. Hêng chângte atang hian hrilhlâwkna thute i zirna kawnga i tangkâipui tûr eng thu pawimawh tak nge awm?
_________________________________________________
__________________________________________________
Tûnlâi khawvêlah hi chuan “thutak” chungchâng ni lovin, “thutak niin ka hria” tih emaw, “thutak niin a lang” tih emaw kan sawi tlângpui ta hlawm a, a chhan pawh “thutak” chu thil danglam thei, hun inher danglam zêl mila inthlâk thîn nia kan ngaih vâng a ni. Tin, mi thenkhat chuan “thutak” tih hrim hrim hi thil awm thei ni lovin an ngâi bawk.
Pathian erawh chuan thutak a lo sawi tawhah rêng rêng hian a rilru a thlâk leh si ngâi miah lo va. A mite hnêna thutak a zirtîr tawh chu hmun dangah leh hun dangah pawh a sawi nawn leh zêl thîn. Tih danglam emaw, thlâk thleng emaw chu sawi loh, a awmzia kan hriatthiam theih nân chiang leh zualin a sawi belh zêl zâwk thîn a. Chutiang chu a nih avângin, hrilhlâwkna thute kan zirnaah pawh hian Genesis bu-in a sawite hi chiang taka a awmzia kan hriatthiam a pawimawh rêng a ni. He lehkhabu-ah hian a tum khatna atân thupui pawimawh tak tak târ lan a ni a, chûng thupuite chu Bible-a lehkhabu dangte’n an sawi kan hriatthiam theihna tûra a lungphûm pawimawh tak a ni hlawm bawk.
Eng vângin nge Bible leh Bible-in min zirtîr thutak dik lo thei lote kan rinna ti chak lo tûr chu tu pawh leh eng pawh, eng anga âwihawm leh bengverh pawh ni se, kan hnâwl zêl a pawimawh êm êm? Bible kan rinna ti derthâwng thei thilte chu eng tiang kawngtein nge a lo thlen thin?
Thawtanni April 7
Pathian hmangaihna hrethiamin
Kan nu leh pate atanga nihphung sual rawn chhawm zêl kan nih avângin lei leh vân leh a chhûnga thil awmte kan ngaihdân pawh hi mahni hma kan sialna leh kan induh tâwkna rilru te’n a ti khawlo thui tawh hle a. Khawvêl pawh hi eng kim hretu Pathian thlîrna atang ni lovin, keimahni hriatna leh thlîrna tawngchham tak atang zâwkin kan hmu ta thîn rêng bawk. Suala tlu tawh mihringte’n kan tih khawlhkham tawh zînga a nasa ber chu “hmangaihna” hi a ni âwm e. Tûnlâia mi tam zâwk sûkthlêk phei hi chuan hmangaihna hi mi dangte tanpuina atân ni lovin, mahni inhâivûrna atâna hmang tûrin mi a fuih tlat mai leh nghâl a. Hetiang mahni indah pawimawh berna rilru putna hian Pathianin hmangaihna a thlîr dânte kan hriatna tûr kawng a dâl ta tlat thîn a ni.
Hmangaihna nihphung hriatthiam hi Bible hrilhlâwkna kan hriatthiam theihna atâna tûl leh pawimawh êm êm a ni a. Indona ropui kal mêka thu inchuh lian ber pakhat pawh Pathian nungchang hriatthiam lohna nasa tak awm hi a ni nghe nghe. Ellen G. White-i chuan heti hian a lehkhabu, Indona Ropui tlângkawmna a lo siam a: “Lei leh vân pum pui chu a lo thianghlim ta vek mai le! Thil siam zawng zawngah chuan thukhat vuaa inlungrual leh hlim tlânna a lo awm ta a. Eng kim siamtu hnên atanga lo chhuak nunna leh ênna leh lâwmna chuan lei leh vân zawng zawng hi a dâp chhuak ta vek a. Thil tê ber atanga khawvêl lian ber thlengin, thil eng kim—nunna neite leh nunna nei lote pawhin khuh bo lohva lo awm ta an mâwina leh hlimna famkim hmangin Pathian chu hmangaihna a ni tih an puang ta a ni.”—Indona Ropui, p. 678.
Genesis 22:1–13 chhiar la. Bible-a “hmangaihna” tih tawngkam kan hmuh hmasakna ber chu Genesis 22:2 hi a ni a. He thawnthu hian Pathian chu hmangaihna a nih dân eng tin nge min hrilh?
___________________________________________________
_________________________________________________
Eng thupui pawh zir dâwn ila, chu thupui chu Bible-a a lo lanna hmasa ber hriat phawt kan tum thîn a. Tûn tuma kan zir tûr hi hmangaihna chungchâng a nih avângin Bible-a lehkhabu hrang hrang awm, a bîk takin, Chanchin Tha bute’n hmangaihna chungchâng an lo sawi lan hmasakna ber zêl theuh kan en dâwn a ni. Chanchin Tha bu pali-te’n “hmangaihna” tih tawngkam an sawi lan hmasakna berte chu Matthaia 3:17 te, Marka 1:11 te, Luka 3:22 te leh Johana 3:16 te hi a ni a.
Entîr nân, Chanchin Tha Johana ziaka “hmangaihna” tih tawngkam a lo lanna hmasa ber (Johana 3:16) phei hi chu a bengvârthlâk hle: mâichâma mu hman vek tawh Isaaka chanchin kha min hriat chhuahtîr lo thei lo. Abrahama’n Pathian a rinzia chu, Pathianah a innghat hmiah mai a, a fapa kha inthâwina atân lo hlân pawh ni se, Pathian chuan a kâi tho leh thei tho a ni tih a ring nghet hle a ni (Heb. 11:19). Khami tuma a thil tih khân Pathianin mihringte a hmangaihzia a lo lantîr a. Mi a hmangaihzia chu “a Fapa mal neih chhun” pawh mi a pe hial a ni (Gen. 22:2, 12, 16 en la). Tin, mitthi zîng ata a kâi tho leh bawk a. Chutiang chuan, Pathianin kan tâna a neih mahni pawh inpêk phal hialna hmangaihna chu puan chhuahin a lo awm tawh a ni.
Eng tin nge kan tâna Pathianin a neih mahni inhlan duh hial khawp hmangaihna ang hi mi dangte lakah kan lantîr ve theih ang? Eng vângin nge hetiang hmangaihna hi a tlângpui thu-a kan neih sa, kan pianpui ve rêng ni lo a nih?
Thawhlehni April 8
Isaaka zawhna: Berâmno chu khawiah nge a awm?
Bible-in “berâmno” (Hebrai tawngin, seh) tih thumal a sawi lanna hmasa ber chu hmangaihna tih thumal a hman hmasak berna, Genesis bung 22-ah tho hian a ni a. Berâmno tih tawngkam hrim hrim hi Thupuan bu-a entîrna/chhinchhiahna hman rim ber pakhat niin, Isua chu “Berâmno” tiin vawi sawmhnih âia tam mah sawi a ni. Thupuan bu-a a ngaihnawm lâi ber pakhat chu bung li-na leh bung nganaa kan hmuh, Johana’n Pathian lalthutphah hûnna pindan a tlawh thu hi a ni a. Hêng bung pahnihahte pawh hian a langsâr ber chu Berâmno bawk a ni.
Genesis 22:7, 8; Exodus 12:3–13; leh Thupuan 5:5–10 te chhiar la. Eng tiangin nge inthâwina atâna Isaaka hlan a nih thelh thu hian Bible ziaktute’n entîrna atâna Berâmno an hman thin dân hrethiam tûrin min tanpui? He thawnthu leh Thupuan bung 5-a Johana thil hmuh hi eng tiangin nge a inzawm?
_________________________________________________
____________________________________________________
Sawi tawh angin, Bible-a “berâmno” (Hebrai tawngin, seh) tih thumal a lo lanna hmasa ber chu Isaaka’n a pa hnêna zawhna a zawh, “Berâmno chu khawiah nge a awm?” (Gen. 22:7) tihah hian kan hmu a. Thil ngaihnawm deuh chu, Bible-a lehkhabu dang zawngte hian he zawhna hi chipchiar takin an rawn chhâng ta hlawm hi a ni. Thuthlung Hluia lehkhabu awm dang 37-te hian Isaaka zawhna hi a tahtawl leh chipchiar zâwkin an rawn chhang chho zêl a. Kalhlên Kût an hman lâia serh leh sâng an tih thinte atanga Davida hnathawh hmasak thin leh chumi hnua thil thleng zawng zawng pawh kha a chhânna a ni chho vek mai. A thawnthu pum pui hi Isaaka zawhna chhânna tûr lo nghâktu Messia chungchâng hrilhlâwkna thu hrang hrangte hmanga lo cheimâwi a ni a. Tichuan, Thuthlung Thar lamah hian, tisa leh thisen neia Isua a lo lanna, a mite zînga rawng rawn bâwla, krawsa a nunna a hlân tâkna hmang khân chhân a lo ni ve leh ta bawk a ni.
Hetih lâi hian Chanchin Tha Johana ziaka “Berâmno” tih tawngkam sawi lanna hmasa ber Johana 1:29–34 hi han en ila. Baptistu Johana hian mi mal takin Isaaka zawhna kha a rawn chhâng niin a lang—a chhânna hmun leh chhân hun nên pawh hian a inhmeh hle nghe nghe bawk. Mi sualte chuan an sualte simin tuiah hnim phûmin baptisma an chang a, chu chuan mi sual thihna leh nun thara an lo nun tâkna a entîr. Hetih lâi vêl tak hian Isua, Pathian Berâmno chu a lo lang ve nawlh mai a, Matthaia’n a sawi dân chuan vânte a lo inhawng a, vân atanga lo chhuak âw chuan, “Hei hi ka Fapa duh tak, ka lawm êm êma chu a ni” (Mat. 3:17) tiin a rawn puang a. Lalpa Vântirhkoh tho hian Abrahama leh Isaaka te zawhna chu vân atangin a rawn puang a nih kha (Gen. 22:11–14).
Hêng Bible châng hrang hrangte hi ngun taka kan chhiar chuan, Isua Krisa, Pathian Berâmno hi kan Âiawhtu a ni tih a chiang êm êm a. Chu chuan Johana inlârna hmuha Berâmno talh a nih thu pawh hi a awmzia min hriatthiamtîr ta a ni.
Eng vângin nge Isua chu kan Âiawhtu a ni tih hriat hi kan chhandamna atâna a lungphûm pawimawh êm êm a nih? Ani tel lo hian rorêlna lo thleng tûrah chuan thiam chan beiseina i nei ang em?
Nilaini April 9
Thihna hmachhawnin
An Siamtu nêna an inzawmna chat tawh khawvêla chêngte nuna bet râwng ber mai chu, nunna nei thil chi hrang hrangte hi thihnain mi a lo châng reng mai leh, eng tikah pawh mi rawn nan chîn nghâl a tum reng bawk si hi a ni âwm e. Thihna hi “sual man” a ni a, lei leh vân pum puia nunna Hnâr awm chhun Siamtu laka kan tâl hran tâk rah hremna kan pêk ngei ngâi a ni. Chutiang chu a nih avângin, Bible hrilhlâwknaah pawh hian dinhmun pawimawh tak a luah rêng a. Thihna chu a taka thleng ngei thîn niin, a chin felna pawh Isuaah—a thihna leh a thawhlehnaah chauh kan hmu thei a ni.
Bible-a thihna tih tawngkam sawi lan a nihna hmasa ber leh, thihna a lo thlen hmasak berna te hian hrilhlâwknaa he thupuiin hmun pawimawh tak a chan chhan hrethiam tûrin min tanpui a. Sual avânga harsatna lo thlengin mi a tih buai nasatzia min hrilh bâkah, a chin felna tûra Pathianin ruahmanna a lo siam chu kan hriatthiam theih nân hmanraw pawimawh tak takte pawh min pe bawk.
Genesis 2:15–17; Genesis 4:8–15, 1 Korinth 15:15–19, leh Thupuan 1:18 te chhiar la. Hêng thute hian—”thihna” tih tawngkam hman a nihna hmasa ber leh thihna lo thlen hmasak ber thu sawina—mihringte kan thih chhan eng tin nge an sawi a, eng tin nge Pathianin thihna a ngaih tih te leh kan harsatna chin felna atâna ruahmanna a lo siamte chu eng tin nge min hrilh?
____________________________________________________
_____________________________________________________
“Thihna hi nunin a ken tel ve rêng a ni” kan ti liam leh mai thîn a. Mahse, hei hi dâwt a ni. Thihna chu nunna letling chiah, nun lohna a ni zâwk a; he khawvêla kan tawn tûr ve rênga duan ni ngâi miah lo, khawi maw atanga lo lût lui a ni. Thihna hi hre thangin lu pawh lo sûn fo tawh mah ila, a taka kan han tawn meuh erawh chuan kan thinlung hian a la ngâithiam lo êm êm tho thung a, a tu pawh mai hian thil tha leh ngainatawm lo tak niin kan la hre theuh chu a nih hi. Thihna hi thil tawn châkawm loh leh hrehawm tak a nih hrim hrim tawh sa bâkah, thihna thenkhat, entîr nân, naupang tê tê-te thihna ang phei hi chu a lungchhiatthlâk leh zual êm êm bawk a. Nu leh pate chu an fate âia thi hmasa tûr ni-a ngaih a nih tlângpui lâia an fate zâwk an thi hmasa leh tlat thîn hi hriatthiam a harsa thîn a ni.
Bible-a thihna lo chhinchhiah hmasak ber pawh hi thil nihphung pângngâi rêng nia ngaih kalha thleng a ni tlat mai pêk a. Mihring hmasa ber Evi leh Adama te khân thihna an tem hma hauhin thih lungngaihna an lo tuar tawh a, an fapa fel zâwk chu a sual zâwkin a that ta mai a nih kha. Abela thihna kha dik lo taka thil tih avânga thleng a ni.
Isua thihna pawh kha ngaihtuah ila, sualna rêng nei lo ni siin, Abela ang chiah khân mi sualte kutah a lo thi a. Isua thihna âia dik lo zâwk thihna dang a awm thei ang em? Abela thihna leh krawsa Isua thihna kha a inan êm êmna dang eng engte nge la awm? Abela thih dân khân Isua’n “thihna leh mitthi khua [thlân] chabi a kawl chhan leh Isuaa Pathianin min pêk chu hrethiam tûrin eng tin nge min tanpui le?
Thihna hi tih bo ni dâwn ta lo se, eng vângin nge kan nun hi tangkâina nei lo, awmze awm lo leh sawngsawhlawt lo a nih ang? Chutiang ni tûr a nihna chuan kan tâna Isua’n a lo tih tawhah khân lâwm nachâng hre tûrin min hrilh em?
Ningani April 10
Rûl kha
Thupuan bu-a thupui pawimawh tak awm chu chibai bûkna chungchâng a ni a. Pawi khawihtu leh chibai bûkna dik lo rawn siam chhuaktu chu “drakon” tia sawi niin (Thup. 13:2–4), rûl ni anga vântirhkoh tlu ta sawi a ni hi tih palh thil thu mai a ni lo. He tawngkam hian Eden huana thil thleng kha min hriat chhuahtîr a, rûl chu huanah khân lo lûtin, Evi leh Adama te kha Siamtu laka hel ve tûrin a hmin ta a nih kha.
Genesis 3:1–5 hi Thupuan 12:1–9 nên khâikhin la. Hêng thawnthu pahnihahte hian thil inang eng engte nge awm? Genesis bu-a rûl chanchin kan hmuh hian eng tiangin nge Thupuan bu-a târ lan vâna indona lo awm tawh kha a lo awm chhan hrethiam tûrin min tanpui?
__________________________________________________
____________________________________________________
Bible-ah hian Setana’n khawvêl zawng zawng a hruai khawloh thu sawina pahnih a awm a. Pakhat chu Genesis bu-a kan hmuh, khawvêla mi pahnih chauh an la awm lâia thleng kha niin, pakhat dang chu, Thupuan bung 12 leh 13-a kan hmuh, “khawvêl zawng zawng bumtu” (Thup. 12:9) tiin leh, sakawlh hnêna thiltihtheihna petu, sakawlh chibai bûk tûra “khawvêl zawng zawng” hruaitu (Thup. 13:2, 3) tia Setana sawi a nihna hi a ni. Bible hrilhlâwknaa kan hmuh thupui pawimawh tak pakhat chu lei leh vân pum huapa indona thlen mêk thu a ni a. Pathian nungchang leh a Thu hi eng tikah mah danglam ngâi lo niin, Setana pawhin a thiltumte chu a thlâk ngâi bîk miah lo bawk.
Vânneihthlâk takin, indona ropui nihphung hi inthlâk danglam ngâi lo a nih avâng leh, hrilhlâwkna thutea indona ropui chungchâng chiang taka ziak kan lo neih bawk avâng hian Krsitiante chuan thutak leh dâwt thu kan thliar hrang thiam a; tin, thlarau lama tlâk hawlh palh theihna khuar awmte pawh kan hre thei thîn bawk. Pathian chuan a nihphung a thlâk ngâi dâwn lo va, Setana pawh Setana a ni chhunzawm zêl ang. Setana hian a nihna dik tak thup nân hmâikâwr chi hrang hrang a inbel thîn a; mahse, suala tlu ta mihringte chanchin kal tawh zawng zawng leh, Thupuan bu-a hrilhlâwkna thu kan hmuhte hian Eden huana a lo hman tawh a ruahmanna kha a la bânsân ngâi rêng rêng lo tih min hrilh. Pathian chuan finna leh hriatthiamna neihtîr min tiam a (Jakoba 1:5), chu bâkah, Pathian Lehkha thu chiang tak nên min thuam bawk; chuvâng chuan, Setana bumnaa kan tlûk hi a hlauhawm hran lo. Nimahsela, thil lungchhiatthlâk tak chu, mi tam tak an lo tlu tawh si tlat mai hi a ni a, mi tam tak—mi tam zâwk daih a ni hial ang chu—an la tlu ve leh bawk dâwn a ni.
Hnam tin hian nun dân phûng bîk leh thil chin than kan nei theuh hlawm a, chûngte chu hun lo inher danglam zêlah a inthlâk ve hret hret thîn. Khawtlâng inkaihhruaina dânte pawh a inthlâk thîn a; tûn hmaa kan lo pawm thin pawm ni ta lo leh, pawm loh ni thîn pawm ni ta thung pawh a awm nual bawk. Indona ropuiah erawh hi chuan a indo-ate leh an thu inchuhte hi a la danglam ve lo rêng rêng a, hei hi rilru-a hre reng chungin hnam zia leh khawtlâng nun lo danglam chho zêlah hian Kristian kan nihna anga kan pawm theih tûr chin leh pawm theih loh tûr chin eng tin nge kan lo thliar hran ang? Entîr nân, Setana dâwt sawi hmasakho, “in thi tawp lo ang” tih leh “pathiante ang in lo ni ang” tih te hi in hnam leh awmna rama mite khân thutak niin an inzirtîr em?
Zirtawpni April 11
Zir belhna: Ellen G. White-i lehkhabu, Tihrkohte Thiltih bung 57, “Thupuan Chu” (phêk 578–592) chhiar ni se.
Khawvêl sakhaw tam tak hi chu tu emaw ngaihdân atanga lo piang chhuak a nih tlângpui lâiin, Kristian sakhuaa ngaihdân awmte erawh hi chu a taka thil thleng ngei beh chhana duan chhuah a ni hlawm thung. Bible pawh hi mihringte chanchin kal tawha Pathianin mihringte inlaichînna a rawn neihpui thin dân chanchin a ni ber a, hêng an inlaichîn tawn dân leh an indâwr tawn dân chanchinte hi ngun taka kan zir a nih chuan, Pathian nungchang nghehzia leh danglam ngâi lohzia kan lo hre thei ngei ang.
Amaherawhchu, Kristiante pawh hian a châng chuan thil ngâi ngawr ngawr ngaihthlâk reng mai hi kan ning ve thîn tho a. Kohhran pâwl dangte’n min tâwmpui ve loh kan hrilhlâwkna thuchah ken hi mite hmaa puan a nih chângte hian kan hriat fo tawh hnu nia ngâiin, thil thar zir belh tûr awm lo niin kan sawi thîn bawk.
Kan thuchah hi danglam ngâi lo leh nghet tak ni mah se, mâwlmang tak emaw, ngaihnawm loh zet emaw chu a ni lo thung. Chumi letling chiah chu a ni zâwk a: eng kim hretu Pathian hnên atanga kan dawn hrilhlâwkna thu kan han zir hi chuan eng kim kan hre vek ta ti thei dinhmunah kan ding ngâi dâwn lo va ni tih kan hre chhuak thuai thîn.
Ellen G. White-i’n Thupuan bu ziah a nih chhan a sawite zîngah pakhat chu Kristian kohhranin eng tik hun atân pawha pawimawh reng thuchah hi a vawn tlat theih nân a ni a. “Thawktute zînga la naupang deuh thenkhat hi chuan . . . thutak kan sawi nawn fo thinte hi an lo ning ta a. Thil thar leh dangdâi deuh zâwk hriat an châkna lamah thurin thar chhawp chhuah phêt an tum ta thîn a ni” a ti.—Tirhkohte Thiltih, p. 580. Thupuan bu hi nakîna thil lo thleng tûrte chanchin ziahna lehkhabu chauh a ni lo va; hun kal taa thil lo thleng tawhte chanchin ziahna bu pawh a ni tel bawk. Kan kohhran chanchin kal tawh leh thurinte chiang taka kan hriat theih nâna ziah a ni a, hêngte hi ngun taka kan zir thîn a nih chuan a ziding nih châknain a hruai bovin kan awm lo vang.
Sawi ho tûrte:
1. Pathian Lehkhabu hian thu thar leh hriatthiamna thar min pêk a thulh ngâi lo va. Eng tin nge thil thar zir belh duhna leh Pathianin min lo pêk tawh sa thutakte vawn ngheh tlat a pawimawhna hi inbûk tâwk takin kan kal kawptîr theih ang?
2. Eng tin nge kohhran hian hrilhlâwkna thu hrilhfiahna thar lo chhuak thîn hi kan lo dawnsawn ang? Thil thar zir belh tûr a awm zêl dâwn a ni tih chu hre tho mah ila, êng thar lo chhuak chu kan mamawh tak thutak nge nia zirtîrna dik lo zâwk tih eng tin nge kan lo hriat theih ang?3. Indopui Pahnihna lâi khân Pacific tuipuia awm lawng sipai pakhat hliam tuar thi mai tûr chuan amah enkawltu doctor hnênah, “Fahrah ka ni a. Ka thih hunah chuan tuin nge min hre tawh ang?” tiin a zâwt a. Doctor chuan, “E, keimah hian ka hre reng dâwn che alâwm” tiin a hnêm a. Doctor hian hriat reng a lo tum tak tak pawh a ni maithei; mahse, ani pawh hi eng tikah emaw chuan a la thi ve leh tho dâwn a, a thih rual rualin a damlo enkawl fahrah a hriat rengna pawh chu a tâwp zui ve nghâl mai ang. He mite pahnih chanchin hian eng tin nge mihring nun derthâwnzia leh awmze neih lohzia, thihnain a la hneh nge nge tho tûr a nihzia hrethiam tûrin min tanpui le?