Zirlai-3 2024 2nd Quarter Junior Zirlai

ZIRLAI 3–NA APRIL 20, 2024

KHAW HMU LO

CHÂNGVAWN: “Mî tûpawhin rawng a bâwl chuan, Pathianin chakna A pêk ang zêlin bâwl rawh se, tichuan Isua Kristá zârah Pathian chu thil engkimah châwimâwiin A awm thei ang,” (1 Petera 4:11).

Chhiâr Tûr: Tirhkohte 9:1-19; Tirhkohte Thiltih, pp. 112- 122; Kan Thurin Bulpuite, No. 10, 13, 22.

Chakna Thû: A talent min pêk mi dangte hnêna A hmangaihna hrilh nâna kan hman hian Pathian rawng kan bâwl a ni.

Zirlâite Puâl: Nangmâ nun thlâk danglam vektu i chunga thilthleng engemaw ngaihtuah theih i nei em? Nû leh pâte thihsan, in\henna, hnathawh thar, naute thar neih emawte pawh a ni the e. Chutiang ni kher lo pawhin engtinnge i nun a lo danglam hlauh theih ang? Tûnah hian thilthleng pakhat, mi pakhat nun lek ni lo, Kristian kohhran chanchin tidanglam hlauhtu chanchin kan ngaithla dâwn a ni.

“Lo insiâm lâwk deuh ulang, naktûk zîngah Damaska lam panin kan zin chhuâk dâwn a ni,” tiin Saula chu ina a lo luh pahin a \awng deuh lâng lâng a. “Puithiam lalberin hmârlam Damaska thlenga kal tûra phalna min siamsak tawh a. Hêng buâina siamtu Kristiante hi kan va vãi fâi vek dâwn a ni. Ka theih phei chuan an baksamah \hâmsakin helâi hmun thleng hian ka rawn hnûk ang,” tiin uângthuâng takin a nui vêl a.

I nui rî ka hriât ngawt pawhin kei chu ka lo khûr titih deuh a. Tûn ang êma a phûr pawh hi ka lo la hre ngâi lova, mahse kei chuan ka \ih deuh zâwk mah a ni. Engemaw châng chuan chû leh chena Kristiante man tuma va zawn vêl chu ti lutuk deuhten ka hriâ a. Mahse kei chhiahhlawh mai tân chuan engmah sawi theih ka nei sî lo.

Thil ken tûrte chu ka’n remfel \an a.

A tûk zîngah chuan kan chhuâk a. Saula vêngtu bîkte bâkah sipai dangte pawhin min kalpui bawk a. Damaska chu a hlat deuh avângin ni engemawzât kawngah kan thang dâwn a. An thlenna chin chin khawpuia inkhâwmna inah chuan Kristiante an awm leh awm loh Saula leh sipaiten an vãi nghâl zêl a.

Tlâi khat a meilum âi phei chu a hlim khawp a, a nui var var mai a ni. Mei ênga meng derâ chung chuan, “Naktûk chu, Damaska kan ban tawh dâwn a, zanin chu tui takin mu teh ang. Naktûk lamah chuan hnâ kan ngah zêk maithei a niâ,” te a ti vêl a.

Meilum âi chu ka ni nâin, a \awngkam hnuhnung sawichhuah dân hmang ka’n hriât chuan ka khûr deuh titiha.

A tûkah chuan midangte thawh hmâin Saula chu a thova. “Tho teh u khâi, Damaska chu kan hmâ lawkah a awm tawh a niâ!” tîa min koh thawh hlawm chu ka theihnghilh thei lo.

Zîng khawvâwta tûk\huân kan ei hnû chuan kan han zimar deuh a, kan zin kawng tâwp pan chuan kan chhuâk leh tâ a ni.

Saula chu a hma lamah a kal thâng thâng mai a. Sakawr kâia ka kal lâi chuan vân a\angin êng êm êm, mit tivâi vek khawp hi a lo êng a. Rante lah chu an tâlbuâi nasa mai a, kei lah chuan chelh tlat ka tum nâin ka hmuh theih loh avângin tihngaihna tak a awm lo. Mitvâi engmah hmuh hlei thei lo chung chuan leiah ka bawk thlawp a, sakawrin min chîl hlâuin anmahni hlat zâwngin ka let tawp tawp a. Êng chak lutuk laka ka mit vên nân ka kawrfuâl hmâwr lam chuan ka mit ka hup a. Khawpui rî niâwm tak lo ri chhuâk hi ka hriâ a. |henkhatten, “En teh u, Saula saw engtiziâ nge ni tâ?” an tih chêl chûlte chu ka hre zui bawk a.

Saula en tûr chuan ka mit chu ka’n meng dêk dêk a. Kawngah chuan a lo let bâm mai a, êng chak tak chuan a lo kâp zawr zawr mai bawk a. Âwin a belâi chu ka hre thei a, mahse a betu âwm tûmah chu ka hmu sî lo.

“Saula, engatinge nangin Kei min tihduhdah ni?” tiin âw hian a chhuahchhâl a.

Saula chuan sehchilh deuh nak hian, “Tu nge i nih?” tiin a’n zâwt a.

“Isua ka ni. Stefana denhlum lâi i hmuh a\ang khân i chhiâ leh \ha hriatna chuan a tibuâi tawh che a. Keimah mi ringtûte chungah i kut a hlei hlê mai.”

Saula chuan, “E-Engti tûrin nge min duh?” tiin zâm âw deuhin a zâwt a.

“Damaska khuâah lût langin, chû hmun i thlen hunah chuan i tihtûr chu Ka la hrilh ang che,” tiin âw chuan a hrilh a.

Harsa takin Saula chu a’n ding chhuâk a. Duhthawh deuh takin a mit chu an nuâi deuh tâwn tâwn a. “Khuâ ka hmuthei ta hlek lo mai! Min \anpui teh u, ka mit a del tlat mai!” tiin a âu chêlchûl a.

Amah vêngtûte chuan an rawn bâwr nghâl vat a, a bânah an kâi tâ a ni.

Kei chuan vaivut a\anga tho chhuâk a inbêngfâi mawlh mawlh chung chuan, “Doctor hnênah kan hruâi ang che chu?” tiin ka’n rawt a.

Ani chuan, “Ni lah love â! LALPAN Damaskaa lût tûrin min ti a, chutah chuan ka tihtûr min la hrilh dâwn a ni,” tiin a \ang tlat a. “LALPA” tih \awngkam a’n hman vê tâkah chuan amah vêngtu pahnihte chu an inmelh ralh ralh a.

Tûemaw hian, “Ti tûra a hrilh che chu i ti dâwn em ni?” tiin a’n zâwt a.

Aw dam deuh thlap hian, “Eng dang nge ka tih theih leh tawh chuân ang?” tiin a chhâng a. A’n thaw deuh huâi a, “LALPAN A mi hrilh ang zêl chu zâwm tûrin min ti a lâwm. Hawh u i kal zêl mai ang u,” a ti a. A hmâ lawka a âwkî ang kha chu a ni ta lo hlê mai.

Amah vêngtute leh kei chuan mitdel Saula chu a hmâ deuh lawka ram hring a hmuh leh ngaihsân tak hmunah chuan kan hruâi chhuk a. Thah a tumte awmna lam pang chu kan pan dîng char char a. Mahse tûnah chuan anmahni dodâl tûr emaw a ni ta lova, a thiâmna leh theihnate nêna thawhpuia, midangte hnêna Pathian hmangaihna puânga A rawngbâwl tûr a ni ta zâwk a ni.

TIH TÛR

Sabbath Chawhnu: Puzzle 3-na ti nghâl ang che.

Sunday: “Khaw Hmu Lo” tih kha chhiâr la. Pathianin thilpêk engemaw tak A pêk che chu ngaihtuah la. Chû chu tûnkâr chhûnga A hmangaihna midangte hnêna i puânna kawnga i \angkâipui theih nân A \anpuina dîl ang che.

Thawh\anni: Rawng tihreh har lo chî engemaw hmangin dârthlalangah i kut zung\angin in chângvawn kha ziâk la. Tirhkohte 9:1, 2 chhiâr la, Kristiante chunga Saula kawlh viâu chhan kha enge nia i rin? Nang anga ring vê kher lote chunga i ngilneih theihna tûrin Pathian hmangaihna dîl ang che.

Thawhlehni: Tirhkohte 9:3, 4 chhiâr la. Pathianin Saula kawng a dâl chhan kha enge ni a i rin? Êng kha eng thil nge ni ang le? Note bûah Pathianin A biâkpawh dân che ziâk ang che. Amah i bengkhawn \hatna tûra thil danglam deuh tak A tih kher ngâi lova i thinlung i hawn theihna tûrin Pathian hnênah \awng\âi ang che.

Nilâini: Tirhkohte 9:5, 6 chhiâr la. Engatinge khâ zawhna kha Saula a zawh ni ang? Mi tûemaw hnêna Isuá nihna i hrilh theih nân i talent vawiin hian hmang ang che. Chuta i thil tawn chu i note bûah ziâk ang che. Isuá nihna i hriâtchiân deuh deuh theihna tûrin \awng\âi ang che.

Ningâni: Tirhkohte 9:7-9 chhiâr la. Mit tuâm tlat chungin pindan chhûng leh pâwnah han kal vêl teh. Pathianin i hnêna A hmangaihna A puânchhuah hriâtna dâltu tihbosak tûr chein Pathian \anpuina dîl la, A rawngbâwl tûra A duhsak dân che hriâtna dîl ang che.

Zirtâwpni: Tirhkohte 9:10-19 chhiâr zawm la. Puitlingte nên Annanian Pathian rawng bâwla, mîte hnêna A hmangaihna a puândân sawiho teh u. Nangmah thah tumtu che tâna rawngbâwlsak tûra tirh angin inngaihruât chhin teh. Pathianin tû rawng pawh bâwlsak tûrin tîr tâ che selang, Amah i rinchhan theih nân \awng\âi ang che.