Zirlai-4 2024 2nd Quarter Junior Zirlai

ZIRLAI 4-na                                                                                                           April 27, 2024

KRISTÂ MÎTE

CHANGVAWN: “Tûnah chuan mikhuâl leh ram dang mî in ni tawh lo a, mi thiânghlimte nên chuan tuâlkhat leh Pathian chhûngte in ni ta zâwk a ni. Krista chu a kil lungphûm chu niin, tirhkohte leh zâwlneite lungphûm chunga sak in ni,” (Efesi 2:19, 20).

Chhiâr Tûr: Tirhkohte 11:19-30; Tirhkohte Thiltih, pp. 155- 165; Kan Thurin Bulpuite, No. 12, 14, 11. Chakna Thû: Pathian mîte chu lungruâl taka an thawh hoa, an inthlâwp hian an thawk sâwt zâwk \hîn a ni.

Zirlaite Puâl: Mî tû emaw, Pathian rawngbâwl tûra mahni hmêlhriâtte leh thilneih engkim kalsan hriât i nei em? Nang pawhin ti thei vê tûrah i inngâi deuh em? Tûnkâr hian ramthim rawngbâwlna kawnga sûlsutu pahnih, Paula leh Barnaba-te chanchin kan zir dâwn a ni.

JERUSALEM khawpuia inkhâwm bânin deakon pakhat chuan tihian a sawi a, “|hiânte u, tihduhdahna avânga khawpui insaseng santûte hnên a\angin thû kan dawng hlauh mai a. Antiokei khawpuiah chuan an zirtîrna chu an lo dawngsawng \ha hlê a ni âwm e. Kohhran thar kan nei leh dâwn niâwmin ka hriâ,” tiin a puâng a.

An zâ chuan mahni ngaihdân dân sawiin an lo \awngchhuâk ta \heuh a. “Chanchin lâwmawm tak a nih chû! Ringtu engzât nge awm tâ chu lê? LALPA chu fakin awm rawh se,” an ti hlawm a.

“Chuta kan ûnâute \anpui tûra midang intirh hun tak niin ka hriâ. Midangte khân enge maw in ngaihdân ni vê rêng lê?” tiin a zâwt hlawm a.

Pakhat chuan, “Kan \anpui ngei chu a \hâ a lâwm. Kan tâna min thawhsak an ni sî a,” a ti a.

Midang tûemaw chuan, “Barnaba hi kal selang a \ha lo’m ni? Ani hi ringtharte tihchak leh fuih kawngah hian a fel riâu sî a,” a rawn ti bawk a.

Mi dangte pawh chuan, “Ani hi a \ha ber ang,” an rawn ti ta sap sap a.

Deakon chuan, “Chû kohna chu i chhâng thei dâwn lo’m niâng?” tiin Barnaba chu a’n zâwt nghâl a.

“E, ka \angkâi theih berna tûr hmunah chuan ka kal tûr a lâwm, naktûka chhuâk nghâl mai tûra lo inpeih ka tum a nge,” a ti ta nghâl mai a.

Mi nâwlpui an \în hnûa la awm khawmuângte hnênah chuan Barnaba’n Antiokei chungchâng a sawipui hlawm a. Tû emaw hian chû khawpui chanchin chu a rawn zâwt hlauh bawk a.

“Rome ram awp chhûnga khawpui lian pathumna tling phâk a ni a. Chuta sumdâwng tûr chuan khawvêl hmun tin hmun tang a\angin mi an lo kal khâwm \hîn a. Ram pâwn lama mîte tân chuan sumdâwnna hmun remchâng tak a ni a, khawpui khawlo tak pawh a ni bawk. Chuta mîte chuan pathiannû, Daphne an tih chu an be \hîn a, an biâk dân phung pawh hurna lam thil a nasa khawp mai,” a ti a.

Tirhkohte zînga pakhat chuan, “I han sawi dân hmang a\ang chuan i thawhna tûr âwm tak pawh a nih chu,” a ti a.

“Nî e, Pathian khawngaihna pawhin min hliahkhuh ang a,” tiin Barnaba chuan a chhâng a.

Antiokei khuâ a va thlen chuan, Barnaba chuan khawsakna hmun tûr a zawng nghâl a, tichuan ringtûte chu a tlawh chhuâk nghâl bawk a. Lalpa hnêna an inpêkna chu a dik ngêiin a hriâ a. Kâr lohah ani pawh chuan midangte chu Isua chanchin zirtîrin A hnênah a hruâi vê ta zêl mai bawk a.

Nilênga thuhril leh zirtîrna a neih zawh tlâi khat chu, Barnaba chu inngaihtuahin a \hu vang vang a. Hetianga mi \hahnem tham takin Isua an pawm han hmuh chu a hlimawm hlê maia, mahse mahni ngawta thawh âi chuan thawh sâwt deuh dân a awm ang. Min rawn \anpui tûrin Saula kha sâwm ilang a \hâin ka hriâ, tiin a ngaihtuah a.

A tûkah chuan Tarsa khaw lam panin a zin chhuâk tâ a, chutah chuan Saula, Paula an tih tâk bawk chu hnathawkin a awm mêk a ni. Paula chuan Barnaba nêna hnathawh dun chu rem a ti nghâl mai a. Antiokei lamah kal lehin, rawng an bâwl dûn a, Jentailte hnênah Isuâ chanchin an puâng a. Nakin lawkah phei chuan Kristian tih an nih ta nghê nghê a ni.

Paula chuan Barnaba hnênah, “Eng nge min vuah i hriâ em?” tiin a zâwt a.

Barnaba chuan nui deuh hak hak chung hian, “E le, Kristian, min diriâm leh nuihsawh angreng chungin ‘Kristá mîte’ min ti a lâwm. Kan LALPÂ hmingchâwi meuha min phuahte chu châwimâwina ropui tak a ni tih ngaihtuahna pawh an nei lo a niâng,” a ti a.

Barnaba leh Paula-te chuan tlawhtu leh inlêng an nei thei khawp mai a. Ni khat phei chu Jerusalem khuâ a\angin tlawhtu bîk tak—zâwlnei an tawng hlauh mai. Barnaba leh Paula-te chuan ringtute nêna zâna inkhâwm ho an rêl a.

Jerusalem, Foiniki, Kupra leh rambiâl dang, Isuâ chanchin an thehdarhna hmun hrang hrang a\anga report an pêk chu inkhâwmhote chuan an ngaithla \hap mai a. A tâwpah Agaba chu thusawi tûrin a lo ding chhuâk a. Barnaba chuan mi tinte chu ngâwia ngaithla \hap tûrin zaizirin a khap hlawm a.

Ani chuan, “Pathian zâwlnei ka ni a, tûnhnâi deuh lawk khân thu hriât nuâm vak lo min dawntîr tlat mai a. Palestina ramah hian khuâ a khêng dâwn tih thû a ni. Kan \hiânte Jerusalema awmte chuan harsatna engemaw tak an tâwk dâwn a ni,” tiin a sawi a.

Agaba chu a \hut leh tâk hnû chuan, a hmei a pâin mahni ngaih dân dân sawiin an lo \awngchhuâk hlawm a. An ngawih leh theihna tûrin Barnaba chuan a bân a’n phar leh hluâi a.

Nui deuh var var chung hian, “Ngaihdân leh rawtna kan ngah hlawm hlê pawhin a lang a, mûmal deuh zâwkin i’n ngaithla dâwn teh ang u hmiâng,” tiin rawtna a siâm a.

Hmeichhe pakhat chuan, “Kan theih ang tâwka tamin Jerusalema kan ûnâute chu i chhawmdâwl ang u,” tiin rawtna a rawn siâm a. Mi tin chuan pawmpui tih hriât tak hian an lû an lo bu nghat nghat hlawm a. Chû nû chuan, “Ka thawh theih tûr chu hei hi a ni,” tih pah chuan a tangka neih chu bâwmah chuan a thlâk ta nghâl mai a. Tichuan a mal malin tangka fâi chu an thlâk ta sup sup mai a, chûbâk \anpuina pawh pe tûrin an intiâm ta hlawm a. An bâwm a lo khah tâkah chuan an zînga pakhat chuan Barnaba hnênah a hlân a.

A hlan pah chuan, “Barnaba, nang leh Paula hian Jerusalema upâte hnênah hlân ulang \hâin ka hriâ,” tiin a chah a.

Barnaba leh Paula chu an inen ralh ralh a, hlim takin an nui dûn var var mai a ni. Barnaba chuan, “Naktûk zîng remchâng hmasaberah kan chhuâk nghâl ang,” a ti a.

TIH TÛR

Sabbath: Puzzle 4-na ti nghâl ang che.

Sunday: Zirlai chhiâr chhuâk la, chângvawn vawng tûrin zir \an ang che. A theih chuan ziâk chhâwng la, vawng tlat ang che. In kohhrana pastor leh upâte tân \awng\âisak ang che.

Thawh\anni: Tirhkohte 11:19-21 chhiâr la. Chanchin \ha thehdarhna remchâng atân i chungah emaw in kohhran chungah emaw harsatna a lo thleng tawh em? Nangmah leh in kohhran tâna Pathianin A thawhsak dân che u chu vawiin hian tûemaw hnênah hrilh ang che. Engang boruâk hnuâiah pawh a \halam zâwnga thlîr thei hrâm tûrin Pathian \anpuina dîlin \awng\âi ang che.

Thawhlehni: Tirhkohte 11:22-24 chhiâr la. Kristian dangte beng thleng tûr eng thil nge LALPA tân i tih? Barnaba anga midangte fuih phûrtu i nih theih nâna vawiina i tihtûr pathum ruâhman lang, ziâkin chhinchhiah fel thlap ang che. I hmûiah fuihna thû a châm theih nân Pathian hnênah dîl ang che.

Nilâini: Tirhkohte 11:25, 26 chhiâr la. Tûten emaw an chhaih leh fiâmna che, engemaw thil \ha lam ni hlauh sî sawi tûr i nei em? KRISTIAN tih hawrawp hi \awngkam thubula hmang \heuhin thu awmzenei han phuah teh. Kristian tih i nih avânga i ham\hatna chungah Pathian hnênah lâwmthu sawi ang che.

Ningâni: Tirhkohte 11:27-30 chhiâr la. Chhiât tâwkte \anpui nân kârtin sum tlêm tal khâwl tum hrâm la, chutiang tûr i neih loh eh, chutiang lama hmalatu ADRA thawktûte tân \awng\âi ang che. Mîte tlâkchhamna chhawmdâwl tûra remchânna avânga Pathian hnênah lâwmthu sawiin \awng\âi ang che.

Zirtâwpni: Tirhkohte 11:19-30 hi in chhûngkuâin ennawn leh ulang, \anpuina i lo dawn tawh dân leh chuta i ngaihdân chu ngaihtuah la, kohhran chhûnga tlâkchham tuârte i \anpui theih dân tûr ngaihtuah ang che. Tûnkar chhûnga tûemawte i \anpui dân tûr ruâhman lang, A mîte \anpui zêl duhna thinlung i put theih nân Pathian hnênah dîl ang che.