Zirlai-9 -2024 2nd Quarter

Zirlai 9                                                    May 25–31, 2024

paThian sorkarna lungphûm chu

Chângvawn: “Tichuan, dragon chu hmeichhe chungah chuan a lo thinur a, a thlah la awm, Pathian thupêkte zâwma Isuâ hriattîrna thu pawmte chu do tûrin a kal ta a,” (Thupuan 12:17).

Sabbath Chawhnû                         May 25

 Chhiar tûr: Thufingte 28:9; Thuhriltu 12:13, 14; Daniela 7:25; Thupuan 14:6–12.

Adventist-ten nasa taka Bible an zirna azârah, vân biak bûk Hmun Thianghlim Bera dân pawimawhzia chu an hrethiam ta a. Pathian dân lai tak kan thlîr chuan, thupêk palîna, Sabbath pawimawhna kan hmu bawk a. Dik takin, a dang zawngte âiin hê dân hian Pathian chu min Siamtu a nihna vânga chibai kan bûk tûr a nihzia min hriat chiantîr a; hei hi chibaibûkna dik lungphûm, khawvêl chanchin tâwpna hunah phei chuan la pawimawh zual tûr chu a ni (Thupuan 14:6–12).

A tîr a\anga Setana thil tum chu Pathian dân palzûtna hmanga Pathian chibaibûkna tih sukuk a ni nghâl a. Ani hian ‘pakhat’ bawhchhiat chu ‘a dang zawnga thiam lohna’ a ni tih a hria a (Jakoba 2:10); chuvang chuan, Pathian dân bawhchhe tûrin mîte hi a fuihpawrh \hîn a ni. Setanan Sabbath a huât viâu chhan chu Siamtu a târ lan bâkah, Amah chu chibaibûk tûr a ni tih a hriattîr vâng a ni. Vân biak bûk Hmun Thianghlim Ber-ah pawh Pathian dân chu vawn him a ni a. Dân chu sual kâwk chhuaktu a nih avângin, mîten Pathian chunga rinawm dân kawng an zawn chhûng chu, Sabbath thupêk pawh telin, A dân hian pawimawhna a nei zui zêl dâwn a ni.

Hê zirlaiin a tum chu biak bûka Pathian dân, Sabbath leh sakawlh chhinchhiahna lo awm tûr chungchâng chu a ni. Tâwpna huna mîte tâna Sabbath pawimawhna pawh kan bih tel bawk ang.

Sunday                                          May 26

Biak Bûk leh Dân Chu

Chhiar tûr: Thupuan 11:19; Exodus 25:16; 31:18; 12:17. Biak bûk Hmun Thianghlim Ber chhûnga Thuthlunna Bâwm chhûnga thil awm eng nge hêng chângte hian an sawi?

Inremna Nî kha rorêlna  nî a ni. Khatah khân Israel mîte chu tel vek tûra thupêk an ni a, hnâ zawng zawng chawlhsanin sima thinlung inen lêtna an nei tûr a ni (Lev. 23:29–31). Chû nîah chauh chuan Puithiam Lalber chu biak bûk Hmun Thianghlim Berah, sual laka inremna siam tûrin a lût \hîn a. Biak bûk pindan chhûngril berah chuan Thuthlunna Bâwm a awm a. Bâwm chhûngah chuan Pathian dân Thupêk Sâwm ziahna lungphêk chu a awm bawk. Bâwm khuhna rangkachak kha ‘zahngaihna \hutphah’ tih a ni a, chû chu sual laka biak bûk tihthianghlim nân thisena theh a ni \hîn. Zahngaihna \hutphah chungah Shekinah ropuina hmangin Pathian chênchilh nihna târ lan a ni bawk a. Inthâwina hlan khân mi sualte chunga Pathian zahngaihna a lantîr \hîn a; Inremna Nî-ah erawh chuan rorêlna nî thlengin sual hi hriat reng a ni (Heb. 10:3) a, sual laka tihthianghlimna chu Kristâ thisen rinna zârah chiah a taka thlen theih a ni tih a târ lang (1 Pet. 1:18, 19). Chuta Pathian chênna hmunah chuan, zahngaihna leh rêldîkna chu inchawih mâwi taka kalpui a ni \hîn a ni.

Vân biak bûk thlîrin, tirhkoh Johanan “Pathian tempul . . . inhawnga A thuthlung lo lang” (Thupuan 11:19) chu a hmû a. Indona Ropui-ah hetianga sawi belh a ni: “Vân biak bûka Hmun Thianghlim Ber chhûngah chuan Pathian dân chu thianghlim leh zahawm taka dah a ni a, Sinai Tlânga khawpui rîte nên Pathianin A rawn puan chhuah, lung phêka Amâ kut ngeia ziak dân chu a ni. Vân biak bûka Pathian dân a tîra mi chu la chhâwngin, Lungphêkahte leh Mosia lehkhabu pangâah te ziah chhâwn leh a ni a, thu ziak chhâwn dik lo thei lo a ni. Chûng thu pawimawh hrethiamte chu, Pathian dân thianghlimna leh, danglam thei lo a nihnate chu hmuhtîr an ni.”—Ellen G. White, Indona Ropui, p. 434.

Adventist ringtu hmasâten biak bûk chungchânga Bible zirtîrna an zir khân, Pathian dân pawimawhna leh a lâi taka Sabbath awm pawimawhna chu an hrethiam ta a. Vân biak bûk chhûnga Thuthlunna Bâwma Pathian dân a awm a nih ngat chuan, kraws-ah a bo dâwn lo tih an chiang ta hlê a ni.

Pelh hauh lo va dârkâr khata mêl sâng khata chaka kâr tina rawn inher chhuak leh \hîn Sabbath chungchâng hi ngaihtuah la. Chû chuan thurina thilsiamna chungchâng pawimawhzia eng nge min hriattîr ngêi tûr ni ang? Eng thurin dangin nge chutiang chu min chiang taka min hriat nawntîr \hin le?

Thawh|annî                                  May 27

Pathian Dân Thlâk Danglam Theih Loh

Chhiar tûr: Matthaia 5:17, 18; Sâm 111:7, 8; Thuhriltu 12:13, 14; 1 Johana 5:3; Thufingte 28:9. Kristian leh dân inlaichînna chungchâng eng nge hêng chângte hian an zirtîr?

Seventh-day Adventist-ten Pathian dân thianghlimna châwisângtu Protestant Siam\hatûte hniakhnung an zui a. Chutiang chungchânga John Wesley-a thusawi hi lo chhinchhiah teh: “Mosian Israel fâte hnêna inthâwina emaw, hlimthla rawngbâwlna emaw a pêk, inthâwina dân te, tempul rawngbâwlna zawng zawngte pawh telin, khâng kha tiboral tûrin kan Lalpa chu a lo kal a, nuai bo leh tiboral hlauh tûrin a ni. . . . Mahse, \hatna dân, Thupêk Sâwma chuang, zâwlneiten an zirtîr kha chu A la bo vê lo. Chu mi pêng khawi mah sût tûra lo kal a ni hek lo. Hê dân hi hnâwl theih ngai loh tûr, ‘vâna thuhretu rinawma ding reng tûr’ chu a ni. . . . Hê dân bung hrang tin hi mi zawng zawng chungah, engtik lai pawha hman reng tûr a ni a; khawi lai hmun leh hun bîk emaw tân mai ni lo vin, a boruâk awm dân azira thlâk theih pawh a ni hek lo; Pathian nihphung leh mihring nihphung, an inlaichîn tawnna thlâk danglam theih loh chu a ni.”—Upon Our Lord’s Sermon on the Mount, Discourse V, John Wesley’s Sermons: An Anthology (Nashville, TN: Abington Press, 1991), pp. 208, 209.

Khaikhin tûr: Exodus 34:5–7 leh Rome 7:11, 12; Sâm 19:7–11; 89:14; 119:142, 172. Pathian dân leh Pathian nungchang inlaichînna chungchâng eng nge hêng chângte hian min hrilh?

Pathian dân chu Amâ nungchang ziah chhuaha awm, A lal\hutthlêng hûn chhan leh mihring thianghlimna tehfung tûr chu a nih avângin, Setanan a huâ a ni. “Leia biak bûk chu vâna mi anpui a nih sî chuan, leia Pathian bâwm chhûnga dân dah tâka chu vâna bâwm chhûnga mi ziak chhâwn chiah chu a ni a; tichuan vân biak bûk thutak pawm chungchângah, Pathian dânin a ngiat chu pawmin, thupêk palîna Sabbath hi zâwm tel tûra pawmna a ni tih tûman an hai thei lo. Hetah hian Pathian thu târlanna inrem tak, vân biak bûka Kristâ rawngbâwlna lantîrtu dodâlna thurûk, kha tak leh tumruh tak chu a awm.”—Ellen G. White, Indona Ropui, pp. 434, 435.

Thupêk Sâwmte zawm a ngai tawh lo tih chhuânlamah mîten eng nge an sawi \hin? Chumi phêna thil awm dik tak chu eng nge nia i rin?

Thawhlehnî                                   May 28

Sabbath leh Dân Chu

Chhiar tûr: Thupuan 14:6, 7; 4:11; Genesis 2:1–3; Exodus 20:8–11. Thilsiamna, Sabbath leh Pathian dân inlaichîn tawn dân chu eng nge ni?

Thilsiamna khân Pathian mithmuha kan hlutzia a târ lang a. Khawvêl zâuvah hian keini chauh hi awm kan ni lo va, tihpalh thila lo awm lah kan ni hek lo. Kan \obul leh kan lo zîkchhuahna chungchâng tûnlai thiamna leh khawvêl finnain a târ lan dân, mi tam takin an pawm tlân leh Bible sawi dân chu a thuhmun hauh lo mai.

Heta kan awm chhan chu Isuan min siam vâng a ni. Ani chu chibaibûk tûr a nihna chhan chu min siam vâng ngawt pawh ni lo vin, min tlanna avâng pawhin a ni bawk. Thilsiamna leh Tlanna chu chibaibûkna dik laimû chu a ni. Chuvângin, chhandamna ruâhman manthiam tak tak tûr chuan Sabbath hi a pawimawh êm êm a. Sabbath hian Siamtû min enkawlna leh Tlantû hmangaihna a târ lang a ni.

Thilsiam chawlhkâr tâwpnaah khân, Pathian chu A khawvêl siam tâk mâwina leh ropuinaah chuan A châwl a. Kan tâna entawn atân A châwl bawk a. Sabbath hi min Siamtu fak nâna kâr tina chawlhna hun a ni. Sabbath nîa chibaibûkna kan neih hian, ni dangah ni lo, chû nîa A malsâwmna bîk A dah chu dawng tûrin kan thinlungte kan hawng tihna a ni.

Kan tâna A thil ruâhman kan kal pênsan hnû pawh khân, Siamtu chuan min hmangaih êm avângin min hlamchhiah mai lo tih Sabbath hian min kawhhmuh a. Amaha kan chawlhna chatuana entîrtu a ni a. Siamtû chunga rinawmna a bîka entîrna pawh a ni bawk (Ezek. 20:12, 20). Hnathawh ni lo vin, chawlhna entîrna a ni a; dân zawma chhandam nih tumna ni lovin khawngaihna, thiamloh chantîrna ni lo vin rinngamna, chhandam nâna keimahni ni lo va Pathian rinchhanna entîrna a ni. Sabbath chawlhna dik chu min Tlantu leh Siamtu, kan tâna Lo-Lal-leh-Tûra hmangaihna bân rinchhana khawngaihnaa chawlhna a ni.

Thupuan 14 thuchah, khawvêl tâwpna huna Pathian thuchah hian Sabbath apianga A hmangaihna leh enkawlnaa châwl \hîn tûrin min ko va. Min Siamtu chu hre renga, Amâ hnêna châwimâwina hlân tûrin min ko reng a ni.  Sabbath serhna hian Eden \hatfamkimna leh, lo la thleng tûr lei leh vân siam thar ropuina chu a dawhzawm bawk. Engtikah emaw chuan, Eden mâwina kha dinthar a la ni leh dâwn tih min hriattîr a ni.

Seventh-day Adventist mi tam zâwkte chuan dân zawma chhandam nih tum anga sawisêlna an tawng \hîn a, chutah chuan kan Sabbath serhna a tel tlângpui bawk. Sabbath hi rinna felna leh Tlanna chhinchhiahna a nih thû hi sawi ho ula. Engati nge châwl tûra Pathian thupêk kan zawmna hi mîten thiltih hmanga vân lâwn tum anga min ngaih phah \hin?

         
Nilâinî                                           May 29

Sakawlh Chhinchhiahna Chu

Chhiar tûr: Thupuan 12:12, 17; 13:7. Engtin nge hêng chângte hian Setana thinurna an târ lan? Engati nge Setana chu tâwpna huna Pathian mîte chungah a thinrim?

Thupuan 12 hian lei leh vân huapa Krista leh Setana inkâra indona, kum tam tak chhûng kalpui chungchâng a târ lang a. Setanan Pathian mîte a beihna hmangin a vâwrtâwp a thleng dâwn a ni. Thupuan 13 hian dragon \anrualpui pahnih, tuipui leh khawmuâl sakawlh a sawi lang a. Hêng thiltihtheihna pahnih \angrual hian Pathian mîte chu an la do rawn dâwn a ni.

Chhiar tûr: Thupuan 13:4, 8, 12, 15; 14:7, 9-11. (En tel tûr: Thupuan 15:4; 16:2; 19:20; 20:4; 22:9.) Hêng chângahte hian eng thupui thuhmun nge lo lang le?

An danglamna hi chhinchhiah la. Mîten Siamtu emaw, a nih loh vêk leh thil dang eng emaw chu chibai an la bûk dâwn a ni. Siamtu chu chibaibûk phû a ni a (Thupuan 5:9). Krista leh Setana kâra vâna indona chhuah chhan kha chibaibûkna thû-ah a ni: “Chhûm âia sâng zâwkahte khian ka chho vang a; Chungnungbera ang maiin ka awm ang,” (Isa. 14:14). Siamtû chanpual bîk liâu liâu, chibaibûk nih kha Setanan a duh tlat mai a. Thupuan 13 sawi dânin, khawmual sakawlh chêtna zârah a hlawhtling dâwn a ni (Thupuan 13:4).

Daniela 7 nêna khâikhinna chuan hê khawmual sakawlh hi “hunte leh dânte thlâk danglam tumtu” leh hrilh lâwknaa ni 1,260 (a taka kum 1,260 chhûng) thuneihna hmangtu ‘ki te tak tê’ tho kha a ni tih a târ lang (Dan. 7:25; Thupuan 13:5; Zirlai 6-na en bawk la). Pathian Thupêk Sâwm dâna ‘hun’ chungchâng sawina awm chhun chu a palîna a ni. Hê kohhran hian a ni sarihna Sabbath nîa chibaibûkna chu chawlhkâr khata ni hmasa ber, Sunday-a thlâk tumin a lo bei tawh a ni.

A thuneihna chhinchhiahna atân Amah Pathian ngêiin nisarihna Sabbath chu chibaibûkna atâna A lo pêk (Exod. 31:13; Ezek. 20:12, 20) laiin, lei thuneihna chuan chibaibûkna nî chu thlâk dân kawng a zawng a, chû chu vân lam thuneihna luahlan tuma beihna a ni. Hê thil tak mai hian, chibaibûkna dik leh dik lo, khawvêl tâwpa inbeihna thu inchuh ber chu a ni dâwn a ni.

Hei vâng hian, Thupuan chuan Pathian chunga mi rinawmte chu “Pathian thupêkte zâwmtu” (Thupuan 12:17; 14:12) tiin a sawi a. Hetah hian Sunday ni lo vin, ni sarihna Sabbath chu a tel a ni. A ni thianghlima Pathian chibaibûk (Isa. 58:13) tûra Vân Tirhkoh Pathumte kohna hnuhnung hnar a, sabbath suâk, Sunday-a sakawlh chibaibûktûte chuan Sakawlh chhinchhiahna chu an dawng dâwn a ni (Zirlai 11-na en la).

Ningânî                                         May 30

Vântirhkoh Pathum Thuchahte Chu

Thupuan 14:7-ah, vântirhkoh pakhatna chuan aw ring takin, “A rorêl hun chu a lo thlen tâk avângin, vân te, lei te, tuifinriat leh tuihnâte Siamtu, Pathian chu hlâu ula, châwimâwi rawh u,” (NKJV) tiin a âu va. Vânin min ngenna chu, rorêlna lo thleng mai tûr êngah Siamtu chu thinlung taka chibaibûk a, A chunga rinawm tlat tûrin a ni.

Vântirhkoh pahnihnain a puân chhuah chu: “Babulon khaw ropui, a mi ngaih chîn vânga thinurna uain hnam zawng zawng intîrtu chu a tlâwm ta, a tlâwm ta,” (Thupuan 14:8) tih a ni. Babulon hian a entîr chu, sâkhuana kal sual, vântirhkoh pakhatna thuchah hnâwl a, chibaibûkna sual pawm zâwktu chu a ni. Chuvâng chuan Thupuan 14:9-11 chuan chibaibûkna thûa vaulâwkna min pêk chu “sakawlh leh a lim” chibaibûk lo tûrin a ni. Hetah hian duhthlan tûr inkalh tak pahnih a târ lang a—Siamtu chibaibûkna leh sakawlh chibaibûkna a ni. Hê leia mi tinte hian, thlâk danglam leh theih tawh hauh loh tûra duhthlanna kan siam a ngai dâwn a, chû chu—Krista nge kan thlan dâwn Setana tih a ni.

Chhiar tûr: Thupuan 14:12. Sakawlh chibai bûk hniâltute nihna târ langtu thil pahnih chu eng thilte nge ni? Engati nge a pahniha an pawimawh vê vê?

Khawvêl chanchina dodâlna namên lo leh tihduhdahna tawrhhlelhawm tak kârah pawh, Pathian chuan tâwpna hunah hian Amâ chunga mi rinawm tlatte A nei dâwn a. Kristâ felna thilthlâwnpêk zârah, khawngaihnaa-khat nun neiin, thuâwih takin an nung ang. Sakawlh chibaibûkna kalh zâwng taka Siamtu chibaibûka dinna chu Pathian thupêkte vawnna a ni. Hê inbeihna hnuhnunga Kristâ chungah rinawmna emaw, sakawlh chunga rinawmna emaw chu chibaibûkna thû-ah a ni dâwn a, Sabbath hi sual leh \ha inkâra indona ropui thupui laimû chu a ni dâwn a ni.

Hêng rinawm taka Chhandamtu zuitûte hian ‘Isua-a’ rinna an nei lek ni lo vin, ‘Isuâ rinna” pawh an nei bawk dâwn a ni. Isuâ rinna chu, thûk, rinchhan ngam, inpêkna tak tak a nih avângin, hremhmun ramhuai zawng zawngte leh hê leia fiahna zawng zawngte pawhin an sâwi nghîn theih loh khawpa nghet a ni. Mita hmuh theih loh lai pawhin a ring a, a chhan hriat loh lai pawhin a ring a, thil manthiam mai loh lai pawhin a beisei tlat \hîn. Hê “Isuâ rinna” hi rinnaa kan dawn thilthlâwnpêk a ni. Hmalam huna buaina lo thleng tûrah pawh min kaltlangpui dâwn a. Khawvêl tâwp buaina a lo chhuah hunah, sum leh pâi, ei leh bâr lama khuahkhirh, tihduhdah, tântîr leh thihna ngêi hmachhawn hunah pawh, Isuâ rinna chuan Isuâ lo kal dârkâr hnuhnung ber thlengin min chelh tlat dâwn a ni.

Engtin nge Pathianin tûna i rinna chu hmalam hun lo kal tûr atâna buatsaih lâwk nân A hman \hin?

Zirtâwpnî                                      May 31

Zir Zâuna: “Anmahni lam \ana Bible hriattîrna a awm loh avângin mi tam

takin luhlul chhuahin–Krista leh A zuitûte laka hnialkalh nân an lo hman \hin tawh dân chu theihnghilhin, ‘Engtin nge hêng Chawlhni thûa zawhnate hi kan mi lianten an lo hriat thiam loh? Mi tlêm tê chauhvin in rin ang hi an ring sî a. Nangniho hi dikin, hêng mi thiamho zawng zawngte hi an dik lo thei lo vang,’ an ti a.”

“Chutiang hniâlna kalh thla tûr chuan, Pathian lehkha thu zirtîrnate chauh leh, tûn hma hun zawng zawnga Lalpan A mîte A lo enkawl dân chanchin kha sawi chhâwn a \ûl a ni.

“Mahse chhuan kal tawha Kristiante chuan Bible-a Chawlhni emaw an serh tiin Sunday an lo serh \hîn a; tûnah pawh kohhran tinrêngah, Roman Cathlolic kohhran pawm chuang lovin, Sunday hi Pathian ruat chawlhni ni ngeia ring tlatte an awm a. An thiltiha an rinawmna leh A hmâa an tihtakna chu Pathianin A pawm a. Mahse Sunday serhna chu dân hmanga tihluihtîr a nih hunah, Chawlhni dik serhna chungchângah tihmâkmawhin khawvêl hi tih-ên a la ni ang a, tichuan tupawh Rome thuneihna âia lêm chuang lo thupêk zâwm tuma Pathian thupêk bawhchhia chuan, pope chu Pathian chung lamah a châwimâwi dâwn a ni. Rome hnênah châwimâwina a pê a, Rome-in dân a siam hmanga thuneihna lektu pawh a châwimâwi a ni.

Sakawlh leh a lem chu chibai a bûk a ni. Pathianin A thuneihna chhinchhiah nâna dân A lo siam tawh chu hnar a, a âia Rome-in a chungnunzia chhinchhiahna atâna a thlan chu an châwimâwi chuan, chutah chuan Rome laka rinawmna chhinchhiahna– ‘Sakawlh chhinchhiahna’ chu an pawm a ni ang. Thil ngaihtuah fel tûr chu chiang taka mipui hmâa dah a nih a, Pathian thupêkte leh mihring thupêkte inkâr thlang fel tûra tih an nih thlenga bawhchhiatna la chhunzawm zêltute chuan, ‘Sakawlh chhinchhiahna,’ an nei ang.”—Ellen G. White, Indona Ropui, pp. 455, 449.

Sawi Ho Tûr:

ŒKan khawvêl hi rang leh mak takin a danglam chak hlê mai. Engati nge tâwpna huna thil thlengten min barakhaih loh nân ngaihven \ha tûr kan nih ang?

Engtin nge rorêlna leh Pathian dân hriatthiamna hi khawngaihna zâr chiaha chhandam kan nih thû nên a inrem?

ŽSabbath thutak pawimawhna la man thiam lo chunga rilru tluâng taka chawlhkâr khata ni khatna (Sunday) serhtûte hnêna thuhretua \an theih dân tûr chu engte nge ni ang? Kohhran leh sorkar thuneihna \andunnaah hian eng thil hlauhawmte nge awm? Kristiante hian sorkar kan inlaichînpui dân tûr chu engtin nge ni?