2024 4th Quarter Puitling Zirlai 8-na
November 16–22
Thuthlung Hlui Hrilhlâwknate A Thleng Famkim
Sabbath Chawhnu
Chhiar tûrte: Joh. 5:17, 20, 36–40, 46, 47; Joh. 13:18; Joh. 17:12; Jer. 2:13; Zak. 9:9; Joh. 8:12–30.
Chângvawn: “Nimahsela, hriattîrna ka neih hi Johana hriattîrna thu âi khân a ropui zâwk a ni: Pa-in thil tih zawh tûra mi pêk, ka thil tih ngei hian Pa-in mi tîr tih ka chanchin a hriattîr a ni” (Johana 5:36).
Johana lehkhabu-ah hian Messia (Hebrai \awngin, hammashiach), Krista chu Israel mite hnênah a lo kal ta tih puangtu Isua thil sawite leh thil tihte kan hmu tam hle a. Dik tak phei chuan, anmahni zîng mi, Juda ni ve tho anga lo kalin, Pathian Lehkha Thu-in a lo sawi ang chiah khân Bethlehem khuaah a lo piang nghe nghe.
Mahse, Johanan a lo ziah ang hian, “Ani chu khawvêlah hian a lo awm tawh a, khawvêl pawh hi ama siam a ni a; mahse, khawvêl hian amah chu a lo hre si lo” (Joh. 1:10, NKJV) a ni.
Khawvêlah hian a lo awm tawh a, khawvêl pawh hi ama siam a ni nghe nghe a; mahse, khawvêl hian amah chu a lo hre si lo amaw? A va han mak ngâi êm! Tin, Johana ziakah leh Chanchin |ha bu dangahte pawh kan hmuh ang hian, khatiang thilte kha tiin sawi \hîn mah se, mi tam takin Messia a ni tih an lo hre chuang lo tlat mai a. A mak leh zual êm êmna pawh, Thuthlung Hlui thute hian amah hi an kâwk vek bawk si lâi hi a ni.
Tûn kârah hian Johanan Isua kha Messia a ni tih a lantîr dân kawng dangte kan en ho leh ang a; tin, Krista a ni ngei tih pawm chhan tûr \ha tak tak a awm chunga mi \henkhatin a la pawm duh chuan tlat loh chhan pawh kan sawi tel bawk dâwn a ni.
An thil tih sual a\ang hian eng nge zir chhuah tûr kan neih ang?
Sunday November 17
Chhinchhiahnate, hna thawhte leh thilmak tihte
Johana hian Isua kha Messia a ni tih entîrtu atâna hman tûr Isua thilmak tih eng eng emaw a sawi bâkah, Isuan chhinchhiahna a tih te, hna a thawh te leh thilmak a tih te zau zâwka sawina pawh a lo ziak tel bawk.
Nimahsela, chhinchhiahnate leh thilmakte hian anmahni ngau ngau chuan Isua kha Messia ni ngei tih an finfiah hran chuang lo thung a, a chhan pawh zâwlnei tam takte khân (a châng chuan zâwlnei derte pawhin) thil mak tak tak an lo tih ve \hin tho vâng a ni. Chuvâng chuan, Johanan hêng Isua chhinchhiahna tihte a lo ziah chhan hi Isua kha thilmak titu ropui tak a ni tih târ lan a duh vâng a ni mai lo a. Johanan a lo ziah chhinchhiahnate hian Isua kha Messia a ni tih thiam taka an târ lan bâkah, Isua Krista kha Pa Pathian tirha lo kal ngei a ni tih an lantîr bawk.
Johana 5:17, 20, 36–38 chhiar la. Engtin nge hêng chângte hian Isua leh Pa Pathiante inzawm dân, a bîk takin Isua chhinchhiahna tihte chungchângah hian an sawi fiah le?
_____________________________________________________
_____________________________________________________
Isua khân a chhinchhiahna tihte chu Pa nên an inzawm hnaihzia leh hna pawh thawk dûn zêl a nihzia tih lan nân a hmang \hîn a. An pahnih hian pumkhat an ni. A hna thawhte hian amahah khân Pa chu a awm a; tin, amah pawh Pa-ah a awm ve tho bawk tih a ti lang (Joh. 10:38, NKJV; Joh. 14:10, 11 pawh en bawk ang che.)
He khawvêla Isua lo kal chhan chu khawvêl hnêna Pathian hna thawhte tih lana a awm theih nân amah tîrtu hnate rawn thawh a ni a. A awmzia chu, Pa-in a rawn tirh chhan hna thawk tûrin a lo kal tihna a ni. Chutiang tak chuan a rawn ti ta ngei rêng a, chûng a hna thawhte chuan chiang takin Pa hnên ata lo kal a nihzia an ti lang bawk.
Chutih rual chuan, kan sawi tâk ang khân, mi \henkhat chuan hêng thilmak ropui tak takte hi hmuin, miten Isua chanchin an sawite pawh lo hre tho mah se, an la ring duh chuang rêng rêng lo a.
Sakhaw hotute meuh pawhin heti hian Isua hnênah zawhna an zâwt a ni: “Eng chen nge tuilâirapin min siam dâwn? Krista chu i nih chuan, chiang takin min han hrilh mai teh” tiin. Isua erawh chuan, “Ka hrilh tawh reng che u kha; mahse, in âwih duh tlat lo alâwm. Ka Pa hminga hna ka thawhte khân tu nge ka nih chu an ti lang chiang khawp mai” (Joh. 10:24, 25, NKJV) tiin a chhâng a.
Isua hian ualau takin Messia a nih thu sawi ta se chuan sakhaw hotute hi a lo hre thiam lo ber bertu an ni dâwn a, amah beihna tûr an zawng nghâl chûk chûk ang tih a chiang reng mai. Chu chu Isuan a hre chiang a, tlang taka a nihna sawi loin a hna thawhte chu lo chîk mai tûrin a hrilh ta zâwk a ni. Isua hian Krista a ni tih lo sawi ta sela, a nih lohzia sawi dân tûr an zawng nghâl vat dâwn a. Nimahsela, a chhinchhiahna tih lante, a hna thawhte leh a thilmak tihte hi chu engtin nge dâwt a ni tiin an sawi theih ang? Hêngte hi tu nge a nih a, khawi a\anga lo kal nge a nih tih phat rual loa ti langtu an ni.
Hêng sakhaw hotuten thinlung sak tak an neih ang hi keini chuan kan neih ve loh nân engtin nge kan invên theih ang? Engtiang kawngtein nge keimahni nuna Pathian hnathawh lo langte hi a dodâl zâwngin kan lo chêt theih ang?
Thawh|anni November 18
Pathian Lehkha Thu thuneihna
Johana hian Isua kha Messia a ni tih entîrtu tûr Isua chhinchhiahna tihte leh miten Isua chanchin an sawi hrang hrangte a sawi chhâwn bâkah, Kristan hna a la rawn thawh tûr lo sawitu Thuthlung Hlui thute leh hrilhlâwknate pawh \an chhan atân a hmang bawk. Thuthlung Hlui thute hi Johana ziakah chauh ni loin, Thuthlung Thar lehkhabu dang zawng zawngte pawhin an dah pawimawh êm êm \heuh a. Isua hi tu nge a nih a, khawi a\anga lo kal nge a nih a, eng thil nge a tih a, eng thil nge a la tih leh dâwn tih zawng zawng pawh Pathian Lehkha Thu-ah a lo inziak vek a (heta “Pathian Lehkha Thu” tih hian Thuthlung Hlui lehkhabute a kâwk.)
Johana 5:39, 40, 46, 47 chhiar la. Hêng chângte hian engtin nge Bible thuneihna chungchânga Isua ngaih dân an tih lan?
________________________________________________________
_______________________________________________________
Chanchin |ha bu pali-ahte hian Isua khân tu nge a nih tih miten an lo hriat theih nân Pathian Lehkha Thu-in a lo sawite chu a sawi chhâwng \hîn a, hei hian Pathian Lehkha Thu hi thu nei nia a ngaihzia a ti lang. Thuthlung Hlui lehkhabuten an lo sawi thil thleng eng eng emaw hi amah lo entîrtu leh a thil tih tûrte lo sawi lâwktu atân a hmang \hîn a. Chûng zînga pakhat chu Numbers 21:5–9-a kan hmuh thil thleng kha niin, “Mosian thlalêra rûl a khâikân ang khân Mihring Fapa pawh hi khâikânin a awm ve ngei tûr a ni” (Joh. 3:14, NKJV) a ti. Hetah hian Mosian dâr rûl a khâikân thu Numbers bua kan hmuh hi a taka thleng ngei a ni tih pawmin a sawi chhâwng a ni mai lo a, kha dâr rûl kha amah lo entîrtu a ni tih sawiin, he thawnthuin min hrilh a tum pawh pawmnaawm takin a sawi fiah nghâl bawk.
Tin, amah Isua chauh ni loin, mi dangte pawhin Thuthlung Hlui thute hi Isua entîrtu atân an hmang ve tho bawk a. Entîr nân, Johana lehkhabu tîr lamah pawh heti hian Philipan a lo sawi a nih kha: “A chanchin Mosian dân lehkhabua a ziak leh, zâwlneiten an ziak kha, amah chu kan hmu ta” (Joh. 1:45) tiin.
Hêngte hi chhiar la: Joh. 13:18; Joh. 17:12; Joh. 19:24, 28, 36. Engtin nge Isua leh Johana te khân Bible hian thu a nei hle a ni tih an pawmzia an sawi? Chu chuan engtin nge Bible thu zawng zawng hian kan rinna kawngah pawh pawimawhna an nei \heuh a ni tih min hrilh le?
_________________________________________________
Kan tûnlâi hunah hian eng thilten nge a rûk deuh hlekin emaw, ualau tak pawhin emaw Bible thuneihnaa rinna nghah ngam lohna rilru min puttîr le? I chhânna chu Sabbath-ah i sawi chhuak dâwn nia.
Thawhlehni November 19
Thuthlung Hlui hrilhlâwknaten Isua chanchin an lo sawi dân: |hen 1-na
Isua khân tu nge a nih tih chungchânga sakhaw hotute nên an inhnial \umin Pathian Lehkha Thu hi thu nei tak a nih thu a sawi chhuak a. Han ngaih mai chuan, chu thu chu sawi chhuah khêr ngâi tûr ni pawhin a lang lo, a chhan pawh sakhaw hotute hi Bible ringtute an nih vâng a ni. Nimahsela, anni hnênah ngei pawh hian Pathian Lehkha Thu hi thu nei a ni tih uar taka a sawi a ngâi tho mai a; chuvâng chuan, eng anga thinlung sak pu leh eng anga amah rin loh luih tum pawh ni hlawm mah se, tu nge a nih tih hriattîrna atân a sawi ta ngei rêng a ni.
Johana hian Thuthlung Hlui lehkhabu hrang hrang a\angin Thuthlung Hlui ziaktuten an lo sawi lâwk Messia chu Isua hi a ni tih entîrtu châng tam tak a la chhuak a. Chûng zînga \henkhat chu a ziaktute sawi a ngialngana a sawi chhâwnte niin, \henkhat dang erawh ama’n nia a rin anga a sawite a ni hlawm thung.
Hêng a hnuaia târ lan Thuthlung Thar thute leh Thuthlung Hlui thute hi engtiangin nge an inzawm hlawm? A awmzia chu, Thuthlung Thar ziaktuten hian engtin nge Thuthlung Hlui thute hi Isua nihna târ lanna atân an hman?
Joh. 1:23, Isa. 40:3 _________________________________
____________________________________________________
Joh. 2:16, 17; Sam 69:9 ______________________________
___________________________________________________
Joh. 7:38, Jer. 2:13 ___________________________________
____________________________________________________
Joh. 19:36, Num. 9:12 _______________________________
____________________________________________________
Johana chauh a ni lo a, Petera te, Paula te, Matthaia te, Marka te, Luka te leh Thuthlung Thar lehkhabu ziaktu dang zawng zawngte pawh hian Thlarau Thianghlim uapna hnuaiah Nazareth Isua nunna, a thihna, a thawhlehna leh Pathian lal\hutphahaa a han \hut tâknate chu Thuthlung Hlui lehkhabuten an lo hrilhlâwk lo thlen famkimna vek a nih thu uar takin an sawi hlawm a.
Tin, Isua khân a hna thawh tûr lo sawi lâwktu Pathian Lehkha Thute chu ngun taka zir tûrin a hrilh \hîn bawk a—mahse, eng tikah nge ama chanchin sawina Pathian Lehkha Thute chu an lo hriat thiam tâk le? A thih hnu, chutah pawh a thawh leha, an hnêna a rawn inlâr hnu-ah chauh an hre thiam ta a. “Chutichuan, mitthi zînga ata a thawh leh hnu khân a zirtîrte chuan an hnêna a lo sawi tawh kha an hre chhuak ta a, Pathian Lehkha Thu leh Isuan a lo sawi \hinte kha an ring ta a” (Joh. 2:22, NKJV; Joh. 20:9 pawh en bawk ang che).
Nilaini November 20
Thuthlung Hlui hrilhlâwknaten Isua chanchin an lo sawi dân: |hen 2-na
Heti hian Isuan sakhaw hotute hnênah a sawi a: “Pathian Lehkha Thu in chhiar ngun \hîn, chutah chuan chatuana nunna awma in rin vâng a ni; hêngte hi ka chanchin sawitu an ni asin” (Joh. 5:39, NKJV) tiin. Ama chungchâng an sawi a ni tih huai taka a sawi ngam hi a va ropui êm!
Bible zir mite chuan Nazareth Isuan Thuthlung Hlui hrilhlâwkte a rawn hlen chhuah tâk zât hi an chhiar a. A hlen chhuah zât an sawi chu inang chiah chiah hlawm lo mah se, za chuang fe chu a tling niin an ngâi hlawm tlângpui. A zât chu eng pawh lo ni se, mi pakhat chunga hetiang zât zet mai a lo thleng famkim hi a mak hrim hrim a. Hetiang hian entîrna han sawi ila: Mizoram tiat vêla zau ram âwl awm se, chutah chuan feet hnih vêla sângin pawisa thîr rem chhuak ta vek ila, chûng pawisa thîr tam tak zînga pakhat chu rawng sen hnawihin hnawih ve lohte nên khân dah pawlh leh ta ila. Tichuan, mi tu emaw, puana a mit tuamsakin, rawng sen kan hnawih taka kha va thur chhuak nalh tûrin ti ta ila. Vawi khat chiah hun pe bawk si ila, a ti theiin kan ring em?
Phat rual a ni lo—Krista a lo pian tûr thu te, thil a tih tûr te leh a thi dâwn a ni tih te kha Thuthlung Hlui lehkhabute hian an lo sawi lâwk sa vek a, Israel-ten an lo nghah Messia chu amah ngei kha a ni tih a chiang hle. Chuvângin, Johana hian chûng Thuthlung Hlui thute chu Isua kha tu nge a nih a, eng vânga amah ringa a chhandamna siam pawh pawm mai tûr nge kan nih tih kan lo hriat theih nân a sawi chhâwng fo rêng a ni.
Hêng thu, Chanchin |ha Johana ziaka mi lâk chhuahte hian Isua chu Thuthlung Hlui lehkhabuten a lo sawi Messia ngei kha a ni tih engtin nge an sawi?
Joh. 12:13, Sam. 118:26 ____________________________
_________________________________________________
Joh. 12:14, 15; Zak. 9:9 ____________________________
_____________________________________________________
Joh. 13:18, Sam 41:9 ______________________________
__________________________________________________
Joh. 19:37, Zak. 12:10, Zak. 13:6 ______________________
________________________________________________
I rinnaah khân engtiang taka nghetin nge i din le? Mi tuin emaw Isua hi Messia nia i rin chhan zâwt ta che se la, engtin nge i chhân ang? I rinna chu a pawmawm hle a ni tih ti lang tûrin eng nge i hman ang a, eng vânga chumi chu hmang nge i nih ang?
Ningani November 21
Hnuai lam chhuak
Johana lehkhabu kan zir tawh chinah khân Johanan Isua hi Thuthlung Hlui zâwlneiten an lo sawi Messia, Juda miten kum kha leh chen nghâkhlel taka an lo thlîr chu a ni ngei tih a târ lan dân kan hmu ta nual a.
Chutih lâiin, sakhaw hotu, thlarau lama mite kâihruaitu tûrte zînga tam tak erawh kha chu Isua hmêlma chimawm ber berte an ni lawi bawk si. Eng vâng nge maw ni le?
Johana 8:12–30 chhiar la. He lâia Isua leh sakhaw hruaitute thu inchuh hi eng nge ni? Hêng chângte zînga a khawi lâi tak hian nge sakhaw hruaituten Isua an pawm loh chhan sawi?
___________________________________________________
____________________________________________________
A pa awmna an zawha Isuan a chhânna chu, “Nangniho hian kei hi tu nge ka nih min hre lo a, ka Pa pawh in hre hek lo” (Joh. 8:19) tih a ni. Hêng mite hian Isua leh a Pa chu hre tawh âwm tak an ni a; mahse, anmahni inbum an nih miau avângin an hre thei tlat lo. An lo kal tawh \hin dân leh ngaih dân nghet sa an neihte chuan a phuar bet hneh lutuk a, Isua chu an bul maia awmin—Pathian inpuanna ropui tak—thilmak chi hrang hrang tiin leh thu ropui tak tak sawi mah se, a pawm duh chuang rêng rêng lo.
Isuan a sawi dang leh chu, “Nangni hi chu hnuai lam chhuak in ni” (Joh. 8:23, NKJV) tih hi a ni a. |awngkam danga sawi chuan, inti-sakhaw mi eng ang mah se, thlarau mi dik tak, Pathian \ihtute chu an ni chuang lo a tihna a ni. “Pathian ngaihsak tak ni ang” (2 Tim. 3:5) chuan an lang naa, chu zawng chu a ni mai. Pâwn lam lang theiah chuan a thianghlim hmêl hlawm khawp a, an thinlung erawh rin duh tlat lohnain a khat thung si a ni ber.
An khawsa zia hi thil thar pawh a ni lo: “He mite hian min rawn hnaih a, an kâ leh an hmûiin mi châwimâwi \hîn tak a; nimahsela, an thinlung chu ka hlatah an sawn daih a, an mi \ihna pawh mihring thupêk an inzirtîr mai a ni” (Isa. 29:13) a lo ti. He thu tho hi kum za eng emaw zât a liam hnu-ah Isua khân a rawn sawi ve leh a, “Eng pawh ni sela, an zirtîrnaa mihring thupêkte an zirtîr avângin a mi biak \hin pawh hi a thlâwn mai a ni e” (Marka 7:7) tiin. Anmahni phuahchawp zirtîrna, anmahni duan chhuah thupêkte hi “he “khawvêl a\anga chhuak a ni a” (Joh. 8:23), Isua erawh chu “he khawvêl a\anga chhuak a ni ve si lo” (Joh. 8:23). Hêng mite hi mahni inbum an ni a, a zia lo hle mai. A lungchhiatthlâk zual êm êmna chu, mi dangte pawh a hruai bo ve leh zêl hi a ni. Hetih lâi hian thil ngaihnawm deuh erawh a awm ve tho a, hetianga sakhaw hotute nêna an inhnial lâi lo thlîrtute zînga tam tak hian Isua an lo ring ve ta hlauh thung a ni (Joh. 8:30).
Chutiang chuan, Juda sakhaw fawng chelhtute hi mi sual tak tak ni hlawm mah se, Juda mi tam tak erawh an zirtîrna a\angin an tâl chhuak thei hlauh mai a; chuvâng chuan, Isua hi tu nge a nih chiah tih an lo hre thei ta a ni.
Isua leh sakhaw hotute inhnialna a\ang hian eng zirlâi nge i zir chhuah le? Engtin nge “hnuai lam chhuak” ni loin, “chung lam chhuak” zâwk kan lo nih theih ang a—engtin nge hnuai lam chhuak tih leh chung lam chhuak tihte hi a danglam dân kan lo hriat theih ang?
Zirtawpni November 22
Zir belhna: Ellen G. White-i lehkhabu, Chatuan Nghahfâk phêk 747–769-a, “In Thinlung Mangang Suh Se” tih kha chhiar ni se.
“Thutak chu, rohlu tak angin Hebrai mite kha kawltîr an ni a. Juda-te inthâwina, Vânram hming chuang kha amah Krista ngeiin a din a ni. Khâng hlimthlaahte leh chhinchhiahnaahte khân tlanna thutak ropuite chu phûm a ni a. Nimahsela, Krista a lo kal khân hêng chhinchhiahten an lo entîr chu amah a ni tih an lo hre miah lo. An kutah Pathian thu chu a awm a; mahse, chhuan tam tak kal ta a\anga an lo inhlan chhâwn tawh thurochhiahte leh anmahni ngaih dâna Pathian Lehkha Thu an hrilh fiahna chuan Isuaa thutak awm hi hmu thei lo tûrin a thukru tlat si a ni. Thuziak thianghlimten thlarau lama pawimawhna an neih zawng zawng pawh a bo fâi vek tawh a. Hriatna zawng zawng dah khâwmna in chu an tân hawn ni mah se, an hre thei chuang lo.
“Pathian chuan mihringte lakah a thutak a thup ngâi lo a. Mihringte hian anmahni thil tihte hmangin a inhliahtîr \hîn a ni zâwk. Juda-te hnênah pawh hian Krista khân Messia a ni tih an hriat theihna tûr finfiahna tam tak a pe a; mahse, a zirtîrna chuan an nun phung thlâk danglam hlauh tûrin a phût si a ni. Krista chu an pawm a nih chuan, an lo ngaihsân êm êm an pi leh pute thufingte leh thurochhiahte, mahni hma an sialna leh Pathian duh loh zâwng thil chi hrang hrang an tih \hinte chu an thlah a ngâi dâwn a. Chatuan thutak danglam ngâi lo chu an pawm dâwn a nih chuan anmahni an inhlan ngei a \ûl tlat. Chuvâng chuan, Pathianin Krista an lo rin theihna tûra finfiahna rintlâk ber a pêk pawh chu an lo duh ta lo a. Thuthlung Hlui thute ringtua inchhâl siin, chûng thuten Krista nun leh nungchang chungchâng an lo ziahte erawh an pawm duh tlat si lo a ni. An ngaih dân neih sa, an lo sahuai thing vawt tlat tawhte chu thlahin an lo piang thar hlauh ang tih chu an hlau êm êm zâwk a. Chanchin \ha ro hlu, Kawng leh Thutak leh Nunna chu an zîngah awm reng mah se, Vânramin a hlan theih thilpêk ropui ber chu an hnar fel ta dêr mai a ni.”—Ellen G. White, Krista Tehkhin Thute, pp. 105, 106.
Sawi ho tûrte:
1. Engtin nge Isua nuna hrilhlâwkna hrang hrang lo thleng famkimte hian i rinna a tihchak sawt \hin?
2. Sakhaw hotuten Isua an rinna theihna kawng dâltu lian deuh deuh pathum emaw, pali emaw chu eng nge ni? Hêngte hi kan tûnlâi hunah pawh hian engtin nge a la rawn lan chhuah ve reng tho? 3. Thawh\anni zirlâi tâwpa zawhna awm i chhânna khân engtin nge Bible thuneihna chungchâng a hrilh che? Enga ti nge Bible hi thuneitu tâwp leh chungnung ber a ni tih rinhlelhna min neihtîr thei thil rêng rêng chu kan hnâwl vek a ngaih?