GOSPEL CONCERT CUM PRAISE & WORSHIP
August 25, 2024 zan dar 7:00 khan Mizo Conference of Seventh-day Adventist Church Official Choir awm chhun, Adventist Choir ten, Vaivakawn Cultural Centre cum Auditorium-ah Gospel Concert an buatsaih. Adventist Choir-te rawngbawl zelna tur atana sum tuakna ni fawma he hun buatsaih-ah hian; Mizoram chhunga artiste langsar tak takin zaiin Pathian an fak.
Pastor Biakzidinga Renthlei, President, Mizo Conference chuan tawngtaina hmangin he hun hi a hawng a. Mizo Life Coach Nathaniel Vanchhawng leh Dr. C. Lalhmangaihzami-te compere niin program an kaihruai a. Adventist Choir-ten fakna hla sain program an hawng a. He mi hnuah hian zaithiam hrang hrang, Rpa Ralte, Kimkima, Rosangliana, Zothanpuii, Jonathan Lianhna, Thawhlehnaniropuia ten fakna hla an hlan a. Tin, Instrumental music, Violin Duo mawi takin Teboih leh Samuela ten an rawn hlan bawk a ni.
Program chhawng hnihna hi Praise & Worship anga hman a ni a. Adventist Choir-ten zai hruaiin thusawi tawi leh testimony sawina hunte an hmang a. Adventist Choir Conductor Upa F. Lalengliana’n lawmthu sawina hun a hman hnuin; Pastor Rodingliana Executive Secretary Mizo Conference chuan tawngtaina hmangin hun khar a ni.
