MINISTERIAL ORIENTATION

Mizo Conference hnuaia field hnathawktu Pastor leh Evangelist-te pualin Ministerial Orientation – 2024 chu May 14 – 15, 2024 khan Mizo Conference Committee Hall-ah neih a ni. He hunah hian Mizo Conference Officer leh Department Director ten hun hmangin paper an present a. Ministerial lama kohhran inkaihruaina hrang hrangte ennawn a, sawihona neih a ni bawk.

Pastor Biakzidinga Renthlei, Mizo Conference President chuan field hnathawktute chu tunhma aia nasa lehzual zawka rawngbawlna lama kal zel turin a fuih a. Kohhran member-te tana thlarau leh tisa lama pa ni turin a fuih a. Tin, kohhran chhunga chhiatni thatni a rawngbawlna hrang hrangte rualkhai zawka kal a nih theih nan, sawihona hun a hman pui bawk a. Pastor Rodingliana, Executive Secretary chuan hruaitu tha ni tura quality pawimawh hrang hrangte a zir pui a. Tin, committee kaihhruai dan leh report pek dan turte a zir pui bawk a. Upa Lalbiakdika Ralte chuan sum leh pai hman dan leh bill hrang hrang kal dante a zirpui ve thung a ni.

Department Director hrang hrangten, anmahni Department kaihhnawiha Field rawngbawltute nen an thawhho theih dan tur leh, ruahmanna hrang hrangte, tha zawka tihhlawhtlin a nih theih dan tur chungchangah paper an present a. Kohhran sum leh pai audit dan, sabbath school zirlai kal pui dan turte, kohhrana pawl hrang hrangte nena felfai taka thawhho dan turte an zirpui a ni.

May 15 chawhnu herah Pathian tana tha zawk leh inpekna thuk zawk nena rawngbawl chhunzawm zel intiamna neih a ni a. Pastor Malsawma Tochhawng chuan tawngtaina hmangin Ministerial Orientation chu khar a ni ta a ni.