2024 3rd Quarter Zirlai 10-na
Zirlâi 10 *August 31–September 6
Ni Hnuhnûngte
Sabbath Afternoon
Chhiar tûr: Marka 12:41–44, Marka 13:1–32, Daniela 9:24–27, Daniela 7:25, 1 Thessalonika 4:13–18.
Chângvawn: “Chutih hunah chuan Mihring Fapa hi thiltihtheihna nasa tak leh ropui nasa tak nên chhûm zînga lo kal an hmu ang. Chumi hunah chuan vântirhkohte chu a tîr chhuak ang a, a thlante chu kâwl kil li ata—lei tâwp a\anga vân tâwp thlengin—a lâwr khâwm ang” (Marka 13:26, 27).
Tûn kâr zirlâi hi Marka 12 tâwp lama kan hmuh thawnthu tâwitê, Isuan hmeithâi pakhat thil tih bei tham tak chungchânga thu pawimawh êm êm a sawina nên khân a in\an a. Mahse, tûn kâr zirlâia a tam zâwk hi chu Jerusalem biak in tihchhiat a nih tûr thu leh thil thleng tûr dangte a sawina Marka 13 chhûnga mi a ni hlawm thung. Hemi bung hian, Matthaia 24 leh Luka 21 te ang bawkin Jerusalem a la tlûk tûr thu leh chumi hnua thil thleng zui tûrte chu min hrilh a, chu mai ni lovin, tâwpna hun thlenga khawvêl awm dân tûr pawh min hrilh vek bawk.
Marka 13-in chiang taka a sawi chu, he hrilhlâwkna hian a puangtu zâwlnei Isua hun a\anga tâwpna hun, Isua lo kal lehna thleng a huam tih hi a ni a. Hetianga hrilhlâwknate hrilh fiahna hi “historist interpretation” (chu chu, hrilhlâwknate hi thlang famkim tawh a awm a, thleng famkim mêk a awm a, tin, nakîna la thleng famkim tûr pawh a awm bawk tihna a ni) tia hriat niin, hrilh fiah dân dang—hrilhlâwknate hi a thleng fel vek tawh (preterism) tih emaw, nakîna la thleng tûr vek a ni (futurism) tih emaw te chuan a inkalh hle.
Marka ziaka kan hmuh Isua tehkhin thu tam takte ang bawk hian, hetiang thu Lalpan a sawi chhan pawh hi a zirtîrten a thil sawi awmzia an hriat thiam loh vâng emaw, zawhna an neih vâng emaw a ni a. Hêng an zawhnate emaw, an thil hriat thiam lohte emaw hian Isua hi Kristian nun leh thil tawn atâna pawimawh êm êm thutak zirtîrna remchâng a siamsak ta hlauh zâwk a ni. Isua hian nakîna thil lo thleng tûrte a lo sawi lâwk a ni ngawt lo va, hmânlâia huna a zirtîrte leh tûnlâi huna a zirtîr keiniho pawh fiahna lo thleng mai tûrte hmachhawn dân tûr min zirtîrna pawh a ni nghâl bawk tih i hre reng ang u.
*Study this week’s lesson to prepare for Sabbath, September 7.
Sunday September 1
Thawhlâwm atân dâr tangka der pahnih
Marka 12:41–44 chhiar la. He hmeithâi hian thawhlâwm atân eng zât nge a pêk a, chumi chungchâng chu engtin nge Isuan a sawi?
Jerusalem biak in kha a mâwiin a ropui hle mai a. Jerusalem khawpui mâwitu ber pawh a ni nghe nghe. A sakna lung lah a hrawl hlawm khawp mai a, \henkhat phei chu ton za chuang chuanga ritte a ni. Tin, a chher dân leh an rem dân pawh an uluk êm êm tih a hriat a, tûnlâi hun thlenga mite mak tih a la tling. Kum b.c. 20 vêlah khân Herod Ropuian he biak in hi sa \hain a zauh a, chu mai ni lovin, a dinna tlâng pang pawh lungin a rem chhuak vek bawk. A hna hi a hautak hle a ni ang, a.d. 60 thleng pawh khân an la thawk a ni an ti.
He biak inah hian mi tam takin thawhlâwm an rawn keng \hîn a, chûng thawhlâwm an rawn kente chu biak in sîra “Hmeichhiate Tual” an tiha thawhlâwm bâwm an hûnah chuan an thlâk \hîn a. Hemi hmunah hian Isua chu \hu-in, hmeithâi pakhat a lo kal a, dâr tangka dere pahnih a thlâk lâi chu a lo hmu a ni. Hmeithâi thawhlâwm thawh hi patlingin nilênga hna a thawha an hlawh zât, denarius hmun sawmthum leh pahniha \hen hmun khat ang vêl chauh a ni a. Chuvâng chuan, a tlêm tham hle tih a chiang.
Amaherawhchu, a thawhlâwm thawh hian Isua thinlung a khawih tlat mai. Mi hausate chuan tam tak tak an rawn thlâk a; mahse, engtin mah a lo fak lêm lo. Chutih lâiin, he hmeithâi thawhlâwm hi chu a fak lo thei lo thung a. Mi dang zawng zawng âia tam a pe a ni a ti hial. Engtin nge chutiang chu a nih theih? Mi hausate chuan a neiha chuang liam an pe a, he hmeithâi erawh hi chuan a neih chhun liau liau an pe thung. Mi hausate chuan an thawh bâng pawh an la nei \euh a, he hmeithâi erawh hi chuan a intunnun ve-na tûra a lo khâwl khâwm sa a pe vek a ni. Chutiang chu a nih avângin a thilpêk hi a ropui ta bîk êm êm mai a, pawisa a nihna anga a hlutna chu tlêm tham hle mah se, Isua ngaihah chuan a thawh tam ber tho tho a ni.
He thawnthu-ah hian Pathianin min pêk kan sum leh pâi, kan thil neihte kan lo enkawl dân tûr chungchângah zirlâi ril tak kan hmu a. Pathian hna thawhna atâna thawhlâwm kan thawh duhna hi hruaitute thil tih dân leh khawsak phungah a innghat tûr a ni lo. Isua hun lâia puithiam, Pathian biak ina rawngbâwltute kha an sual hlawm hle mai a; mahse, anni sual avânga thawhlâwm thawh ui tûr chuan Isuan tu mah a fuih ngâi lo thung. Sakhaw hruaitu sual tak tak an awm a nih ngâi chuan, hetih hun lâia mite hi a sual ber zînga mi an ni nghe nghe ngei ang (Kaiapha te, Anna te kha kha ngaihtuah la). Hêng mite sualzia hi Isua khân a hre chiang lutuk tlat.
Sakhaw hruaitute hian Pathian duh dân anga mite thawhlâwm rawn thawh khâwm lo hman kawngah mawhphurhna pawimawh leh thianghlim tak a nei a ni tih hi chu a dik reng a. Nimahsela, dik tak leh thianghlim taka an hmang lo a lo nih pawhin, Pathian ram zauh zêlna atâna thawhtute chuan he hmeithâi ang hian, malsâwmna an dawng tho dâwn a ni.
Kawng leh lamah, hruaituten kan duh loh zâwng an tih avânga sâwma pakhat emaw, thawhlâwm emaw kan lo pe hreh mai a nih chuan, Pathian chunga kan lâwm avânga pe ni lovin, hotute thil \ha tih avâng pe zâwk kan ni tihna a lo a ni daih zâwk dâwn a. Chutiang rilru put chu awl viau mah se, a dik hauh si lo a ni.
He thawnthu hian Lalpa hna thawhna atâna thawhlâwm kan thawhna kawngah kan rinawm a pawimawhzia engtin nge min hrilh?
Thawh|anni September 2
Lung pakhat pawh tihchim loha intiang a awm lo ang
Marka 13:1–13 chhiar la. Engtin nge zirtîrte hian Isuan temple chhiat tûr thu a sawi chu an lo dawnsawn? An zawhna Isuan a chhân dân hi eng nge ni a awmzia?
Nimin lama kan sawi tâk ang khân Pathian biak in leh a tual vêl hi a ropuiin a mâwi êm êm mai a. Juda-te chanchin ziaktu Josephus-a sawi dânin a chhim lam sîra awm Royal Portico chuan ban 162 ngawt a nei a, chûng bante chu patling pathumin kut insuih zawm veka an pawm tâwk vêla lian a ni (Antiquities, 15.11.5 §§413–414). Mahse, hêng zawng zawng hi tihchim vek a ni dâwn tih Isuan a sawi a. Hetiang in lian leh ropui, nghet leh mâwi êm êm bawk si tihchhiat vek a ni dâwn tia a han sawi hi a lo ngâithlatute tân chuan khawvêl tâwpna tûr nia lo ngaih loh rual a ni lo ang.
“Hetia Kristan Pathian biak in mâwi leh ropui êm êm mai a han hmuh hian a rilru-ah a sawi chhuah rem si lo eng nge awm ang le? A hmaa awm biak in chu a mâwi êm êm rêng a; mahse, lungchhe tak chungin ‘Ka hmu vek alâwm’ tiin a sawi tlat mai. ‘In ropui tak chu a ni ngei a. A hungna bangte pawh tihchhiat rual loh a ni tih lang reng mai; mahse, ka thute hi lo ngâithla teh u: ‘Tih chim loha lung intiang rêng rêng pakhat mah a awm loh’ hun chu a lo thleng ngei dâwn a ni’ a ti.”—Ellen G. White, Chatuan Nghahfâk, p. 704.
Chutah zirtîrte chuan he Isua hrilhlâwkna hi eng tika lo thleng tûr nge ni tih hriat an châk ta a. Tichuan, a zînga amah hnaih zual deuh—Petera te, Jakoba te, Johana te leh Andria te chuan a lo thleng hun tûr an han zâwt a (Marka 13:4). Hêng thil zawng zawng lo thlen hun tûr leh a lo thleng dâwn hnâi tawh a ni tih lo hriatna tûr chhinchhiahnate chu hriat an duh a ni.
Marka 13:5–13 thua thil mak angreng deuh kan hmuh chu, Isua hian Jerusalem chhiat tûr chungchâng sawi ta lova, kohhran din hna an thawh kawnga an thil tawn tûrte chungchâng zâwk a sawi ta daih hi a ni. Chûng an thil tawn tûrte chu a khirh nek dâwn leh nghâl niin a lang bawk a.
Dik tak phei chuan, tihduhdahna an tâwk ang a, fiahin an awm ang a, an zînga \henkhat phei chu tihhlum an ni nghe nghe dâwn. Nimahsela, hêng zawng zawng hi chu tâwpna tak a la ni dâwn lo tih a hrilh a. Hêng buaina leh thil thleng râpthlâk tak takte hian a bum tûr a ni lo. Chu bâkah chuan, Thlarau Thianghlimin a hun taka an sawi tûr thute a rawn hriattîr ang a, an chhûngkhat lainate leh an \hiante ngei pawhin an phatsan vek hunah pawh eng nge an tih tûr an hre thei tho dâwn a ni.
Hêng Isua hrilhlâwkna thuhmahruaitea kan lo hriat reng tûr thil pawimawh tak awm chu: Pathian mite chuan buaina leh fiahna kan hlau tûr a ni lo. Eng tik lâi pawhin kan inrâlring reng tûr a ni a, a chhan pawh Pathian Thlarau chuan hêng buaina kârah pawh hian min hruai zêl dâwn vâng a ni.
Isua i zuina kawnga fiahna leh harsatna i lo tawn ve tawhte chu eng nge ni? Chutiang chu i la tawng lo a nih chuan, Isua i lo la zui tak tak lo tihna a ni thei mai ang em?
Thawhlehni September 3
Ti\iautu tenawm chu
Marka 13:14–18 chhiar la. “Ti\iautu tenawm” chu tu nge tih kan hriat theihna tûra Isuan insihhmuhna a pêk chu eng nge ni?
Marka 13:14-ah hian Jerusalem tlûkna chungchânga a sawia a pawimawh lâi ber chu kan hmu a. Chu mi chu “ti\iautu tenawm” tiin a sawi. Lalpa hian a chhiar apiangtin [an thil chhiar] awmzia chu an hriat a \ûl thu pawh a sawi bawk a. Chutichuan, hêng \awngkamte hmang hian a zirtîrte chu Daniela lehkhabuin a lo sawi kha a kawhhmuh a ni. He \awngkam hi Daniela 9:27, Daniela 11:31 leh Daniela 12:11-ahte kan hmu a, hemi zûl deuh \awngkam dang hi Daniela 8:13-ah pawh kan hmu bawk.
Daniel 9:26, 27 chhiar la. “hriak thiha” a tih hi tu nge ni a; tin, “lal lo kal tûra” a tih hi tu nge ni bawk?
Daniela 9:26-a kan hmuh “hriak thiha” tih hi Hebrai Bible-ah chuan masiaḥ tih a ni a, Mizo Bible-ah hian Messia (Sap\awng Bible-ah chuan Messiah)tia dah a ni. Daniela 9:24–27 hi ngun taka kan chhiar chuan, hriak thiha a tih hian khawvêla lo kal tûr Isua Krista a kâwk tih a chiang hle.
A nih leh, “lal lo kal tûra,” Jerusalem khawpui tichhiaa tiram vektu tûr a tih hi tu nge ni ve thung le? Jerusalem khawpui hi Rom sipai hotu Titus-a khân a lo tichhe tawh a. Chuti a nih chuan, ani kha Daniela 9:26, 27-a kan hmuh “lal lo kal tûra” a tih hi a nih hmêl riau mai. Hêng mi pahnihte hi an inzawm tawn tlat a, a chhan pawh Juda-ten Messia an tihhlum avânga a thungrulh nân Rom sipaiten Jerusalem khawpui hi an tihchhiat Pathianin a phal ta a ni.
Mahse, Isuan “ti\iautu tenawm” tia a sawi hi tu nge ni ta ang? Vânduaithlâk takin, Bible zir mi thiam tam tak chuan he \ih\iauna tih hian b.c. zabi hnihna lâia Antiochus Epihanes-an Jerusalem temple a tihbawrhbânna kha a kâwk niin an ring a. Nimahsela, ani kha chu a nih hmêl si lo. Isua sawi dânah hi chuan he “ti\iautu tenawm” hi a thih hnu, vâna a chho hnua lo lang tûr a ni tlat mai a; chuvâng chuan, amah Krista pawhin leia rawng a bâwl hma kum zahnih emaw vêla lo awm tawh kha a nih daih a rinawm loh hle a ni.
Chu âi chuan, tih\iauna tih hian a.d. 60 chho vêla milem be mi Rom sipaiten Jerusalem khawpui an hual chhûnga an thiltihte kha a kâwk zâwk a nih hmêl a. Hual a nih hi Isuan Jerusalem khawpui tlân chhuahsan tûr hun nia a lo sawi kha niin, an tlân chhuak ta vek rêng a ni.
Isuan a lo sawi lâwk ang chiah khân Jerusalem chu tihchhiat vek a ni ta a. Hêng hrilhlâwkna zawng zawngah hian engtin nge Isua leh Bible hi an rin tlâk a ni tih kan hriat theih ang?
Nilaini September 4
Buaina hun râpthlâk tak chu
Marka 13:19 chhiar la. He chângin a sawi hi eng nge ni?
Marka 13:14-a kan hmuh “tih\iauna” tih hi bung 13 pum pui innghahna, a khâikhâwmtu ber an ni a (Thawhlehni zirlâi kha en leh rawh). Châng 19-ah chuan thil dangah pakâiin, leilung pian tirh ata la awm ngâi miah lo tihduhdahna râpthlâk tak chanchin a sawi ve ta thung. He tihduhdahna a sawi hi chu Jerusalem tihchhiat a nih \uma Juda-te tawrh tihduhdahna âi khân a nasain a tawrhhlelhawm zâwk daih dâwn a. Tin, a thlen hun tûr pawh nakînah, Isua thih hnu, vâna a chho hnu daih a ni ang (Marka 13:19).
Marka 13:14 khân Daniela 9 thu min hriat chhuahtîr a, chutiang chiah chuan Marka 13:19–23-a kan hmuh tihduhdahna nasa tak pawh hian Daniel 7 leh 8 thu, ki te tak tê-in Pathian mite “hun khat leh hunte leh hun chanve” (Dan. 7:25) chhûng a tihduhdah hun tûr chu min hriat chhuahtîr leh bawk. He hrilhlâwkna hun ni 1,260 hi kum pângngâi 1,260 nên a intluk a (Num. 14:34, Ezek. 4:6). Chu hun chuan a.d. 538 a\anga a.d. 1798 thleng kha a huam. Chutichuan, a.d. 1798-ah khân French Lal Napolean-a chuan pope man tûrin a sipai lalber a tîr a. Hemi hun, kum 1,269 chhûng hian ki te tak tê chuan a kohhran inkaihhruaina zawm ve duh lotute chu tihduhdahin tam tak phei chu a tihlum hial nghe nghe a ni.
Marka 13:20–23 chhiar la. Tihduhdahna a thlen chhûnga Pathianin a mite beiseina a pêk chu eng nge ni? Tihduhdahna hun a tâwp dâwn hnâi lama vaukhânna thu a pêk chu eng nge?
Marka 13:20 hian Pathianin a mite a khawngaih avânga tihduhdahna hun chhûng a tihtâwi thu a sawi a. Chanchin kal tawh kan thlîr kîr chuan, Kohhran Siam\hatna a lo chhuah hnu khân tihdudahna mei chu lo mitin manganna hun pawh tihtâwi a lo ni ta tih kan hria ang. Ki te tak tê thiltihtheihna a lo kiam tâkah chuan mi tam zâwkin siam\hatute hnung an rawn zui ta sup sup a. Nimahsela, Thupuan 13-a kan hmuh hrilhlâwknain a lo sawi angin, he ki te tak tê hian thiltihtheihna nasa tak a rawn nei thar leh dâwn a ni.
Marka 13:21–23-ah hian Isuan vaukhânna thu dang pakhat a sawi leh a, chu chu a lo kal leh hmaa lo chhuak tûr zâwlnei derte leh Krista derte an ni. Amah zuitute chu hêng mite lakah hian lo fîmkhur hle tûrin a chah nghâl bawk.
Kristan zâwlnei derte leh Krista derhte an lo la chhuah tûr thu a sawi lâi vêl hi chuan Kristian kohhran hi ding tîr mai a la ni rih a. Chuti chung chuan hetiang hrilhlâwkna ropui leh huaisâr tak hi a lo puang lâwk ngam tho tlat mai. A hrilhlâwkna hi a takin a lo thleng ta ngei bawk a (tûnlâi hunah pawh hian Isua nia lo insawi mai tâwk an awm leh nawlh \hîn a nih hi). Engtin nge he hrilhlâwkna hian Pathian Thu-ah rinna nghat ngam leh zual tûrin min \anpui?
Ningani September 5
Mihring Fapa lo kal lehna chu
Marka 13:24–32 chhiar la. Heti lâia a sawi thil thleng ropui tak chu eng nge ni?
He lâia a sawi hi chu eng dang ni lovin, ropui taka Isua lo kal lehna a ni a, chumi a thlen hma chuan ni leh thla leh arsi-ahte chhianchhiahna a lo lang phawt ang. Thuthlung Thar lehkhabute hi he thil thleng ropui tak kâwktu hrilhlâwknate-in a khat a ni ber a. Tirhkoh Paula phei chuan 1 Thessalonika 4:13–18-ah chipchiar taka lo sawiin, Kristaa muhîl tate chu kaih thawh an ni ang a; chutichuan, mi thianghlim nung dama lo la awmte nên Krista hmuak tûrin boruakah lâk chhoh a ni dâwn a ni ti. Tin, 1 Korinth 14-ah pawh mitthite chu an thawh leh ngei tûr thu chipchiar takin a sawi bawk a, chu chu Krista lo kal leh hunah a thleng ang.
Petera pawhin chu ni ropui tak lo thleng tûr chanchin chu a lehkhathawn pahnihna 2:3–13-ah a lo sawi bawk a, Lalpa chu a thutiam kawngah a muangchâng a ni lo va, mi zawng zawngin an sualte sim vek se a tih avânga dawhthei a nih zâwk thu a sawi. Tin, Thupuan bu phei chuan Krista lo kal lehna chungchâng hi chiang leh fiah takin a lo sawi a (Thupuan 1:7, Thupuan 6:12–17, Thupuan 14:14–20, leh Thupuan 19:11–21 chhiar ang che). Thuthlung Thar lehkhabu hrang hrangte hian Krista lo kal lehna chu amah ngei a tak taka, hmuh theih leh a ri hriat theiha a lo kalna a ni dâwn tih an sawi \heuh a. A lo kal hunah chuan mi tinin an hmu \heuh dâwn a ni.
Amaherawhchu, Isuan “tûnlâi chhuan” a tih te, “chumi ni” a tih te leh “chumi dârkâr” a tih te hi eng nge ni a awmzia ni ang? Hêng \awngkam hrang hrangte hian mi tam tak rilru a tibuai a, a chhan pawh Isuan hêng thu a sawina chhuante (a sawi hun lâia awmte) kha an thihna a rei tawh êm vâng a ni.
He thu awmzia hrilh fiahna hi mi eng emaw zâtin an lo chhawp chhuak tawh a. Mi \henkhat chuan “chhuan” tih thumal hian eng hnam ber emaw a kâwk thei a, heti lâia a kawh hi chu Juda-te an ni ang an ti. A awmzia chu, Krista lo kîr leh hma chuan Juda hnamte hi an boral dâwn lo tihna a nih chu. Hrilhfiahna dang pakhat chuan Krista lo kal leh hmaa lo thi lo tûrte chu hêng chhinchhiahna zawng zawngte lo thlen famkimna hmute chhuante a ni ang a ti ve thung a.
Nimahsela, a hrilh fiahna hriat thiam awlsam ber chu Marka 13:30-ah hian Isuan “tûnlâi” tih thumal hi “tûnlâi chhuan” tih sawina atân a hmang a; tin, Marka 13:32-ah pawh “chumi” tih \awngkam hi “chumi dârkâr” tih sawina atân a hmang a ni tih hriat a ni. Marka 13-ah hian “tûnlâi” tih thumal hi (Grik \awngin, houtos, haute, touto) hmun dang zawng âiin châng 1–13, Jerusalem tihchhiat a nih tûr thu sawinaah hian a lang tam zual a. He thumal hian bung chanve hnu lam pawh a la kâihruai ta zêl nghe nghe.
Chuvâng chuan, “tûnlâi chhuan” tih \awngkam hian kum zabi pakhatna lâi vêla chêng, Marka 13:30-in a sawi anga Jerusalem tihchhiat a ni lâi hmutute kha a kâwk a. Amaherawhchu, Marka 13:32 hi chuan Krista lo kal lehna kâwk ve thungin, chu chu nakîna lo la thleng tûr, kum zabi pakhatna lâi vêl a\ang phei chuan la hla tak a ni. Chutiang chuan, Marka 13:32 hian “chumi” tih \awngkam hi kum zabi pakhatna hnu daiha lo la thleng tûr thilte sawina atân a hmang a ni.
Zirtawpni September 6
Zir Zâuna: Ellen G. White-i lehkhabu ziah, Chatuan Nghahfâk phêk 704–716-a “Oliv Tlangah” tih chhiar ni se.
Khawvêlah hian kan rilru timangang tak taktu thil chi hrang hrang a thleng \hîn a. Hêng thil thlengte hian mi tam tak chu a tirâlkhêl hle nghe nghe. Keini Seventhd-day Adventist, hêng thil thlengte ngun taka lo zir chiang reng \hîntute hian engtin nge hêng thil thlengte hi mite hnêna Isuaa beiseina kan neih leh a lo kal lehna thutiam kawhhmuhna hmanrua atân kan hman theih ang?
“A lo kal hun tûr chiah kan hriat loh avângin lo ngaihven rêng tûra thu pêk kan ni a. ‘A pu a lo kal hunah bâwih lo nghâk renga a hmuhate chu an eng a thâwl ang’ Luka 12:37. Lalpa lo kal lehna lo ngaihven rengtute chu âwlthâwng takin an lo awm der der ngawt tûr a ni lo. Krista lo kal lehna beiseina hian mite chu Lalpa \ihna, bawhchhiatna chunga a rorêlna lo thleng tûr chu hlauhna a neihtîr tûr a ni a. Zahngaihna pêk a tiam lo hnar chu sual lian tak a ni tih hriatna pawh a neihtîr bawk ang. Lalpa lo nghâktute chuan thutak zâwmin an nun an tithianghlim tûr a ni a. Ngaihvena thlîr reng chungin, \hahnemngâi takin hna an thawk pah reng bawk ang. Lalpa chu kawngkhâr bulah a ding reng tawh a ni tih an hriat avângin ngawrh leh zualin vântirhkohte nên thlarau bote chhandamna hna an thawk tlâng a. Hêng mite hi Lalpa chhûngte hnêna ‘a hun apianga an chaw chan tûr’ pe zat zat \hînte an ni. Luka 12:42. Tûn hun atâna inhmeh êm êm thutak chu an puang a. Enoka te, Nova te, Abrahama te leh Mosia te khân anmahni hun \heuh zêlah thutak an lo puang tawh a; chutiang bawkin, tûnah hian Krista chhiahhlawhte pawhin anmahni dam rualpuite tâna bîka duan vaukhânna thuchah chu an puang ve dâwn a ni.”—Ellen G. White, Chatuan Nghahfâk, pp. 634, 635.
Sawi ho tûrte:
1. Lalpa hna thawhna atâna thawhlâwm thawh leh neih zawng zawng pêk tih hi thil thuhmun a ni lo va. Eng nge a danglam ni a, eng vângin nge chu a danglamna chu hriat thiam a pawimawh?
2. Enga ti nge Pathian hian kum zabi hrang hrang leh tûnlâi khawvêla a miten tihduhdahna an tawrhte hi a tihtâwp mai loh le? Engtiangin nge indona ropui thurin hian tihduhdana lo awm chhan hre thiam thei tûrin min \anpui?
3. Kristia lo kal lehna hnaih tawhzia tilangtu chhinchhiahna hrang hrang zînga eng ber hian nge a hnâi tawh tak zet a ni tih rinna neihtîr che?4. Mitthite awm dân leh mitthite chu Krista lo kîr leh hma chuan an lo muhîl rih a ni tih thu hi ngun takin ngaihtuah la. Mi an lo thih hian an mit an chhîng a, chumi hnua an hmuh leh hmasak ber tûr chu eng nge ni? Mitthite awm dân hriat thiamna hian engtin nge mi tin tân Krista lo kal lehna hi a hnâi êm êm reng a ni tih hre thiam thei tûrin min \anpui?