2024 3rd Quarter Zirlai 13-na
Zirlâi 13
*September 21–27
Tho Leh Isua Chu
Sabbath Chawhnu
Chhiar tûr: Marka 15:42–47, Marka 16, Kolosa 2:10–12, 1 Korinth 15:1–8, Daniela 9:24–27, Johana 20:11–18.
Chângvawn: “Tichuan, ani chuan an hnênah, ‘Mangang suh u; Isua Nazaret mi an khenbeh kha in zawng a ni âwm a, a tho leh ta; hetah a awm tawh lo; en teh u, an zalhna hi’ a ti a” (Marka 16:6).
Isua khenbeh a ni hian a zirtîrte beiseina leh rinna kha a ti thi vek a. A thih ni a\anga thlâna a la awm chhûng zawng kha chu an tân hun thim tak niin, an Hotupa thihna avânga an beidawn êm êm bâkah, Isua tihlumtute hian anmahni an rawn bitum ve leh mai ang an hlau hle bawk a ni (Johana 20:19).
Chanchin |ha Marka ziaka a bung tâwp ber, bung 16-ah hian Isua thih hnua thil thlengte kan thlîr ho dâwn a. A hmasa berin, thlân a\anga Isua thawh leh hun leh, Sunday zîngkâra hmeichhiate thlâna an va kal chhan kha kan sawi phawt ang.
A châng chuan Adventist-te hian thawh lehna zîngkâr hi—mi tam takin Sunday thianghlimzia sawina atâna an hman \hin avângin—sawi ve kan tîm deuh dui \hîn a. Tûn \um chu—hemi a\ang hian zirtîrna dik lo tak lo chhuak tho mah se—Sunday tûka Isua a tho leh hi kan tâna a lâwmawmzia hriat thiam tumin kan zir ho dâwn a ni.
A pahnihnaah chuan, kan zirlâi hian Marka 16-a a châng hmasa ber hi a awmzia sawi fiahin, hêng thute hi a lehkhabu pum puia inzam chhuak vek thupui nên a suih zawm a. Thawh\anni zirlâi leh Thawhlehni zirlâi hian chûng thute chu min luh chilhpui ang.
A pathumnaah chuan, Nilaini zirlâiah leh Ningani zirlâiah hian Marka 16:2–20 thu kan thlûr bing ve thung dâwn a, kan kova innghat mawhphurhna chu eng nge ni tih hriat kan tum ang. Tichuan, tûn kuartara kan zirlâi hi a khawvêl zawng zawnga chanchin \ha hril vek tûra chona nên khâr a ni dâwn ni.
*Study this week’s lesson to prepare for Sabbath, September 28.
September 22
Sunday
Thawh lehnaah chuan lâwmin
Marka 15:42–16:6 chhiar la. Hetah hian eng thil nge thleng a, eng vângin nge hemi chanchin hi Isua thawh lehnaah khân a pawimawh êm êm ni?
Chanchin |ha ziaktu pali-te hian Isua kha “Inrinni” tia an sawi ni-ah a thi a ni tih an pawm \heuh a (Mat. 27:62; Marka 15:42; Luka 23:54; Joh. 19:14, 31, 42). Tin, Bible hrilh fiahtu mi thiamte pawhin hemi ni hi Ningani ni tlâk a\anga a tûk Zirtâwpni ni tlâk leh inkâr sawina niin an ngai vek bawk. Isua kha Zirtâwpni chawhnu tlâi deuh tawh takah a hnuk a chat a; tichuan, hmanhmawh takin, ni tlâk hma siin phûm a ni ta a ni.
Kan Lalpa hi Chawlhni (Sabbath) chhûng zawng kha chuan thlânnah a châwl rih a; chutiangin, Isua zirtîr zawng zawngte pawh an châwl rih vek bawk. “Tin, Chawlhni chuan thupêk angin an châwl ta a” (Luka 24:1). Isua khân thupêk pali-na hi zawm kher a \ûl hran tawh lo niin zirtîr lo ni ta ang se, Sabbath nia an châwl hi thil âwm ang lo tak a ni dâwn a, ho pawh an ti rilru ngawt ta ve ang.
Chawlhni ral zânah hian hmeichhe pathumte khân hriak rimtui an lei a; tichuan, a tûk Sunday zîngkârah thlân lam pana kalin, an hriak rimtui lei chu Isua ruanga va chulh an tum a. Mahse, Isua chu a lo awm tawh si lo!
Kum zabi pahnihna vêl a\ang daih tawh khân Kristiante chuan Sunday tûka Isua a tho hian pawimawhna a nei niin an lo ngâi \hîn a. Hei hi ni thianghlim nia Sunday an lo ngaih tâk tlat chhan pawh a ni nghe nghe bawk. Nimahsela, chutiang chu Thuthlung Thar lehkhabuten min zirtîr dân a ni em le?
Kolosa 2:10–12 chhiar la. Thuthlung Thar lehkhabuten Isua thawh lehna hriat rengna atâna ti tûra min hrilh chu eng nge ni?
Bible-ah hian Isua thawh lehna hriat rengna atâna Sunday serh tûr a ni tih sawina thumal pakhat pawh a awm lo va. Isua thawh lehna hriat rengna atâna ti tûra min hrilh chu baptisma chan zâwk hi a ni. “Chutichuan, a thihnaa baptisma kan chan hian ama rualin phûmin kan awm ve a, Krista chu Pa ropuinain mitthite zînga ta a kâitho ta ang khân keini pawh nunna tharah chuan kan lo awm ve thei ta a ni” (Rom 6:4, NKJV).
Sunday serh chungchângah hian zirtîrna dik lo tak chu awm tho mah se, keini Adventist-te hi Sunday tûka Isua a thawh leh avâng hian kan lâwm hle tûr a ni. A chhan chu, a thihna leh a thawh lehna avâng hian thihna lakah hnehna a chang ta a; tin, a thawh lehna azârah keini pawh kan la tho ve leh ngei dâwn a ni tih kan hre bawk a ni.
“Kan Lalpa Isua Krista Pathian leh Pa chu fakin awm rawh se, ani chuan a khawngaihna nasa tak avângin mitthi zîng ata Isua Krista thawh lehna azârah beiseina nung nei tûrin min hring leh ta si a” (1 Pet. 1:3, NKJV). Paulan Isua thawh lehna a hriat chianzia hi ngaihtuah la. Engtin nge keini pawh hian a tho leh ngei a ni tih hi kan lo hriat chian ve theih ang?
September 23
Thawh|anni
Lung chu lum sawn a ni
Marka 16:1–8 leh 1 Korinth 15:1–8 chhiar la. Hêng thu pahnihten inanna an neih chu eng nge ni?
Isua thawh leh thu hi Chanchin |ha bu pali-te hian an ziak \heuh a. Tin, a ziaktute hian a thawh leh thu hi thlîrna tlâng hran hran a\angin ziak tho mah se, an zavâi hian 1 Korinth 15:1–8-ah pawh kan hmuh thu pawimawh tak takte hi an sawi vek a ni.
Hêng Isua thawh leh thu ziahna bu hrang hrang pali-ahte hian thu pawimawh tak tak pali kan hmu \hîn a, chûnge chu: Isua kha a thi a, phûm a ni a, a tho leh a, a thawh leh hnu khân mi hrang hrangin an hmu tihte hi a ni. Marka ziakah hian Isua thih thu leh phûm a nih thu chu bung 15-ah kan hmu a. A thawh leh thu leh a thawh leh hnua miin an hmuh thu chu bung 16-ah kan hmu ve thung. Marka 16:7-ah hian Isua chu zirtîrte hmu tûra Galili ram a pan thu kan hmu a, chutah chuan in hmu ang (Johana 21 en ang che).
Mi \henkhat chuan Kristianten kan Lalpa a tho leh a ni tih kan ring hi mak an ti a, thil ni thei niin an hre ve lo. Nimahsela, a tho leh ngei a ni tih tichiangtu Bible-a kan hmuhte hi a tam tham khawp mai a; tin, mihring ngaihtuahna fîm leh thil chhût thiamna nên pawh a inrem thlap bawk.
A hmasa berin, Pathian hi Siamtu a ni tih kan ring phawt tûr a ni a (Genesis 1 leh 2 en rawh), chutianga kan ring a nih chuan thawh lehna mai bâkah thilmakte pawh rin a harsa miah lo ang. Lei leh vânte siamtu leh leia nunna awmtîrtu Pathian chuan a duh a nih phawt chuan Isua kâitho tûrin thiltihtheihna a nei ngei ang tih a chiang a. Amaherawhchu, Pathian a awm hian Isua thawh lehna kha pumpelh theih miah lovah a siam ni lovin, a thlentîr thei a ni mai zâwk.
A dawtah chuan, thlân kha a ruak chiang a. Pathian awm ring lotute ngei pawhin hei hi chu a dik a ni tih an pawm. Ruak lo ni ta se, a tho leh a ni tih thu an sawi hian a tîr a\ang rêngin âwih a hlawh dâwn lo va, a chhan pawh a ruang ber a la awm miau dâwn si avângin tu tân maha han âwih chi a ni lo ang.
A pathumnaah chuan, a zirtîrten a ruang an ru chhuak a ni tih pawh hi thil âwihawm lo tak a ni. Zirtîrte hian thlân vêngtu sipaite kha an pal tlang thei dâwn lo hrim hrim a. Lo pal tlang thei ta mialin, ruang pawh chu va ru chhuak thei hlauh pawh ni se, enga ti nge chutianga an tih avâng chuan man an tawh si loh? A chhânna chu, sakhaw hruaitute hian chutiang chu zirtîrten an ti lo tih an hriat vâng a ni.
Tin, tho leh Isua hi mi tam takin an lo hmu bawk a. A hmutute zînga tam tak hian—zirtîrte ngei pawhin—a tîrah chuan tak tak a nih an ring bîk lo. Kristiante hmêlma râwva ber pakhat Paula phei kha chuan tho leh Lalpa hi a hmu a ni mai lo va, an intawnna khân a nun pum pui thlâk danglamsak vekin, Krista zuitu hmingthang tak a lo nih phah ta hlauh zâwk nghe nghe a ni.
A tâwp berah chuan (a dang tam tak pawh la awm tho mah se), tho leh Lalpa hmu nia insawiten an din Kristian kohhran lo pian chhan hi engtin kan sawi fiah ang? Hêng mite hian an thil sawi hi dâwt a ni tih hre reng siin an thih phah duh dâwn em ni? An thil hmuh dân an sawite hi a inang vek a, Isua chanchin—a thih (Tirh. 3:15) a\anga a hnu leh zêla thil thlengte (1 Pet. 1:3)—an sawite hian a thawh leh ngeizia chiang takin a nemnghet a ni.
Mi tuin emaw Isua kha a tho leh ngei a ni tih tichiangtu hrilh tûrin ngên ta che la, eng nge i sawi ang?
September 24
Thawhlehni
Thlâna va kal hmeichhiate kha
“Krista kraws bula ding hmeichhiate hian Sabbath ral hun chu nghâkin an thlîr reng a. Chawlhkâr ni hmasa ber a lo thlen chuan, zîng hma takah, Isua ruanga hnawih tûr rimtui man to tak takte nên thlân lam an pan a. Mitthi zîng ata a thawh leh tûr thu kha chu an lo ngaihtuah chang lo rêng rêng a ni. An beiseina ni chu a tla fel dêr tawh a, an thinlungah zân thim a lo thleng ta thung. An kal pah chuan Kristan mi a khawngaih avânga thil a lo tih tawhte leh thlamuanna thu a lo sawi \hinte kha an ngaihtuah chhuak uar uar a. Nimahsela, ‘Ka hmu leh ang che u’ Johana 16:22 tih thu a sawi kha chu an hre chang tawh lo rêng rêng thung.”—Ellen G. White, Chatuan Nghahfâk, p. 889.
Marka 16:1–8 chhiar la. Hemi \um hian eng nge thleng a, chu thil thleng chu engtin nge hmeichhiate hian an dawnsawn?
Chanchin |ha Marka ziak chhiartute chuan an chhiar tirh a\ang rêngin Isua hi Messia a ni tih an hre sa mai a. Ramhuai pâite pawhin Messia a nih thu hi chu an sawi fo mai. Nimahsela, a chhûng thu-ah hrim hrim hi chuan ramhuai pâi ni ve lo zînga Messia a nih thu puang hmasa bertu chu Petera a ni tih kan hmu a (Marka 8:29). Tin, hetianga Isua nihna a puan chhuahna hi a lehkhabu laihâwl vêlah chauh a thleng bawk.
Marka lehkhabu pum puiah hian Isua mite chu tu nge a nih tih sawi chhuak lo tûrin a khap tlat \hîn a; tin, anmahni a tihdam thu pawh zêp tlat tûrin a hrilh \hîn bawk. Marka 1:44-ah chuan a tihdam keibâi pakhat chu a dam tâk thu tu ma hnêna sawi chhuak lo tûrin a hrilh a. Marka 5:43-ah chuan Jaira leh a nupui chu an fanu kaihthawh a nih thu tu mah hrilh lo tûrin a chah a. Marka 7:36-ah chuan a hnêna bengngawng \awng thei lo rawn hruaitute chu an \hianpa a tihdamsak thu puangzâr lo tûrin a hrilh a. Tin, a zirtîrte chu Messia a nih thu mite hnêna sawi miah lo tûrin a chah bawk (Marka 8:30, Marka 9:9). Mite hnêna a chanchin sawi lo tûra a hrilh chhan ber chu Daniela 9:24–27-a kan hmuh hun hrilhlâwknaten an lo sawi ang tak hian a hun takah a rawngbâwlna hlen chhuah a duh vâng a ni a. A chanchin hi a lo tlângthang chiam ta se, a rawngbâwlna a hlen chhuah hmain tihhlum a ni daih thei tlat atin ni.
Isua an zalhna thlân ruak va hmute hmeichhiate hi, Isua chu a tho leh tawh a ni tih hrilh ni tho mah se—an hlauhthâwn avâng leh mak an ti êm vâng pawh a ni ang a—thlân a\ang hian baklêngin an tlân lêt a, a tîrah chuan eng thil thleng tih pawh an sawi mai thei lo nghe nghe.
Nimahsela, rei tak chhûng chu an ngâwi thei chuang lo va. Marka lehkhabu tâwp lam hi han keu ila, eng thu nge kan hmuh le? “Chutichuan, an kal chhuak a, ram tinah thu an hril ta a, Lalpan anmahni a thawhpui a, an thu hril chu amah zuitute an ni tih tilangtu chhianchhiahnate chuan a nemnghet zêl bawk a” (Marka 16:20, ESV).
Chutiang chuan, Isuan a chanchin leh a thiltihte zêp tlat tûra a chahna chuan zawm a hlawh hlei thei ta lo va. Marka lehkhabu ngei pawh amah zuituten “ram tina” a chanchin an hril thu nên tihtâwp a ni ta a ni.
Eng vângin nge Isua chanchin leh a thiltih chanchin hi ngawih bopui mai mai tûr kan nih loh? Isua chanchin leh chhandamna ruahman hi tute hnênah nge i sawi ang?
September 25
Nilaini
Mari leh mi dangte hnênah a inlâr
Marka 16:9–20 chhiar la. Hêng Bible chângte hian Isua thawh lehna chanchinah eng thil dangte nge min hrilh?
Marka 16:9–20 thute hian a zavâi deuh thaw-in Chanchin |ha bu dangahte pawh kan hmuh thote nên inanna a nei a. Entîr nân, thlâna va kal Mari Magdalinin Isua a hmuh thu te (Mat. 28:1, 9, 10; Joh. 20:11–18, Luka 8:2), khaw kâr kawnga \hian dûn pahnih zinin Isua an hmuh thu te (Luka 24:13–35) leh, sâwm leh pakhatte tirhchhuah an nih thu te (Mat. 28:16–20, Luka 24:36–49, Joh. 20:19–23) hi Chanchin |ha bu pali-te hian an ziak \heuh a ni.
Khenbeh a nih hnua a nunga Isua hmu lehtu hmasa ber chu Mari Magdalini a ni a (Joh. 20:11–18). Amah mai bâkah hmeichhe dangte pawhin a hmu ve bawk (Mat. 28:8–10). Tho leh Lalpa hmu hmasa bertute hmeichhia an lo ni hi a chhinchhiah tlâk khawp mai. A chhan pawh hmânlâi kha chuan thu buai hla buaiah hmeichhiate hi thu hretu atân hman tlâkah an ngâi lutuk lo va, Isua thawh leh thu hi phuahchawp mai lo ni ta se chuan, a hmu hmasa bertute hi hmeichhia ni lovin, mipa zâwk nia sawi a ni ngei ang. Nimahsela, mipa, sâwm leh pahnihte zînga mi emaw pawh ni lovin, hmeichhia zâwk a ni tlat mai si a. Ani hian zirtîrte hnênah a thu hriat thar lâwmawm êm êm chu a hrilh chhâwng a; anni lah chuan, rin ang ngeiin, a thil sawi chu an lo âwihsak bawk si lo. A ngaihtuahna kal ding lutukin thil ni lo pui chu ni emaw a tihtîr ni-ah an ngâi pawh a ni maithei a; tin, hmeichhe a lo ni kher bawk nên, thu tak hla taka ngaihsak tlâkah an ngâi lo pawh a ni thei tho bawk.
Isua hi a tho leh ngei a ni tih sawitue chuan he thu, tho leh Isua hmu hmasa bertute chu hmeichhiate an ni tih hi a tho leh ngeizia fiahna atân an hmang \hîn nghe nghe.
Marka 16:14-ah hian, Isua thawh leh thu an sawi hi phuahchawp mai mai lo ni ta se, awmze nei miah lo tûr eng thil nge thleng?
A thawh leh thu hi an phuahchawp mai mai lo ni ta ang se, eng vângin nge zilhhau ngâi ni angin an insiam ang? An “thinlung sak” avâng hian Isuan a zilhhau a nih kha. Isua chanchin ziahna hian, man a nih a\anga a thawh leh hnua amah zuitute hnêna a rawn inlâr leh \hin thleng mai hian, Isua zuitute kha a chhuah \ha lo angreng khawp mai a: Isua tlânchhiatsan, amah hre lo ni anga insawi, a thu sawite ring lo, leh a dangte pawh. Chutiang mite chuan Isua thawh leh thu hi an phuahchawp duh hauhin a rinawm loh.
Nimahsela, a thawh leh hnu kha chuan an lo huaisen ta hle mai a, Isua Krista thawh leh thu leh, chumiin mi zawng zawng tâna beiseina a pêk pawh chu tîm hauh lovin an puangzâr ngam ta. Hêngte hian an thil sawi hi a dikin a rintlâk a ni tih a tilang chiang hle a ni.
Engtin nge rin lohna leh rinhlelhna thlarau lam thangah hian kan awh lohna tûrin kan lo invên thei ang? Eng vângin nge tho leh Krista nên hian ni tin kan inzawm reng a \ûl?
September 26
Ningani
Khawvêl zawng zawngah kal ula
Marka 16:14–20 chhiar la. Isuan a zirtîrte hnêna a inlan \uma a sawi chu eng nge ni? Hêng a thil sawite hi keini tûnlâi hûna mite tân hian eng nge a pawimawhna awm ve?
Tho leh Isuan a zirtîrte hnêna thu a sawi hmasak ber chu anmahni a zilhhauna a ni tih Marka 16:14 kan chhiar hian kan hre thei a. A zilhhauh chhan pawh a tho leh a ni tih an rin loh avâng leh an thinlung sak êm vâng a ni. Rin lohna avânga zawhna siam hi tûnlâi mite chauh hian kan chîng a lo ni bîk lo va. Kan hmuh tâk ang khân, a tîra Isua zirtîrte ngei pawh khân Isua hi a hring a hrâna lênpui \hînin, a thilmak tihte pawh an hmu ngun hle naa, a tho leh tih erawh rin harsa an ti ve hle tho mai (Mat. 28:17, Joh. 20:24–29).
Nimahsela, finfiahna hrang hrang hmangin an hnênah hian a thawh leh ngeizia a tilang \hîn a. Anmahni ngei pawhin an hmuh ve bawk leh Thawh\anni zirlâi kan hmuh finfiahnate hian rinna lungphûm nghet \ha tak a siamsak ta a ni.
Chutichuan, Isuan a zirtîrte chu khawvêl ram tina kala chanchin \ha hril darh tûrin thu a pe ta a. A thupêk hian a huam zau hle. Khawêl ram zawng zawngah an kal chhuak vek ang a, thil siam zawng zawng hnênah chanchin \ha chu an hril dâwn a ni. An hna thawh rah chu miin an lo dawnsawn dân azirin an chan \hain a \ha lo mai dâwn tih pawh a hrilh sa bawk a—ringtute chu chhandam niin, ringte erawh thiam loh chantîr an ni ve thung ang.
Tin, Isua hian zirtîrten chanchin \ha an hrila anmahni rawn zui zêltu tûr chhinchhiahnate pawh a sawi bawk a, chûngte chu—ramhuai hnawhchhuah te, \awng thara \awng te, hlauhawm laka vênhim te leh damlo tihdam te a ni. Mi \henkhat chuan Marka 16:18 thu hi dik lo taka hrilh fiahin, Kristiante chuan an rinna entîr nân tûr hlauhawm tak nei rûlte pawh an kutin an khawih tûr a ni tihna ang ten an lo sawi a. Chutiang chu hemi chângin a sawi hi a ni hauh lo. Isuan a sawi hi chu chanchin \ha hrilnaa mi a inhmana vênhimna a chan tûr a ni zâwk a, chutiang chu Paula pawh khân lo changin mi dangte âi tûr thing a fawm \uma rûlin a chuk khân engtin mah a awm lo a nih kha (Tirh. 28:3–6).
Mahse, Bible hian Kristiante chu hlauhawm lakah vênhimin an awm zêl dâwn ti chuan a sawi hran lo thung. Chanchin \ha hril hnain hma a sâwn zêl theih nâna thilmak a thlentîr châng chu a awm ngei a. Nimahsela, Kristiante hian thu hretu a nih avânga hrehawm an tawrh châng a tam khawp mai. Chutiang hunah chuan, dawhthei takin an awm \hîn thung a, chu chu ring lo mite hnêna rinna thiltihtheihzia tilangtu dang pakhat a ni nghâl bawk.
He leia a tih tûr zawng zawngte a tlingtlâk vek hnu chuan, “vâna hruai chhohin a awm ta a, Pathian ding lamah a han \hu ta a” (Marka 16:19). Chutiang chuan, Isua hian sual sipai zawng zawng a hneh tâk vek avângin Pathian ding lam, thuneihna chungnung ber awmna hmunah chuan han \hu tûrin vâna hruai chhoh a ni ta a ni.
Bung 16 châng tâwp ber hi kan lo chîk êm aw? Chanchin \ha hrilin “ram tinah” an kal a; mahse, anmahni chauhin an kal lo thung. “Lalpan anmahni a thawhpui a, an thuchah puan chu a dikzia tichiangtu chhinchhiahnate hmangin a nemnghet zêl bawk a” (Marka 16:20, NKJV). Hetih hun lâia a mite hi a awmpui a, an hna thawh chhunzawm zêltu keini pawh hi min awmpui ve zêl tho dâwn a ni.
“Kei kumkhuain, khawvêl tâwp thleng pawhin, in hnênah ka awm zêl ang” (Mat. 28:20). “Ram tina” chanchin \ha hril kan tumna kawngah he thutiam a\anga thlamuanna kan hmuh theih leh kan hmuh tûr ni bawk chu eng nge ni?
September 27
Zirtawpni
Zir Zâuna: Ellen G. White-i lehkhabu ziah, Chatuan Nghahfâk phêk 881–888-a, “Lalpa Chu A Tho Leh Ta” tih leh phêk 919–933-a “Hnam Tinte Zirtîr Tûrin Kal Rawh U” tihte chhiar ni se.
“Ringtute tân chuan Krista hi thawh lehna leh nunna a ni rêng a ni. Kan Chhandamtu-ah hian sual avânga kan chân tawh nunna chu din thar a ni leh ta a; amahah hian a duh apiangte tinung theitu nunna chu a awm. Mihringte hnêna thih theih lohna pe tûrin a hnênah thuneihna pêk a ni a. Mihring nia nunna a lo pêk tawh chu nei lêt lehin, mihringte hnênah a pe chhâwng a. ‘Kei zawng nun an neih nân, tam tak an neih nân lo kal ka ni’ a ti. ‘Tu pawh an hnêna ka pêk tûr tui in apiang chu kumkhuain an tuihâl lo vang; keiin an hnêna ka pêk tûr in chu an kawchhûngah tuihna a lo awm ang a, chatuan nun thlengin a chik chho ang.’ Tu pawh ka tisa eia, ka thisen in chuan chatuana nunna a nei tawh; ni kin ni-ah chuan ani chu ka kâitho ang.’ Johana 10:10; 4:14; 6:54.
“Ringtute tân chuan thihna hi thil tê tham tak a ni a. Kristan a sawi dân phei chuan hun rei lo te chhûng chauh awh tûr a ni. ‘Miin ka thu a zawm chuan kumkhuain thih ni hmêl a hmu lo ang a,’ ‘thihna a tem lo ang.’ ‘Kristiante tân chuan thihna hi muthilhna a ni a, hun rei lo tê chhûng atâna ngawih rihna leh thim rihna a ni. Nunna chu Pathianah, Krista hnênah thuhrûkin a awm a; tichuan, ‘Krista kan nunna chu a lo inlâr hunah nangni pawh ama hnênah ropui takin in inlâr ve ang.’ Johana 8:51, 52; Kol. 3:4.”—Ellen G. White, Chatuan Nghahfâk, pp. 786, 787.
“Isua kha a tho leh a ni tih pawm thei miah lo, Pathian a awm ring lotu mi thiamte ngei pawhin Isua kha tihhlum a ni tih hi chu an pawm ve tho mai a. Chu mai ni lovin, a thih hnu khân mi tam takin tho leh Krista chu an hmu niin an sawi a, chumi avâng chuan Kristian kohhran lo ni ta pawh hi a lo piang a ni tih pawh hi an an hre chiang hle bawk. Mi \henkhat chuan, Isua zuituten tho leh Isua an hmu nia an sawi hi sawi pialsak an tumna lamah Isua khân phîrpui a nei a, chu pa chu Isua emaw an ti a ni ang te an ti hrâm a. Tin, \henkhat dang chuan Isua kha a thidang chauh a ni a, thlân chhûnga a awm hnu khân a rawn harh chhuah leh a ni ang an ti thung. Khawvêl danga mite rawn kalin a ruang kha an ru chhuak a ni maithei tia sawi pawh an awm bawk. Hêng an hnialkhân zawng zawngte hi chipchiara hriaa, an thil sawi âwihawm lohzia hre duh tân Glifford Goldstein-a lehkhabu ziah, Risen: Finding Hope in the Empty Tomb (Pacific Press, 2021) chhiar ni se.
Sawi ho tûrte:
1. Eng vângin nge zirtîrte khân Isua thawhleh thu-ah hian dâwt an sawi duh ang ni? Kan hriat theih chinte a\ang hian an rinna avânga mite huat, mihran leh tihduhdah bâk thil dang eng mah an hlawh lo va. Isua thawh leh thu hi an phuahchawp mai mai lo ni ta ang se, chumi avâng chuan eng nge an hlawh chhuah tûr awm?
2. Isua kha a tho leh ngei a ni tih tichiang thu thil chi hrang hrang a awm a. Chûng zînga âwihawm ber nia i hriat chu eng nge ni? I âwih êm êm chhan chu in class-ah sawi ang che.
3. Isua thawh lehnain beiseina ropui tak min siamsak hi ngun takin han ngaihtuah \ha leh teh. 1 Korinth 15 chhiar la. Engtiang takin nge Paula hian Isua thawh lehna hi a ngaih pawimawh le?