2024 3rd Quarter Zirlai 8-na

Zirlâi 8                                           *August 17–23

Zirtîrte Zirtîrin: |hen 2

          Sabbath Chawhnu

Chhiar tûr: Marka 10; Genesis 1:27; Genesis 2:24; Galatia 4:1, 2; Rom 6:1–11; Isaia 11:1–16.

Chângvawn: “Mihring Fapa meuh pawh rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûrin a lo kal a ni si” (Marka 10:45).

            Tûn kârah hian Marka 10 thu kan zir dâwn a; tichuan, Isuan krawsa a la thih tûr thu a zirtîrte hnêna a zirtîr dân inziahna lâi bîk chu a zo ang. Hemi bung chanve vêl hi chu anmahni zirtîrte chungchâng sawina niin, a bâk zawngah hian zirtîr nihna atâna thil pawimawh tak tak kan hmu thung a; mahse, chûngte chu Isua nêna inbia mi dangte thlîrna kal tlangin a ni thung. Isua hnênah hian Pharisaite an lo kal a, inmâk chungchângah an inhnial a. Nu leh paten an fate Isua hnênah a malsâwmna beiseiin an rawn hruai a. Mi hausa tak pakhatin chatuana nunna neih theih dân tûr a rawn zâwt a; tin, mitdel pakhatin a mit tihvârsak a ngên bawk.

          Hemi bungah hian Isua zui tih chu eng nge ni a awmzia tih chungchângah zirlâi pawimawh tak tak, a bîkin he leia kan nun nêna inzawm: nupui pasala inneihna, naupang leh sum leh pâi kan hmu a. Tin, Isua zui avânga kan chan tûr lâwmman leh hrehawmte pawh a sawi vek bawk. A tâwp lamah hian mitdel dang pakhat a tihdam leh thu kan hmu a (Marka 10:46–52; Marka 8:22–26 nên khâikhin rawh); tin, Isua kan zui avânga kan tawrh tûr leh chumiina min hruai thlen tûr chu tehkhin thu ngaihnawm tak hmangin min hrilh bawk.

            Hêng zirlâi pawimawh tak takte hian a zavâiin Isua zuitu \ha ni thei tûrin mi a buatsaih a. Tin, hêng zirlâite hi kum 2,000 kal ta daiha mite tân chauh ni bîk lovin, keini kum zabi sawmhnih leh pakhatna huna mite tân pawh hian a la pawimawh êm êm reng tho a ni.

            *Study this week’s lesson to prepare for Sabbath, August 24.

Sunday                                                  August 18

Pathian ruahman inneihna

          Marka 10:1–12 chhiar la; tin, Genesis 1:27 leh Genesis 2:24 pawh chhiar ang che. Pharisaiten inmâk chungchâng an zawhna phênah hian eng thang nge inphûm ru a, Isuan a lo chhânna hmang hian eng zirlâite nge a zirtîr nghâl?

            Pharisaite chu Isua hnênah lo kalin mipa tân nupui mâk (\hen) a phal a nih leh nih loh thu an zâwt a. Anmahni Pharisaite zîngah hi chuan inmâk hi phal nia ngaih a ni. Eng dinhmunah nge phalsak an nih ang tih thu-ah erawh chuan an lung a rual lo hle thung a. Shammaia pâwl an tihte chu an duh fîr deuh hlek a. Mipa chu a nupuiin fa a hrinsak thei lo emaw, a mamawh a phuhrûksak zo lo emaw, a hmangaih tak tak lo emaw, a uire-san emaw a nih chuan a mâk phalsak a ni. Chutih lâiin, Hillela pâwlte erawh an thilphal deuh hlek a, chhan eng vâng pawhin nupui mâk an phal a ni deuh ber mai. Amaherawhchu, inmâk phalna lehkha pêkna tûra thil tih ngâi neuh deuh erawh an tuk tam ang reng a, hun pawh an duh deuh \hîn rêng a ni.

            Pharisaiten Isua hnêna inmâk phal a nih leh nih loh thu an rawn zâwt hi an ti âwm ang lo kan lo ti pawh a ni maithei a. An zawhna phênah hian Isua tâl buaitîr tuma phiar rûkna, tûna Isua awm mêkna Jordan lui chhak lam bial awptu Herod Antipas huatthu sawitîr tumna a inphûm atin ni. Heroda hian a nupui hmasa zâwk a ma a, chumi hnu chuan a unaupa nupui Herodi a nei leh a. Baptistu Johana khân he a thiltih tenawm tak hi a sawisêl a; chuvâng chuan, Heroda hian Baptistu Johana kha a lu a lo tansak tawh nghe nghe a ni (Mat. 14:1–12 en la).

            Isuan hian an zawhna chu lo lâk leu-sakin, inmâk chungchânga Mosian thu a lo pêk tawh kha a zâwt lêt hlauh mai a. Pharisaiten chhânna atâna Mosia ziak an rawn lâk chhuah chu inmâk hnua inneih leh theihna dân inziahna Deuteronomi 24:1–4 thu hi a ni. Mosia hun lâia Israel fate pawh khân nupui mâk an lo chîng tawh a. Deuteronomi 24-a Mosian a lo sawi inmâkna dân hi a nihna takah chuan hmeichhe thlavâng hauhsakna, an chan \hatna tûa duan a ni zâwk. Nimahsela, Isua hun lâi khân Hillela pâwlte hian chhan ho tê tê avânga pawha an nupuite an mâk an phalsak theih nân an lo tidanglam kual vêl a. Hmeichhiate thlavâng hauhna tûra duan ni si kha anmahni nawr chhuahna hmanrua atân an hmang ta hlauh zâwk a ni. 

            Isua pawh hian Deuteronomi 24-a inmâkna leh inneih lehna dân awmzia chu hrilh fiah tum ta bîk lovin, Pathianin inneihna atâna a lo duan duhthusâma \ha kha (Genesis 1 leh 2) kha a sawi chhuak ta zâwk a. A tîrah khân Pathian chuan mi pahnih, hmeichhia leh mipa a siam thu sawiin (Gen. 1:27), chu thu chu Genesis 2:24-a kan hmuh, mipain a nu leh pate a kalsan ang a, a nupui a vuan ang a; tichuan, tisa pumkhat an lo ni ang tih thu nên hian a sawi zawm ta a ni. He inpumkhatna thu hi Isuan inneihna thutiam a nemnghehzia tichiangtu a ni a. A ngaih dân chuan, Pathianin a zawm tawh chu mihringten an lo ti\hen thiang lo hrim hrim.

          In kohhran khân in member-te zînga innei tawhte inneihna tihnghehsak sauh tûrin eng nge tih theih in neih? In\hen tate an awm em? An awm a nih chuan an inhruai leh theihna tûra hma lâksakna in nei em?

Thawh|anni                    August 19

Isua leh naupangte

          Marka 10:13–16 chhiar la. Isuan a hnêna an fate rawn hruaitute tâna a lo tih chu eng nge ni?

            Hmânlâi khawvêlah khân fa neih (chhûngkuaa mipa an lal zâwkna hnamte chuan mipa ngei) an châk êm êm hlawm na chungin, lo pian chhuah leh naupang lâi nun hman erawh a awlâi lo angreng viau thung. Tûnlâi ang hian damdâwi lama inenkawlna \ha a la awm ve si lo va, nau veitu nu tân te, nau lo piang chhuak hlim tân te, nausên tân te leh naupang tân te pawh hlawhthâwnawm a tam êm êm a ni. Hnam tam tak chuan an pi leh pute a\anga an lo hman tawh \hin ramhmul damdâwite leh dâwi lam thil laka lo invênna chi (amulet) eng eng emaw an nei a, chûngte hmang chuan hêng dimdâwih ngâi tak takte hi anmahni tihnat tumtute lakah an vêng ve \hîn a ni.

            Fa neih thlahlel viau e ti lovin, naupangte erawh an dah hniam leh hle lawi si a, a nihna takah chuan an sal chhawrte tluk lekah an dah a ni ber (Gal. 4:1, 2). Grik mite leh Rom mite khawvêlah phei kha chuan nausên pian fu lo leh fu-ke kim lote chu ram palailêngah thi tûrin an va dah tawp mai zêl a, luia paih ta daih pawh an tam mai. Hmeichhe naupang âiin mipa naupang an duh zâwk a; a châng chuan, hmeichhe nausênte chu ni-in a em hlum tûrin emaw, ruahin a nan hlum tûrin emaw ram palailêngah an hnutchhiah tawp mai \hîn a ni an ti. A châng chuan, hêng an nu leh paten an hnutchhiah nausênte hi mi tuten emaw an va “chhanchhuak” a, enkawl sei lianin an lo tleirâwl chho tiah sal atân an hralh leh \hîn a ni. 

            Zirtîrte hian naupang tê pakhat pawh lâwm apiang chu Pathian lalram lo thlen thlahleltute an ni tia Isuan a zirtîr kha a awmzia an hre thiam lo niin a lang a (Marka 9:33–37). Chuvâng chuan, Isua malsâwmsak beiseia an fate rawn hruaitu nu leh pate hi an lo hau a, chutiang thil ho mai mai tih nân chuan an zirtîrtu hian hun a ni lo niin an ring a ni âwm e.

            Mahse, an ring sual chiang khawp mai. Naupang rawn hruaitu nu leh pate an hau lâi a hmuh chuan a thin a rim ta hle zâwk a. Marka lehkhabu-ah hian mi tu tute emaw laka Isua an thinrim emaw, lungnih loh emaw thu kan hmu nual a. Chûng zînga pakhat chu a hnên ata kal bo tûra zirtîrten naupangte an hrilh \um hi niin, hei hian Isuan naupangte a dah pawimawhzia min hrilh nghâl bawk.

            Zirtîrte chu a hnêna naupang rawn kal tumte lo dang lo tûrin a han hrilh deuh hrâwk mai a. Eng vâng nge ni? E le, vânram chu anmahni naupangte ta hi a nih vâng a ni. Pathian lalram chu naupangte rilru put hmang ang pu ve chunga lo lawm tûr a ni tih thu thlengin a sawi ta a. Naupangten an nu leh pate chunga rinna an nghat thlawp ang deuh hian keini pawhin Pathianah rinna kan nghat ve tûr a ni tihna a nih hmêl e.

            “Miten dik lo taka Krista an hmuh phah theihna tûr zâwngin Krista nungchang ang ni lo tak pu suh. Naupang tê tê-te chu i nêlawm lohna leh i kherkhiapna hmang khân hnawt kiang lo la. Vânram chu nangmah i awm ve avânga hmun nuam tak a nih loh rinna an neih theihna tûrin khawsa ngâi rêng rêng lo vang che. Sakhuana hi naupangten an hriat thiam ve theih loh thil angin sawi ngâi suh la; tin, an la naupang têt lâi chuan Krista pawm tûra beisei tûr an ni lo emaw ti ngawt bawk heh suh. Isua sakhua hi sakhaw ngui tak, Chhandamtu hnên pan tûr chuan nun tihlimtu thil zawng zawngte an bânsan vek a ngâi ni anga an hriat theih nân ngaih dân dik lo tak neihtîr lo bawk ang che.”—Ellen G. White, Tihdam Rawngbâwlna, pp. 32, 33.

          Engtin nge i bul hnâia awm naupangte hnênah khân Isua rilru i lantîr theih ang?

Thawhlehni                                                                                              August 20

Sum khâwl khâwmna \ha ber chu

          Marka 10:17–31 chhiar la. He lâi thu-ah hian rinna leh zirtîr nih man chungchânga zirlâi pawimawh êm êm, mi zawng zawngin—mi hausa an ni emaw, mi rethei an ni emaw—an zir chhuah vek tûr awm chu eng nge ni?

            He tlangvâl hausa tak mai hian Isua a zahin zawhna a han zawh dânah pawh hian a ti tak hle a ni tih a hriat a. Isua hnênah hian a tlâna lo tlânin, Isua bul a rawn thlen ve leh a hmaah a \hing\hi nghâl a, mi zawng zawngin hriat kan chak vek tûr zawhna pawimawh tak—Chatuana nunna neih theihna tûra thil tih ngâi awmte chu eng nge ni? tih chu a zâwt ta a ni. Isua hian Thu Sâwm Pêka lungphêk pahnihna zâwka inziakte chu sawi chhâwngin a lo chhâng a. Mahse, he tlangvâl hian chûngte chu a naupang têt a\anga a lo zawm vek tawh thu-in a chhâng lêt nghâl a.

            Chanchin |ha bu pali-te zîngah Marka chauhin he tlangvâl hi Isuan a hmangaih thu a ziak a. A mizia leh rilru put hmangah hian hmangaihna tûr chhan \ha tak a awm a ni ngei ang. Mahse, Isuan chatuana nunna neih chu a duh tak tak nge duh tak tak lo tih hriat nân an thil neih zawng zawng hralh vek tûr leh, chumi hnua amah zui tûra a han hrilh meuh chuan—a sum neih a lo tam tham ve êm bawk si nên—lungngâi tak takin a kal bo ta a. A nihna takah chuan he tlangvâl hian thupêkte hi a lo zâwm miah lo tihna a ni. A nunah Pathian âia dah lal zâwk a neih avângin thupêk pakhatna hi a bawhchhia a. A pathian chu hausaknate hi a ni.

            A kal liam hnu hian, Isuan a zirtîrte lam chu hawiin hausaknate hi min titlutu a nih theihzia a hrilh ta a. Mi hausa tak tân vânrama luh âi chuan ran lian tak sanghâwng sei tân hriau beng te reuh tê chhûnga luh tlang pawh a awl zâwk tûr thu a sawi ta nghe nghe a ni.

            Isua thu sawi chu a zirtîrte hian mak an ti hle a, “Tu nge chhandam ni thei ang le?” tiin an ngaihtuah a. Mahse, Isua chuan heti hian a sawi tum takah a luhpui ta a ni: “Chu chu mihring tân chuan tih rual a ni lo rêng a; Pathian nên erawh chuan tih rual loh a ni lo thung. Pathian nên chuan eng pawh tih theih a ni si a” (ESV).

            Marka 10:27 thu hi a mâwiin, a thawnthu tlângkawmna atân pawh inhmeh tak niin a lang: nangma chakna leh \hatna nên kha chuan vânramah i lût thei dâwn lo va, chhandamna chang tûrin Pathian khawngaihna i mamawh a ni.

            Petera a ngâwi hle hle thei ta lo, amah leh a \hianten Isua zui tûra an neih zawng zawng an kalsan vek thu kha a rawn sawi chhuak a. Mahse, Isua hian a chhâng thiam khawp mai: amah an zui duh avânga an kalsan tâk zawng zawng kha chu tûn dam chhûng la laa an hmuh tûr leh, “hun lo la thleng tûra” an la chan tûr nêna khâikhin râlah chuan eng tham mah a ni lo.

            A awmzia chu hetiang hi a ni: Krista thihna khân mihringte sualna a la bo a; tichuan, Krista khawngaihna leh a thawh lehna nun chuan a thupêkte zâwm thei tûrin thiltihtheihna min pe ta a ni.

            Rom 6:1–11 chhiar la. Engtin nge he thu hian kan nuna Pathian khawngaihna a lo thlen dân, thiam min chantîr tâk dân leh amaha mi thar ni tûra mi a siam tâk dân chu a sawi fiah?

Nilaini                                                                                           August 21

Ka in tûr chu in in ve thei dâwn em ni?

          Marka 10:32–45 chhiar la. He lâi thu hian zirtîrte kha Isuan hna a thawh tûr chungchângah pawh ni lovin, amah zui awmzia chungchângah pawh an la ngawng chhunzawm zêl a ni  tih engtin nge a tihlan?

            Isua chu Jerusalem lam panin a chho a, Jerusalem khua an thlen hma deuh hian a zirtîrte hnênah Jerusalem a thlen huna a chunga thil thleng tûr a hrilh a. Chu a thil hrilh chu an hriat châk zâwng a nih loh bâkah, thleng tûr pawha an duh miah lo a ni. Isuan hian a thih tûr thu leh ni thum hnua a thawh leh tûr thu a hrilh a. Mahse, an hriat duh zâwng ni miau hek lo, an benga rawngah an lo khung lo rêng rêng.

            A khung lo a ni tih chu Jakoba leh Johana te unau-in an rawn hnaiha a hnêna thil an rawn dîl hian a tichiang a. Eng chiah nge an dîl chu ni tia Isuan a han zawh chuan, ropuina a chan huna a ding lamah leh a vei lama a \huttîr an beisei thu-in an chhâng a. An thil dîl hi mahni hmasialthlâk kan lo ti ngei ang. Nimahsela, he mite unau hi Isua rawngbâwlnaah khân an inpumpêk tawp mai a ni a; chuvângin, an thil duh pawh hi mahni hmasialna hlâwm chu a ni ngawt bîk chuang âwm lo ve.

            Isua erawh hi chuan an thil dîl chu a awmzia hriat chiantîr a tum thung a. A thil in tûr chu an in ve theih dâwn leh dâwn loh leh. a baptisma chan tûr chu an chan ve theih dâwn leh dâwn loh a lo zâwt ta a ni. A in tûr chu Gethsemania-a tawrhna leh krawsa thihna no a ni a (Marka 14:36 nên khâikhin rawh); tin, a baptisma chan tûr pawh a thihna leh phûma a awmna a ni ang (Marka 15:33–47)—baptisma a chan \uma tui thlâna phûm a ni (Marka 1 chhiar la) ang chiah khân leiah phûmin a awm leh dâwn a ni.

            Nimahsela, Jakoba leh Johana te hian Isua thil sawi awmzia chu an la hre thiam ta chuang lo va. Ngaihtuah chiang miah lovin, an theih tûr thu an sawi ve ngawt mai a. Isua pawh hian a run ve deuh hlek emaw ni dâwn ni, “Ka no in tûr chu in in ve ngei ang a, ka baptisma chan tûr pawh chu in chang ve khawp tak ang” tiin a hrilh ta a ni. A sawi ang ngei hian Jakoba hi tirhkohte zîngah chuan martara thi hmasa ber a ni a (Tirh. 12:2). Johana erawh tirhkohte zînga dam rei ber niin, Patmos thliarkârah amah chauha tântîrin a awm thung (Thup. 1:9). Chutichuan, Isua hian a ding lama \hu tûrte leh a vei lama \hu tûrte chu ama ruat tûr ni lovin, Pathianin a buatsaihsakate tân zâwk a ni tih a hrilh ta a ni.

            Isuan Jakoba te unau a chhânna hi zirtîr dangten an lo hriatin eng tin nge an tih? Jakoba te unau chungah hian an lungni lo hle a. He ta “lungni lo” (Marka 10:41) tih sawina Grik thumal, aganakteo hi Marka 10:14-ah pawh zirtîrten a hnên ata naupangte an hnawh bova Isua thinrim thu sawina atân khân hman a lo ni tawh a ni.

            Hemi hnu hian Isuan a zirtîrte chu ko khâwmin a thu zirtîrte zînga pawimawh ber pakhat chu a hrilh ta a. Jentail mi rorêltute chuan an thuneihna chu an mimal ham\hatna atân an hmang \hîn a, Pathian lalramah erawh chuan an thiltihtheihna chu mi dangte châwikânna leh malsâwmsakna atân hman \hin tûr a ni thung tih a hrilh a. Amah Isua ngei hian Pathian lalram Lal nih angin chu kawng chu a lo zawh tawh nghe nghe asin. Engtin maw a zawh? E le, mihringte tlan nâna ama nun ngei pe-in maw le! A zirtîrte rin loh deuh leh hriat châk loh thil tak a ni ngei ang.

Kristiante kan nih anga mi dangte “rawngbâwlsaktu” kan nih dân tûr chu eng nge ni? A awmzia chu, he thu hi ni tina mi dangte nêna thil tih ho nikhuain engtin nge i nunpui ang tihna a ni.

Ningani       August 22

“Eng nge tihsak che ila min tih?”

          Marka 10:46–52 chhiar la. Bartimaian a \hutna bul Isuan a rawn thlena a lo tih chu eng nge ni?

            Marka ziak kan zir tawh chinah khân Isuan a tihdamte rêng rêng kha an dam tâk thu leh tu nge a nih tih te tu ma hnêna sawi darh lo tûrin a chah zêl a nih kha. Mahse, he thawnthu-ah hian, Jeriko khua a chhuahsan leh dâwn lâi takin, kawngsîra kutdawh lo \hu mitdel pakhat chuan Nazaret Isua a ni tih lo hriain, “Isu, Davida Fapa, min khawngaih rawh” (Marka 10:47) a lo ti vak vak mai a.  Chu lâi vêla lo awm mipuite chuan, Isua nihna hi thupsak an duh ni maw, ngâwi tûrin an rawn hrilh a; mahse, an hlawhchham chiang hle thung.

            Ngawih chu sawi loh, a hmaa âia ring sauhin, “Davida Fapa, min khawngaih rawh” tiin a au chhunzawm zêl a (Marka 10:48). A au hla hi Messia nia Isua a pawmzia leh a tidam thei tih a rinzia a puanna a ni. Isua hun lâi khân “Davida Fapa” tih \awngkam hian kawh pahnih a nei a, chûngte chu: Israel lal\hutthleng luah lehtu tûr lal lo chhuahna leh chu mi chu damlo tidamtu (Isaia 11; Jer. 23:5, 6; Jer. 33:15; Ezek. 34:23, 24; Ezek. 37:24; Mika 5:2–4; Zak.. 3:8; Zak.. 6:12 chhiar rawh) leh ramhuaite hnawtchhuaktu a nihna te a ni.

            Isua chu a ding a, amah lo autu mitdel chu a hnêna rawn hruai tûrin a hrilh a. He mitdelin Isua hnên a pan rual ruala a puan bah lâi a paih thla nghâl hi lo chhinchhiah ang che. Isua hun lâia mitdelte kha khawtlângah an dinhmun a hniam hle a, hmeithâite leh fahrahte nên an chan a inang reng tih theih a ni. Mipui vântlâng hnuai lamah awmin ei tûr tlachhama thi mai thei dinhmunah an ding a. Thawmhnaw lum leina tûr tak ngial pawh an nei zo ve lo. Bartimaia pawhin a neih chhun chu a puan bah lâi mai hi a ni a. Hetia a han paih thla ta daih hian Isuan a tidam thei a ni tih a ring hle tih a tilang âwm e.

            Isua pawhin a tibeidawng lo chiang khawp mai. Chanchan |ha bute hi kan chhiar chuan, a \anpuina beiseia amah pantu apiangte chuan an duh ang chhânna an dawng ngei \hîn tih kan hria ang. Bartimaia hnênah hian Marka 10:36-a kan hmuh Jakoba leh Johana te hnêna a lo zawh ang tho kha a zâwt ve leh a, chu chu: “I chungah engtia ka tih nge i duh?” (Marka 10:51) tih a ni. Chu ve leh eng dang sawi kual lovin, thil hmuh theih a duh thu a hrilh nghâl var a, a thil duh chu Isua a pe nghâl a. Tichuan, Isua a zui ve ta nghâl a ni.

            He thawnthu hi Marka ziaka zirtîr nih chungchâng sawina bîk bungte khârna a ni a, Marka 8:22–26-a kan hmuh mitdel tihdam thu dang pakhat nên khân zirtîr nihna awmzia a sawifiahna hi an kâr cheh a ni. Hêng thawnthu pahnihte hian zirtîr nihna chu mit thar nêna khawvêl thlîrna a ni tih an tilang a, a tîrah chuan fiah vak lo mah se, Isuan min hruaina apiangah chuan kan kal zêl mai tûr a ni.

          Eng kawngahte hian nge, “Isu, Davida Fapa, min khawngaih rawh?” tiin i lo au ve tawh le? Chutia i auh chuan eng nge lo thleng a, chu i thil tawn a\ang chuan eng nge ni i zir chhuah?

Zirtâwpni                                             August 23

Zir Zâuna: Ellen G. White-i lehkhabu ziah, Chatuan Nghahfâk phêk 572–583-a “Naupangte Mal A Sâwm” tih leh “Kawng Khat I La Bâk E” tih te chhiar ni se.

            “Isua kha eng lâi pawha naupangte ngaina rengtu a ni. Naupang chhia mai an la nihna anga mi an khawngaih theihna leh an rilru an hawn zauna, thil dangin a la tihchingpen loh an hmangaihna rilrute chu a lâwm êm êm \hîn. An hmûi thianghlim tak a\anga lo chhuak fakna thu lâwmawm takte chu a bengah rimâwi tak ang a ni a, mi vervêkte leh verther tak takten an nêk chêp châng pawha a rilru tihahdam sawng zawng \hîntu a ni bawk. Chhandamtu hian a kalna hmun apiangah a hmêl lan dân ngainatawm tak, a ngilneihna leh zâidamna te avângin naupangte ngainat leh rin a hlawh \hîn a ni.”—Ellen G. White, Chatuan Nghahfâk, p. 511.

            “He rorêltu tlangvâl anga dinhmun sâng tak luah leh sum leh pâi rohlu tam tak neite tân hi chuan, Krista zui tûra neih zawng zawng han kalsan tawp mai chu chânna nasa tak ni dâwnin a lang a. Mahse, chu chu a zirtîr ni tûr zawng zawngte tih ngei tûra ruat a ni miau bawk si. Hemi zâwm lotute chu zirtîr atân pawm theih an ni lo va. Mahni inpêkna hi Krista zirtîrnate laimu chu a ni tlat. Mihringte hi anmahnin an lo lawm avânga an nun pum pui tichhe vek thei thilte lak ata lâk hran tawp mai loh chuan chhandam a ni thei dâwn si lo va; chuvâng chuan, \awngkam khauh tak leh thuneihna nei ang taka an zawm tûr thute puanchhuah a \ûl fo \hîn a ni.”—Chatuan Nghahfâk, p. 523.

Sawi ho tûrte:

1. In fate/naupangte leh in tleirâwlte kha Krista nên leh kohhranhote nên inzawmna nung an neih reng theih nân engtiang kawngtein nge in \anpui theih ang?

2. Mi \henkhat chuan sum leh pâi an ngaihtuah lêm loh thu an sawi \hîn a. Mahse, an ti ve mai mai a ni. Mi tin hian sum leh pâi kan ngaihtuah \heuh a; tin, chu chu thil sual a ni ngawt hran chuang lo bawk. Chuti a nih chuan, eng chinah nge buai lo awm ta \hîn ni a, eng vângin nge Kristian \ha takte chu—an hausa emaw, an rethei emaw pawh ni se—sum leh pâi thu-ah hian an fîmkhur hle a \ûl?

3. Isua hian “Eng thil nge tihsak che ila min tih?” tiin zâwt che se la, engtin nge i chhân ang?4. Marka 10:43–45-a kan hmuh Isua thil sawi hi ngun takin han ngaihtuah leh la. Hetiang hian engtin nge i nun theih ang? Engtin nge mi dangte rawngbâwlsaka awm ni lovin, mi dangte rawngbâwlsaktu zâwk nih dân kan lo hriat theih ang? Chutiang nun chu mi dangte nêna kan chên honaah leh thil tih honaah engtin nge kan lan chhuahtîr theih ang?