Zirlai-10 2024 1st Quarter

Zirlai 10                                                      March 2–8, 2024

HUN KAL TÂ A|ANGA ZIRLAITE

CHÂNGVAWN: “Chûng chu kan bengin kan hria a, kan rilrûin kan hre bawk a, min thlahtûte pawhin min hrilh kha. Chûng chu kan fâte lakah kan zêp lo vang a, thangthar lo la awm tûr hnênah LALPA fakna thû leh, A chakzia leh a thilmak tak tihziate chu kan hril zâwk ang,” (Sâm 78:3, 4).

Sabbath Chawhnû                                                   March 2

Chhiar Tûr: Nambar 6:22–27; Sâm 78; Sâm 80; Sâm 105; Sâm 106; Sâm 135; Galatia 3:29.

    LALPÂ chhandamna thiltih ropui chungchâng sawina hmangin, Sâm tam takah Pathian chu fak a ni thîn a. Hêng Sâm-te hi “chhandamna chanchin sawina Sâm” emaw “thil thleng tak tak Sâm” emaw a ni. Mi thenkhat chuan Pathian mîte hnêna ngenna siamin, an chanchin atanga zirlai zir tûrin an hrilh a, a bîk takin anmahni leh an thlahtûte tihsual atangtein a ni. Thil thleng tak tak Sâm zîngah, hun kal taa Pathianin A mîte tâna thil mak tak tak A lo tihsak tâkte chu fakna hlâin an châwi a, chûng chuan LALPA an rinna a tichak sawt thîn a; Ani chuan tûna harsatna an tawh mêkte laka chhanchhuak tûra theihna neiin, a rinawm bawk.

    Thil thleng Sâm zînga ngenna bîkte hian Pathian mîte chanchin pêng khat kan nihna min hmuh thiamtîrin, hun kal ta chu kan puâlah min neihtîr a. Kristâ zâra hun kal taa Pathian chhûng zînga teltîr kan nih tâk avângin (Rome 8:15; Rome 9:24–26; Gal. 4:6, 7), hmânlai Israel mîte rochan kha, a nihna takah chuan thlarau lama min thlahtûte chanchin a ni. Chuti chuan, an chanchin liam ta atang khân keini pawhin zirlai kan zir thei a, kan zir tûr pawh a ni bawk.

    A tum ber chu, Pathian mî chhuân tina mîte hian indona ropuia Pathian thil tum ropui rawn inpuâng chhuak zêlah hian chanvo pawimawh eng emaw tak kan chang theuh a ni tih kan inhriat hi a ni.

Sunday                                                                      March 3

LALPÂ Rinawmna Dâl Ruâl Loh Chu

Chhiar tûr: Sâm 78. Hê Sâm-ah hian eng hun kal taa thilthleng pawimawh pathumte nge a târ lan? Khâng hun theuhte atang khân Asafan eng zirlaite nge a lâk chhuah?

    Khâng Israelte hun kal tâa thilthlengte ennawn lehna khân Pathian rinawmna leh Israelte rinawm lohna a târ lang a. Chhuân lo awm zêl tûrte chu an thlahtûte tihsualna ang ti vê lo va, Pathian rinchhan a, A thuthlung chunga an rinawm tûra zirtîr nân a ni. Sâm-phuahtuin thil thleng tawh kha tehhkhin thû angin a hmang a (Sâm 78:2), chû chu Sâm thuchah chu chîk taka an ngaihtuah a, anmahni ngêiin a awmzia an zawnna tûrin a ni. Sâm 78:2 hi Isuan tehkhin thu hmanga zirtîrna A la pêk dân tûr hrilh lâwkna a ni (Matthaia 13:34, 35).

    Sâm hian Aigupta chhuahsan lai (Sâm 78:9–54) te, Kanaan ram luah thû (Sâm 78:55–64) te, leh Davidâ hun pawh a târ lang a (Sâm 78:65–72). LALPÂ thiltih ropui takte bâkah, mipuiten Pathian thuthlung an bawhchhiatin nghawng râpthlâk tak a neihte pawh a târ lang a. Israelte chanchinah khân Pathian chunga mipuite rinawm lohna chi hrang hrang, a bîkin milem biakna chu a sawi nawn a ni (Sâm 78:58).

    Sâm-phuahtu erawh chuan, Israelte rinawm lohna tobul sawi uârin, an tâna Pathian thiltih an theihnghilh a, Pathian rinchhan lo vin, Pathian chu an fiah a (Sâm 78:18, 41, 56), A laka helin, A dân te, thuthlung te leh thuhriattîrnate an bawhchhia a (Sâm 78:10, 37, 56). Hetianga rinawm lohna uâr bîkna hmang hian, Sâm-phuahtuin târ lan a tum chu, Israelte chanchina hnar an nihna thlentu chu sualna laimû, mipuiten LALPA an rinchhan lohna chu a ni (Sâm 78:7, 8).

    Sâm han chhiar hian, mipuite luhlul fona leh thlarau lam mitdelna ang lo takin LALPA chu A dawhtheiin, khawngaihna a ngah hlê thung a. Engati nge thil zir kawngah chhuân thar lo awm zêlte an ngawng viâu zêl?

    Chhuân liam tâte kan dem viâu hmâin, keimahni hi kan inngaihtuah chiâng hmasa tûr a ni. Pathianin hun kal taa thilmak A tihte kha kan mangnghilh vê tho vin, A thuthlung thil ngiâtte pawh kan hlamchhiah vê tho a ni lo’m ni? Sâm hian mipuite chu anmahnî thiltiha innghat lo tûrin a fuih a. Sâm 78 hian mihring ruâhmanna chu, Pathian rinawmna hriatna leh A khawngaihna pawmna neih fo loh chuan, a eng mah lohzia a târ lang a. Indonaa Pathian mîte hlawhchhamna khân (Sâm 78:9, 62–64) Pathian rinawmna tel lova mihring beihna maite chu hlawhchham mai tûr a nihzia a sawi fiah a ni.

Hun kal taa i thil tihsual palhte atang khân eng zirlate nge lo zir tawh tûr i nih?

THAWHTANNΠ                                                                                March 4

Thil Thleng Hre Rengin Pathian Fak Rawh

Chhiar tûr: Sâm 105. Hê Sâm-ah hian hun kal taa thilthlengte leh zirlai an târ lan chu engte nge ni?

    Sâm 105 hian LALPA leh A mî Israelte inkâra thuthlunga inlaichînna thlentu thilthleng a sawi lang a. Abrahama leh a thlahte hnêna Ram Tiâm pe tûra Pathian thuthlung chu sawiin, chû thutiâm chu Isaaka leh Jakoba-te hnênah nemngheh a ni a; thuthlung thu thenkhat chu Josefa te, Mosia leh Aarona-te bâkah Kanaan ram lâk lai khân a lo famkim a. Sâm hian chhuân tina Pathian mîte tân beiseina a siamsak a, hun kal taa Pathian thilmak tihte khân, hun tina Pathian mîte tân A hmangaihna chu a danglam chuâng dâwn lo tih a entîr a ni (Sâm 105:1–5, 7, 8).

    Sâm 105 leh Sâm 78 (nimin zirlai) nên khân inzûlin, hun kal taa A mîte chunga Pathian rinawmna an târ lang a, chû chu Pathian an châwimâwi nân leh, A chunga an rinawm phah nân a ni. Chuti chungin, Sâm 78 ang lo takin, Sâm 105 hi chuan hun kal taa mipuite sualna a sawi vê lo. Hê Sâm hian tum dang a nei a ni.

    Sâm 105 hi chuan, Israel thlahtubulte zînga ropui berte hmangin chanchin liam ta a sawi nawn a, Pathian hruaina leh thlatubulten harsatna chhel taka an tawrh chhuah dânte a târ lang a. Thlahtûte chhelna leh rinawmna kha Pathianin nasa takin mal A sâwm a. Tichuan Sâm 105 hian mipuite chu thlahtûte rinna ngaihtuah a, anmahnî huna Pathian chhanchhuahna chu, Amah rinchhan chunga nghâk tûrin a sâwm a ni.

    Sâm 105 hi Pathian fakna hla thlûk nei niin (Sâm 105:1– 7), a nih dân tûr ang taka Pathian fak tûr chuan, Pathian mîten an chanchin liam ta an hriat hmasak a ngai tih a entîr a. Chanchin kal ta hian kan rinna rintlâk zia leh, Pathian chu faktlâk a nihzia a lantîr thîn.

    Chibaibûktûte chu Abrahama thlah leh Jakoba fâte anga sawi an ni a (Sâm 105:6), chû chuan Abrahama chu hnam ropui taka siam A tiâm thlen famkimna a ni tih a entîr a (Gen. 15:3–6). Sâm-phuahtuin a sawi uâr chu, thlahtubulte atanga Pathian mî chhuân lo awm zêlte inkâra inzawmna chu a ni. Sâm-phuahtu thil sawi uâr chu, “A rorêlte chu lei chung zawng zawngah hian a awm a” (Sâm 105:7, NKJV; emphasis supplied), chû chuan chibaibûktûte chu “kan Pathian” chu leilung luah zawng zawngte LALPA niin, A hmangaih- ngilneihna chuan mipui zawng zawng a huâm tel tih theihnghilh loh tûrin zilhna a pê a (Sâm 96:1; Sâm 97:1). Hei hi ringtu chhuân tina mîte chu rinawm tûra kohna a ni tih a chiang hlê.

Keini Seventh-day Adventist-te hi engtin nge Abrahama thlaha inchhui lût tûr kan nih dân? (Galatia 3:29) Eng zirlaite nge hê thû atang hian kan zir chhuah tûr ni ang?

Thawhlehnî                                                            March 5

Thil Thleng Hriat Reng leh Simna

Chhiar tûr: Sâm 106. Hê Sâm-ah hian hun kal tâa thilthleng engte leh eng zirlaite nge a târ lan?

    Sâm 106 hian Israelte chanchina thilthleng lian tham deuhte târ langin, chutah chuan Aigupta chhuahsanna, thlalêra zinna leh, Kanaan ram nun pawh a sawi tel a. An saltânna thlentu chhuâna an thlahtûte suâlna râpthlâk tak chu chiang takin a entîr a. Tichuan, Sâm hi an hnam Babulona an awm lai emaw, chuta tanga an lêt leh hnû emawa ziah a ni ang tih a chiang thawkhat a; Thlarau Thianghlim thâwkkhumin Sâm-phuahtu hian an chanchina thil thlengte leh chuta tanga mipuiten zirlai an zir chhuah tûr chu a târ lang ta a ni.

    Hê Sâm hian, a dangte angin, A khawngaihna thuthlung chunga Pathian rinawmna a sawi a, hun kal taah A mîte chu A lo chhanchhuak tawh thîn tih a ni (Sâm 106:45). A mî sual simte chunga duhsakna lantîrin, hnamte zîng atangin A hruai khâwm leh ang tih beiseina pawh a târ lang tel bawk (Sâm 106:47). Tûna chhanchhuah dîlna hi duh thu sâm lek a ni lo va, hun kal taa Pathian chhanchhuahnate behchhana rinnaa tawngtaina (Sâm 106:1–3) leh, A mîte hnêna A thuthlung chunga Pathian rinawmna nungchang thlâwn ngai lo chu a ni. Sâm 106-a Israelte chanchina hlawhchhamna chungchâng sawina hi, mipuiten an sualnate an puân leh anni chu an thlahtûte âiin an tha bîk chuâng lo tih pawmna pawh a ni a. Tûn chhuânte hian an thlahtûte âiin an dinhmun a chhe zâwk tih an pawm a, a chhan chu hun kal taa bawhchhiatna nghawngte hriain, hun kal ta khân an nun kawng sual an zawh zêl chungin, A dawhtheihna ropui tak lantîrin, khawngaihnain anni chu A chhandam a ni. Hei hi an tân a dik a nih chuan, tûna keinî tâna a nih zuâl dân tûr chu ngaihtuah la, Isua leh kraws zâra khawngaihnaa chhan- damna leh Pathian inpuân chhuahna chu kan nei sî a.

    Sâm 106-a chanchin lâwmawm chu, mipuite sualna kârah Pathian hmangaihna chu a ding nghet tlat reng hi a ni (Sâm 106:8–10, 30, 43–46). Mosia leh Finehas-aten Pathian thinrimna thâwidam tûra an hmalâkna kha, ringtute tâna Kristâ dîlsakna pawimawhzia târ langtu a ni. Mimal taka Pathian khawngaihna a taka channa zârah chiah kan chanchin liam taa siamthatna a thlen thei ang.

Sâm 106:13-ah: “A thiltihte ch an theihnghilh ta thuai a; A thurâwn chu an nghâk peih lo” (NKJV) tih a chuâng. Engati nge chû chu keimahnî nunah pawh tih vê a awl viâu?

Nilâinî                                                                      March 6

LALPÂ Grêp Tehkhin Thû Chu

Chhiar tûr: Sâm 80. Engtin nge hê Sâm-ah hian Pathian mîte chu entîr an nih a, eng beiseina ropui nge an dîl?

    Israel hi grêp huan Pathianin hnehchhiahna ram, Aigupta atanga a pawh a, hniânghnârna Ram Tiâma a phun tâk hmanga entîr a ni a. Entîrna atâna Grêp huan hmanna hian Israelte Pathian thlan nihna leh, A enkawlna chu a târ lang a (Gen. 49:11, 12, 22; Deut. 7:7–11).

    Chuti chungin, Sâm 80-ah, Pathian Grêp huan chu A thinrim khum a (Sâm 80:12). Grêp huân chu a lo that loh tâk avânga Pathian hremna entîr nân zâwlneiten grêp huân tihchhiat a nih thû an puâng a (Isa. 5:1–7; Jer. 2:21).

Sâm 80 hian chunglam rorêlna thlen chhan a târ lang lo thung. Pathian khawngaihna thûkzia ngaihtuahin, Sâm-phuahtu hian chû leh chen Pathianin A mîte hnêna A chênchilhna chelhkîr chu a ngaihna a hre lo va. Pathian thinurna leh hremna kâr hi, kawng khatah Pathian khawngaihna leh ngaihdamna a nih laiin, a lehlamah thung chuan Sâm-phuahtu hlauh chu chunglam thinurna chu dingchangin, mipuite chu a tiboral phiâr mai ang tih a ni thung (Sâm 80:16).

Chhiar tûr: Nambar 6:22–27. Engtin nge hê malsâwmna hi Sâm 80-in a hman?

    Sâm thunawn hian Arona leh a fapâten Pathian mîte mal an sâwm thin dân tûr kha min hriat chhuahtîr a (Num. 6:22– 27), chû chuan Pathian khawngaihnain mipuite chhiatna thlen thîntu chunga hnehna a la chan tûr beiseina chu a târ lang bawk a; chû chu “Aw Pathian, min dinthar leh la; I hmêl kha tiêng ang che, tichuan chhandamin kan awm dâwn nia!” tiin (Sâm 80:3; Sâm 80:7, 19).

    Hebrai thumal heta “dinthar” tih hi “hawi kîrtîr” tihna niin, Bible-ah hian Pathianin A mî, pêng bote A koh kîr leh a, Amâ hnêna kîr leh tûra koh nân hman fo a ni a. Hei hian simna, sual hawisan a, Pathian lam hawi tih a kâwk a ni. “LALPA ka ni tih mi hriat nân thinlung ka pê ang; ka mîte an ni ang a, an Pathian ka ni ang; an thinlung zawng zawng nên ka hnênah an lo kîr dâwn sî” (Jer. 24:7).

Engtin nge nangmâ tân ngei simna chu Pathian lam hawina anga a taka i lo chan vê tâk?

Ningânî                                                                     March 7

Chanchin Liâm Tâa LALPÂ Chungnunna

Chhiar tûr: Sâm 135. Hê Sâm hian chanchin liam taa thil thleng engte nge a târ lan? Chûng atang chuan Sâm– phuahtuin eng zirlaite nge a lâk chhuak?

    Sâm 135 chuan Pathian mîte chu Thilsiamna (Sâm 135:6, 7), Aigupta chhuahsan lai huna Israelte chhanchhuahna (Sâm 135:8, 9) leh, Ram Tiâm hnehnaa LALPÂ thatna leh rinawmna (Sâm 135:10–12) avânga Amah chu fak tûrin a ko va.

    LALPAN a rohlu bîk anga Israel mîte thlangin, A khawngaihna chu a lantîr a (Sâm 135:4). “Rohlu bîk” tih hian LALPA leh A mîte inkâra thuthlunga inlaichînna danglam bîk chu a entîr a (Deut. 7:6–11; 1 Pet. 2:9, 10). Israelte thlan an nihna kha LALPÂ chungnunna behchhana tih a ni a, anni Israelte khân mi dangte âia chungnunna bîk an nei lo. Sâm 135:6, 7 hian khawvêl tâna LALPÂ thiltum chungnung kha Israelte hnêna intan ni mai lo vin, Thilsiamna kha a ni zâwk tih a sawi a. Tichuan, Israelte khân khawvêl pum chhandam nâna Pathian thil ruâhmana an chanvo chu inngaitlâwm takin an hlen mai tûr a ni.

    A mîte tâna Pathian thiltih ropui takte hriat thar lehna (Sâm 135:8–13) kha, Pathianin A mîte ‘rorêlsakin’ an chungah khawngaihna A nei dâwn tih thutiâm hmanga khâr a ni a (Sâm 135:14). Heta ‘rorêlna’ hi Pathianin hnehchhiah tuâr leh chanhaite A châwisânna tûr chu a ni (Sâm 9:4; Sâm 7:8; Sâm 54:1; Dan. 7:22). Thutiâm ang chuan, LALPAN A mîte chu châwisângin, a humhim tlat dâwn a ni (Deut. 32:36). Tichuan, Sâm 135 hian Pathian mîte chu LALPA rinchhan a, Amah nêna an thuthlunga rinawm zui zêl tûra chawhphûr a tum a ni.

    A mîte chunga LALPÂ rinawmna khân Sâm-phuahtu chu milim (pathiante) eng mah lohzia leh khawvêla LALPÂ chungnunna danglam bîkzia a sawi a (Sâm 135:15–18). Milimte rinchhanna khân, a milimte ang thovin a betûte pawh beisei bo leh thiltihtheihna nei lo an ni tih a sawi a (Sâm 135:18). Sâm hian Thilsiamna leh A mîte Chhandamtu a nihna vânga Pathian chu fak tûr a ni tih a târ lang a. Hei hi Thupêk Sâwmtea a palîna târ lanna bung hnihah mak takin sawi a ni (Exod. 20:8–11; Deut. 5:12–15). Khawvêlah hian thilsiamna leh khawvêl chanchina Pathian thiltihtheihzia hi tluk ruâl loh a nih avângin, Pathian mîten Amah chu innghah nâna hmangin, Ani chu chibai an bûk thîn tûr a ni. Siamtu leh min Tlantu a nih angin, Amah chauh chu chibai kan bûk tûr a ni a, thil dang leh milem eng mah chibai kan bûk tûr a ni lo.

Engtin nge kan nunah milimte kan nei lo tih kan chiân theih ang? Engati nge kan ngaih ngawt âia milem biak hi a lo awlsam theih?

Zirtâwpnî                                                                 March 8

Zir Belhna: Chhiar tûr: Tirhkohte 7 leh Hebrai 11. Thuthlung Thar lam hian hun kal taa Pathianin A mîte chungchuâng taka A lo hruainaa A thiltum eng nge a sawi?

    Chanchin kal ta sawina Sâm-te kha A mîte chunga Pathian rinawmzia chiang taka lantîrna a ni. Pathian mîte chanchina thilthleng tin khân, Nazareth Isua zâra khawvêl Chhandamtu chunglam tiâm lâwkna lo thlen famkim chhoh zêl dân chu a târ lang a. Pathian mîte timangang thîntu fiahnate vângin Pathianin hlamchhiah ta angin an inngaih phah a. Pathian erawh chuan engkim thununin, thil thleng chunga LALPA a nih angin a tahtawl têin A kalpui zêl thîn.

    Sâm-phuahtu hian thiam taka thutak târ langin, mipuite rinawm lohna pawhin A mîte tâna A rinawmna leh A thutiâmte hlenna lakah Pathian kawng a dâlsak thei lo tih a sawi a. Chuti chungin, mimal leh a huhova sual sim lohna chuan thuthlung malsâwmnate chu dâlsakin, an chanchin tâwp dân khân Pathian tel lo emaw, Amah dodâlna emawin chhiatna a thlen thîn tih min hriattîrna tûr a ni.

    Sâm hian hun tina Pathian fâte chu LALPA-a beiseina nei a, Amâ chunga rinawm tlat tûrin a fuih phûr a ni. “Kan chanchin liam ta a A mi zirtîrna leh, A mi hruaina kan theihnghilh ang tih chauh lo chu, kan hmalam hunah hian, eng mah hlauh tûr kan nei lo.”—Ellen G. White, Life Sketches of Ellen G. White, p. 196.

    Pathian mîten hlâu lo va hmâ an sâwn zêl theih nân, an chanchin liam ta kha an hriat a ngai a. Ellen G. White-in ringtûte chu Sâm 105, 106 chhiar thîn tûrin thurâwn a pê a, chû chu “chawlhkâr tin tum khat tal” a ni.—Testimonies to Ministers and Gospel Workers, p. 98.

    Hê Pathian mîte chanchin hian A thûa Pathianin thutiâm A lo siam tawhte chu thleng famkim lo a awm dâwn lo tih a târ lang a. Hetah hian tûna mimal taka min enkawl tûra chunglam thutiam leh, nakin huna Kristâ lo kal lehna thutiâm pawh a tel a. Chutah chuan Pathian rêldikna lalram chu dinngheh niin, lei tharah chuan muânna a awm dâwn tih a ni.

Sawi Ho Tûr:

@Khawvêl chanchin liam taa Patianin rinawm taka A mîte A hruaina hriat rengnaah eng malsâwmnate nge awm? Hun kal ta atanga zilaite theihnghilh emaw, hlamchhiah emawin eng nghawng tha lote nge a neih thin? Hmânlai Israelte koh an nihnaa tih tûr ngâi vêk chu ti tûra kohhran koh a nihna thupui hi engtin nge kan inbel theih ang?

@Engtin nge Sâm hian kan nunah Pathian enkawlna kan dawn te, Pathian kawng chungnungte chu, kan chunga a lo thlen dân hriat thiam mai a awlsam lo chungin, chhel taka nghah leh innghah nâna hmang tûra lo pawm tûra min fuih le?

@Engtin nge kan Pathian biak inkhâwmahte hian mimal leh a huho pawhin Pathian mîte chanchin kha zir chîk takah kan neih theih ang? Engtin nge tûn hnâia Pathian mîte chanchin hi tum nei râna kan fâte hnênah kan hrilh theih ang

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †