Zirlai-11 2024 1st Quarter

Zirlai 11                                                    March 9–15, 2024

ZION-A PATHIAN THLAHLELIN

CHÂNGVAWN: “Ka nunna hian LALPÂ biak in hung chhûng kawtlaite chu a ngai êm êm a; a ni, a chauh phah hiâl a; ka thinlung leh ka tîsâ hi Pathian nung hnênah chuan a âu chhuak a,” (Sâm 84:2).

Sabbath Chawhnû                                                   March 9

Chhiar Tûr: Sâm 46; Sâm 84; Sâm 87; Sâm 122; Sâm 125; Matthaia 28:18–20; Galatia 3:28, 29; Thupuan 21:3.

    ZION hlâte hi hlim taka Pathian fakna hlâte niin, Zion mâwina leh LALPÂ , A tlâng thianghlim atanga rorêltû chungnunzia chu hlâin a châwi a. Hêng Sâm-te hian LALPÂ in thatnate leh Sâm dangtea chuang biak bûk thlâkhlelhna pawh a târ lang bawk a. Hêng Sâm-te zînga tam tak hi Kora fâte phuah a ni a, anni kha tempula rimâwi tumtu, LALPÂ in mawlsâwmnate a taka changtu (1 Chron. 6:31–38) leh tempul gate vêngtûte an ni (1 Chron. 9:19).

    Engin nge Zion chu beiseina leh hlimna hnârah chantîr? Zion hian A mîte zînga Pathian chênchilhna nung a entîr a. Israel mîte kha Pathian mi thlante an ni a (Deut. 7:6), chuvângin Zion chu Pathian thlan tlâng chu a ni (Sâm 78:68; Sâm 87:2). Pathianin Zion atangin ro A rêl a (Sâm 99:1, 2), A tempul chu Zion-ah a din bawk a (Sâm 87:1). Tichuan, Zion chu chunglam malsâwmnate leh inhumhimna hmun a ni. Zion tih hi Jerusalem leh hmun thianghlim, Pathianin khawvêl tâna chhandamna hnâ A thawhna hmunpui nêna hman kawp a ni fo thîn a ni.

    Zion malsâwmnate chu kâwlkil tâwp thlengin a luâng liâm a, a chhan chu LALPA chu mimal, a taka awm leh A khawngaihna chuan hmun thianghlim ramrîte chu a khûm vâng a ni. Zion chu lei pum pui lâwmna niin (Sâm 48:2), chû chuan lei pum pui hi Pathian tâ a ni tih a nemnghet a ni.

Sunday                                                                    March 10

Kum Sâng âiin I Tuâla Ni Khat A Tha Zâwk

Chhiar tûr: Sâm 84:1–4. Engati nge Sâm-phuahtuin hmun thianghlima chên reng a châk?

    Sâm-phuahtu hian chatuana Pathian kianga a awm theih nân biak bûk kianga awm reng mai a “thlahlelin” a “chauhphah” hiâl thîn a (Sâm 84:1, 2). Pathian chênchilhna nung (Sâm 84:2) chuan biak bûk chu hmun danglam bîkah a siam a. Biak bûkah chuan, chibaibûktûten “LALPÂ mâwina a hmu theiin” (Sâm 27:4; Sâm 63:2), “I in thatna chênin kan tlai ang” (Sâm 65:4) an ti thei.

    Sâm 84-ah, Pathian nêna inlaichînnaa hlimna namên lo neih thû a chuâng a, chutah chuan Amah fakna pawh a tel a (Sâm 84:4), Amaha chakna hmûin (Sâm 84:5), Amah an rinchhan bawk (Sâm 84:12). Biak bûk chu chutiang inlaichînna châwm nunna hmun a ni a, chû chu ringtu ûnaute nêna chibaibûk leh inpâwlhona neihna atangin a ni. Biak bûka Pathian chênchilhna nung chuan chibaibûktûte hnênah Pathian lalram ropuizia leh, chatuan nun lo tem lâwkna a neihtîr thîn.

Chhiar tûr: Sâm 84:5–12. Biak bûkin mal a sâwmsak theih dang chu tu nge ni?

    Pathian malsâwmnate chu biak bûk atanga lo êng chhuakin, biak bûka rawngbâwltûte chungah malsâwmna a thlen hmasa phawt a (Sâm 84:4), chutah biak bûk lam pana khualzinte chungah (Sâm 84:5–10), a tâwpah chuan kâwlkil a thleng ta hiâl thîn a ni. Biak bûka Pathian tawh beiseina chuan khualzinte rinna a tichak sawt thîn a (Sâm 84:7). Khualzin dangte chu kawng thui tak zawha an zin hian an châu sauh thîn a ni a, biak bûk lam pana zinte erawh chu, biak bûk an lo hnaih lai chuan an chaknate chu a lo pung deuh deuh thîn.

    Biak bûk atanga sawn bo an nih lai pawhin, Pathian fâten nun thianghlima nungin, Pathian biak bûk chhinchhiahna chu an pu zêl thîn a (Sâm 84:11), chû chuan LALPÂ biak bûka lût mi fel nihna a entîr thîn (Sâm 15:1, 2). LALPA chu “nî” anga sawi a nihna hian, ni-zungin kâwlkil thlenga a chhun thîn angin, biak bûk atanga malsâwmnate a entîr a (Sâm 84:11). Tichuan, rinna zâra Pathian hnêna awmte chuan, an awmna apiangah A khawngaihna an chang thîn.

Chhiar tûr: Thupuan 21:3. Hetah hian lei biak bûka beiseina awm eng chu nge min târ lansak? Engtin nge tûnah ngêi pawh chuta nuntawng chu eng ang ni tûrin nge kan ngaihruât thin?

THAWHTANNΠ                                                                              March 11

Jerusalem Muânna Dîla Tawngtai

Chhiar tûr: Sâm 122:1–5. Jerusalem an lo thlen laia chibaibûktûte rilru sûkthlêk chu eng nge ni? Jerusalem- ah chuan eng nge hmuh an beisei thin?

    Sâm 122 hian khualzinten Jerusalem an lo thlen dâwna an phûr leh hlim theihzia a târ lang a. Sâkhaw biakna thila Jerusalem lama zin hi thil hlimawm tak, Pathian mîten hun kal ta leh tûn huna Pathian thatna an hriat reng nân kum tin tum thum Jerusalem-a biakzin an nei thîn (Deut. 16:16). Jerusalem-ah khân “Israel-ho hnêna thuhriattîrna” (Sâm 122:4) leh rorêlna lalthutthlêngte (Sâm 122:5) a awm avângin, an hnam nun hmunpui ber a ni.

    “Israel-ho hnêna thuhriattîrna” tih hian biak bûk chu engtik lai pawha “Thuhriattîrna biak bûk” (Num. 1:50, NKJV) tih niin “Thuhriattîrna bâwm” (Exod. 25:22) pawh a awm tel a. Rorêlna lalthutthlêngte tih hian Jerusalema rorêlna neih dân kalhmang chu a entîr (2 Sam. 8:15). Sâkhaw biakna thila zin kha mîten rêldikna an zawn leh an hmuh theih hun a ni thîn a. Pathian chunga rinawmna leh mipuite chunga dik taka rorêlna kha lâk hran ngai loh tûr a ni.

Chhiar tûr: Sâm 122:6–9. Pathian mîte tawngtai thil dîl ber chu eng nge ni?

    Jerusalem muânna dîla tawngtaina khân, khawpui leh chuta chêngte tân Pathian malsâwmna dîlsakin, chibaibûktûte tipumkhatin, an zîngah remna a lêntîr thîn (Sâm 122:8). Jerusalem kha remna khawpui a nih theihna chhan chu Pathian leh A mîte inkâra remna a awm a, Pathian fâte zînga rem a lênin a ni. Tichuan, Jerusalem muân nâna dîlna chu Pathian mîte chu Pathian nêna inrem bâkah, anmahnî zinga inremna a awm theih nâna ngenna a ni. Jerusalem muânna zârah, mipuite an hmuingîl vê bawk ang (Sâm 147:12–14).

    Sâm hian rinna chhûngkuâte thatna tûr dîlsak chu Pathian fâte tawngtaina thupui pawimawha nei thîn tûrin min fuih a; a chhan chu Pathian mîte tangruâl leh an chak chauhin Pathian thlamuânna leh chhandamna chanchin thâ chu khawvêla an puân chhuah theih vâng a ni (Johana 13:34, 35).

    Jerusalem thlamuân nâna dîlna chu ringtûte tâna hamthatna leh mawhphurhna a ni kawp a, a chhan chu khawvêl-tâwpa Pathian muânna lalram lo thleng tûr beiseina a vawn nun vâng a ni a, chû chuan Jerusalem khawpui chauh ni lo, khawvêl pum a huâm tel dâwn vâng a ni (Isa. 52:7; Isa. 66:12, 13; Thupuan 21-22).

Mipui kan nih angin, kan zînga inremna awmtîr tûra a taka kan beih theih dân tûr kawng chu engte nge ni ang?

Thawhlehnî                                                          March 12

Zion—Hnam Zawng Zawngte Chênna Chu

Chhiar tûr: Sâm 87:1, 2. Zion chu chutiang taka hmun duhawm nihtîrtu chu eng nge ni?

    Sâm 87 hi Zion chu Pathianin a bîk tak leh duh taka A thlan khawpui a nih lawmna hlâ a ni. Pathian tempul lungphûm chu Zion Tlângah a awm a (Sâm 2:6; Sâm 15:1). Hun tâwpah chuan, Zion chu tlângsâng dangte âi sânga dingin, chû chuan khawvêl pum pui chunga LALPÂ chungnunzia a entîr dâwn a ni (Sâm 99:2; Isa. 2:2; Mika 4:1). Sâm 87 hian Zion chu “tlângte” tiin a sawi a, chû chuan a ropuizia a entîr a (Sâm 133:3). Pathianin Zion kulh kawngkhârte chu “Jakob ho chênna zawng zawngte âiin” (Sâm 87:2, NKJV), A ngaina zâwk tih a ni a; chû chuan Israel hmun dang zawng zawng, hun kal ta a Pathian mîte lo pun khâwm tawhna Shilo leh Bethel-te âia Zion chungnun bîkzia a târ lang. Tichuan, Sâm hian Pathian chibaibûkna dik chu Amâ thlan hmunah, Amâ sawi dân anga neih tûr a ni tih a nemnghet a ni.

Chhiar tûr: Sâm 87:3–7. Zion chungchângah eng thil ropuite nge sawi lo ni le?

    Zion ropuina chuan Pathian hnên lamah hnam zawng zawngte chu a hîp a, tichuan Pathian lalram ramrîte chu khawvêl pum huâm tel tûra tihzauh a ni ta a ni. Thil chhinchhiah tûr chu, Zion chu LALPA chu an Chhandamtua pawmtu mî zawng zawngte thlarau lama pianna anga sawi a ni chungin, Pathianin hnam dangte hi mi hnuaihnung zâwk angin A en chuâng lo tih hi a ni.

    Mi tinte chu an pianna hmun angzia zêla chhinchhiah an ni a (Neh. 7:5; Luka 2:1–3). Tum thum lai Sâm hian hnamte chu Zion-a piang angin a sawi a, a awmzia chu LALPAN nihna thar neihtîrin, dân ang taka Zion-a piang fâte ni thei tûra hamthatnate chu A pê tihna a ni (Sâm 87:4–6).

    Sâm 87 hian Juda-te leh Jentail-te chhandamna sawiin, Kristâ tlanna rawngbâwlna zârah kohhran pakhata inpumkhat an nihna a sawi bawk (Rome 3:22; Rome 10:12; Gal. 3:28, 29; Kolosa 3:11). Sâm-in Zion hmuingîlna a sawi dân hi Danielan inlârnaa Pathian lalram a hmuh dân, tlâng lian takin lei pum pui a luah khah nên khân a inzûl hlê a (Dan. 2:34, 35, 44, 45), Isuâ tehkhin thûa Pathian lalram lo thang zêl chu thing lian taka lo thang a, a zâra chunglêng savâte riâk (Matthaia 13:32) nên pawh a induh hlê.

Engtin nge mî zawng zawngte lo pawm tûra Zion inpeihna kha, hnam tinte hnêna chanchin tha puâng tûra Thupêk Ropui (Matthaia 28:18–20) famkimna tûr a nih ang? Engtin nge hê ngaih dân leh Vântirhkoh Pathum Thuchahte puâng tûra koh kan nihna chu a inrem?

Nilâinî                                                                    March 13

Zion Himna leh Muânna

Chhiar tûr: Sâm 46:1–7. Engtin nge hetah hian khawvêl chu hla thu hmanga entîr a nih?

    Sâm hian khawvêl dinhmun buaizia chiang taka târ langin, leilunga chhiatna thlen nasatzia a sawi a (Sâm 46:2, 3). Tuipui so bulh bulh hian helhmang hnamte leh mi suaksualte vânga khawvêla harsatna chi hrang hrang thleng thînte chu a entîr a (Sâm 93:3, 4; Sâm 124:2–5). Chutiangin, Sâm 46-a khawvêla chhiatna hmêlhmang lo lang hian hnamte zînga indona râpthlâk tak lo thlengin a thunun chu a entîr bawk (Sâm 46:6).

    Hei hi Pathian hriatna tel lo khawvêl a ni tih a chiang a, a chhan chu A mîte lai takah A awm a, Pathian chênnaah chuan muânna a awm thîn sî a (Sâm 46:4, 5). Chuti chungin, khawvêl hian Amah chu hnar mah se, Pathian erawh chuan khawvêl hi A hlamchhiah mai chuâng lo. Pathian chu khawvêla A mîte zînga chêng anga sawi a ni a. Khawvêl lan dân chu duhawm lo tak ni bawk mah se, Pathianin khawvêl hi A chênchilh a, thutak laipui hriatna zârah mimal taka beiseina leh phûrna kan nei thei dâwn a ni.

    Inhumhimna duhthusâm ber, LALPA chu Zion-a muanna leh himna Hnâr chu a ni a. Zion-a himna thû erawh chu Sâm 46:3-ah a chuâng vê tho va. Khawvêl chu buâi hlê mah se, Pathian mîte erawh chu an him thung a. Hei hian muânna chu harsatna awm miah lo tihna a ni lo va, Amah rinchhantu A fâte hnêna Pathian thilthlâwnpêk a ni. Khêk nei hauh lo va Pathian rinchhanna zârah, Pathian fa chuan thlipui kârah pawh muânna leh himna a chang thei a ni (Matthaia 8:23– 27). Zawhna awm ta chu: Pathianin khawvêl hi a duhthlan anga chêtna leh chhiatna tûrin A kalsan mai dâwn em ni?

Chhiar tûr: Sâm 46:6–11. Khawvêla tharum thawhna leh chhiatna thleng Pathian chhânna chu eng nge ni?

    A thû hmanga khawvêl siamtu Pathian chuan, A lungâwi loh thiltihtheihna nên lei hi A titui ta a (Sâm 46:6). Chuti chungin, chutia tihtuina chuan chhiatnaa tâwpna âiah tihtharna a thlen zâwk a. Pathianin A muânna chu Zion atanga kâwlkil thlengin A zauh zêl tih hria ila. Pathianin indonate titâwpin, chhiatna hmanruâte chu a tiral a, chûng chu mi suaksualten khawvêl hnehchhiah nâna an hman thinte chu an ni (Sâm 46:9). Hê beiseina ropui, Kristianten an neih hi, Isuâ lo kal leh hunah a lo thleng dâwn a ni.

Engtin nge chhiatna tam tak thlenna khawvêlah hian muânna nei a, Pathian rinchhan dân kan zir theih ang?

Ningânî                                                                   March 14

Zion Tlâng Anga Tihnghîn Theih Loh

Chhiar tûr: Sâm 125:1, 2. Engtin nge hetah hian Pathian ringtûte entîr an nih?

    LALPA ringtûte chu Zion Tlâng tihnghîn ruâl loha nghet nên tehkhin an ni a. Jerusalem khawpui huâl vêltu tlâng mâwi takte khân, Sâm-phuahtu chu chunglam huâlhimna chiang tak hriatna a neihtîr a (Sâm 5:12; Sâm 32:7, 10). Mi suaksualten ro an rêlna tlâng, tuifinriat chhûnga insawn thînte ang lo takin (Sâm 46:2), Jerusalem dinna tlâng nghet tak chuan rinchhanna chiang tak nei tûrin a chawkphûr a. Pathian vênhimna innghah nâna hman ngamna zârah, thil tha lo lo thleng thîn, tawrh hrehawm kârah pawh a huaisen deuh deuh zâwk a. Chuti chungin, thil tha lo kârah pawh, Pathian mîte chuan beiseina an nei tlat thîn.

Chhiar tûr: Sâm 125:3–5. Engtin nge mi felte thlêm an nih? Kan tâna zirlai chu eng nge ni?

    Mi suaksualte hlawhtlinna chuan Pathian fâte a tizâm thîn a, an kawng zawh ang zawh vê tûra thlêm an ni fo (Sâm 73:2– 13; Sâm 94:3). Zion Tlâng dinngheh tlatna pawhin LALPA pênsantûte chu a dinnghehtîr vê chuâng lo. Mîte chu “an kuttea khawlohna an ban” (Sâm 125:3) tûr leh, “an kawng kâwitea pêng” (Sâm 125:5) tûra zalênna pêk an la ni reng tho va. LALPA chu a dik a, hel zui zêlte leh sual sim duh lo mi mal tinte chungah ro A la rêl dâwn a ni.

    Hetah hian Zion Tlâng chu inhumhinna tihnghîn ruâl loh a ni ang khân, Pathian mîte chu rinna sâi ngai lova ding tûr leh, LALPA chu rinchhan zêl tûra koh an ni. Chû chu, thil kan hrethiam kher lo chung pawhin, Pathian thatna chu innghah nân kan hmang thei cheu a ni.

    “Khawvêla sual luh tanna te, Kristâ mihring channa te, piantharna te, thawhlehna te leh zir tûr dang tam tak Bible-a mîte hi mihring rilru hrilhfiahna tûr leh hriatthiam vek tûra thurûk thûk lutukte chu a ni. Mahse Pathian thurûk chu kan hriatthiam theih loh avângin rinhlelh nân kan hmang tûr a ni lo.   Khawiah pawh hian thilmak kan hriat phâk loh a awm.

    Thlarau lamah pawh thurûk kan teh phâk loh kan hmuh chuan mak kan ti dâwn em ni? A harsatna chu mihring rilru tlinlohnaah leh a zîmnaah hian a awm a ni ber mai. Pathian chuan A lehkhabuah a nungchang tihlan chianna tâwk min pê a, chuvângin A thurûk zawng zawng kan hriatthiam theih loh avângin A thû chu ringhlel mai tûr kan ni lo.”—Ellen G. White, Krista Panna Kâilâwn, p. 96.

Zirtâwpnî                                                               March 15

Zir Belhna: Chîk takin Isaiah 40 leh Isaiah 51:1–16-a thuchah awm hi ngaihtuah ang che.

    Zion hlâte khân Zion chu ngaihtuah pui bera hmang tûr leh, chû thilin a entîr Pathian lalna chungnunga beiseina nung nei tûrin min fuih a. Hê lei damchhûnga Pathian biak bûk malsâwmna tam tak dawn kan beisei laiin, Zion-a hlimna leh nun famkim beiseina chu hmalam huna mî tûr a la ni a. Pathian fâ tam takte chuan mittui nên vân Zion an thlahlel a (Sâm 137:1). Zion hre reng tihin a kawh chu a châng chânga hre chhuak zeuh zeuh chauh ni lo vin, chû hriatna nung rema ngaihtuah leh thutlûkna siama nung tihna a ni (Exod. 13:3; Exod. 20:8).

    Tichuan, ‘Zion hlâte sâ’ tih pawh chu, lei thara Pathian lalram dinthar leh beiseina duh taka vawng nung reng tihna a ni (Thup. 21:1–5). “Chutah chuan rilru thi thei lote chuan, Siamtu thiltihtheihna leh tlanna hmangaihna thurûkte chu lâwmna chuai ngai lo neiin an ngaihtuah ang a. Hmêlma nunrâwng, bum hmang tak, Pathian theihnghilhtîr tûra thlêmtu chu a awm tawh lo vang. Taksa leh rilru chakna zawng zawng chu a thang puitling tawh ang a, thiltihtheihna tinrêng chu a pung tawh ang. Hriatna nei tûra zirna chuan rilru a tichâu lo vang a, chakna te a tichâu hek lo vang. Chutah chuan thil ropui ber chu tih zui zêl a ni ang a, suangtuahna tlin phâk tâwk chu thlen a ni tawh bawk ang a, duhthusâm chu hlen a ni tawh ang; chutichung chuan lâwn sân zêlna tûr thil tharte a lo awm zêl ang a, ennawm mak thar te, thutak thar hriat chhuah tûr te, taksa leh rilru thiltihtheihna hman tûlna chî thil tharte a lo awm zêl ang.”—Ellen G. White, Indona Ropui, p. 677.

    Zion theihnghilh lo tûra thutlûkna siam tih chu, LALPÂ khualzinte intiâmkamna siam, hê khawvêl hi an chênna ram tûr angin an pawm ngai lo vang a, vân tharte leh lei thar chu an nghâk zâwk dâwn tihna a ni.

    Tichuan, Zion Sâm-te chu chhuân tina ringtû, Jerusalem Thara chên châkte chuan an sa thei theuh a (Thup. 3:12). Zion hlâte chuan beiseina nêna khawvêl lo la awm tûr min thlîrtîr a, tûnlai khawvêla Pathian khawngaihna târ lanna hmanruâ ni tûrin min tur bawk.

Sawi Ho Tûr:

@Jerusalem-a hmun pakhat, Zion-a Pathian mîte tih thupui hi engtin nge in ngaih a, engtin gne kohhran leh khawvêla a rawngbâwlnaa in bel ang?

@Engtin nge tûnlai hian ringtûte chu Pathian biak bûkah an awm reng theih dân tûr? (Johana 1:14–18; Hebrai 12:22–24).

@Engtin nge Sâm 87 hmathlîr anga Zion chu hnam zawng zawngte khawpui a nih theih ang? (Rome 5:10; Efesi 2:11– 16; Kolosa 1:19–23).

@Khawvêla mi suaksualte an hmuingîl viâu laia mi tha tam takten harsatna an tuâr sî hi engtin nge i chhân ang? Eng nge i sawi ang? Tûnah rih hi chuan engkim chhânna kan la nei vek lo tih pawm thiam hi engati nge a pawimawh?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †