Zirlai-5 2024 1st Quarter

Zirlai 5                                    January 27–February 2, 2024

RAM DANGA LALPÂ HLÂ SÂIN

CHÂNGVAWN: “Engtin nge mî ramahte chuan LALPÂ hlâ kan sak theih ang?” (Sâm 137:4).

Sabbath Chawhnû                                               January 27

Chhiar Tûr: Sâm 79:5–13; Sâm 88:3–12; Sâm 69:1–3; Sâm 22:1; Sâm 77; Sâm 73:1–20; 1 Petera 1:17.

    KHAWVÊL famkim lo tak, sual, thil tha lo, tawrhna leh thihna thlenna hmunah kan chêng tih hmu chhuak tûrin Sâm Bûa kal thûk tehchiam pawh a ngai lo. LALPÂ thuneihna leh A dân fel hmanga enkawl thilsiam awmphung nghet hi, thil tha lo hian dinhmun derthâwngah a siam reng a. Sualin khawvêl a tihkhaw loh zuâl deuh deuh vângin, kan chênna lei hi Pathian mîte tân ‘hriat loh ram’ ang a ni zuâl deuh deuh a. Chû tak chuan Sâm-phuahtû tân pawh: ‘Engtin nge hriat loh ramah rinna neia nun dân tûr?’ tiin harsatna a thlensak ta a ni.

    Kan lo hmuh tâk ang khân, Sâm-phuahtuin Pathian lalna leh thuneihna chu a pawm a, fel taka rorêl thîn a ni tih pawh a hre bawk. Anni hian Pathian chu buaina huna inhumhimna leh tanpuina thlâwn ngai lo a ni tih an hria a. Chuvâng chuan, Sâm-phuahtuten eng emaw laiin thil an manthiam lo va (kan ni theuh âwm e?), LALPÂ lalna leh thatna kalha thil tha lo hmuingîl anga lang hian Pathian chu awm ta lo a lantîr thei a. Sâm nihphung dik, mak bawk sî chu, Pathian chu ngâwi reng anga a lan laia Sâm-phuahtûte chhân lêtna tawngtaina hmanga târ lan chu a ni. Tawngkam dang chuan, Pathian chu awm ta lo anga lang Pathian chênchilhna Sâm– phuahtûte chhân lêtna a ni.

Sunday                                                                  January 28

Ni Thalote Chu

Chhiar tûr: Sâm 74:18–22 leh Sâm 79:5–13. Heta thil hlauhthâwnawm chu eng nge ni?

    Sâm-phuahtuin Pathian leh sual thiltihtheihna inkâra indona ropui kal mêk manthiam dân a zawng a, Pathian dawhtheihna hriatphâk ruâl loh leh, A finna leh thiltihtheihna chin nei lo chu a târ lang a.

    Sâm-a sual vânga harsatna hi, Pathian thu zirna a ni ber a, Pathian chungchânga zawhnate a ni ber. Tichuan, Jerusalem leh tempul tihchhiatna pawh kha, sâkhaw dangte tâna Pathian sawichhiatna remchâng thlentu a nih avângin chunglam chêt fuh lohna a ni. Pathian roluah (Israel mîte) kha A chunglam thlan nihna leh a thuthlung (Deut. 4:32–38; Deut. 32:8, 9) thlâwn ngai lo tûr chhinchhiahna a ni. Pathian roluah nihna thû hian tâwpna-hun pawh a kâwk tel a, engtikah emaw chuan hnam zawng zawngte pawh hi Pathian roluahte niin, A rawng an la bâwl dâwn a. Hnamten Pathian roluah chu rûna ngaihna chuan hêng chunglam thutiâmte hi an tiderthâwng a ni.

    Mîte sualnain Pathian leh mîte thuthlunga an inlaichînna chu tikhaw lo vin, a nghawng tha lo zawng zawng chu mîte chungah a thleng tih hi Sâm-phuahtu chuan a pawm a (Sâm 79:8, 9). Mîte dam khawchhuahna tûr pawh chu Pathian khawngaihna lo chêtna leh, thuthlung thutiâm anga sual hrênga tâng chhanchhuahna chiah chu a ni. LALPA chu “Kan chhandamna Pathian,” a ni a, Pathian rinawmna chu A thuthlung thutiâmte hmangin a târ lang a (Sâm 79:9).

    Chuti chungin, Israelte hamthatna dinthar lehna âia pawimawh zâwk chu hê khawvêla Pathian nungchang humhim hi a ni (Sâm 79:9). Hnamte sualna thiltihte hi hrem a nih loh chuan, Pathian chuan A thuneihna hloh ta angin a lang dâwn a (Sâm 74:18–23; Sâm 83:16–18; Sâm 106:47). Pathianin A mîte A chhanhim chauhin, A hming chu thiamchantîr leh châwisân a ni thei ang.

   Tûnlai ang tho vin, hmânlai pawh khân chutiang tho chu a lo ni tawh a. Kan sualna te, kan hnungtawlhna te, kan khawlohna te hian kan chunga hmingchhiatna chauh ni lo, chû âi pawha tha lo zâwk, a hming kan châwi Pathian pawh a ti hmingchhia a ni. Thil dik lo kan tihte hian thuhretûa kan tanna leh rawngbâwlnaahte pawh thlarau lam thilah nghawng tha lo a nei thîn a. Kristâ hming chhâltute thiltih avâng hian mî eng zâtin nge kan rinna hi bânsan tawh le?

“Pathian châwimâwina, Kristâ châwimâwina chu A mîte nungchang siam famkimna tûrah hian a tel ngei tûr a ni.”— Ellen G. White, Chatuan Nghahfâk, p. 757. Engtin nge hê thutak pawimawh tak hi i manthiam dân ni a, nangmâ Kristian nunah eng awmze nei tûr nge ni ang?   

THAWHTANNΠ                                                                          January 29

Thihna Kawngkâ-ah

Chhiar tûr: Sâm 41:1–4; Sâm 88:3–12; leh Sâm 102:3–5, 11, 23, 24. Eng nuntawng nge hêng chângte hian a sawi? Heta thil sawi lan hi engtiang kawngin nge i sawi theih ang?

    Hêng damlohna leh thihna laka chhanchhuah dîlnate hian Pathian fâte meuh pawh hê khawvêla tawrhna lakah an him bîk vek lo tih a entîr a. Sâm-in a târ lan chu Sâm-phuahtu tawrhna namên lo tak chu a ni. Ani chu chakna nei lo, hnim uâi ang niin, thil a ei thei lo va, thlâna ruâng zalh ang maiin ruâng zînga muttîr a ni a, thiante hmuh mawh, beidawng taka hrehawm tuâr a ni. A vun chu a ruhahte a bet hrâm a ni.

    Sâm tam tak chuan Israelte thuâwih lohna avângin LALPAN buaina an tawh A phal angin an sawi a. Sâm-phuahtu chuan sualin natna a rawn thlen tih a pawm a; tichuan, tihdam nih nân ngaihdamna a sawi chhuak a (Sâm 41:3, 4). Chuti chungin, Sâm thenkhat, Sâm 88 leh Sâm 102 erawh chuan, sualna nei lo Pathian mîten an tuâr chu hriatthiam harsa hlê mah se, thil thleng chu a ni sî tih a pawm thung a ni.

    Sâm 88-ah, Pathian chu Sâm-phuahtû chunga thihna thlentîr tûr anga sawi a ni a (Sâm 88:6–8). Chutih laia kan hriat tûr chu, diâu lo taka mangan thu sawi chhuahte pawh hi, rinna thil tih a ni a; LALPAN A thuneihnain buaina lo thlen A phal a, A fâ thatna tûr chu A dintharsak leh thei tih hi a ni.

    Thlân kotlângah meuh pawh, Sâm-phuahtuin Pathian hmangaih-ngilneihna te, rinawmna te, makna te leh felna te chu a hre reng a (Sâm 88:10–12). Pathian kutthlâk tuâr a ni ang tih inhre reng chungin, Sâm-phuahtu chuan Pathian a chelh tlat a. Tuâr rih mah se, Pathian hmangaihna chu a phat chuâng lo va, Pathian chu a tân chhandamna awm chhun a ni tih a hre reng a ni. Hêng ngenna thûte hian Sâm-phuahtuin tawrhna chauh ni lo, Pathian khawngaihna duhawm a hria tih a entîr a, a pakhat hian pakhat dang chu a dâl ngawt lo a ni.

   A tâwi zâwngin, Pathianin tawrhna thlen A phalna leh A chhanchhuahna hi, A lalna leh thuneihna tâwp târ lanna a ni vê vê a. Pathian chu engkim chunga thuneitu a ni tih hriatna hian beiseina min siamsak a. Kristâ tawrhna ênga Sâm 88-na kan chhiarin, A hmangaihna thûk, mihringte tâna thihna kawngkhâr paltlang A inhuâm hiâl kha kan zah ngawih ngawih thîn a ni.

Kraws chunga Isua leh sual vânga A tawrhna chungchâng kha ngaihtuah la. Keini tawrh zawng âia nasa zâwkin Pathianin Krista-a A lo tawrhna khân, tawrhna leh harsatna hunah ngêi pawh rinna vawng tlat tûrin eng tianga min tanpui tûr nge ni ang?

Thawhlehnî                                                        January 30

Khawnge Pathian?

Chhiar tûr: Sâm 42:1–3; Sâm 63:1; Sâm 69:1–3 leh Sâm 102:1–7. Sâm-phuahtû tâna natna nasa tak thlentu chu eng nge ni?                                                      

    Mimal tawrhna chauh ni lo khawtlânga tawrhna thlengten Sâm-phuahtu ngaihtuahna an tibuâi a, chutih laiin, Pathian chu A chhiahhlawhte harsatnate ngaihsak miah lo angin a lang sî a. Pathian awm lohsan anga ngaihna chu thlalêr ram rova tuihâl huâm huâmna ang leh (Sâm 42:1–3; Sâm 63:1), rilru chauh dêrna a ni (Sâm 102:2–4). Sâm-phuahtu hian Pathian hnên atanga hnawh bo angin a inhria a, sava khawhar tak nên a intehkhin a. “Thlalêr tuivalawng ang ka ni a; khaw ram chhimbuk ang mai ka lo ni. Chawngzawng, in chunga amah chauh va awm ang ka ni,” (Sâm 102:6, 7).

    ‘Thlalêr’ tih hian Pathian laka tihhran a kâwk a. ‘Inchunga amah chauhva awm’ sava chu, a chawlhna hmun, a bu pâwnah a awm thîn. Sâm-phuahtu chuan tui thûk tak chîm leh ‘chirhdûp’ zînga tâng anga inchanin, Pathian chu “tuipui thûk,” atanga chhanchhuak tûrin a âu va (Sâm 69:1– 3; Sâm 130:1). Hêng ngaihruatnate hian chunglam lo chêtna zâr chauha chhanchhuah theih tûr hnehchhiah nihna dinhmun chu a entîr a ni.

Chhiar tûr: Sâm 10:12; Sâm 22:1; Sâm 27:9 leh Sâm 39:12. Engtin nge Sâm-phuahtuin Pathian kalsan nihna chu a chhân lêt?                                                           

    Pathian chu ngâwi hmiah anga a lan lai pawha Sâm– phuahtuten ngawih an tum lo tlat hi thil chhinchhiah tlâk tak a ni. Sâm-phuahtute hian Pathian nung leh khawngaihnaa khat hnêna thû an thlen theih avângin tawngtaina an ring tlat a. Pathian chu awm lo angin lang mah se, A la awm reng a. Ani chu hun kal taa an thu ngaithlatu a ni ang tho khân tûnah pawh A la ngaihthlâksak reng tho a ni tih an ring thei ang.

    Pathian chu ngâwi anga a lannate hian Sâm-phuahtute chu mahnî inenlêtin, inpuânna leh inngaitlâwm taka dîlnate nên Pathian a zawntîr zâwk a. Pathian chu a ngâwi reng dâwn lo tih an hria a. Kan nun dinhmun chu engang pawh ni se, Sâm hian Pathian nêna inbiakna chu a kal zêl tûr a ni tih a târ lang a ni.

Pathian kalsan nihna anga lang Sâm-phuahtuin a chhân lêtna atangin eng nge kan zir chhuah theih ang? Pathian chu ngâwi reng anga a lan chângin engtin nge i chhân lêt thin? I rinna vawng nungtu chu eng nge ni?                      

Nilâinî                                                                  January 31

Chatuanin A Thutiam A Tlawlh Tawh Em?

Chhiar tûr: Sâm 77. A ziaktu hian eng nuntawng nge a paltlang?

    Sâm 77 hi tanpui tûra Pathian ngenna thûin bultan a ni a, tah hlâ leh rilru na tak chunga hun kal ta hriat rengnain a khat a ni (Sâm 77:1–6). Sâm-phuahtû dinhmun hi mangang tak chunga Pathian lam hawina hlîr a ni. Pathian atanga chhuak thlamuânna chauh lo chu thlamuânna dang rêng a duh lo a ni. Chuti chungin, Pathian a hriat rengna chuan a rilru nâ tizual angin a lang a. “Pathian ka hre reng a, ka rûm thîn” (Sâm 77:3, ESV). Hebrai twnga hamah, “rûm,” tih hian tuifâwn ri hum hum a kâwk thîn a (Sâm 46:3). Chutiangin, Sâm-phuahtu taksa pum pawh a châwl hlei thei lo a ni.

    Engtin nge Pathian hriat rengna chuan chutiang rilru hrehawm tak chu a puttîr theih ni ang le? A rilru mangan chhan zawhna chhân mai harsa tak a indawt chho zut mai (Sâm 77:7–9): Pathian a danglam ta em ni? Pathianin A thuthlung a phat ta mai em ni dâwn?

    Hun kal taa Pathian chhandamna thiltihte leh, tûna Pathian awm ta lo anga lang thil inla hlei tak avâng hian Sâm-phuahtuin Pathianin A kalsan ta angin a inngaihphah a. Pathian chu danglam ta ni se chuan, Sâm-phuahtu hian a rilrûa hnar a tum ngar ngar angin, beisei tûr rêng a nei lo a ni ang.

    Chutih laiin, Sâm-phuahtu chu a muhîl thei lo, a chhan chu LALPAN chutianga A awmtîr vâng a ni (Sâm 77:4). Hei hian Bible-a mi dangte, an muthilh theih loh vânga Pathianin A thil ruâhmante puân chhuah nâna A hman min hriattîr a (Gen. 41:1″8; Estheri 6:1; Dan. 2:1″3). Zân rei tak thlenga a muthilh theih loh zârah, Sâm-phuahtuin hun kal ta a LALPÂ chhanchhuahna thiltihte a ngaihtuah a, rilru thar a put phah ta zâwk a ni (Sâm 77:5, 10).

    Pathian hnên atanga Sâm-phuahtuin rinngamna a dawnah hian, amâ dinhmun sawifiahna a tel lo va; Pathian rinawmna leh innghahngamna A nihzia tihchianna a ni zâwk (Joba ang khân). Sâm-phuahtu chu LALPA nghâk fan fan tûra fuih phûr a ni a, chû chu Pathian chu Israelte hun kal taa thilmakte titu A ni thîn ang khân A la pângngai reng tih a ni (Sâm 77:11–18). Sâm-phuahtu-in a hriat chian tâk chu “I hniâkte chu hriat theih loh a ni lo,” (Sâm 77:19, NKJV), mihring mita Pathian chênchilhna hmuh theih loh a nih lai pawhin, Pathian kaihhruai nih a inhre ta a ni. Sâm-phuahtu hian Pathian chu a inpuânchhuah ruâlin, A inthup bawk tih a pawm a, tichuan, LALPÂ kawngte makna leh thuneihna chu a fak ta zâwk a ni.

Hun kal taa LALPAN nangmâ nuna A thawhsak che kha ngaihtuah la. Engtin nge chû thutak chuan tûna harsatna i hmachhawn mêk chingfel tûra a tanpui che?

Ningânî                                                                 February 1

Mi Felte Thlêm An Nih Loh Nân

Chhiar tûr: Sâm 37:1, 8; Sâm 49:5–7; Sâm 94:3–7; leh Sâm 125:3. Eng harsatna nge Sâm-phuahtuin a hmachhawn?                                                   

   Hêng Sâm-te hian tûna mi suaksualte hmuingîlna leh, chû thilin mi felte tâna harsatna a thlen sî chu a tahpui a ni ber a. Mi suaksualte chu an hmuingîl pawh a ni ngawt lo va, Pathian hmusitin, mi dangte an la hnehchhiah zui a. Thil ngaihthiam har chu, “mi suaksualte laltiang” (Sâm 125:3, NKJV) chu khawvêla a dinchan laiin, “mi felte laltiang” (Sâm 45:6, NKJV) chu tlawlh angin a lang sî hi a ni. Chuti chu, engah nge mi dangte tih dân anga thil tha lo chu kan pawm vê mai loh ang ni?

Chhiar tûr: Sâm 73:1–20, 27. Eng thilin nge Sâm-phuahtu chu harsatna paltlangtîr thîn? Thil eng mah lo mai rinchhantûte tâwpna tûr chu eng nge ni? (en tel tûr, 1 Petera 1:17.)

    Sâm-phuahtuin Sâm 73-a khawvêla bawhchhiatna a ngaihtuahin, zâu zâwka Pathian thil thlîr dân chu a hmu thei sî lo va. Suahsualna hmuingîlnain a rinnaa harsatna a thlen chu a namên lo êm êm a; a rin tel bawk chu, rinna tlâktlâi lohzia chu thil lan dân hian a nemnghet bawk sî hi a ni.

    Chutih laiin, Sâm 73 hian “hêng thilte hian hê Sâm châng hmasa, hê Sâm pum pui khâikhâwmtu: ‘Thinlunga mi ngîlte chungah chuan Israelte Pathian chu a lo tha ngêi mai!” tih hlamchhiahtûte chu a nuihzat a.”—Johannes Bugenhagen, Reformation Commentary on Scripture (Downers Grove, IL: InterVarsity Press, 2018), p. 11.

    Sâm-phuahtu chu, Pathian chungnung rorêlna hmun, biak bûka hruai niin, chuta tang chuan “vawiin” hi thil cheimâwi lianpui pêng khat ang lek a ni a, ani chuan “tâwpna” huna mi suaksualten Pathian hremna an la hmachhawn hun tûr chu a thlîr zâwk tûr a ni tih a hre ta a ni. Sâm-phuahtu chuan hê thutak hi biak bûkah chuan hrethiamin, a hmâa a lo âtna atang khân mihring ngaihtuahna atang ni lo, thlarau lam hriatna atanga thil nihna tak hriat theih a ni tih chu a manthiam ta a ni.

Engtin nge khawvêl chungah leh thil tha lo zawng zawng chunga Pathian rorêlna lo thleng tûr thutiâmin, tûna thil tha lo a thleng nasa hlê chungin, thlamuânna a neihtîr che?

Zirtâwpnî                                                            February 2

Zir Belhna: Chhiar tûr: Sâm 56; Ellen G. White-i lehkhabu,

Krista Panna Kâilâwn-a”LALPA-a Lâwmna,” pp. 103–113.

    Sâm-phuahtute ang khân, engtik hun lai pawha Pathian mîten ‘mî rama’ LALPÂ hlâ sak chungchâng hi an manthiam lo fo thîn a. LALPÂ thuneihnaa rorêlna kan rinna hian chona a hmachhawn a, Pathianin engkim chungah ro A rêl meuh em kan ti emaw, Lehkhathu sawi anga thiltithei leh thâ a ni tiin kan pawm zâwk emaw a ni ang.

    Bible sawi ang rinna hi chuan thil chiang lo leh ngaihngam chiah lohna ang chî leh rinngamna leh nghehna pawh a kâwk thei. Eng emaw thil tha lo tawn chânga, Pathian pawh hnâi lo anga ngaih chângte chuan, chiang lo leh ngaihngam lo taka awmin, tawrh zawh ruâl loh angte pawh a ni thei. Chuti chungin, chian lohna erawh chu Pathian chungchâng a ni tûr a ni lo; A hmangaihna leh felna nungchang chu rinchhan ngam a ni reng sî a. Sâm-phuahtute chu hmalam hun chungchângah an chiang lo vê thei a, mahse Pathian rinawmna leh hmangaihna thlâwn ngai lo chu chang tûrin an ngên thîn (Sâm 36:5–10; Sâm 89:2, 8).

   Chutiangin, keini pawhin an tih dân chu kan zui thei. “Chunglam thlîr tûrin i theihna zawng zawng sâwm khâwm la, hnuai lama harsatnate chu thlîr suh ang che; tichuan i kal zêl laiin i châu ngai lo vang. Chhûm piah lama nangmah tanpui tûra A bân lo phar chhuak, Isua chu i hmu thuai ang a; chuta i tih tûr zawng chu, rinna tluâng nêna A kut inchelhtîr a, Amah chu inhruaitîr a ni. Rinna zâra Isua rinchhan tlattu i lo nih chuan, beiseinaa khat i lo ni ang.”—Ellen G. White, Testimonies for the Church, vol. 5, pp. 578, 579.

    Pathianin ‘A hmêl A thup’ anga a lan lai pawhin tawngtai tangkaina hi ngainêp suh ang che. Chutiang lo thleng chuan Sâm-phuahtute chu mahni-inenlêtna neihtîrin, hun kal ta a Pathian chhanchhuahna thiltihte ngaihtuahin, inpuânna leh inngaitlâwm taka dîlnate nên Pathian an zawn phah thîn (Sâm 77:10–12; Sâm 89:46–52).

    “Buaina leh rinhlelhna te, dodâlna te kârah hian rinna chu a chakin a thang duang zâwk zêl a. Hetiang hun leh hmuna tawnhriat pawimawh tak takte hi incheina manto tak tak âi pawhin a hlu zâwk fê a ni.”—Ellen G. White, Testimonies for the Church, vol. 3, p. 639.

Sawi Ho Tûr:

@Sâm-phuahtuten thil thalote hmachhawnin eng harsatnate nge an tawh? Eng harsatnate nge i lo hmachhawn vê a, engtin nge i chinfel tâk? Chutiang hunah chuan engtin nge rinna i vawn nun thin?

@Harsatnate emaw, Pathian thatna leh thiltihtheihna ringhleltute hmang emawa Pathian kan rinna fiaha a awm chângin, a chhânna khawiah nge kan zawn ang?

@Hmangaih-Pathian, engkimtitheiin A siam leh enkawl khawvêla thil tha lo chungchânga zawhna tlânglâwn awm hi engtin nge i chhân thin? Engtin nge hê chona hi Indona Ropui hmanga eng emaw chen chu chhân fel theih a nih?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †