Zirlai-7 2024 1st Quarter

Zirlai 7                                                February 10–16, 2024

I ZAHNGAIHNAIN VÂNTE A TAWNG

CHÂNGVAWN: “Aw LALPA, mipui zîngahte ka fak ang che; hnamte zîngah nangmah fakin ka zai ang. I zahngaihna chuan vân a tawng sî a, I thutak chuan chhûmte a tawng a,” (Sâm 57:9, 10, NKJV).

Sabbath Chawhnû                                             February 10

Chhiar Tûr: Sâm 136; Sâm 51; Sâm 130; Sâm 113; Sâm 123.

    THLARAU lama rethei leh Pathian hnêna hlan tûr thil tha nei lo an ni tih Sâm-phuahtuten an inhria a; chu chu, Pathian lalthutphah thianghlim hmâa chhuân tûr eng mah anmahnia an ni lo tih an inhria tihna a ni (Sâm 40:17). Keimahni ang thova khawngaihna, Pathian khawngaihna chu mamawhtu an ni tih an inhrethiam a ni.

    A tâwi zâwngin, chanchin tha mamawhtu an ni.

    Sâm hian mîte hi Pathian zahngaihna rinchhan mai an ni tih uâr takin a sawi a. Vânneih thlâk takin, Pathian zahngaihna chu chatuan daih, Thilsiamna leh Pathian mîte chanchin kal ta hmanga finfiah tawh a ni (Sâm 136). Chatuan Pathian hmâah chuan, mihring nunna hi hlobet vuâi leh mai thîn ang lek a ni a, Pathian chuan mihringte hi khawngaihin, an chakna A tihtharsak leh thîn a (Sâm 103:3, 5, 15); Amahah chuan chatuan thutiâm an nei a ni.

    LALPA chu A thuthlunga A rinawmna hi Pathian mîten an thlamuânpui a. Eng ang harsatna hnuaiah pawh ni se, mîte ngenna chu khawngaihnaa khat an Pa vâna mî hnêna thlen a nih avângin, beiseinain a khat a (Sâm 103:13; Sâm 68:5; Sâm 89:26) . Thil dang zawng âiin, Pathian khawngaihna leh hmangaihna chan tharna chuan, Pathian chibaibûk leh A rawngbâwl tûrin chakna a neihtîr leh thîn.

Sunday                                                                February 11

A Zahngaihna Chatuanin A Awm Reng

Chhiar tûr: Sâm 136. Eng ngaihtuahnain nge hê Sâm hi luah ber le? Hê Sâm phuahtu hian a thil beisei chu a awm ngêi tih finfiahna khawiah nge a neih?

    Sâm 136 hian Pathian mîte chu thilsiamah leh Israelte chanchina (Sâm 136:10–22) lo lang A zahngaihna (Sâm 136:4– 9) avânga LALPA chu fak tûrin a ko va. “Zahngaihna” (Hebrai khesed, “hmangaihna ding nghet”) tihte hian A thilsiam chunga Pathian thatna leh Israelte nêna A thuthlung chunga rinawmna a entîr a. Sâm hian Pathian thiltihtheihna namên lo tak leh ropuinate chu A hmangaihna ding ngheta innghat a ni tih a târ lang.

    LALPA chu “pathiante Pathian” leh “hotûte LALPA,” Hebrai tawngkâuchheh a “Pathian ropui ber” chu a ni a (Sâm 136:1– 3), Amah chauh lo chu Pathian dang rêng an awm hek lo.

    LALPÂ thilmak ropuite chu, tû mahin a lem pawh an chang thei lo va, chû chu A lalzia târ lanna phat ruâl loh chu a ni (Sâm 136:4). Pathianin vânte leh lei bâkah, vân lama thil awm zawng zawng, ringloten chibai an bûk thinte chu A siam a (Deut. 4:19). Sâm erawh chuan ringlote pathiante leh mihring-behchhan rinngamna leh thuneihnate chu a chapchâr a. Thilsiam atanga siam leh chhâwn maite an ni. Anni chu thilsiam lekfang niin—Siamtu pawh a ni vê lo, an va inthlâu êm!

    LALPÂ kut chak tak leh bân phar chhuak (Sâm 136:12) tih hi Pathian thiltihtheihzia leh A zahngaihna thuneihna nghawng thuizia târ lanna a ni.

    Thilsiamna leh khawvêl hun kal taa Pathian zahngaihna khân, A mîte chu Amah rinchhan tûr leh, A thuthlung chunga rinawm zêl tûrin a chawkphûr tûr a ni. Sâm-a vawi 26 lai sawi nawn, “A zahngaihna/ngilneihna chu kumkhuâin a awm dâwn sî a,” tih hian Amah chibaibûktûte hnênah LALPA chu a danglam vê ngai lo va, chhuân tharte chungah pawh A duhsakna chu A lantîr zêl ang tih rinngamna a neihtîr a. Pathianin A mîte a hre reng a (Sâm 136:23), A khawngaihna thuthlung chungah pawh a rinawm. Bible rinna innghahna laimû chu LALPÂ zahngaihna danglam lo rinnaah a ni a, chutah chuan hlim taka chibaibûkna bâkah, inchhîrna leh simna nêna Amah rinngamna a tel a ni.

    Sâm 136 (châng 23–25) hi Pathianin khawvêl pum A enkawlna thu hmanga khâr a ni a. Pathian zahngaihna chu Israelte tân chauh ni lo, thilsiam zawng zawng huâp zo a ni. Sâm hian Pathian khawngaihnaa chhandamna chu khawvêl pum huâp a nih thû a sawi a; khawvêl pum pui chu Israelten LALPA an fakna chu zawm vê tûrin a sâwm nghâl a ni (en tel tûr, Luka 2:10; Johana 3:16; Tirhkohte 15:17).

Engtin nge kraws chunga kan sualte Phurtu ni chunga Isuâ thi lai hmêl kha, Pathian nihna târ langtu thutak thiltithei ber, “A hmangaihna chu chatuanin a awm reng” tih entîrtu a nih?

ThawhTannî                                                      February 12

Keimahah Thinlung Thianghlim Siam La

Chhiar tûr: Sâm 51:1–5. Engati nge Sâm phuahtuin Pathian zahngaihna chu a ngen?

    Lal Davidan LALPÂ hmâah a thinlung bun ruâkin, amâ nuna thlarau lama hun thim lai bera sual ngaihdamna a dîl a (2 Samuela 12). Ngaihdamna hi Pathian khawngaihna thilthlâwnpêk chungchuâng niin, “I zahngaihna duhawm tling khâwm” (Sâm 51:1, NKJV) zâra lo thleng a ni. Lal Davidan a sualnain a phû ang ni lo va (Sâm 103:10), A zahngaihna, rinawmna leh lainatna (Sâm 51:1; Exod. 34:6, 7) ang zâwka chinfelsak tûrin Pathian a ngên a.

Chhiar tûr: Sâm 51:6–19. Engtin nge sual ngaihdamna chu hetah hian târ lan a nih? Pathian ngaihdamnain a tum tak chu eng nge ni?

    Pathian ngaihdamnaah hian dân anga sual nei lo tia puân bâk thil dang a awm a. Mihring chhûngril nihna thlenga danglamna tak a thlen a (Sâm 51:6; Heb. 4:12). Chû chuan thilsiam thar nihna a thlen thîn (Sâm 51:10; Johana 3:3–8). Hebrai tawnga thil tih sawina bara’, “siam,” tih hian thilsiam tûra Pathian thiltihtheihna a târ lang a (Gen. 1:1). Pathian chauhin a ‘bara’ (siam) thei a; Pathian chauhin sual simtû thinlungah danglamna tlo chu A thlen thei bawk (2 Korin 4:6). Davidan hussop hmanga tihthianghlim a ngên a (Lev. 14:2–8; Sâm 51:7). A bawhchhiatnain LALPÂ hnên hnaih theihna dâl tlatin a hria a; chutiangin phâr hri veite pawh, chû natna an vei chhûng chuan mi dangte zînga an awm thei lo thîn a ni (Sâm 51:11). Inthâwinate hmangin dinhmun ngai luahtîr theih a ni lo vang tih a hlâu va, a chhan chu inthâwinain tûna a bawhchhiatna sual, uirêna leh tuâlthahna hi chu a tlêng fâi thei lo a ni (Exod. 21:14; Lev. 20:10).

    Chunglam khawngaihna chinnei lo chauh chuan Davidâ “thinlung lungchhia leh inchhîrna chu pawmin, Pathian nêna inremna dintharsak tûra inthâwina a pawmsak thei a ni (Sâm 51:16, 17). Pathian chênna hmuna kîr leh dûhin hussop hmanga tihthianghlimna a dîl a ni.

Pathianin Davidâ uirêna te, bumna leh tuâlthahna te A ngaidam thei a nih chuan, eng beiseina nge i tân awm vê le?

Thawhlehnî                                                      February 13

LALPA, Khawlohnate I Chhinchhiah Chuan….

Chhiar tûr: Sâm 130. Engtin nge sual pawizia leh mi sualte tâna beiseina chu târ lan a nih?

    Sâm-phuahtû tawrhna râpthlâk tak kha amah leh a mîte sualnate vâng a ni a (Sâm 130:3, 8). Mîte sualnate chu a nasat êm avângin kumkhuâa Pathian nêna inmihran theihna tûr a ni (Sâm 130:3). Bible-ah hian Rorêlna Nî thlenga sualnate vawn a nih tûr sawina a awm a (Dan. 7:10; Thup. 20:12) mi sualte hming pawh chu Nunna Bû atanga thâi bo a ni bawk (Exod. 32:32; Sâm 69:28; Thup. 13:8).

    Sâm-phuahtuin Pathian ngaihdamna a dîl a, chû chuan sualte chhinchhiaha awm chu a nuâi bo dâwn a ni (Sâm 51:1, 9; Jer. 31:34; Mika 7:19). Ani chuan ‘Pathian chu Amâ nihphung rênga thinrim a ni lo’ tih a hria a. A hmangaihna chu chatuan daih a ni. A ‘thinrim’ chhan pawh mihringten A hmangaihna an ngaihhlut loh thin vâng chauh a ni.  A thinrimna pawh chu tihnat nân ni lo vin, tihdam an nih zâwk nân a ni a; tiboral tûr ni lo, A thuthlung mîte chhandam tûr zâwkin a ni (en tûr, Hos. 6:1, 2).”—Hans K. LaRondelle, Deliverance in the Sâms (Berrien Springs, MI: First Impressions, 1983), pp. 180, 181.

    Thil chhinchhiah tlâk tak chu, Pathian chu sualte hrem tûr ni lo, ngaidam tûra inpeih sâ a nihna hi a ni a; chû chuan Pathian zahna a chawktho thîn a ni (Sâm 130:4; Rome 2:4). Chibaibûkna dik tak chu hrem hlauhna atang ni lo vin, Pathian hmangaihna nungchang ngaihsânna atanga lo chhuak a ni.

    Pathian fâte chu LALPA nghâk tûra koh an ni a (Sâm 27:14; Sâm 37:34). Hebrai tawng qawah, “nghâk,” tih awmzia tak chu “phar chhuak” tihna niin, Hebrai tawnga a tobul chu ‘beisei’ tihna a ni. Chutiangin LALPA nghâk tih pawh chu dinhmun châu taka tlâwma eng mah ti lo lam ni lo vin, LALPÂ lo chêtna tûr thlîr lâwka beisei chunga ‘phar chhuak’ a ni zâwk. Sâm-phuahtû beiseina hi mimal beiseinaa innghat ni lo vin, Pathian Thûa innghat a ni (Sâm 130:5). Rinawm taka LALPA lo nghah chu a thlâwn ngai lo, a chhan chu zân thim hnûa zînga chunglam chhanchhuahna lo thleng ang a nih vâng a ni.

    Sâm-phuahtû mimal ngenna, mipui huâp lo ni ta hi ngaihtuah la (Sâm 130:7, 8). Mimal tâna hamthatna leh mipui tâna hamthatna hi then hran tak tak theih a ni lo. Chutiangin, mimal tân ngawta tawngtai lo vin, mipuite tâna dîlsak a ni zâwk thîn. Ringtûte kan ni a, khawtlâng mipui pêng khat kan ni a, mipuia nghawng nei thil chuan mi tin a nghawng thîn.

Hê zawhna hi ngaihtuah teh, “LALPA, nangin khawlohnate i chhinchhiah chuan, … tu nge ding ang le?” (Sâm 130:3). Chû chuan i tân eng awmzia nge a neih? LALPAN i bawhchhiatnate chhinchhiah ta se, khawiah nge i awm ang le?

Nilâinî                                                                February 14

Pathian Ropui leh Zahngaithei Chu Fak Rawh

Chhiar tûr: Sâm 113 leh 123. Hêng Sâm-ahte hian Pathian nungchang ze pahnih inang lo a târ lan chu engte nge ni?

    Sâm 113 leh 123 hian LALPÂ ropuina leh zahngaihna a fak vê vê a. LALPÂ ropuina chu A hming ropuina leh A lalthutthlêng châwisan hmun, chû chu hnam zawng zawngte leh vânte chung lama târ lan a ni (Sâm 113:4, 5; Sâm 123:1). “LALPA kan Pathian ang tu nge awm?” (Sâm 113:5, NKJV) tih hi khawvêl chhûng leh pâwn thlenga Israelte Pathian cho thei an awm lo tih rinna thû a ni.

    LALPA chênnate chu hnaih phâk ruâl loha hmun sânga awm a nihzia chu, LALPA chu “Mahni intitlâwm” leh, “Chung lama thutphah neia, vâna thil awmte leh leia thil awmte en tûra intihnuai thîn,” (Sâm 113:6) tih hian a tichiang. Pathian chu vân sâng taka awm a nihna hian hê leia thil awmte A hmuhna tûr a dâl chuâng lo. LALPÂ zahngaihna chu lainatna nêna khawvêla lo che tûr leh, buaina laka tlachham leh retheite chhan chhuak tûra inpeih sa a nihna hian a târ lang a. A chênna hmun chu vân sâng hla taka awm ni mah se, A kut thilphal tak chu A chhiahhlawhte laka thup a ni chuâng lo.

    Pathian ropuina leh enkawlna chu A rawn inphahhnuaina mak tak hmang pawha hriat vek sên ni lo mah se, A zahngaihna leh khawngaihna thiltihte atanga chiang taka lantîr a ni. Tlachham, rethei leh hnehchhiah tuârten Pathian lalna thiltihtheihzia chu anmahni duhsaka thil A tihsakna atangin an chang thei a. Châwisâna awm Pathianin A ropuina chu hnuaichhiah tuârte A châwisânna hmanga lantîr a ni thîn. Ani chu an tâna Siamtu leh Tungnungtu ni a, mîte chu A chhiahhlawhte leh A hmangaih fâte an nih avângin, mîten zalên takin LALPÂ hnên an pan thei. A ropui chungchuânna leh thuneihna chu a danglam vê ngai sî lo va.

    Chibaibûkna hi Pathian ropuina chauh ni lo, A thatna pawhin a cho chhuah a ni. Fakna hi kumkhuâ leh chatuan thlenga kal zêl tûr a ni (Sâm 113:2, 3). Pathian ropuina leh zahngaihna chu, mihring tlu tâte châwisâng tûra vân atanga rawn intitlâwm a, krawsa thihna thleng hiâla lo chhuk, Isua Krista hmanga ropui taka târ lan a ni a (Filipi 2:6–8). Kraws- ah ngêi chuan, kan tâna thil min tihsak tâk vânga Pathian chibaibûk leh fak tûr kan nih chhan ropui ber chu kan nei a ni.

Kraws leh chuta thil thlengahte khân châm zui rih la. Eng thil lakah nge Isuan A chhandam che? Engati nge i rilrûa kraws vawn reng chu nangmâ tâna thil pawimawh ber a nih?

Ningânî                                                               February 15

A Malsâwmna Zawng Zawngte Theihnghilh Suh

Chhiar tûr: Sâm 103. Hetah hian Pathian zahngaihna chu eng tianga târ lan nge ni?

    Sâm 103 hian LALPÂ malsâwmna thuah tam tak a sawi a. Chûng malsâwmnate zîngah chuan nun hmuingîl nâna (Sâm 103:3″6) “a thil tih that zawng zawngte” (Sâm 103:2) pawh a tel a. Hêng malsâwmnate hi Pathian nungchang khawngaihnaa khat leh Israelte nêna A thuthlung chunga A rinawmnaa innghat a ni (Sâm 103:7–18). LALPAN mihringte chu derthâwng leh rawih chhe hmâ tak an ni tih A “hriat reng” avângin A mîte chu A khawngaih a (Sâm 103:13–17).

    Hre reng tih hi ‘hre satliah’ bâk deuh niin, inpêkna tela chêtna a ni: Pathianin A mîte chhanchhuakin A châwm zui a (Sâm 103:3–13). Sâm 103:11–16 ngaihruatna thiltithei tak hian Pathian khawngaihna tehsên ruâl loh chu a târ lang a, chû chu chin nei lo va vân zâuziâ nên tehkhin a ni (Isa. 55:9).

    Chuti chu, Pathian hmangaih-ngilneihna chu engtin nge mihringten an chhân tâk ang le?

    Pakhatnaah, LALPA chu malsâwmin a ni (Sâm 103:1, 2).

    Malsâwm tih hi a tlângpui thûin mî tû emaw chunga thlarau lam leh tîsa thil lama duhsakna/hlâwkna intêltîr a ni (Gen. 49:25; Sâm 5:12). Pathian chu malsâwmna zawng zawng Hnâr a nih avângin, engtin nge mihringin Pathian chu mal a sâwm tâk ang? A hnuaihnung zâwkin a ropui zâwk mal a sâwm theih dân chu lâwmthu sawi emaw, amah fakin emaw a ni (1 Lalte 8:66; Joba 29:13). Pathianin mîte chu an chunga thil tha tihsaknain mal A sâwm thîn a, mîten Pathian mal an sâwm dân chu Amaha thil tha awmte fakna hmangin Pathian chu mal an sâwm lêt a, A khawngaihna nungchang zahna hmang pawhin a ni bawk.

    Pahnihna, A thuthlung leh A hnên atanga thil tihthat zawng zawngte hre rengin a ni (Sâm 103:2, 18–22). LALPA pawhin mihring dinhmun chak lo tak leh, A mîte nêna A thuthlung chu A hre reng thîn a ni (Sâm 103:3–13). Hriat reng hi Pathian leh A mîte inlaichînnaa thil pawimawh tak a ni. Mîte hnêna A thutiamte Pathianin A hre reng ang khân, mipuite pawhin Pathian rinawmna chu hre rengin, hmangaihna leh thuâwihnain Pathian chu an chhâng lêt vê tûr a ni.

    Hei hi rilrûa vawng chungin, hê Ellen G. White-i thusawi hmingthang tak nên hian a inhmeh viâu mai: “Nî tina dârkâr khat tal Kristâ nun chanchin, chîk taka ngaihtuahna neih thin kan tân a thâ. A nuna thil thlengte kha, kan suangtuah theihna hmanga man thiam ngei tûrin, a mal malin a indawt tê têin, beng sikin ngaihtuah lêt thîn ila; a hun hnuhnung lam lek phei kha chu urhsûn lehzualin i chhût chet chet thîn ang u. Chutiang taka, a inhlanna ropui takah khân kan chên thin chuan, Amah kan rinna a nghet zual ang a, kan hmangaihna a nung tha zâwk ang a, a Thlarau malsâwmna pawh kan dawng hnem zâwk bawk ang. A tâwpa chhandam nih kan duh takzet chuan, inchhîrna neia kraws bula inphah hniam kan zir tûr a ni.”— Chatuan Nghahfâk, p. 78.

Zirtâwpnî                                                          February 16

Zir Belhna: Chhiar tûr: Ellen G. White lehkhabu, Krista Panna Kâilâwn-a”Misualin Krista a Mamawhzia,” pp. 14–19.

    Sâm-ah hian, Pathian chatuan hmangaihna lawm nân, Pathian mîte âw chuan hê thû hi an sawi nawn tlâng thîn “A ngilneihna/zahngaihna chu kumkhuâin a awm dâwn sî a” tiin (Sâm 106:1, NKJV; Sâm 107:1, NKJV; Sâm 118:1–4, 29, NKJV; Sâm 136, NKJV). “Pathian fak LO tih chu A malsâwmna zawng zawng theihnghilh a, Pathian thilthlâwn pêkte ngaihlu lo tihna a ni ang. Faktûte chauhin an theihnghilh vê lo. Pathian chungchâng ngaihtuah leh sawi chhuah mai hian Amah chu a la fak chuâng lo. Fakna intanna chu mîin Pathian ropuizia leh thiltihte pawm a, A thatna te, zahngaihna leh finna te châwisânga an chhân lêt hian a ni.”—Hans LaRondelle, Deliverance in the Psalms, p. 178. Pathian zahngaihna tâwp lo khûn taka puân chhuah pawimawhna chuan thil duhawm zâwk min la têltîr a; Pathian khesed—chû chu thuthlunga a hmangaih-ngilneihna leh rinawmna kan hriat rengin, Pathian laka helna leh mihringte sualna kârah pawh a ding nghet tlat thîn a ni.

    “Amah dovin thil sualte kan ti tawh thîn a, A duhsakna dawng tlâk kan ni rêng rêng lo; mahse, kan kâahte hian hêng ngenna ropui takte hi min dahsak sî thîn: ‘I hming avângin min hmusit suh la, i lalthutthlêng ropui tihminghliâu suh la, kan hnêna i thuthlung hre rengin bawh bo suh ang che,” (Jeremia 14:21) tih te hi. Kan sualte leh kan tlin lohnate puânga A hnêna kan kalin, kan auhna min ngaih pawimawhsak dâwn tih thutiam min pê a, kan hnêna A thu hlen famkim nân A lalthutthlêng zahawm chu a hmachhuan thîn.”—Ellen G. White, Kristâ Tehkhin Thûte, p. 116.

    Amâ chunga Pathian ngilneihna lo thleng (Sâm 103:2) chuan Sâm-phuahtu chu hetianga sawi chhuak tûrin a fuih phûr a, “LALPA chuan, hnehchhiahna tuâr zawng zawngte tân thil felte tihsakin, rote a rêlsak thîn,” tiin (Sâm 103:6). Tichuan, Sâm-phuahtu mimal hriattîrna leh a nuna Pathian zahngaihna faknain a tum ber chu, mi dangte hnêna Pathian hmangaih-ngilneihna hriat thartîr leh niin, chû chuan A khawngaihnaa chhandamna dawng tûra thinlungte Pathian lama hawngin, Pathian an fakna tûr chu a ni (Sâm 9:11, 12; Sâm 22:22–27; Sâm 66:16).

Sawi Ho Tûr:

@Mîte chhandam nâna Pathian zahngaihna chatuan daih nihna chuan eng pawimawhna tak nge a neih? Engvângin nge hei hian chatuana Pathian zahngaihna avânga sual zui zêl theih a ni tih a kawh loh?

@Pathianin kan sualte A ngaihdamna leh sual chunga rorêlna A la neih tûr chu engtin nge kan sawi rem tâk ang?

@Engtin nge Thuthlung Thar lama Pathian zahngaihna sawi chhuahnate (Efesi 2:4, 5; 1 Tim. 1:16; Tita 3:5; Heb. 4:16) leh Sâm-a sawi dân hi a inrem?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †