Zirlai-12 2024 1st Quarter

Zirlai 12                                                  March 16–22, 2024

CHIBAIBÛKNA TÂWP LO

CHÂNGVAWN: “Ka dam chhûng zawngin LALPA châwi- mâwiin hlâ ka sâ ang a; ka nun chhûng zawngin ka Pathian fakin ka zai ang,” (Sâm 104:33).

Sabbath Chawhnû                                                March 16

Chhiar Tûr: Sâm 15; Sâm 96; Sâm 101:1–3; Sâm 134; Isaia 42:10–12; Johana 4:23, 24; Thupuan 14:3, 6–12.

    PATHIAN khawngaihna leh thiltihtheihna a taka kan chan hian a lo pung deuh deuh a, tichuan Sâm-phuahtu chu thuruâlpuiin: “Ka chunga A thiltih that zawng zawng avâng hian LALPA chu eng nge ka pêk vê thung ang?” (Sâm 116:12, NKJV) tiin kan âuchhuak thîn. Chhânna lo thleng ngêi tûr chu mahnî nun rinawm taka Pathian hnêna hlan a ni.

    Sâm-ah hian, Israel chu hnam a ni ngawt lo va, “pungkhâwm nasa tak” pawh a ni bawk (Sâm 22:22, 25, NKJV; Sâm 35:18). Hei hi Israelte chu Pathian fak leh hnam dangte hnêna Amâ chungchâng thuhretûa tang tûra koh an ni tihna a ni, a chhan chu A mîten Amah chibai an bûkna chu khawvêl pum hian zâwm vê sê LALPAN a tih vâng a ni. LALPÂ mîte chu mi fel, LALPA chibaibûk a, Amah leh A hmangaihna beiseitûte an ni.

    Mipui zînga LALPA fak hi chibaibûk dân duhthusâm anga ngaih a ni a. Mimal tawngtai leh fakna chu nêp deuh ta zâwk anga ngaih erawh a ni chuâng lo. Mimalin Pathian chibai a bûkna chuan a huhova chibaibûkna châwmin, fakna a tithar thîn a (Sâm 22:22, 25), chutih ruâlin mimal chibaibûkna sân theih dân ber chu mipui zîngah a ni. A huhova chibaibûkna neitûte chu “Mi dik takte inkhâwmna” (Sâm 111:1) tih a ni a. Mi ngîlten Pathian an hria a (Sâm 36:10) anni chu Pathian hriat an ni bawk (Sâm 37:18), hê nuntawng hian an nun pêng tin a fan chhuak vek thîn.

Sunday                                                                    March 17

Hmun Thianghlim Lamah Kutte Phar Chhuak Rawh U

Chhiar tûr: Sâm 134. Khawi hmunah nge chibaibûkna chu neih a nih? LALPA chibaibûknain a rah chhuah chu eng nge ni?

    Sâm 134 hian Aarona puithiam malsâwmna Nambar 6:24– 26 (leh Sâm 67:1) min hriatchhuahtîr a, Pathian leh Israelte inlaichînna rahchhuah leh kalphung chu a târ lang a ni. Mipuiten Pathian chu hmun thianghlimah mal an sâwm a, Pathianin A mîte chu Zion atangin mal A lo sâwm vê thung a. LALPA chu lei leh vân Siamtu a nih avângin, malsâwmnate chuan nun pum pui a fan chhuan vek a. Chunglam malsâwmna bîkte hmun anga Zion sawi a nihna hian thuthlunga LALPA leh A mîte inzawmna a târ lang a. Tichuan, khawngaihna thuthlung huâng chhûngah Israelten LALPA chu malsâwmin, anni pawhin A malsâwmna an dawng bawk.

Chhiar tûr: Sâm 18:1; Sâm 36:1; Sâm 113:1; Sâm 134:1, 2; leh Sâm 135:1, 2. Engtin nge hetah hian chibaibûktûte chu târ lan an nih?

    Sâm hian chibaibûktûte chu LALPÂ chhiahhlawhte angin a sawi fo thîn a. “LALPA ina zâna ding thîn” (Sâm 134:1, NKJV) tih hian Levia chî zâna vên hna thawktûte a kâwk a (1 Chron. 9:23–27), a nih loh leh, chhûn leh zâna Pathian hnêna fakna hlân thîntu Levia chîte pawh a kâwk thei bawk (1 Chron. 9:33). Israelte khân hmuhtheih loh Pathian chibai an bûk avângin, Ani chu milem hmanga entîr theih a ni vê lo; hmun thianghlim khân LALPÂ ropuina chu târ langin, mi sualten an Lalber thianghlim hnên an pan theihna tûrin boruâk him a siamsak thîn. Hetianga intawnna hi Amah LALPÂ remruât dân niin, A dân leh thupêk hmanga kalpui a ni.

    “Amah chu lung nung, mihringte duh loh ngei, Pathian ngaihah erawh chuan thlan leh hlu tak a ni, amâ hnênah chuan lo kalin, nangni pawh lung nungte angin thlarau lam ina rem chhohvin in awm, Isua Kristâ zâra Pathian lâwmzâwng thlarau lam inthâwina hlân tûrin puithiam thianghlimho in lo nih nân,” (1 Pet. 2:4, 5, NKJV). Heta Petera thusawi kan hmuh hi Thuthlung Thar lamin hêng Sâm-a chuâng thûte a sawi dân a ni a; Pathian mîte chu tûnah chuan puithiam thianghlim, anmahni Siamtu leh Tlantu, LALPA Isua Kristan an tâna thil thâ A lo tihsak tâk zawng zawngte avângin fakna leh lâwmthu sawina an hlân ta a ni.

Thuthlung Thar ringtute kan ni a, puithiam hnâ leh khawvêla chanchin tha puang tûra kohte kan ni. Hê hnâ kan thawh hlâwk theih dân ber tûr chu eng nge ni ang?

ThawhTannî                                                           March 18

LALPÂ Hnênah Hla Thar Sa Rawh U

Chhiar tûr: Sâm 33:3; Sâm 40:3; Sâm 96:1; Sâm 98:1; Sâm 144:9 leh Sâm 149:1. Hêng chângten an sawi tlân thu tlângpui chu eng nge ni?

    Sâm hian mipuite chu ‘hla thar’ sa tûrin a ko va. Heta ‘hla thar’ hi eng nge ni? ‘Hla thar’ sakna chhan tûr chu LALPÂ ropuina leh khawvêl chunga A lalzia hriatna nei thar a, leilung Siamtu leh Rorêltu a nihna anga A enkawlna leh chhandamna chunga lâwmna atanga lo chhuak a ni. Hmêlmâte leh thihna laka chhanhimna leh, Israelte chunga Pathian duhsakna chu mimal taka ‘hla thar’ sak chhan tûr zînga thenkhat chu a ni ngêi ang.

    A hmangaih-ngilneih leh maknate avâng pawhin hla dangte pawh LALPA fak nân sak a nih tho laiin, ‘hla thar’ hi hla bîk tak, Pathian hnêna thutiâm leh inpêkna neih thartîr tûra hlimna thar eng emaw tak lantîrna a ni. Chunglam chhanchhuahna chan tharna chuan LALPA chu Siamtu leh Lalber a nih pawm tharna a neihtîr thîn a. Sâm-a thupui tlânglâwn tak ‘hla thar’ tih hi, thil hrang tam tak zîngah, Pathian rinchhanna te, A thil tih mak tak fakna te, tawrhna laka chhanchhuahna te pawh a tel thîn a ni.

Chhiar tûr: Isaia 42:10–12; Thupuan 5:9 leh Thupuan 14:3. Hêng Bible chângte atang hian eng ‘hla thar’ chungchâng nge kan chhuidawn theih ang?

    Pathian mî, Israelte chu thil duhawm tak “Amâ [Pathian] kianga mîte” (Sâm 148:14, NKJV) tia sawi niin, chû chuan Thilsiam zawng zawng zîngah, Israelte khân dinhmun pawimawh bîk an luah a, chuvâng chuan Pathian fak tûra hamthatna bîk pawh an nei rêng a. Bible hian chhuân zawng zawng zawnga ringtûte chu Tlantu fakna hla thar sa tûrin a fuih a, chu chuan Berâmno thisena chhandam an nihna testimoni danglam bîk a keng tel a ni.

    “Hla thar” chu tû mâ la hriat ngai loh hla thar pawh a ni thei a, mimal nuna Pathian khawngaihna chiang taka chan tharna pawh a ni thei bawk. “Hla thar” hian hmalam huna Pathian ropuina a taka la chan tûr danglam tak hmathlîra neih zâra beiseina lo târlanna pawh a ni thei. Chibaibûkna dik chu inthâwina leh thawhlawm hlanna bâk deuh niin, Pathian nêna inlaichînna nung chan tharna târ langtu pawh a ni. ‘Hla thar’ tih chu Pathianin kan tâna thil min lo tihsak tâk hmangaih leh ngaihlu thiam chunga nî tina sawi chhuahna pawh a ni thei tho bawk.

Nangmâ nuna Pathian malsâwmnate ngaihtuah la. Hla thar sa tûr ni dâwn ta lang, eng hlâ nge ni ang le?                                                                                                  

Thawhlehnî                                                          March 19

LALPA, Tunge I Puân Inah Lo Awm Thei Ang?

Chhiar tûr: Sâm 15. Tûte nge ni Pathian chênna hmuna (Amah) chibaibûk tlâk mîte chu?

    Hê Sâm-a chhânna hi Pahtian dân leh zâwlneite thûa thil ngiât awm tawh sa khâikhâwmna a ni. Chû mi thiltihte (felna thiltihte) leh nungchang (thinlunga”) (Deut. 6:5; Mika 6:6–8) chu Pathian lanchhuahtîrna a ni. Biak bûk kha hmun thianghlim a ni a, chuta thil awm tin rêng, puithiamte pawh tela hlan thianghlim vek a. Chuvângin Pathian chênna hmuna lût tûr chuan thianghlim a ngai a ni. Israelte thianghlimna kha kawng hrang hrangin a ni a, chibaibûkna kaihhnawih thil leh nunphung tin rênga hman tûr a ni. An nih theih dinhmun sâng ber, puithiamte lalram nihna hlen chhuak thei tûrin Pathian mîte kha dân pêk an ni a. Lal puithiam chî nihnaah khân, Pathian hmâa thianghlim taka nun a, hnam dangte hnêna thuthlung malsâwmnate thlensak a ni bawk.

Chhiar tûr: Sâm 24:3–6 leh Sâm 101:1–3. Eng nge hi thianghlim tih awmzia chu?

    “Thinlung tha famkim” nihna kha Pathian hmâa chibaibûktû nih theih sâng ber a ni. Hebrai tawnga tamim, “thafamkim,” tih hian ‘famkimna leh thianghlimna’ a kâwk a. Grêp hrui “thafamkim” chu hrisêlin, tih silawn loh leh duah thâ a ni (Ezek. 15:5). Inthâwina ran hlan tûr kha hmêlhem lo, tamim, a ni tûr a ni (Lev. 22:21–24). Thusawi “thafamkim” chu thutak hlang (Job 36:4) a ni. “Thinlung thafamkim” pawh chu ‘thinlung thianghlim’ (Sâm 24:4) emaw, thinlung rinawm emaw a ni ang (Sâm 15:2). Pathian a zawng a (Sâm 24:6), Pathian ngaihdamna zâra dinthar a ni (Sâm 51:2–10).

    Sawisêl bo nun chu Pathian khawngaihna leh A felna pawmna atanga lo chhuak a ni a. Chunglam khawngaihna chuan Pathian chhiahhlawhte chu LALPA tihna neia nung tûra chawkphûrin theihna a pe bawk a; a awmzia chu Pathian nêna inpâwlna vawng nung rengin, A Thu-ah a intulût thîn. Inpêkna leh nun thianghlima nun thuhriattîrna chuan, mahni ni lo vin Pathian fakna a thlen zâwk a. Sâm 15-a thil ngiât hi a tlângpuiin, tih loh tûr lam zâwnga sawi a ni tih chhinchhiah la (Sâm 15:3– 5). Hei hi Pathian duhsakna hlawhna ni lo vin, Pathian laka min tihrang thei tûr thilte pumpelhna tûr a ni.

Engtin nge Pathian hnên atanga min ûm bo thei thilte chu rilru fîm taka kan pumpelh theih ang? Chûng thil thenkhat chu engte nge ni a, engtin nge chutiang tih kan pumpelh theih dân tûr?

Nilâinî                                                                    March 20

Hnamte Zîngah A Ropuina Puâng Rawh U

Chhiar tûr: Sâm 96. Hê Sâm-ah hian chibaibûkna ziârâng chi hrang engte nge a sawi?

    Chibaibûkna, LALPÂ hnêna hlasak (Sâm 96:1, 2) te, A hming fak (Sâm 96:2) te, A thatna leh ropuina puân chhuah (Sâm 96:3, 4) leh, A tempula thilpêk rawn ken (Sâm 96:8) te a tha vek. Chibaibûk nâna hêng kan thil hriat lârte bâkah hian, Sâm 96 hian chibaibûknaa tel pângngai rêng ni lo a sawi tel a; chû chu, mi dangte hnêna LALPÂ lalram puânchhuahna hmanga ram lâk a ni (Sâm 96:2, 3, 10).

    Chuti chungin, hla sak te, fak te, thilpêk rawn hlan te leh chanchin tha puân chhuahna hi thil hrang teh luâ ni lo vin, chibaibûkna lantîr dân kawng dang a ni. Hnam zawng zawngte hnêna Pathian chhandamna puân chhuahna chuan fakna leh chibaibûkna pawh a huâm tel a. Mi dangte hnêna thuchah puân chhuahna leh chibaibûkna kal dun chhan tûr chu chhinchhiah la: “LALPA chu A ropui sî a” (Sâm 96:4), “mipuiho pathiante chu milemte an ni sî A; LALPA erawh chuan vânte khi A siam a” (Sâm 96:5, NKJV), “LALPAN ro A rêl a” (Sâm 96:10, NKJV), “Ani chu lei rorêl tûrin A lo kal dâwn sî a” (Sâm 96:13, NKJV). Tichuan, rawngbâwlnain a tum chu mi dangte chu Pathian mîte nêna pumkhata siam a ni; a tâwpah chuan thilsiam pum pui hian LALPA chu chibai an bûk ang (Sâm 96:11–13).

    LALPA chu Siamtu, Lalber leh Rorêltu a nihzia thinlung chhûnga pawmna atangin chibaibûkna hi a lo chhuak a (Sâm 96:5, 10, 13). Chibaibûknah chuan hun kal taa Pathian thiltih tâkte hriat reng te, tûna thilmak A tih mêk te (Ani chuan khawvêl hi a awm dân tûr anga awmtîrin, ro A rêl) leh hmalam huna thil A la tih tûr (tâwpna-hun rorêlna leh vân tharte leh lei thar) thilte pawh a huâm tel a ni.

    Sâm-a rorêlna awmzia chu chunglam ruâhman anga muânna, rêldikna leh, tûna hleihneihna leh tawrhna vânga khawvêla phurrit nuai bo va a dinhmun ngaia awmtîr lehna a kâwk a. Chuvâng chuan, Pathian rorêlna lo thleng tûr ngaihtuahin lei pum pui hi a lâwm a (Sâm 96:10–13; Sâm 98:4–9). LALPA chu Rorêltu fel a nihna avâng hian mipuite chuan thianghlimna leh khûr chunga Amah chu chibai bûkin, lâp taka Amah chibaibûkna lakah an fîmkhur tûr a ni (Sâm 96:9). Chibaibûknaah hian nasa taka lâwmna leh rinngamna (Sâm 96:1, 2, 11–13) te, hlauh leh zahna thianghlim pawh a tel bawk (Sâm 96:4, 9).

    Siamtu leh Rorêltu a nihnaa Sâm 96-in huâp zâu taka ngenna a siamna hian khawvêl hun tâwpa chanchin tha puân darhna tûr, Thupuan 14:6-12-a Vântirhkoh Pathum Thuchah puanna tûr chu a entîr a. Kawng tam takin hê Sâm hi tâwpna hun thuchah nên a inzawm a: thilsiamna te, chhandamna (“chatuan chanchin thâ) te, chibaibûkna leh rorêlna thû chu a chuâng vek a ni.

Hê Sâm hi vântirhkoh pathum thuchah (Thup. 14:6–12) nên khâikhin la. Engtiang kawngtein nge khawvêla kan puân chhuah tûr tâwpna hun thuchah vêk chu a lo zirtîr?

Ningânî                                                                   March 21

Pathianin Inthâwinate A Lawm Loh Hun

Chhiar tûr: Sâm 40:6–8; Sâm 50:7–23 leh Sâm 51:16–19. Hêng chângte hian eng thu pawimawh tak nge an târ lan? Engati nge Pathianin A Thûa tih tûr a sawi inthâwinate chu A lawm loh (Exod. 20:24)?

    Zâwlneite angin, Sâm-phuahtute pawhin chibaibûkna hman khawloh chungchâng chu an âuchhuahpui a. Hêng chângtea a sawi tum chu LALPAN Israelte inthâwina leh kûtte a ngai theih loh lam ni lo vin, chibaibûkna leh thlarau mî nihna kâr a inhlat êm vâng zâwka ngaithei lo a ni.

    Pathianin A mîte chu an inthâwina leh hâlral thihlante vângin A hâu lo va, an suahsualna leh anmahnî mimal nuna hleih an neih thinna vânga ngaithei lo a ni (Sâm 50:8, 17–21). Sâm hian inthâwi leh chibaibûkna kalhin thû a sawi lo va, inthâwina eng mah lo leh chibaibûkna thawlêng, hêng chibaibûktûte fellohnaa lang chu kalh zâwngin a tlâng âu a ni. Pâwn lam lang theia chibaibûkna leh chhûng lam rilrû chu chibaibûknaa a inhran daih sî chuan, puithûna thil chuan a taka Pathian hnaih duhna chu a luahlân zâwk hlauh thîn a. Chutiang chuan chibaibûk dân phung mai chu ngaihpawimawh ber a ni a, chûng thilten an entîr tak zâwk chu a phur chhuak zo ta lo thîn a, chû chu Pathianin a dodâl a ni.

Chhiar tûr: Johana 4:23, 24. Sâm-in tûnlai mîte min vaulâwkna thû nêna inmil eng thû nge Isuan hetah hian a sawi?                                                                            

    Inthâwina hlan ngawt chu a tâwk lo. Simna, rinna leh sual vânga lungngaihna tel lova hêng inthâwina hi hlan ni ta se, eng thatna nge a neih ang ni? Simna leh tihtakzeta lâwmthu sawina nêna bâwngpa hlâna inthâwina hlan a nih chauhin Pathianin “felna inthâwina” angin a pawm thîn (Sâm 51:19; Sâm 50:14). Isuan Isaia thusawi hetiangin A sawi chhâwng a: “Hê mîteho hian an kâin mi châwimâwi a, an thinlung erawh chuan mi hlat sî” (Matthaia 15:8) tiin. Sâm-phuahtuten an hmuh harsatnate tho chu Isua pawh khân hê leia rawng A bâwl laia mi thenkhat, a bîkin hruaitûteah khân a hmû a ni.

Engtin nge keini Adventist-te hian êng leh hriatna kan dawn tâk zawng zawngte nên hian thutak hriat leh sâkhaw puithûna thilte tih mai hi tâwk anga ngaihna thang lakah kan fihlîm theih ang?

Zirtâwpnî                                                               March 22

Zir Belhna: Chibaibûkna thil pawimawh chu simna, simna dik chu a ni: “Simnaah hian sual vânga lungngaihna leh sual hawisanna a tel a. Sual hi a sualna tak kan hriat loh chuan kan bânsan thei lo vang; thinlunga kan hawisan chauh loh chuan, nunah danglamna tak tak a awm ngai lo vang.

    “Simna awm dân dik hrechiang thiam lo mi tam tak an awm. Mi tam tak chuan an thil tih sual avângin pawi an ti a, an thil tih dik lohin an chungah tuarnate a rawn thlen ang tih an hlauh avângin pâwnlam thil siamthatnate an nei a. Amaherawhchu, Bible tih dân chuan hetiang hi chu simna a tling zo lo. Sualna ai chuan tuarna chu an pawi tih zâwk avângin, Esauva’n a fatîr nihna chu kumkhuaa hloh a ni ta tih a hria a, a lungngaihna kha chutiang lungngaihna chu a ni. Balaama chuan a kalna kawngah vântirhkoh khandaih hriam táwn keng a hmû a, a hlâu ta êm êm a, tichuan a thih mai dâwn avângin a sualna a pawm ta a; mahse, sual simna tak tak te, tumna danglam ta leh sual tenna te a nei chuang hauh lo. Juda

    Iskariota pawhin a LALPA a mantîr khân, ‘Mi thiam thisen ka mantîr kha thil ka lo tisual a ni,’ tiin a puang leh a ni.’ Matthaia 27:4.”—Ellen G. White, Krista Panna Kâilâwn, pp. 20, 21.

    “Pathian chu kuta sak inahte chêng lo mah se, chutiang hmuna A mîte an lo kal khâwm chuan, A chên chilhnain A rawn châwimâwi thîn a ni. Amah zawng tur leh tâwk tûra an lo kal khâwm a, an sualte puang leh an intawngtaisak tawh chuan, A Thlarauvin an hnênah a lo awm thîn. Thlarau leh tih tak zet leh, thianghlim mawina nên chibai an bûk loh erawh chuan, an lo kal khâwmna chu a thlâwn mai a ni thung ang. Chutianga lo kal khâwm thînte chungchâng thu sawiin LALPAN heti hian a ti: ‘Hê mîteho hian an kâin i chawimawi a, an thinlung erawh chuan mi hlat sî a. Engpawh ni sela, an zirtîrnaah mihring thupêk an zirtîr avângin an mi biak thin hi a thlâwn mai a ni.”Matthaia 15:8, 9. Pathian “chibai bûktûten thlarau leh tih tak zetin chibai an bûk tûr a ni.” Matthaia 15:8, 9. Pathian ‘chibai bûktûten thlarau leh tih tak zetin chibai an bûk tûr a ni.’ Johana 4:23.”—Ellen G. White, Zâwlneite leh Lalte, p. 41.

Sawi Ho Tûr:

@Chibaibûktûin Pathian hnêna a hlan theih ropui ber chu eng nge ni (Sâm 40:6–10; Rome 12:1, 2)?

@Engtin nge mimal leh a huhova chibaibûkna a inkûngkaih? Engati nge a pahniha kan mamawh? Engtin nge an inchâwm tawn?

@Mi tam tak chuan chibaibûknaah hian tawngtai te, fakna hla sak te, Bible leh thlarau lam thuziakte zirna chauh ni tûrin an ngai a. Chibaibûk nân hêng thil tihte hi a tûl laiin, chûng chauh chu em ni ang? Pathian chibaibûk dân tûr entîrna dang thenkhat târ lang teh.

@Ellen G. White-in heti hian a ziak: “A rawngbãwlna hnã chu hna lungngaih thlâk leh hrehawma ngaih tûr a ni lo. LALPA biak leh A hnãa chanvo neih chu thil lãwmawm tak a ni. Pathian chhandamna ropui tak.”—Krista Panna Kâilâwn, p. 103. Engtin nge LALPA chibaibûkna chu hlimna a nih theih?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †