Zirlai-13 2024 1st Quarter

Zirlai 13                                                  March 23–29, 2024

LALPA NGHÂK RAWH

CHÂNGVAWN: “LALPA chu nghâk reng rawh; chak takin awm la, i thinlung chu intihuai rawh se; a ni, LALPA chu nghâk reng rawh!” (Sâm 27:14).

Sabbath Chawhnû                                                 March 23

Chhiar Tûr: Sâm 27:14; Sâm 131; Sâm 126; Sâm 92; Matthaia 18:3; Marka 16:1–8; Rome 8:18–25; 2 Petera 1:19.

    TÛN kuartar chhûnga Sâm Bû kan zir chawlhkâr hnuhnung kan lo thleng ta a. Thlarau lam zinkawng zawhin Siamtu, Lalber leh Rorêltu hnên min thlenpui a; hêng thil chi hrang hrang: chunglam chhanchhuahna, ngaihdamna leh chhan- damna te tawngin; lungngaih leh tahna paltlanga intukluhna te pawh paltlangin, chatuana Pathian chênchilhna thutiâm ropui takte bâkah, lei leh vân pum puiin tâwp nei lova Pathian chibai kan bûkna tûr temlâwkna min neihtîr a. LALPÂ lo kal lehna beiseina nunpui a, zinkawng erawh chu la zawh zui zêlin, chû hunah chuan kan beiseina zawng zawng a lo famkim hlân nghâkhlel takin kan thlîr a. Sâm atang hian thu tlângkâwmna kan nei dâwn a nih chuan, “LALPA chu nghâk fan fan rawh,” tih a ni ngêi ang.

    LALPA nghâk tih chu eng mah tih nei lo va kut kuângkuah veng veng tihna lam a ni lo. Amah rinchhan leh ring chung zêla chêt zui zêlna, chêtna hmanga rinna leh rinchhanna lantîrna a ni. LALPA lo nghahna chuan lungngai tak chunga zîng êng mâwi a lo thleng ang tia tlâi lama nghahna ang chî lakah min chhâwk zângkhâi a (Sâm 30:5; Sâm 143:8). Beiseina leh muânna neih thar beiseinain kan thinlungte min tihchaksak a. LALPÂ tâna rawngbâwlna hmun atanga buhphal tam zâwk rawn thlen tûrin, rim zâwka thawk tûrin min tiphûr thîn (Sâm 126:6; Matthaia 9:36–38). LALPA lo nghahna hian muâlphovin min siam ngai dâwn lo, LALPA chu A thutiâm zawng zawngah A rinawm avângin, rah duhawm tak kan la têl ngêi dâwn a ni (Sâm 37:7–11, 18, 34; Sâm 71:1; Sâm 119:137, 138).

Sunday                                                                    March 24

Nghâk Tûra Kohna Chu

Chhiar tûr: Sâm 27:14; Sâm 37:7, 9, 34; Sâm 39:7; Sâm 40:1; Sâm 69:6; Galatia 5:5 leh Rome 8:18–25. Hêng chângte hian Pathian mîte eng ti tûrin nge a ngen?

    Nun tihrehawm thei zînga pakhat chu lo nghah ngai hi a ni mai thei e. Tû pawh niin, khawi hmuna chêng leh eng ang ruâl pawh ni ilang, thil eng emawte chu kan lo nghah a ngaih châng a awm thîn. Duh lêm lo chung pawhin thil leina hmunah emaw, doctor râwn tûr emaw pawha intlar a ngaih chângte a awm fo mai.

    A nih leh, Pathian lo nghah hi eng nge a an le? Sâm-ah chauh pawh ni lo vin, Bible pum puiah hian LALPA lo nghah thû hi a chuâng tam mai. Hêng thû zawng hi chhel ngaih thû vek a ni mai. Pathian chu A lo kal leh lo mai anga beidawng takin kan awm mai ang tih ang chî hlauhthâwnna nei duh miah lo va tuâr tichhel tlat kan nih a ngai. Pathian fâ inpezo chuan, Pathian chu a rinawm tih hre chiangin a nghâk reng thîn a. Amah nghâktûten Amâ chunga kan rinna kan nghah hmiah chuan, kan beisei ang diâk diâka thil a thleng lo chung pawhin, kan tâna tha ber tûrin min thawhsak ang tih kan chiang ngam thîn a ni.

    LALPA lo nghâk tih chu eng mah tih nei lo va lo awm mai mai a ni lo. Ram roa tui in châka tuihâl huâm huâm ang deuha Pathian thlâkhlelhna nei nên tehkhin a ni (Sâm 63:1). Sâm-phuahtuin Pathian hnêna malsâwmna tam tak chu a lo nghâk a, damchhûng mamawh leh duhzâwngte âiin Pathian hnaih mawlh chu a thlehlel zâwk a ni.

Rome-a Paula thusawi mak tak hi kan chhiarin, Pathian leh thilsiam zawng zawngte pawhin khawvêl tihthar leh hun tûr, tâwpna huna Pathian leh A mîte intawhkhâwm hun chu nghâkhlel takin an thlîr tih kan hmû. Heti hian a ziak: “Thil siam zawng zawngte chuan beisei êm êmin, Pathian fâte lo lanna chu an nghâkhlel hlê sî a” (Rome 8:19, NKJV)!

    Thutiâm ropui a va ni êm!

    Chuti chungin, chhandam kan nih a, Pathian nêna intawhkhâwm hun tûr kan nghah a, “thil siam zawng zawngte chu tûn thlengin rûm leh nauvei na tuârin an awm hlâwm” (Rome 8:22) lai hian, LALPA chu tûnah A mîte nên Thlarau Thianghlimin A awm reng a ni.

    Hetih lai hian, chhandamna ruâhman thuhretûa tang tûra koh kan ni a (Tirhkohte 1:4–8), chû chuan thil siamtharna a la thlen dâwn a ni. Chû thilsiam tharna chu kan thil nghah mêk chu niin, keini Adventist Kristiante beisei lo thlen famkimna tûr a nih bâkah, chû beiseina kan nghah mêk chu hmingah pawh kan châwi hiâl a. Kan lo nghâk a, mahse nghâk thlâwn mai kan ni lo. Kristâ lo kal hmasaka A thihna leh thawhlehna kha, Ani chu A lo kal leh ngêi dâwn tih tichiangtu a ni.

Pathian lakah eng thil thenkhatte nge tûnah i nghah mêk? Engtin nge rinna leh rinchhan ngamna nêna nghah dân kan zir ang, a bîkin kan dîlnate chhân a nih nghâl mai loh lai hian?         

THAWHTANNΠ                                                                             March 25

Naupang Hnute Hnêk Bâng Muânna

Chhiar tûr: Sâm 131. Hê Sâm hian Pathian nêna kan inlaichînna chungchâng eng nge min zirtîr?

    Pathian mîte chu khawvêla chêngin, mi rinawmte pawhin harsatna an tuâr a; mi tinin harsatna leh thlêmnate an tuâr theuh a ni ber mai. Pathian fâ, a nunna atâna Pathian rinchhan mai a ni tih inhriat tharna zârah, Sâm-phuahtu chuan nun nawmna neiin, chapo-uânnain hlutna rêng a nei lo tih a puâng a. Chapona hian mahni-thupui bera neihnaa hruaiin, mahni bâk hmu thei lo tûrin a bum thîn a. Chuvâng chuan chapote chu Pathian nihna hrethei lo tûrin an mit a tihdelsak tlat thîn.

    A leh lamah, mi felte chuan Pathian lamah an mît an lên a (Sâm 123:1, 2). Pathian ropuina hriatna chuan mi inngaitlâwm, hmasialna leh mahnî-ropuina zawnna laka zalênin a awmtîr thung a. Sâm-phuahtu chuan “thil ropuite” leh “thil sâng lutukte” chu a zawng vê ngai lo tih a sawi a (Sâm 131:1). Hêng thil sawinate hian mihringte hriat phâk loh khawvêla Pathian hnathawhte chu a sawi a. Tûnlai thiamnain a târ lan dân chuan, thil ho tê anga kan ngaihte pawh hi, tûna kan hriat sên ruâl loh khawpa mak a ni tih a ni. A ni rêng a, khawvêla thil awmte hi kan zir chiân poh leh hriat thiam mai loh khawpa mak a lo ni zêl mai a nih hi.

    Chutih laiin, Sâm 131:2-a tehkhin thû, “Naupang hnute hnêk bân tawh a nû hnêna a awm angin,” tih hi Pathian pawma nun nuâm taka awm hlê hlê ngaihruâtnaa sawi chhuahna a ni. Naupang a la têt zuâl laia a nû nêna inlaichînna duhawm an lo neih thin sawina a ni.

Tumsânna leh chapona min ngheitîrna hmangin, Pathianin chaw pângngai min rintîr ta zâwk a, chû chu “min tîrtû duhzâwng tih leh a hna thawh zawh” (Johana 4:34; Heb. 5:12– 14) a ni. Sâm 131-a naupangin (a nû) a rinchhanna ang chî hi rinna puitling, fiahna leh harsatna paltlang tawh, Pathian leh A Thu chunga rinawm tlat ang chu a ni.

    Sâm-phuahtu thil ngaihtuah chu a tâwpa Pathian mîte chawlhna a ni. A tâwpah chuan, Pathian tawn hriatna kan neih chu A kohhran tihchak nâna hmang tûra koh kan ni ta a. Chu chu, mimal taka kan thil zir chhuah, Pathian rinawmna leh thatna atangin, an rinna kawnga harsatna tuâr mêkte hnênah kan hrilh chhâwng thei a. Kohhran chhûngah ngêi pawh hian Kristâ tâna thuhretûah kan tang thei a, mi tam tak chuan Krista hriatna neih thar hi an mamawh thîn a ni.

“Tih tak meuhvin ka tî a che u, in lamlêt a, naupang tê ang in lo nih loh chuan, vân ramah in lût tawp lo vang” (Matthaia 18:3). Eng nge Isuan hetah hian min hrilh? Hetah hian eng ngaih dân nge tel?

Thawhlehnî                                                          March 26

Buhphalte Rawn Kengin

Chhiar tûr: Sâm 126. Pathian mîte hnêna chakna leh beiseina petu chu eng nge ni? Kan vawiin nuna a taka bel tûr eng nge hetah hian a sawi?

    Hun kal taa LALPAN mak taka min chhanchhuahnate khân Pathian mîte chu nasa takin a chawkphûr thei a, hun lo kal tûr atâna beiseina hnâr a ni bawk. Hun kal taa chhanchhuahna chu a ropui êm avângin mumang thleng dik ta ang mai a ni (Isa. 29:7, 8). Sâm 126-a târ lan angin, hun kal taa saltânna atanga (Sâm 126:1) LALPÂ chhanchhuahna vânga Amah faktûte ngêi kha, tûnah chuan saltâng an ni leh ta (Sâm 126:4) tih hria ila.

    Chuti chungin, hun kal taa hlimna leh chhawmdâwlna kha hlâte hmanga lo thleng niin, tûnah ngêi pawh chan nawn theih a ni. Chhuân tharten Bible-a thil thlengte kha an hmâi hmâa thleng anga chanin, a taka tawngtûte zînga tel angah an inngai thîn a. Tichuan, rinna nung chuan Pathianin thil ropui tak A lo tih tâkte kha châwisângin, hmânlai huna mîte tân chauha A tih anga ngai liam mai lo vin, keimahnî chhana LALPÂ tih angah an chan thîn a ni.

    Hmân laia thilthlengte hriat rengna khân tûn hun a tân beiseina a tithar a. “Chhim rama luite” (Sâm 126:4) tih ngaihruâtna hi, A mîte tâna Pathian lo chêtna thiltithei tak chu a entîr a. Juda ram chhim lam chu thlalêr ram ro a ni a. Fûr ruahtui tlâk laia ruah bawhawk taka a sûr laite chuan kawr vêlahte chuan tui a luâng liam dûl dûl thîn a. An thlâi chînna hlawhtlin leh hlawhchham kawngah pawh ruah hmasâ leh ruah hnuhnung hian awmzia a nei hlê thîn a (Deut. 11:14; Deut. 28:12). Chutiangin, ‘mittui tla chunga chî theh leh, hlim taka rah seng’ (Sâm 126:5, 6) tih pawh hi, tûna dinhmun khirh atanga chunglam hruaina zâra hmalam hun hlimawm lo thleng tûr thutiâm awmzenei tak a ni.

    Buhseng hun a lo tâwpin, Hebrai hote khân an thlâi tharte chu Jerusalem-a Pathian tempul-ah an rawn zinpui thîn a (Exod. 34:22, 26). Khatih hun laia mîte khân an thlâi chîn rahsengna atang khân thlarau lam zirlai an zir thîn a ni. Chi theh leh thlâi hmun enkawl hna hâutak zet chu, a tâwpah chuan rah duhawm tak sengna hun hlimawm a lo thleng a; chutiangin tûnah Pathian mîten harsatna tâwk rih mah se, tâwpna hunah chuan chhandam hlimna an la chang dâwn tho a ni. Ropui taka rahsengna hian Kristâ lo kal leh huna leia A lalram din tharna tûr min ngaihtuahtîr a (Amosa 9:13–15; Matthaia 9:37). Hetah pawh hian, nghah thû a lo lang leh a. Rahsengna ang tho vin, kan thawh rimna rah sengna tûr chu chhel takin kan lo nghâk fan fan rih tûr a ni.

Nangmâ nunah emaw, mi dangte nunah emaw LALPÂ hna thawh chiang taka in tawn laiah khân châm zui rih la. Tûna i thil tawn mêk chu eng pawh ni se, engtin nge hun kal taa i nuntawng atang khân beiseina i neih thar theih ang?

Nilâinî                                                                    March 27

Pathian Sabbath Chawlhnaa Nghâkin

Chhiar tûr: Sâm 92. Hê Chawlhni hlâ hian Chawlhni chungchâng eng thil pahnih nge a târ lan?

    A kut thiltih ropuite avânga Pathian fakna (Sâm 92:4, 5) leh mifelte chu Eden-anga târ lanna (Sâm 92:12–14) hian chiang taka Thilsiamna kha târ langin, Sabbath nihphung dik tak min kawhhmuh a. Sâm hian rêldikna Pathian a nihna anga hmêlmâte chunga LALPÂ hnehna chu châwisângin (Sâm 92:7–15), Sabbath thupui pahnihna—thil tha lo laka tlanna (Deut. 5:12–15) chu a nemnghet a. Tichuan, Sâm 92 hian hun kal ta a Pathian thilsiamna leh tûna khawvêl a enkawl zui zêlna leh, khawvêl tâwp huna chatuan atâna muânna leh chinfelna beiseina chu a châwisâng a.

    Pathian chu “Chungnung Bera” (Sâm 92:1, NKJV) chu a nih avângin mîten Sabbath chawlhna chu an chên thei a; hmun sângtea A dinhmun chungnung chuan hmêlmâte elphâk ruâl loh dinhmun thâah a dintîr a ni.

    Chuti chungin, Ani chu Chungnung Bera chu a ni nâin, LALPAN Amah lamtûte chhanchhuak tûrin a rawn pawh reng thîn a. LALPÂ thilsiamna hnathawh leh a bîkin chû thilsiam tlanna chuan mîte chu Pathian chibaibûk leh Amah chu hmangaih tûrin a chawkphûr tûr a ni. Thilsiam tlu tâa chêng, tlanna tel lo va beisei bo kan nih lai hian, thil han hlimpui êm êm tûr kan nei dâwn em ni? Kan hmangaih, kan tuâr, kan thî—beisei nei lo vin kan awm thîn. LALPA kan fakna chhan chu Siamtu a nih vâng ngawt ni lo vin, min Tlantu a nih vâng pawhin a ni bawk.

    “Hriak thar” thih tih hian Sâm-phuahtu chu, A chhiahhlawh inhlân thar a nihna anga Pathian rawngbâwl tûra tuâi thar a ni tih a kâwk a (Sâm 92:10). Puithiamte leh lalte kha an hna thar thawk tûra hriak thiha hlan thar an ni thîn (Exod. 40:15; 1 Sam. 10:1). Sâm-phuahtu hian Hebrai thumal danglam deuh, balal tih a hmang a, chû chu Pathian chhiahhlawhte hriak thih an nihna ang lo chî deuh, inthâwina pêng danga hriak ‘chawhpawlh’ ang chî chu a hmang zâwk a (Exod. 29:2, NKJV; Lev. 2:4, 5). Sâm-phuahtuin mak danglam deuha balal tih a hmanna hian Sâm-phuahtuin amah ngêi chu inthâwina nung ni tûra LALPÂ hnêna inhlan leh Pathian hnêna inserh hran (Rome 12:1) pumhlûm a duhna a entîr a ni.

    Sabbath hi Pathianin A mîte a tihthianghlim chhinchhiahna a nih avângin, Sâm-in Sabbath chu inhlan thianghlimna sawi nâna a hmang hi a mak lêm lo (Exod. 31:13). Tûm thing leh Lebanon-a sidar thing anga Pathian mîte târ lanna hian, rinna leh Pathian hmangaihna leh thil tum mak tak ngaihhlutna dika than zêlna a entîr a. Sabbath hi A mîte nêna LALPÂ chatuan thuthlung chhinchhiahna a ni (Ezek. 20:20). Sabbath chawlhna neih hi Pathian mîte tân a tûl a, a chhan chu A thuthlung thutiâmte hlawhtlinna tûra LALPA rinchhan chunga lo nghâk tûra a tihchak thin vâng a ni (Heb. 4:1–10).

Sâm 92 chhiar chhuak leh la. Chutah chuan kan tân eng beiseina ropui nge hlui kan nih a, engtin nge tûnah ngêi pawh a thû chu kan thlamuânpui theih ang?

Ningânî                                                                   March 28

Zîngah Hlimna A Lo Thleng Thîn

Chhiar tûr: Sâm 5:3; Sâm 30:5; Sâm 49:14; Sâm 59:16;

Sâm 92:2; Sâm 119:147; 2 Petera 1:19 leh Thupuan 22:16. Pathian tlanna entîr nân ni khata engtik hun lai hi nge hman ni a, eng nge a chhan?

    Sâm-ah hian, ‘zîng’ hi Pathian tlanna lo thleng tûr beiseina hun a ni thîn a. Zîng hian Pathian duhsakna a târ lang a, zankhuaa beidawn leh manganna hun rei tak chu a titâwp thîn (Sâm 130:5, 6). Sâm 143-ah, Pathian chhanchhuahna chuan tûna thihna thim hi a la tikiângin (Sâm 143:3), zîng êng mâwiah a la chantîr (Sâm 143:8) ang a, khuarkhuruma awm (Sâm 143:7) tawh pawh chu “ram tha takah” (Sâm 143:10) a awmtîr ang.

Chhiar tûr: Marka 16:1–8. Heta sawi ang hian zîngah eng nge lo thleng a, engati nge chû chu kan tân a pawimawh viâu?

    Isua Kristâ thawhlehna zîng khân A hming ringtu zawng zawngte tân Pathian chhandamna chatuan zîng khawvâr tûrin kawng a hawng a. Isuâ zirtîrte khân Sâm 30:5 thû: “Tahna hi riak tûrin tlai lamah a lo lût thei a, zîngah erawh chuan hlimna a lo thleng thîn,” tih thutiâm hi LALPÂ thawhlehna an hmuh khân a takin an chang a. Pathian duhsakna leh delhkilh nei lova hmangaihna zârah chiah kan tahna hi lâwmnaah a chang thei dâwn a ni (Sâm 30:5, 7).

    Vârparh arsi êngin ni thar lo thleng tûr a târ lang thîn angin, rinna hian Pathian fâten chatuan nunna an la chan tûr chianzia chu an puâng a (2 Pet. 1:19). Isua chu Vârparh Arsi êng tak (Thup. 22:16), zân te, thil tha lo leh thihna awm leh tawh lohna tûr A lalram dinna kan nghah mêka chu a ni (Thup. 21:1–8, 25). LALPÂ lo kal lehna tûr hi, thil dang zawng âia kan nghah mêk kan sawi thin, khawvêl tâwpa lo thleng tûr chu a ni. Nghah manhlâ tak a ni ngêi ang.

    “Josefâ thlân kerkuak chungah khân Kristan, ‘Kei hi thawhlehna leh nunna chu ka ni,’ tiin a puang chhuak a. Hêng thûte hi Pathian chauhin a sawi thei a ni. Thilsiam dang zawng zawngte chu Pathian remtihna leh thiltihtheihnaa nung vek an ni. Serafim sâng ber atanga nunna nei zînga a tlâwm ber thlengin, an zain nunna Hnârin A châwm leh tunnun vek an ni a; Pathian nêna pumkhat nihna changtu chauhin, ‘Pe thei ka ni a, la leh thei pawh ka ni,’ tiin A sawi thei. Krista chu Pathian a nih miau avângin thihna phuarna hruite tihchah theihna a nei.”—Ellen G. White, Chatuan Nghahfâk, p. 886.

Thihna hi kan pian tirha kan timûra bet nghâl a nih thû an sawi thîn. Keini tlu tawhte tân a dik tho nâin, Isuâ thawhlehna khân thihna chu hun rei lo tê atân a ni tih eng thû nge min tiâmsak le? Engati nge hun rei lo tê chauh thi tûr kan ni tih hi theihnghilh ngâi lo tûr kan nih ang?

Zirtâwpnî                                                              March 29

Zir Belhna: Chhiar tûr: Ellen G. White lehkhabu Krista Panna Kâilâwn-a “Kristaa Thanlenna,” pp. 60–68.

    Sâm hian LALPA chu nghâk fan fan tûrin thahnemngai takin min ngên a. “LALPA-ah châwl la, Amah chu nghâk fan fan rawh,” (Sâm 37:7). Lo nghah chu phurrit, chiang lo leh khawhar thlâk anga kan ngai a nih chuan, Isuâ vân lâwn nîa zirtîrte kha kan hre reng tûr a ni ang (Tirhkohte 1:4–11). An mithmuh ngêiah Isua kha vâna hruai chhoh a ni a, hmalam hun engtik emawa A lo kîr lehna nghâk tûra hnutchhiah an ni. Khâmi nîa zirtîrte âia tûna Pathian malsâwmna dawn châk lehzual zâwk tunge awm thei ang le? Anni khân nghâkhlel takin, “LALPA, tûnah Nangmâ ruâlin min hruai vê mai rawh,” tih tak an nâp ang. Chuti chungin, Pâ thutiâm leh Isuâ lo kîr lehna chu nghâk tûra tih an ni ta zâwk a. Zirtîrte kha beidawnna leh lungngaihnaa khata kan ring a nih chuan, mak kan ti ngawt ang. Anni chu Jerusalem-ah kîr lehin, Isuan A hrilh ang tak chuan an chê a—Thlarau Thianghlim thilpêk chu an nghâk a, chutah thiltihtheihna nên khawvêlah chanchin thâ chu an puâng ta a ni (Tirhkohte 1:12–14; Tirhkohte 2).

    Kan LALPÂ thupêk, Amah lo nghah chu, Thlarau Thianghlim zâra A hnâ chu thawh a nih loh chuan theih loh ang hiâl a ni ang. Mihringa phûrna mai chu keimahnia chak lohna a lo thlen hun chuan kan dinpui thei meuh lo vang. Thil pakhat chiah kan dinpui theih tûr a awm, chû chu Isua Kristaa awm reng a ni a; Amah chu mimal taka inlaichînna kan neihpui tûr a ni.

    “Krista chu kan thinlunga A chên chuan, keimahniah “A duhzâwng tih tum tûr leh bei tûrin,” (Filipi 2:13) A thawk ang a; Thlarau thuhmun bawk chu kan tilang ang. Chutiang chuan, Amah hmangaih leh Amaha chêngin, “Engkimah Amahah kan thang lian thei zâwk ang; Amah chu Lû a ni, Krista chu.’ Efesi 4:15.”—Ellen G. White, Krista Panna Kâilâwn, p. 67, 68. LALPA kan lo nghah mêk laiin, Sâm atang hian muânna leh lungâwina kan chhar thei ang. Kan tawngtaina leh kan hlâte chu Pathian thinlung leh kan thinlungte nî tina a intawhna hmun a ni.

Sawi Ho Tûr:

@Engati nge kan thlarau nunah ‘nghah’ hi a pawimawh? Bible-a rinna mi lian thenkhatten an nghahna thiltawnte kha sawi ho teh u. Engtin nge nghahna hian kan rinna thlitfîm a, a tihchak thin? (Rome 4:19–22; Hebrai 11).

@Kan nghah tâwpna chu eng nge ni? (Sâm 37:34–40). Chû chu, thil zawng zawngte chinfel a nih hun atân eng nge tiâmsak kan nih? Kan lei damchhûng nuna thleng ngai vak lo, rêldikna chungchângah eng beiseina nge hê châng atang hian kan hmuh?

@ Mi thi tâte leh an nuntawng (Thuhriltu 9:5) chungchângah, engati nge Isua an lo nghahna chu a tâwp têp? A chhânna atangin eng beiseina nge kan chhar theih ang?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †