Zirlai-2 2024 1st Quarter

Zirlai 2                                                    January 6–12, 2024

|AWNG|AI DÂN MIN ZIRTÎR RAWH

CHÂNGVAWN: “Heti hi a ni a, Isua khawii hmunah emaw a \awng\ai a, a \awng\ai zawh chuan A zirtîr mi pakhatin a hnênah, “LALPA, \awng\ai dân Johanan a zirtîrte a zirtîr ang khân min zirtîr vê ta che,’ a ti a,” (Luka 11:1).

Sabbath Chawhnû                                                January 6

Chhiar Tûr: Sâm 105:5; Sâm 44; Sâm 22; Sâm 13; Sâm 60:1–5; Kolosa 3:16; Jakoba 5:13.

    KRISTIAN thenkhat zînga ngaih dân tlânglâwn tak chu, rilrûa vawn sâ mai ni lo, thinlung atanga lo chhuak tawngtaina chiah hi tawngtaina dik tak a ni tih a ni. Chuti chungin, Isuâ zirtîrte erawh kha chuan Amâ hnêna tawngtai dân zirtîr tûra an ngena A chhânna kha an hlâwkpui hlê thung a. Pathianin tawngtaina bû, Sâm hi Bible bu lâi takah A dah tlat mai a, chû chu hmânlai mîte tawngtai thin dân min entîr tûr lekfang ni lo vin, tûna kan tawngtai theih dân tûr min kawhhmuh nân pawh a ni tho bawk.

    Hmânlai hun atang tawhin, Sâm hi Pathian mîte tawngtai dân hmang a lo ni fo tawh thîn a, chutah chuan Isua pawh a bâng bîk lo (1 Chron. 16:7, 9; Neh. 12:8; Matthaia 27:46; Efesi 5:19). Tûn kâr chhûng hian, Pathian mîte nun zin kawng zawh dân leh, Pathian nêna an inlaichînna than zêl nâna Sâm tangkâizia kan en tlâng dâwn a. Sâm hi tawngtaina a ni tih hre reng ila, chuvângin Pathian thûa bengvâr nân chauh ni lo, keimahni mimal leh a huhova kan tawngtai nunah awmzia a neih êm avângin, a hlu êm êm a ni.

    Sâm thu hmanga tawngtaina zârah ringtu tam takin tawngtai manhlâ tak neiin, an lo vawng nung reng thîn a ni.

    Tûn kâr chhûng hian Sâm bû kan zir chhunzawm zêl dâwn a, a bîk takin kan tâna thil a kal tluân viâu loh lai hunte kan thlûr zui dâwn a ni.

Sunday                                                                   January 7

Tawngtai Nâna Sâm Hman Chhawmnungin

Chhiar tûr: Sâm 105:5; Kolosa 3:16 leh Jakoba 5:13. Ringtû Pathian chibaibûkna nuntawngah Sâm hian eng hmun nge a chan?

    Nî tin nuna Sâm nunpui theih dân tûr kawng awlsam chu nî tina Sâm chhiar thin tûr a ni; Sâm 1-na atanga chhiar tanin, a phuahtû thil sawi hi zui zêl ni bawk se. Kawng dang leh chu, thilthleng leh i tûn dinhmun mil deuh tûr Sâm kha chhiar la: Sâm-ah hian mimal tahna lam te, a huhova sûnna hlâ te, lâwmthu sawina, fakna, inchhîr leh simna te, finna thû (Pathian finna leh kaihhruaina dîlna) te, hun kal taa thilthleng te, thinrim leh rilru so bâkah, vahvaihna lamte pawh a awm vek a ni. Tûn kuartar chhûng hian, chûng zînga tam tak chu kan thlîr zui ang a, an lan dân, tobul ang zêlin kan zir dâwn a ni.

    Chuti chu, Sâm hi engtianga chhiar tûr nge kan nih le?

    A hmasa berin, ngaihtuah a, chuta tawngtai zui chu a ni. Ngaihtuah lêt leh a, a nih dân phung ennawn tûr chu: Sâm-phuahtuin Pathian a lam dân leh, chuta tawngtaina hlan chhante a ni phawt a. Nangmâ dinhmun leh anî nuntawng inzûl dân te ngaihtuah a, chutiang atâna Sâm tangkai theih dân tûrte ngaihtuah zui ni se. Chuta i thil chhiar leh nangmâ dinhmun inan leh inkûngkaih dânte chu ngaihtuahin, mak pawh i ti ngêi ang.

    Sâm-a thil eng emawin chona a siamsak che a nihin, entîr nân, tûna i thil hmachhawn mêkah beiseina dik lo a tihdiksak che emaw pawh a ni thei. Chû Sâm chu Amah Krista leh chhandamna êng bâkah, Kristâ hnathawhten hun rei tak atâna beiseina min siamsakte chu chîk takin ngaihtuah ang che. Krista leh kraws êngah Bible thil tin rêngte hi thlîr thiam tûrin min tanpui ngêi tûr a ni.

     Sâm-in tawngtai duhna rilrû min put thartîr dân thlîrin, chûng chu nangmâ tân te, in kohhran leh khawvêl tâna a pawimawhnate pawh en tel la. I thinlung leh rilrûa Amâ Thû chu dahsak tûr chein Pathian ngên ang che. Sâm chu mî i hmêlhriat tû emaw dinhmun nêna induh riâuva i hria a nih chuan, chû mî tân chuan tawngtaiin dîlsak la. Sâm hian nun pêng hrang a hâwl kim hlê mai a, kan chhiar a, kan thinlunga kan khâwl khâwm phei chuan kan hnêna a thusawi hi kan hlâwkpui hlê dâwn a ni.

“Kristâ thû chu finna tin rêngin nangmahniah awm teuh rawh se” (Kolosa 3:16) tih hi eng nge ni a awmzia? Engati nge chû nuntawng atân chuan Bible chhiar hi hmasa ber leh hmalâkna tûr pawimawh tak a nih?

THAWHTANNΠ                                                                                           January 8

Buaina Huntea Rinchhanna

    Kristian zawng zawngten tawrhna leh beidawnna hriain, nuntawngah an nei theuh tawh a, chutiang hunah chuan ‘LALPAN eng nge a tih?’ emaw, ‘engati nge hetiang hi LALPAN an chunga thlentîr A phal?’ tiin a ngaihna kan hre lo fo thîn. Chutiang chu Sâm-phuahtûte pawhin an lo paltlang vê tawh a. Chutiang an nuntawngte chu chunglam thâwkkhumnain an lo chhinchhiah thlip thlep a ni zâwk.

Chhiar tûr: Sâm 44. Hei hian eng nge kan hnênah a sawi a, engati nge hei hi hun tina ringtu zawng zawngte tân pawh a pawimawh?

    Kan biak in inkhâwma chhiar leh ngaihthlâk atâna Sâm thlan chhuahte hi rilrû leh a inhmeh thûte niin, chûng chu kan tawngtai honaahte pawh kan sawi chhuak thîn. Chutiang hun bîk atâna thlan chhuahte chuan nun thim hrehawm kan chinfel theih lohzia leh hrehawmzia a entîr a. Eng emaw chângte phei chuan Pathianin kan chunga dik lo taka thlentîr a, min tawrhtîr angte pawhin kan ngai a, mipui zîngah emaw, fianriâlah emaw pawh chutiang inhmeh sawi chhuahna tûr tawngkam kan haihchham fo thîn.

    Chutiang a nih avâng chuan chibaibûkna hmuna telte pawh min hrehtîr a. Tawngtaia Pathian hmâa kan rilrû leh ngaihtuahna dik taka kan thlen loh thin avângin keimahnî rilru thawpikna kan indelh behtîr ta thîn a ni. Chutiang avâng tak chuan nêl taka Pathian rinchhan chunga A hnên kan pan loh phah a. Sâm thu hmanga tawngtaina erawh chuan rinngamna min neihtîrin, kan tawngtai leh chibaibûk hunah pawh nuntawng hlimawm tak kan nei thei ang tih beiseina kan nei thîn.

     Entîr nân, Sâm 44, hian bawhchhiatna nei lote pawhin harsatna an tuâr vê thîn a ni tih manthiam tûrin chibaibûktûte chu a tanpui thîn a. Sâm thu hmanga tawngtaina chuan zalên taka tawngtai thu chham theihna a neihtîr a. Kan sawi chhuah thiam loh leh sawi ngam chiah lohte pawh sawi tûrin Sâm hian huaisenna min neihtîr thîn. “Kan thinung hi a hawi kîr lo va, kan ke pênte hian i kawng chu a pênsan ngai hek lo; Nangin sihalte awmnaah min sawisa nek a, thihna daihlimin min khuh a” (Sâm 44:18, 19).

     Sâm 44 bul tanna thû hi lo chhinchhiah la. A ziaktu hian hun kal ta lama Pathianin A mîte tâna thil ropui takte A lo tihsak chungchâng a sawi a. Chuvângin a ziaktu hian “a thalngul leh khandaih” âia Pathian a rinchhan zâwk thû a sawi a ni (Sâm 44:6).

     Chuti chungin, Pathian mîte chungah buaina a lo la thleng tho mai. Heta lungngaih leh manganna thû a sawi hi a thuiin, a hrehawm hlê a ni. Chutiang kârah chuan, Sâm phuahtu chu, “I zahngaihna avângin min tlan ang che,” tiin Pathian chhanchhuahna dîlin a âu chhuak a (Sâm 44:26). Chû chu, buaina chîm kârah pawh, Pathian leh A hmangaihna chu a tak a ni tih hriatna a neih tlat vâng a ni.

Engtin nge hun kal taa Pathian chênchilhna a taka lo chan tawhna ngaihtuah lêtnain Pathian chu hla taka awm daih anga ngaihna avânga buaina hunah a tanpui theih che?

Thawhlehnî                                                          January 9

Mi Beidawng Sâm

    Sâm hmanga tawngtaina hian zalên taka tawngtai theihna bâk pawh chibaibûktûte chu a tihsak a. Sâm-te hian Pathian tehfungte ang zêla an nuntawngte vênsakin, Pathian chênchilhna zâra beiseina leh rinngamna a neihtîr thîn a ni.

Chhiar tûr: Sâm 22. Tawrhna nasa tak kârah pawh Pathian rinchhan chungchâng eng nge hê Sâm atang hian kan zir chhuah theih ang?

    Sâm 22:1-a mangang âuthâwm: “Ka Pathian, ka Pathian, engah nge mi kalsan? Engati nge mi tanpui tûra i hlat êm a, ka rûmna thûte atanga i hlat le?” tih hian an lungngaih leh khawharnaah mîte chu a tanpui thei dâwn tih a entîr a.

     Amah Isua ngêiin kraws chunga A awm laia A lo âuchhuahpui avâng khân, hêng thûte hi Kristiante zîngah chuan hriat a hlawh hlê a; Kristâ tawrhna târ lanna Sâm a ni (en tûr, Matthaia 27:46). Chuti chungin, tawrhna leh fiahna kârah pawh hê thu hi sawi chhuah a ni tho bawk: “Ka ûnaute hnênah i hming ka hril ang a; Inkhâwmho zîngahte chuan ka fak ang che,” (Sâm 22:22).

     Tawngkam dang chuan, hêng tawrhna thûte hi a ziaktû dinhmun dik tak chu a ni chiah lo nâin, Sâm phuahtu hian Pathiana a rinna thû sawi chhuakin, chutiang boruâk hnuaiah pawh Pathian chu a la fak cheu dâwn a ni.

     A sawi tum chu, tawngtaina thû min hrilhin, Sâm hian tûn dinhmun bâk thlîr a, Pathian khawngaihna zâra kan nun dinthar a nih leh hun tûr chu thlîr tûrin min zirtîr a ni.

    Sâm thu hmanga tawngtaina hian chibaibûktûte chu thlîrna thar, zâu zâwk a neihtîr a. An rilru awm dân leh hriatthiam dân sawi chhuah theihna neihtîrin, an tûn dinhmunah erawh chuan a hnutchhiah mai lo. Chibaibûktûte dinhmun chu eng ang pawh ni se, an natna te, beidawnna te, thinrimna leh mangannate chu Pathian hmâa hnutchhiah a, Amah rinchhan tûrin a hruai thîn.

     Sâm tam takah chuan tahna chu faknaa chantîrin, tawngtaina avânga thlamuânna leh chunglam khawngaihna an dawn zâra thlarau dinhmun siamthatsak an nih thû hmuh tûr a awm nuâl.

Tûna kan thil hmachhawn chu eng pawh ni se, engtin nge tûna harsatna kan tawh mêk piah lam thlîr a, Pathian thatna rinchhan dân kan zir theih ang?

Nilâinî                                                                  January 10

Beidawnna Atanga Beiseina

    Pathian chu keimahni hlat taka awm ta daih ang dinhmuna din châng kan nei deuh theuh hlawm a. Chutiang hunah chuan, “Engtin nge hei hi ka chungah a lo thlen theih lê?” tia kan ngaihtuah chângte pawh a awm.

     Sâm-phuahtute hi keini ang bawka mihring vê tho an ni a, kan tawrh ang hi an lo tuâr vê thîn a. A châng chuan keimahnî sualnaten harsatna min thlen a, a châng leh kan phû hauh loh nîa kan hriatte pawh kan chungah a lo thleng bawk a; tuâr âwmah pawh kan inngai lo thîn. Chutiang tuâr lo fâ kan awm dâwn em ni?

Chhiar tûr: Sâm 13. Eng rilru puthmang pawimawh chi hnih nge hê Sâm-ah hian i thliâr hran theih? Eng thutlûkna siamin nge Sâm phuahtû thil thlîr dânah danglamna nasa tak chu thlen nia i rin?

     “Aw LALPA, eng chen nge mi theihnghilh kumkhua dâwn le? Eng chen nge ka lakah hian i hmâi i thup dâwn le?” (Sâm 13:1). Hei pawh hi dik lo ti tak chung pawha tuâr lo tak tak kan awm ang em lê? (A nih leh, Pathianin keini zînga tû emaw hi A theihnghilh ang em?)

     Sâm 13 hian thil tihsual tlânglâwn tak pumpelhna kawng min kawhhmuh a, chû chu tawngtainaa keimahnî leh kan harsatna zâwk thupuia neihna hi a ni. Hê Sâm hian kan tawngtai dân phung her danglamin, Amâ mîte chunga Pathian thil tih dân phung danglam lo leh rinawmna min hriat nawntîr thîn.

     Nî e, hê Sâm hi manganna leh sawisêlnaa bultan ni mah se, chutiang ngawtin a tâwp chuâng lo. Chû tak chu a pawimawh lai chu a ni.

     Hê Sâm hian kan hlauhna leh hlauhthâwnna te (Sâm 13:1–4) chu Pathian chhandamnain a luahlan a, tahna âiah fakna, beidawnna âiah beiseina (Sâm 13:5, 6) kan neih zâwk theih nân, chhandam tûra Pathian thiltihtheihna (Sâm 13:5) chu kan rinchhan zâwk tûr a ni.

     Chutih laiin, Sâm thûte han chham leh sawi chhâwn vê satliahna ngawt chuan, a tum ang taka rah duhawm chu min thlen chuâng lo vang. Sâm thu hmanga kan tawngtaiin, chû Sâm-in a ngiât ang taka che thei tûra Thlarau Thianghlim tihchakna chu kan dîl tel tûr a ni. Sâm hi Pathian Thû, ringtûte nungchang leh chêt dân siamthatna tûr a ni a, bengvârna thu satliah mai a ni lo. Pathian khawngaihna zârah, Sâm-a thutiâmte chu ringtûte nunah a taka lantîr a ni thîn. A awmzia chu, Pathian duhzâwng anga nung tûrin Pathian Thûin keimahnia hnâ a thawh kan inphal a. Pathian Fapa tîsâa lo chang a, duhthusâm ang taka Pathian duhzâwng târ langtuin Sâm thu hmanga a tawngtai ang khân, Krista nên kan inpumkhat tûr a ni.

Engtin nge harsatnaten Pathian a hnaihtîr zâwk theih che? Engati nge, i fîmkhur loh chuan Amâ hnên atanga a hruai bo theih ang che?

Ningânî                                                                 January 11

Aw, Min Dintharleh Rawh

Chhiar tûr: Sâm 60:1–5. Engang hun atânte nge hê Sâm hi tawngtai nân a inhmeh ang? Engtin nge Tah Hlâ Sâm hi nun hlimna hun atânte pawh hlâwkpuiawm a nih theih ang?

     Tah hla Sâm-te hi tîsâ, rilrû leh thlarau lama harsatna tâwk mêkte tawngtaina anga hriat a ni thîn.

     Chutih laiin, hêng Sâm-te hi hun tha neih lai chuan kan hmang lo tûr tihna chu a ni chuâng lo. Eng emaw chângte chuan, Sâm thûte leh chibaibûktûte dinhhmun chu inpersan deuh angte pawhin a lang a ni thei. Tah hla Sâm-te pawh hi buaina tâwk vê lêm lo chibaibûktûte tân pawh a hlâwkpuiawm thei tho a ni.

     Pakhatna, mihring nuntawng tlângpuiah hian, mi felte leh mi suaksualte chungah pawh tawrhna a thleng thei vek tho tih min hriattîr a. Chûng buaina hunahte chuan Pathian chu engkim chunga thuneitu niin, chakna leh a chinfelna kawng min buatsaihsak thei tih Sâm hian min hriat nawntîr leh thîn a ni. Hê Sâm-ah ngêi pawh hian, buaina kârah (“Hê ram hi i tikhûr a; i tikhi ta a,” Sâm 60:2), Sâm-phuahtû chuan Pathian chhanchhuahna chu a beisei ngam tih a târ lang a ni.

     Pahnihna, vântlâng zîngahte Tah Hla Sâm-te hian hrehawm tuâr mêkte chunga khawngaihna neih min zirtîr a. Pathian chunga lâwmna leh hlimna kan sawi chhuah hunin, hêng mi vânduâi zâwkte hi kan ngaihtuah tel thîn tûr a ni. Nî e, tûnah chuan thil thâte kan nei rih a ni ang, mahse, kan vêla tawrhna namên lo tlâkbuâk hre lo tu nge awm ang ile? Chutiang Sâm hmanga tawngtaina zârah harsatna paltlang mêkte theihnghilh lo tûrin min tanpui a. Chû chuan Isuâ tih dân ang a chutiang tuârte lainat leh tanpui duhna rilrû min neihtîr thîn a ni.

     “Hê khawvêl hi tawrhna in zâu a ni ber mai e; mahse, Krista chu damlote tidam a, Setana saltlângte hnêna chhanchhuahna thû tlângâupui tûrin a lo kal a. Ani kha hrisêlna leh chakna Hnâr a ni. Amâ nunna chu damlo leh hrehawm tuâr te, ramhuai mante tân A pê a. A tihdamna chan duha rawn pantûte tû mah A hnar ngai lo. A khawngaihna dîltu tam takte kha mahnî chunga tawrhna inthlen chawp an ni tih A hria a; chuti chungin, anni tihdam chu A thulh phah chuâng lo. Chûng mi khawngaih thlâk takte nuna Kristâ thatna a lo luhin, sual inhriatna an nei a; mi tam tak chu, an tîsa lam damna bâkah, thlarau lam natnate tihdamsak an ni. Chanchin Thâ hian chutiang thiltihtheihna chu a la pâi reng a, engah nge chutiang rah duhawm chu tûnah hian kan hmuh loh ang ni?”—Ellen G. White, Welfare Ministry, pp. 24, 25.

Tûnah ngêi hian, i tawngtaisaknate chauh ni lo, rawngbâwlsaknaa i khawih pawh mamawh tu nge hriat i neih?

Zirtâwpnî                                                            January 12

Zir Belhna: Chhiar tûr: Sâm 42:8. Engtin nge tawngtaina leh hlâ hi hêng thâwkkhum thû hian an inkûngkaih tih an sawi?

    Ellen G. White-in Davidâ inchhîrna Sâm-te (entîr nân, Sâm 51) chungchâng sawiin, chutiang chu sual vânga lungngaih dân dik entîrna leh tawngtai dân tûr a nih thû a târ lang a (en tûr, Krista Panna Kâilâwn, pp. 21, 22). Ani hian ringtûte chu hêng Sâm thûte hi vawng tûrin a fuih a, chû chu an nuna Pathian chênchilh nih hriatna vawn nun nân leh, thlêmna leh hnehchhiahna hlauhawm A tawh laia Isuan Sâm hmanga hmachhawn lêt nâna âw A chhuah dân a târ lang a ni. Heti hian a lo sawi bawk: “Hla thianghlim thûte hi, nuna inchhîr leh rinna, beiseina leh hmangaihna leh lâwmna neihna hnâr a ni fo thîn! . . . Nî e, hla tam tak hi chu tawngtaina a ni bawk.”— Education, pp. 162-168.

     Sâm hmanga kan tawngtai leh hlâ kan sakin, a phuahtûte chhelzia, huaisenzia, tumruh leh beiseina neihzia kan ngaihtuah a. Thlarau zin kawng zawh zêl tûra min fuihphûrin, keini mai kan ni lo tih hriattîrin min thlamuân thîn. Keini angin, mi dangte pawhin hun harsa takte paltlangin, Pathian khawngaihna zârah hnehna an lo chang tawh a. Chutih ruâlin, Sâm hian thahnemngai taka kan tâna Kristâ min dîlsakna min hriattîr bâkah, kan tâna min dîlsak tûrin A nung reng tih min târ lansak bawk (Heb. 7:25).

     Tawngtai leh chibaibûk nâna Sâm hmanna hian, ringtûte chu mihringte nuntawng pêng tamzia hriatna neihtîrin, chibaibûkna pêng hrang hranga inhmang tûrin min zirtîr bawk. Sâm hi Pathian-mihring tawngtaina leh fakna hlâ a ni a. Chutiang a nih avâng chuan, chibaibûkna hmuna Sâm hmanna hian, ringtûte chu Pathian duhzâwng leh khawngaihnaa tihdam theihna chu thupuiah a neihtîr dâwn a ni.

Sawi Ho Tûr:

@Engati nge thinlung atanga lo chhuak, phuah sâ ni lo kher chauh chu tawngtaina tûr a nih bîk loh? Engtin nge kan tawngtai nun hian Bible tawngtaina, Sâm atang hian hlâwkna kan têl theih ang?

@Engtin nge Sâm-in a huhova kan tawngtai nun hi hmâ a sâwntîr theih ang? In tuâlchhûng kohhranin Pathian biak inkhâwma Sâm hi a taka in hman tangkai zâwk theih dân tûr kawngte sawi ho teh u.

@Mihringte rinna zinkawnga thil tawn chi hrang tamzia leh Pathian khawngaihnaa tihdamna thiltihtheihzia chungchâng eng nge Sâm hian a târ lan?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †