Zirlai-3 2024 1st Quater

Zirlai 3                                                  January 13–19, 2024

LALPAN RO A RÊL

CHÂNGVAWN: “LALPAN ro A rêl a, ropuinain a inbel a; LALPA chu ropuinain a inbel a, chaknain A inthuâm ta a; khawvêl pawh hi, din nghehin a awm a, nghet leh him takin” (Sâm 93:1).

Sabbath Chawhnû                                              January 13

Chhiar Tûr: Sâm 8; Sâm 25:10; Sâm 75; Sâm 97; Sâm 100; Sâm 105:7–10; Galatia 3:26–29.

    PATHIAN thuneihna-rorêlna hi rinna lungphûm angin Sâm hian a châwisâng a. LALPAN A thilsiam engkim chu A enkawl zui zêl a. Ani chu khawvêl pum pui chunga thuneitu Lalber niin, dikna leh felnain khawvêl ro A rêl a. A dânte leh thupêkte chu a thâ a, a vawngtûte hnênah nunna a thlen thîn. LALPA chu Rorêltu dik niin, khawvêl hi fel takin A awmtîr zui zêl a, chutiang chuan mi felte hnêna lâwmman pêin, mi suaksualte erawh chu keinî duh dân ni lo, Amân thâ a tih hunah A hrem mai thîn a ni.

    Pathianin Israelte hnêna thû a thlun hmanga LALPÂ chhandamna a tlângâupui avângin, khawvêl himna atân pawimawhna bîk tak a nei a. LALPAN Israelte kha A rohlû atâna neiin, Israel chu hnam zawng zawngte zîngah A mi bîkah a nei a. Ani chu A thutiâm chunga rinawmin, an rinawm loh leh eng emaw chânga an hel chungin, A ran rualte angin A ngaihsak zui zêl tho a ni.

    LALPÂ rorêlna chungchuâng chuan khawvêl hi nghet tak leh him takin a awmtîr a. Sâm-phuahtuten hê thutak lungphûm hi hrethiam tûrin min duhsak a. Chutiang zâwnga khawvêl thlîrna nei chung chuan, Sâm-phuahtûten thinlung taka Pathian rawngbâwl leh hmuingîl dân kawng an zawng ta a ni.

Sunday                                                                 January 14

LALPAN Min Lo Siam

Chhiar tûr: Sâm 8 leh Sâm 100. Engtin nge hêng Sâm– ahte hian Pathian leh mîte chu târ lan an nih? Hêng Sâm– te hian Pathian nungchang chungchâng eng nge an târ lan?

    Sâm hian Thilsiamna kha ngai pawimawhin, Pathian thuneihna a châwisâng a. Vânte khi “A kutchhuakte” niin, A ropuina leh thiltihtheihzia an puâng chhuak a (Sâm 19:1– 4, Sâm 97:6). Lei pum puiah hian Pathian hming chu a ropui a (Sâm 8:1, 9). LALPAN thil engkim A siam a; Ani chuan awm tanna (Sâm 93:2) leh tâwpna (Sâm 102:25–27) pawh a nei lo. Ani chu chatuan mî, hnam dangte pathian, ‘mihringte kutchhuak (Sâm 115:4) lek âia chungnung zâwk fê a ni. Milimte chuan “kutte an nei a, mahse an khawih thei sî lo” (Sâm 115:7); LALPA erawh chu, “Ama kutah chuan lei hmun thûk takte chu a awm. . . . khawmual pawh hi a kut chhuak a ni” (Sâm 95:4, 5).

    Sâm tam tak hian leilung thil, hnam dangten pathiana an ngaih hiâlte chungah pawh Pathianin thiltihtheihna A neih thû a sawi a (entîr nân, Sâm 29; Sâm 93; Sâm 104). Hêng Sâm-te hian LALPAN thilsiam zawng zawngte chunga rorêltu leh lalna leh thuneihna neia A inchhâlna an nemnghet a. Sâm 100:3 hian milem biakna—mahnî-inrinchhanna eng mah lohzia uâr taka sawiin, “mahnîa lo awm mai kan ni lo va” Pathian chu min siamtu a nih zâwk thû a sawi a.

    Thilsiamna khân Pathian hmangaihna a târ lan bawk a. Thil awm tin rêngte hi Pathian zâra lo awm vê mai niin, Amâ zâra nung an ni (Sâm 95:7; Sâm 147:4–9). Pathian zârah mîte hi an lo awm ni mai lo vin, hmânlai Israelte kha “A mîte leh a ran tlatna hmuna berâm hoteah A siam a” (Sâm 100:3). “A mîte leh A berâmte” tih hian Pathianin A mîte nêna inlaichînna duhawm neih a duhzia a târ lang a ni.

    Siamtu chauh chuan A mîte malsâwm leh tipung tûra thiltihtheihna A nei a, chuvângin Amah chauh chu chibaibûk leh rinchhan tlâk a ni. Sâm hmun tam takah engkim, thawthei tawh phawt, hê lei leh tuipuia awm zawng zawngte chu LALPÂ hmâa hlim taka âu tûrin min ko vek a ni.

    Pathian ropuina chu thilsiam, leia thilsiam tlu tâah meuh pawh hmuh theih a ni a, Sâm hian Pathian chauh chu chibaibûk phû a ni tih a târ lang.

“Mihring hi eng nge maw a nih a I ngaihtuah thin a, mihring fapa pawh hi eng nge maw a nih a I kan thin ni?” (Sâm 8:4, NKJV). Pathian chu nangmah Siamtu a nihna anga i chhânna chu eng nge ni? Pathianin arsîte an hming theuha A koh laiin (Sâm 147:4), engang takin nge nangmah kha ngaihsak chea i rin?                                                                

THAWHTANNΠ                                                                                     January 15

LALPAN Ro A Rêl

    Thil inthlun zawm—thenhran theih loh chu—LALPA chu Siamtu a nihna leh Rorêltu leh Thuneitu a nihna hi a ni. “LALPAN ro A rêl” tih thû hi, khûn takin Sâm 93:1, Sâm 96:10; Sâm 97:1; Sâm 99:1 hian an puâng a, chû chu Sâm bu pum puiah hian a thang khâwk chhuak vek a ni.

    LALPA chu châwimâwina te, ropuina leh chaknain A inthuâm a (Sâm 93:1; Sâm 104:1). A vêlah chuan chhûmte leh thimchhah chu a awm a (Sâm 97:2), chuti chungin Ani chuan êng chu silhfên angin a inbel” (Sâm 104:2). Hêng tawngkâuchhehte hian Lalber thuneihna leh ropuina sawina chu fîmkhur taka thlang chhuakin, Pathian ropuina danglam bîk, mihringte hriatthiam phâk ruâl loh a nihna chu a châwisâng a ni.

Chhiar tûr: Sâm 97. LALPÂ rorêlna chungchâng sawina chu eng nge ni? (Sâm 97:2, 10) A rorêlna huâm chin chu eng nge ni? (Sâm 97:1, 5, 9)

    LALPÂ rorêlna chu A thilsiamnaah (Sâm 96:5) te, chhandamnaah (Sâm 98:2) te, leh rorêlnaahte (Sâm 96:10) khân târ lan a ni a. LALPAN khawvêl pum puiah A lalna A tinghet a (Sâm 47:6–9). Pathian lalram chu chatuan lalram, thuneihna leh ropuinaa tluk ruâl loh a ni (Sâm 45:6; Sâm 93:1, 2; Sâm 103:19). LALPÂ rorêlna chu zahngaihna, rêldikna leh felnaa tihngheh a ni a, khawvêl siam tâkah chuan felna leh nghehna a thlen a (Sâm 98:3; Sâm 99:4). A rorêlna chuan Pathian fak tûrin vân lam leh lei lama chibaibûktûte chu lungruâlna a neihtîr a (Sâm 103:20–22; Sâm 148). Sâm tam tak hian mî zawng zawngte chu Pathian thuneihna rorêlna pawm tûrin a ti bawk (Sâm 96:10; Sâm 97:1; Sâm 99:1; Sâm 145:11–13).

    Mahse hê leia rorêltûte emaw, mî zawng zawngte emaw chuan chû chu an la ti rih lo. LALPÂ rorêlna chu mi suaksualten pawm duh lo vin, LALPA chu an neihsan a, A mîte an hnehchhiah bawk a (Sâm 14:1; Sâm 74:3–22). Mi suaksualte hmuingîlna hrethiam lo leh, Pathian dawhtheihna man thiam lo rih mah se, Sâm-phuahtûten Pathian thuneihna rorêlna chu rinchhana neiin, Ani chuan fel takin rorêlna a la hlen ang tih an ring tlat a (Sâm 68:21; Sâm 73:17–20). Kristâ tlanna rawngbâwlna zâra Pathian lalram lo inhawng ta chu Pathian mîten rinnain an lâwm a, Kristâ lo kal leh huna A lalram lo ding tûr chu an nghâk fan fan a ni (Matthaia 12:26″28; 1 Korin 15:20–28).

“Nangni Lalpa hmangaihtûte u, thil tha lo haw rawh u!” (Sâm 97:10,). Engati nge Pathian kan hmangaihna chuan thil tha lo min huâttîr ang? Engtin nge hêng thil pahnihte hi an inkûngkaih?

Thawhlehnî                                                        January 16

Pathian Chu Rorêltu

Chhiar tûr: Sâm 75. Engati nge mi suaksual chapo-uânna chu eng mah lo mai a nih?

    Lal chungnungber a nih angin, LALPA chu Dân-petu (Sâm 99:7) leh Rorêltu (Sâm 98:9, Sâm 97:2) a ni bawk a. Pathianin khawvêla A dinngheh tawh chungchângah mi suaksualten mi felte dinhmun an tiderthâwng fo va; mahse, LALPAN khawvêl chunga rorêlin, thil tha lo tâwpna A la thlentîr dâwn a ni (Sâm 75:8–10; Sâm 96:13).

    Sâm 75-ah, mi suaksualte borâlna tûr chu thil chi hrang hrang hmanga entîr a ni a. Nova uain sen (Sâm 75:8) hian Pathian thinurna namên lohzia a entîr a (Jer. 25:15; Thup. 14:10). Mi suaksualte kî tansakna hian an thuneihna leh ram tâwpna a entîr a; mi felte kîte erawh chu châwisân a ni ang (Sâm 75:10). Pathianin ‘hun remchâng’ (Sâm 75:2) emaw “hun ruât” (NIV) emaw chu rorêl nân A thlang a. Hê hlenchhuah rorêlna hi hun tâwpnaah a lo thleng ngêi dâwn a ni (Sâm 96:13; 1 Korin 15:23″26).

    LALPAN A rorêlnaah chuan mîte thinlung chhûng a en dik dâwn. Sâm 14:2 chhiar la. Hei hian Genesis 6:5, 8 min hriat chhuahtîr a. Hêng châng hnihte hian Pathian hlenchhuah rorêlna thlen hmâin, tûte nge chhanhim theih tûr tih hriat nân, Pathianin mîte nun A endik hmasa thîn tih a entîr a. Hê rorêlna hi eng emaw châng chuan “rorêl lâwkna” tih niin, Pathianin A mi felte tanzâwng leh mi suaksualte tâwpna tûr thutlûkna A siamna tûr a ni. Engtia kalpui tûr nge?

    A hmasâin, Pathianin A mîte chu mi suaksualte lakah A chhanchhuak dâwn a (Sâm 97:10; Sâm 146:9), mi inngâitlâwmte chu chhandamna lallukhum a khumtîr ang (Sâm 149:4). A dawtah, sual sim lo mi suaksualte chu chatuana tihboral an ni ang (Sâm 97:3). Sâm hlathu thenkhatah chuan

    Pathian Rorêlna laka mihringte râlthuâm tlâktlâi loh tûrzia târ lan a ni (Sâm 76:3–6). Mîte chu an tihsualah hrem thîn bawk mah se (Sâm 99:8), LALPA chu ngaidamtu Pathian pawh a ni a. Mi sualsualte chauh ni lo vin, Pathian mîte pawh Pathian hmâah an la ding dâwn a ni (Sâm 50:4; Sâm 135:14).

    Sâm-in a sawi ang zûl deuh hi Bible châng dangte pawhin târ langin, Pathian rorêlna chu Pathian mîtea tanin, khawvêl pum pui a huâp dâwn a ni (Deut. 32:36; 1 Pet. 4:17). Sâm-phuahtûin Pathian chu amâ ro rêlsak tûra âu chhuakin, amah humhim tûrin Pathian felna a rinchhan thung a ni (Sâm7:8–11; Sâm 139:23, 24).

Hêng Sâm hian Pathian rorêlna thlîr chunga lâwm tûrin min ko va (Sâm 67:4; Sâm 96:10–13; Sâm 98:4–9). Engtin nge Pathian rorêlna thû hi Kristâ thisena hliahkhuhte tân chanchin lâwmawm a nih?

Nilâinî                                                                  January 17

A Thuthlung A Vawng Reng

Pathian rorêlna thupui hian zawhna pawimawh tak min chochhuahsak a: Engtin nge rorêlna hunah pawh Pathian mîten Pathian nêna inremna leh chhandam nih chiânna an neih theih? Chhiar tûr: Sâm 94:14; Sâm 105:7–10; Daniela 7:22.

    Pathian mîte an him theih chhan chu, LALPAN Zion a chênchilh a (Sâm 76:1, 2), chutah chuan A chatuan thuthlung chu A rohlû anga A dinngheh vâng a ni (Sâm 94:14; Sâm 105:8–10). Pathianin A thuthlung mîte hnar loh ngawt A tiâm a ni lo; Amaha an him theih nân anni chu A thawhsak reng zâwk a ni. Ani chuan A mîte chu an sualnate ngaidamin (Sâm 103:3); A zirtîr a, mal sâwmin, A tichak zui zêl a ni (Sâm 25:8–11; Sâm 29:11; Sâm 105:24). Pathianin rorêlna a kalpui chhan chu, mîte chu felna lam hawitîr a, anni chu Pathianin A ngaihsak a ni tih târ lan nân a ni (Sâm 94:8–15).

    Sâm 105 hian Israelte chanchin a LALPA chu A thuthlunga A rinawm zêl thû a sawi ber a. Thilthleng, a chhia leh tha tinah khân, Pathian chu a tel vê zêl a. Amâ remruâtnain Josefa kha Aigupta ramah hruai a ni a, chû chu hnamte chunga tâmpui râpthlâk a lo thlen huna A mîte A chhanhim theih nân a ni (Sâm 105:16–24). LALPAN A mîte chu Aigupta bâwih nihna atanga hruai chhuak tûrin Mosia A din a, chû chu anmahnî tâna chhinchhiahnate leh thilmakte tîin A hlen ta a ni (Sâm 105:25–38).

    LALPAN A mîte hnênah Ram Tiâm pêk (Sâm 105:11, 44), leh anmahni vênhim zêl (Sâm 105:12–15) A tiâm a. Anni chu nasa taka tipungin (Sâm 105:24) , anmahni hnehchhiahtûte lakah a chhanchhuak a (Sâm 105:37, 38), an nî tin mamawhte A phuhrûksak zêl a (Sâm 105:39–41). LALPA chu A mîte chunga thuneitu lalber a ni takmeuh— chû thutak chu A mîte khân theihnghilh ngâi lo tûrin Sâm– phuahtûten an duh a ni.

    Pathianin A thuthlung A hriat rengna hian, hriat reng satliah ngawt a kâwk lo va, a takin A chêtpui fo thîn a ni (Gen. 8:1; 1 Sam. 1:19; Sâm 98:3; Sâm 105:42–44). Chutiangin, Pathian thilmak tihte leh rorêlnate hre reng tûra koh an nihnaah hian, mîte chu Pathian châwimâwi tûrin an nung tûr a ni tih a kâwk a ni.

    Hê thutlungah hian, Israelte koh an nihna chu, Pathian dânte zâwma thuthlung chunga rinawm tûrin a ni (Sâm 78:5–7; Sâm 105:45). Pathian mîte hi hnam dangte hnêna Pathian nihna chungchâng thuhretûa tang tûra koh an ni, a chhan chu LALPAN hnam zawng zawngte chu A mî Israelte rawn zawm vek tûra A duh vâng a ni (Sâm 105:1, 2). Chutiang chuan khawvêl pum pui hi Pathian zahngaithei leh engkimtitheia thuthlung hmanga vênhim a ni thei dâwn a ni (Sâm 89:28–34).

Hmânlai Israelte hnêna lo tiâmsak tawhte kha, tûna keini tân bel theih a ni tih târ lantu eng nge Isua-ah kan neih? (En tûr, Galatia 3:26–29.)

Ningânî                                                                 January 18

I Thuhriattîrna A Dingnghet

Chhiar tûr: Sâm 19:7; Sâm 93:5; Sâm 119:165; Sâm 1:2, 6; Sâm 18:30; leh Sâm 25:10. Hêng chângahte hian eng thil thuhmun nge inzam chhuak le?

    LALPA chu khawvêla Siamtu, Lalber leh Rorêltu chungnung ber a nihna hi Amân A nihna a sawi rinawm tak a nihna hian thuzirna lamah nghawng pawimawh tak a nei a. Hriattîrna thûte (Hebrai ‘edut, “thupêk,” “dân”) tih hian LALPAN A mîte sâkhuana leh vântlâng nun inenkawl nâna dân leh thupêk A siamte chu a kâwk a (Exod. 32:15). Chûng chu “rinawm” tak (Sâm 93:5), Pathian lalthutthlêng ngheh leh tlozia a entîr a; chutiang chu Pathian siam khawvêl pawh a ni (Sâm 93:1, 2). Hebrai tawng “nghet” (English-a amen tih tawngkam tobul) hian rintlâk, rinawm leh nghet tih a kâwk a (2 Sam. 7:16; 1 Chron. 17:23). Pathian dânte hi thlâk danglam theih loh leh nuâi bo theih loh a ni.

    Pathianin A thutiâmte leh thupêkte thianghlimzia chu A nemnghet a. Pathian rinawmna chu A dân danglam thei lo anga muânpuiawm tak, mîten rinchhanngamna nêna Pathian thû an âwih zêlna phût lêt sî a ni.

    Chutih ruâlin, khawvêla rêldikna tlâkchham a nihna chu hla thu hmangin leilung lungphûm nghîng anga sawi a ni (Sâm 18:7; Isa. 24:18–21). Pathian dânin mîte chu nun fel neihna kawng a kawhhmuh a, chû chu Pathian rorêlnaa ding thei tûr a ni. Mi felte chu an nghîng lo vang, a chhan chu Pathian dâna nghet taka zungkaih an nih vâng a ni. Chû chuan nghehna leh muânna an thinlungah a neihtîr a, an thinlungte chu LALPA-ah a nghet tlat a (Sâm 112:1, 6, 7). Pathian dân vawngtûte chu eng mahin a tinghîng thei lo (Sâm 119:165), chû chuan Pathian vênhimna leh nun A kaihhruaina chu a entîr a ni (Sâm 1:2, 3, 6).

    Pathian thû hi Sâm-phuahtu chuan ke tâna ‘khâwnvâr’ angin a sawi a, chutiang chuan hmêlma thang kam rûk lakah pawh a him thîn (Sâm 119:105, 110). Pathian dân ngainatûte chuan thlamuânna namên lo tak an chên thîn a (Sâm 119:165), chû chu fiahna leh harsatna awm lo tihna chu a kâwk lo (Sâm 119:161). Pathian chênna hmuna awm rengna zâra lo chhuak niin, Amah nên inlaichînna hrisêl an nei reng a ni.

Engtiang kawngtein nge Pathian dân te, kaihruaina leh thuhriattîrnate zawmna hian nangmâ nunah a takin i lo sâwtpui? A lehlamah, chûng i bawhchhiat vângin eng nge i lo tawrh?

Zirtâwpnî                                                            January 19

Zir Belhna: Chhiar tûr: Sâm 86:5, 15; Ellen G. White lehkhabu, Krista Panna Kâilâwn-a “Pathianin Mihring A Hmangaihzia,” pp. 7–13. Engtin nge ‘Pathian chu hmangaihna a ni’ tih thutak hian, Sâm-in a târ lan Pathian leh A thiltih chungchâng hrang hrang manthiam zâwk tûra min tanpui?

    Tûn kâr zirlai hian Pathian leh A chêtna chungchâng thil pawimawh zuâl deuhte min enpui a, Ani chuan khawvêl hi dinin, nghet leh rinawm takin A awmtîr a. Siamtu, Lalber, Rorêltu, thuthlunga Chhandamtu, leh Dân-petu Pathian hnênah Sâm-phuahtûten ngenna an thlen a. Khawvêla Pathian dinhmun luah hrang hrang chu Amâ hming leh nihna hmanga târ lan a ni a, chûng zîngah chuan Berâmpû (Sâm 23:1, Sâm 80:1), Chhandamna Lungpui (Sâm 95:1), leh Pâ (Sâm 68:5; Sâm 89:26) tihte pawh a tel.

    Indona Ropui vângin buâi manganna nasa tak kârah pawh him leh muâng takin kan awm thei, a chhan chu Pathian chu a thil tih leh sawi zawng zawnga rinawm leh chungchuâng ber a nih vâng a ni. Hetiang lam thû hi chu sawi zawh sên ruâl a nih loh avângin, Sâm-a Pathianin Mahnî a rawn inpuânchhuahna kawng hrangte lek a ni zâwk.

    Sâm bû kan zir chhunzawm zêl laiin, Pathian hmangaihna, khawngaihna leh khawvêl hi a dinhmun ngâia awmtîr leh tûra A chhandamna ruâhman ênga kan chhiar thin a pawimawh hlê a ni. “Kraws êng atanga Pathian nungchang kan zir nasat poh leh zahngaihna te, zaidamna te leh ngaihdamna dik takte leh, felnate kan hmu tam ting mai dâwn a ni. Nûin a fa luhlul tak mai pawh a hmangaih êm êm tho ang bawkin, chû hmangaihna chhiarsên rual loh leh dai thei ngai lo chu kan lo hmû a ni.”—Ellen G. White, Krista Panna Kâilâwn, p. 13.

    Sâm-ah hian, an helna avângin Pathian hremna hmachhawn lâi meuh pawhin, Pathian thinurna chu hun rei lo tê atân mai a ni tih leh, A zahngaihna chu chatuan daih a ni (Sâm 103:8) tih an hriat avângin, Pathian chu an lam leh ngê ngê dâwn a ni.

Sawi Ho Tûr:

@Pathian chu Rorêltu leh Thuneitu chungchuâng a ni chunga kan khawvêla buai leh manganna thleng reng tho sî hrethiam tûrin engtin nge Indona Ropui hi a takin a la kal mêk a ni tih manthiamna hian min tanpui theih ang? Engati nge Indona Ropui kalhmang hriat hi kan tân a sâwtpuiawm viâu?

@Pathian chu Siamtu a ni tih rinna hian keimahnî leh thilsiam dangte nêna kan inkûngkaih dân manthiam tûrin engtin nge min tanpui? Chû thutak laka mî a kal pênin eng nge thleng thîn (Sâm 106:35–42)?

@Bible hun laia hnamte milimte dik lohna kha eng nge ni (Sâm 115:4–8)? Tûnlai milimte hi eng nge an an? LALPA nêna kan lên dunna kawngah engati nge an hlauhawm vê tho dân?OPathian rorêlna chu A mîte chunga tan a ni tawh tih hriain, Pathian mîte chu engtianga nung tûr nge an nih ang? Engtin nge Pathianin A mîte ro A rêlsak, eng nge A tum?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †