Zirlai-4 -2024 1st Quarter

Zirlai 4                                                  January 20–26, 2024

LALPAN A NGAITHLÂIN A CHHANCHHUAK |HÎN

CHÂNGVAWN: “Mi felte chu an âu va, tin, LALPA chuan a lo hria a, an manganna zawng zawngah chuan A chhan chhuak tâ a,” (Sâm 34:17).

Sabbath Chawhnû                                               January 20

Chhiar Tûr: Sâm 139:1–18; Sâm 121; Sâm 17:8; Matthaia 23:37; 1 Korin 10:1–4; Hebrai 4:15, 16.

    LEI leh vânte Siamtu leh tungnung zui zêltu LALPA chungnungber chuan, mimal Pathian A nihna anga Mahnî inpuâng chhuakin, A mîte nên inlaichînna neihpui zêl A duh tih thutak chu Sâm hian a puâng nawn fo thîn a.

    Pathianin A mîte leh A thilsiam chu leiah leh vânah pawh A hnaih chilh reng thîn a (Sâm 73:23, 25). Ani chuan “vânah A lalthutthlêng A dinnghet ta” (Sâm 103:19) nâin, “chhûm chunga chuâng” (Sâm 68:4, NKJV) chungin, Ani chuan “a kotu zawng zawngte chu a hnaih thîn, tih tak zeta Amah kotu zawng zawngte chu” (Sâm 145:18). Sâm hian LALPA chu Pathian nung a nih thutak hi tîm hauh lo vin a châwisâng a, Ani chuan Amah kotute tân A che thîn (Sâm 55:16–22). Ani chu Pathian nung, tawngtainate ngaithlâ a, chhâng thîntu a nih avângin Sâm-in a sawi dân hi a dik chiah a ni. LALPA chu kan bul hnâia awm a nih kan chhân lêtnaah hian, Amaha rinna nun neiin, A thupêkte kan zawmna a tel tih kan hre reng tûr a ni. Chutiang tak rinna leh thuâwihna tel lo chu, Israelte chanchina kan hmuh fo angin, Ani tân pawmtlâk a ni.

Sunday                                                                  January 21

Ka Ruhrêlte I Laka Thup A Ni Lo

Chhiar tûr: Sâm 139:1–18. Engtin nge hla thu hmangin Pathian thiltihtheihna (Sâm 139:1–6), chênchilhna (Sâm 139:7–12), leh thatnate (Sâm 139:13–18) chu târ lan a nih? Pathian ropuinain Amâ thutiamte chungchâng eng nge a sawi chhuah?

    Mî tûte emaw tanpui i duh a, mahse, tanpuina tûr neih loh châng i nei tawh ngai em? Chutiangin, mî tûten emaw tanpui che an tum a, mahse i mamawh tak chu an hre bawk sî lo. Mi rilru thâ, hmangaihnaa-khatte meuh pawh ang lo takin, Pathian chuan min hre chiang êm êm a, kan dinhmun dik tak pawh A hre bawk a, min tanpuina tûr pawh A nei bawk. Chuti chuan, min tanpui leh chhanchhuahna tûra A thutiâmte pawh thû mai ni lo vin, innghahngamna a ni.

    Pathianin Sâm-phuahtu chu a hriat chiân êm avângin a nû chhûl pawhin Pathian lakah a thup thei chuâng lo (Sâm 139:13, 15). Chunglam hriatna hi a tlo va (Sâm 139:2), a rilin (Sâm 139:2, 4), a huâm zâu bawk (Sâm 139:3)—Sâm– phuahtû nihna pum pui a huâm vek. Pathian hriatna mak tak hi Siamtu leh mîte vil rengtu A nihna rah chhuah niin, anmahni A enkawlnaa târ lan a ni thîn.

    Hê Pathian min hriatna chungchâng thutak maktak hian min tihlâu tûr a ni lo va, kraws chunga min lo tihsak tâk leh Amah Isuâ hnên lamah min hîp hnâi zâwk tûr a ni. Isuaa rinna zârah, A felna, Amah “Pathian felna chu” pêk kan ni (Rome 3:5, 21).

    Pathian chênchilhna chu, Pathian chu ‘hremhmun’ (thlân, sheol) leh ‘thim chhah’ (Sâm 139:8, 11, 12) pawh thleng phâk anga sawi a ni a; hêng hmunte hi Pathian chênna hmun (Sâm 56:13) anga sawi a ni ngai meuh lo. A chênchilhna chu ‘zîng thlâ’ (khawchhak) thleng phâk a, ‘tuifinriât thûk lai ber’ (khawthlang) (Sâm 139:9) pawh thleng phâk anga sawi a ni bawk. Hetianga ngaihruâtnaten a târ lan thutak chu, lei leh vânah hian Pathianin A pawh phâk loh hmun rêng a awm lo tih hi a ni. Pathian chu, thenkhat rin dân anga khawvêl pêng khat chu a ni lo nâin, Ani chuan engkim hi A hnaih vek a, A siam chauh ni lo vin, A tungnung zui zêl zâwk a ni (Heb. 1:3). Keimahnî chungchâng hre vektu a nih angin, Pathian chuan min tanpuiin, min dinthar leh thîn. A ropuizia hriat thar lehna zârah, Sâm-phuahtu chu Amah faka âuchhuahtîrin, Amah rinna a neihthartîr leh thîn. Chunglam enfiah nihna chu amâ nun atanga Pathian nêna inlaichînna tibuai thîntûte lâk bosakna angin a ngai hlauh zâwk a ni.

Mi thenkhat chuan Pathianin an thurûk thil tha lo chena hriatsak vek anga an ngaih avângin an hlauhphah zâwk thîn a. Chuti chu, engati nge chanchin thâ chu kan beiseina awm chhun a nih?

THAWHTANNΠ                                                                          January 22

Pathian Enkawlna Rinchhanngamna

Chhiar tûr: Sâm 40:1–3; Sâm 50:15; Sâm 55:22 leh Sâm 121. Engtin nge Pathian chu kan nî tin nunah A lo chêt thin?

    LALPAN Amah chu Pathian nung, Amah lamtûte tâna lo che thîn angin Bible-ah hian a inpuâng chhuak a.

    Sâm-phuahtu chuan, “LALPA chu ka hmâah A awm fo” a ti a (Sâm 16:8). Tichuan, Pathian rinchhanin, Amah chu a lam thîn (Sâm 7:1; Sâm 9:10). “(Tui) thûk takte” atanga a auh pawhin LALPAN A ngaithlâ ang (Sâm 130:1, 2), hê thû hian Pathian lalna chuan nun kawng engkim A huâm vek tih a entîr a. Chutiang chuan, Sâm-phuahtû mangang âu chu, eng anga hmanhmawh thlâk pawh ni se, beisei bo a ni ngai rêng rêng lo.

   Chutih laiin, Sâm 121 hian, mimal rinawm nuna Siamtû thiltihtheihzia chu a châwisâng vê thung a. Hê thiltihtheihnain a huâm tel chu:

1. “Ani chuan i kê chu tihsawn a phal lo vang” (Sâm 121:3). ‘Kê’ ngaihruatna hian nun zinkawng a târ lang thîn a (Sâm 66:9; Sâm 119:105; Thuf. 3:23). Hebrai tawnga “sawn” tih chuan Pathianin khawvêl (Sâm 93:1) leh Zion (Sâm 125:1) hnêna himna A pêk thû a sawi.
2. Ngaihruâtnaa LALPA chu Israelte Vêngtu, ‘muthlû leh muhîl ngai lo’ tih hian LALPA chu engtik lai pawha A fâte tâna che chhuak tûra inring leh inpeih sâ reng a nihzia a entîr (Sâm 121:3, 4).
3. LALPA chu “zâr-hliahtu” (Sâm 121:5, 6) tih hian Kanaan ram pan laia thlalêra chhûm ding kha min hriat chhuahtîr a (Exod. 13:21, 22). Chutiangin, LALPAN A mîte tân tîsâ leh thlarau lama hliahkhuhtu A pe thîn.
4. Pathian chu ding lamah A awm (Sâm 121:5). Kut dinglam hian chakna, chêt chhuahna kut a entîr (Sâm 74:11; Sâm 89:13). Hetah hian Pathian hnaihzia leh duhsakna a târ lang a ni (Sâm 16:8; Sâm 109:31; Sâm 110:5).
5. Pathianin A mîte A huâlhimna chu chiang takin Sâm 121:6–8-ah nemngheh a ni. Pathianin A fâte chu thil tha lo zawng zawng lakah A humhim dâwn a. “Nî leh thlâin” a tihrehawm dâwn lo. Pathianin an ‘kal chhuak’ leh an ‘lût’ chu A humhim dâwn. Hêng hla thûte hian Pathianin zâu tak leh tâwpintâi nei lova A enkawlna chu an entîr a ni.

    A sawi tum ber eng nge? Sâm-phuahtuin hmangaih taka Pathian enkawlna a rinchhan hmiah a. Keini pawhin chutiangin kan ti vê tûr a ni.

Eng tiang kawngtein nge Pathian enkawlna hi tha zâwkin a taka i chan vê theih ang? Nangmâ chhûngah leh nangmâ tâna A thawh theih nân engtin nge Pathian chu tha zâwka i thawhpui theih ang?

Thawhlehnî                                                        January 23

LALPA Chu Hun Harsâa Inhumhimna A Ni

Chhiar tûr: Sâm 17:7–9; Sâm 31:1–3 leh Sâm 91:2–7. Buaina hunah Sâm phuahtuin eng nge a tih thin?

    Sâm-phuahtu hian buaina chi hrang hrang a hmachhawn a, chûng hunah chuan buaina lama inhumhimna, LALPÂ hnên lam a hawi zêl thîn a. Rinchhanngamna hi, kan nuna eng ang boruak pawhin min tlâkbuâk se, Pathian lalna leh thuneihna pawm zêl tûra duhthlanna siam hi a ni. Mangan huna rinna hi kan sâwtpui lo a nih chuan, khawi dangah mah kan sâwtpui tawh chuâng lo vang.

    Sâm-phuahtû testimoni chu, “LALPA chung thû-ah chuan, ‘Ani chu ka inhumhimna leh ka kulhpui; ka Pathian, ka rina chu a ni,’ tih a ni,” (Sâm 91:2,). Hêng thû hi hun kal taa a taka Pathian hriatna an neih atanga lo chhuak niin, tûnah hian hun lo kal tûra a rinna tihchakna a lo ni ta bawk a. Sâm -phuahtuin Pathian chu Chungnung Bera leh Engkimtithei tiin a sawi a (Sâm 91:1, 2), a Pathian ropuina chungchuânzia a hre reng a ni.

    Sâm-phuahtu hian Pathiana himna a hmuh thû a sawi bawk a: “hmun birû” (“bihrûkna” emaw “tawmbona hmun”), “hlim” (Sâm 91:1), “inhumhimna,” “kulh” (Sâm 91:2), “thlâte,” “phâw,” “phaw tê” (Sâm 91:4), leh “chênna hmun” (Sâm 91:9, NKJV) tîtein a sawi. Hêng ngaihruâtna thilte hian Sâm– phuahtû hnam nunah khân ‘chawlhna hmun him’ sawina a ni thîn. ‘Hlim’ hlutna manthiam tûr chuan, tawrh hrehawm khawpa nisatna hmun, thlalêr hmun angte ngaihtuah ni se la; chutiang zêlin Israelte chanchina inhumhimna phâw leh kulhte pawh chutiang tho chu a ni.

Chhiar tûr: Sâm 17:8 leh Matthaia 23:37. Hetah hian eng hlimthlâ nge hman ni a, eng nge a târ lan?

    Innêl taka awm sawina tawngkâuchheh pakhat chu “I thla hnuaia awm” (Sâm 17:8; Sâm 57:1; Sâm 63:7, NKJV) tih hi a ni. Hê tawngkam hian sava puiin a notê humhim tûra a awpna thlamuânpui awm tak chu a kâwk a. LALPA pawh chu mupuiin a thla hnuaia a notê a vênghim anga tehkhin a ni a (Exod. 19:4; Deut. 32:11). Arpuiin a notête a thla hnuaia a awp khâwm pawh tehkhin nân hman a ni bawk (Matthaia 23:37).

Chhiatnaten min tlâkbuâk a, LALPÂ vênhimna hmu thei anga kan awm laiin engtin nge kan lo tih thin le? Engati nge chutiang thlen vânga LALPA chu kan hnêna awm ta lo anga ngâi chuâng tûr kan nih loh ang?

Nilâinî                                                                  January 24

Humhimtu leh Chhanchhuaktu

Chhiar tûr: 1 Korin 10:1–4. Engtin nge Paulan Aigupta chhuahsan thû kha a sawi? Eng thlarau lam zirlai zirtîr nân nge hman a tum?

Chhiar tûr: Sâm 114. Engtin nge hetah hian hla thu hmanga Pathianin Aigupta atanga Israel mîte A chhanchhuahna kha sawi chhuah a nih?

    Sâm 114-ah hian Pathianin A fâte chu Aigupta bâwiha an tânna atanga mak taka A chhanchhuah dân hla thu hmangin a târ lang a. Thuthlung Hlui hun pum puiah leh, Thuthlung Tharah pawh, Aigupta ram atanga chhanchhuahna kha, A mîte chhanchhuak tûra Pathian thiltihtheihzia entîr nâna ngaih a ni thîn. Korin-a hêng chângahte hian Paulan chutiang tak chuan a ngai a, Isua Kristâ chhandamna entîr nân a hmang thung.

    Sâm 114 hian Siamtu a nihna anga thilsiamte chunga thuneitu A nihna anga Pathian thuneihna chungchuâng hmanga chunglam chhanchhuahna chu a târ lang a. Chutiang tak chuan Pathianin A mîte chu Aigupta atangin A chhanchhuak a ni. Tuifinriat te, Jordan Lui te bâkah, tlâng sângte leh tlâng tête kha Israelten Ram Tiâm an panna kawnga harsatna thlen theite an ni hlawm a (Deut. 1:44; Josh. 3:14–17). Pathian erawh chuan, chûng zawng zawngte chunga thuneitu chungchuâng A nihna chu a lantîr ta a ni.

    Pathian mîten vân Jerusalem an panna kawng tinah, khawi hmunah pawh hlauhawm hmachhawn tûr tam tak an nei a. Hêng Sâm-te hian chûng tlângte piah lama awm, lei leh vânte Siamtû lam chu thlîr zâwk tûrin min fuih a ni (Sâm 121:1).

    Sâm 114 nihna dik tak chu Isuan tuipuia thlipui A hâu rehnaah pawh khân a lo lang a. Khawvêl A hneh tawh avângin kohhran hian eng mah hlauh tûr a nei lo tiin A puâng bawk (Matthaia 8:23–27; Johana 16:33).

    A mîte tâna LALPÂ thiltih ropui takte avâng khân A chênchilhnaah lei pum pui kha a nghîng a (Sâm 114:7). Thil nghîng khân hlâu delênga awmna âiin chibaibûkna leh pawmna lam a kâwk zâwk tih hriat tûr a ni (Sâm 96:9; Sâm 99:1). Pathian chu an lamtang a ni a, ringtûten hlauh tûr eng mah an nei lo.

Ringtûte kan nih anga thlarau lam thila hlauhawm kan hmachhawn theih thil thenkhat chu engte nge ni? Sâm– phuahtu ang khân, chûng thil hlauhawmte chu hlâuva kimki mai lo tûrin LALPÂ thiltihtheihna atangin eng nge kan zir chhuah theih ang?

Ningânî                                                                 January 25

Hmun Thianghlim Atanga Tanpuina

Chhiar tûr: Sâm 3:4; Sâm 14:7; Sâm 20:1–3; Sâm 27:5; Sâm 36:8; Sâm 61:4; leh Sâm 68:5, 35. Hêng chângahte hian tanpuina chu khawi atanga lo thleng nge ni?                                                                                            

    Biak bûkah khân thlarau lam leh tîsa lam inhumhimna zirlaia hman theih tûr a awm hlawm a. Biak bûk kha tanpuina, himna leh chhandamna hmun a ni. Buaina tâwkte tân inhumhimna a ni bawk a. Pathianin fahrah te leh hmeithâite humhimin, A mîte hnênah pawh chakna A pe bawk thîn. “Mâwi famkimna, Zion atang chuan, Pathian chu a ên chhuah” (Sâm 50:2) hunin, Pathian rorêlna fel chu puânchhuah niin, LALPÂ malsâwmna chu a lo chhuak thîn (Sâm 84:4; Sâm 128:5; Sâm 134:3).

    Biak bûka humhimna chuan khawvêla humhimna dang zawng zawngte chu a khûm vek a, a chhan chu Amah Pathian ngêi chuan a taka A chênchilh vâng a ni. Pathian chênchilhna chu, biak bûk tinghettu ni ngawt lo vin, hmun him a ni bawk. Chutiangin, LALPÂ chênna tlâng, Zion Tlâng pawh chuan tlâng dang zawng zawngte chu a khûm vek a ni (Sâm 68:15, 16; Isa. 2:2).

“Puithiam Lalber, kan chak lohnate min hriatpui thei lo nei kan ni sî lo; keimahni anga kawng tin rênga thlêmna tâwk tawh, sual erawh chu sual lo, nei kan ni zâwk e. Chutichuan, zahngaihna kan hmuh theihna tûr leh, puih kan ngaih huna tanpuina khawngaihna kan hmuh theihna tûrin, khawngaihna lalthutphah chu huai takin i hnaih ang u,” (Heb. 4:15, 16). Engtiang kawngtein nge hêng thûte leh Sâm-phuahtuin biak bûk a sawi dân kha a inzûl le?

    Pathian biak bûk thianghlimna khân Sâm-phuahtu chu mî zawng zawng hi mi sual, Pathian duhsak phû lo vek an ni tih a pawmtîr a. Chhanchhuahna pawh chu Pathian rinawmna leh khawngaihna avâng chauh a ni tiin a sawi ta bawk (Sâm 143:2, 9–12). Keimahnia awm eng thil mah hian Pathian hmâa mi tlingah min siam lo. Mîten simna leh Pathian khawngaihna leh ngaihdamna pawmna zâra Pathian nêna inlaichînna dik neih chauhin, Pathian chhanchhuah nihna tûr chu an dîl thei. Biak bûk rawngbâwlna khân Isuaa chhandamna chu a entîr a ni.

Zirtâwpnî                                                            January 26

Zir Belhna: Chhiar tûr: Ellen G. White lehkhabu, Thlahtubulte leh Zâwlneite-a “Inbuânna Zân,” pp. 184–192. Jakoba nuntawng, thahnemngai taka dîlna leh khêk nei lova Pathian rinchhanna thiltihtheihzia chungchâng eng nge kan zir chhuah theih ang?

    Sâm-te hian Pathian kan rinna min tichaksak thîn a, Ani chu A chakna kuta an nun inkawltîrtûte tâna Inhumhimna thlâwn ngai lo chu a ni sî a. “Pathian ring tlattute tân chuan Pathianin thil ropui takte a ti thîn. Pathian mi intite hian chakna an neih theih loh chhan chu, anmahni finnaah an innghat tlat a, an tân Pathian thiltihtheihna lang chhuak tûrin hun remchâng an pe lo. LALPÂ thû chu an âwih a amah chu an rin tlat phawt chuan LALPA chuan Amah ringtute chu tanpui an ngaih hun apiangah a tanpui zêl ang.”—Ellen G. White, Thlahtubulte leh Zâwlneite, p. 514.

    Chuti chungin, Sâm thu thenkhatin thûtiâm min siamsak a, kan tûn dinhmun nên a intu lo viâu a nih hunin, chona lian tak min siamsak thîn. Chutiang hunah chuan, Pathian thatna rinchhan dân kan zir tûr a ni a, chû chu kraws chungah khân namên lo taka târ lan a ni.

    Chû bâkah, eng emaw châng chuan Sâm hi beiseina dik lo neih nân hman theih a ni tlat mai. Sâm 91:11, 12 thû dik lo taka Setanan a hmana Isuâ chhân lêtna kha, Pathian rinchhanna hi Amah fiah nân kan hmang tûr a ni lo tih entîrna a ni (Matthaia 4:5–7); a nih loh leh Amâ ruâhman kalha thil eng emaw ti tûrin Pathian kan ngên tûr a ni hek lo.

    “Krista kohhranah emaw, Kristian mimalah emaw, a hnehna ropui berte chu talent neih that emaw, lehkhathiam vâng emawa neih a ni lo va, hausakna leh mihring induhsakna vâng a ni hek lo. Chûng hnehna Pathian mîten an chan chu thahnem ngai leh, na tuar khawpa rinnaa Engkimtitheia thiltihtheihna bân chu an vawn tlat vâng a ni.”—Ellen G. White, Thlahtubulte leh Zâwlneite, p. 192.

Sawi Ho Tûr:

@In class-ah, Thawhlehni zirlai tâwpa zawhna kha sawi ho ula. Engtin nge hêngte hi hriatthiam a nih a, Sâm-a Pathian vênhimna thutiâm mak takte a awm chungin, hetiang mîte chunga lo thleng chu hriatthiam a nih theih ang? Hei pawh hi ngaihtuah teh: Thutiâm mak takte chungchâng ziaktu, Sâm-phuahtu hian harsatna tuârin, mi rinawm chutiang tuâr vête chu a hre lo em ni ang?

@Engtin nge eng ang dinhmunah pawh khêk nei hauh lo va Pathian kan rinchhan zêl theih ang (entîr nân, Sâm 91:14; Sâm 143:8, 10; Sâm 145:18–20)? Eng thilin nge hê rinngamna hi min hlohtîr thei? Engati nge hun tha lovahte Amah rinchhan dân kan zir theih nân, hun thâa Pathian rinchhan chu a pawimawh?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †