Zirlai-6 2024 1st Quarter

Zirlai 6                                                    February 3–9, 2024

KA THOLEH ANG

CHÂNGVAWN: “LALPA chuan, ‘Retheite an hnehchhiah avâng leh, pachhiate rûm avângin, Ka tho nghâl mai ang a; an nuihsanna chu him takin ka awmtîr teh ang,’ a ti a,” (Sâm 12:5).

Sabbath Chawhnû                                               February 3

Chhiar Tûr: Deuteronomi 15:7–11; Sâm 18:3–18; Sâm 41:1–3; Sâm 82; Sâm 96:6–10; Sâm 99:1–4; Rome 8:34.

    KAN hun hi thil tha lo te, hleihneihna te leh inhnehchhiahna hluâr hun a ni. Sâm-phuahtute pawh kha chutiang hunah chuan an lo chêng thîn a. Chutiangin, an nihna chu eng pawh ni se, Sâm hi Pathianin kan khawvêlah leh khatih lai khawvêla tharum thawhna leh inhnehchhiahna A dodâlna pawh a ni.

    Ni e, LALPA chu dawhthei tak niin, A chhelna ropui tak avâng chuan A thinurna chu a chelh hrâm hram a, chû chu tû mah an boral loh a, sima an nunkawng (sualte) an pênsan theih nân a ni (2 Pet. 3:9–15). Mihringten thleng tûra an ngaih ang hunah Pathian chu lo che kher lo pawh ni se, Pathian rorêlna nî chu a lo la thleng tho dâwn (Sâm 96:13; Sâm 98:9). Chû nî a lo thlen thlengin, Amah leh A thutiâmte chu kan rinchhan a ngai a ni.

    A lalthutthlêng nghahchhana felna leh rêldikna neitu chu Siamtu chauh a ni a (Sâm 89:14; Sâm 97:2); Ani chuan A rêldikna chungchuâng hmangin khawvêl tân nghehna te, hmuingîlna te A thlensak thei a. Chunglam rorêlna thuâng hnihah hian, hnehchhiahna laka chhanchhuahna leh mi suaksualte avânga boralna a tel a ni (Sâm 7:6–17).

    Hei hi tiâmsak kan ni a, hei hi nakinah a lo la thleng ang a, mahse, Sâm-phuahtuin uâr taka a târ lan angin, keini hun ruât ni lo, Pathian hun ruâtah zâwk a ni ang.

Sunday                                                                  February 4

Indomi Mi Ropui Chu

Chhiar tûr: Sâm 18:3–18; Sâm 76:3–9, 12; leh Sâm 144:5–7. Engtin nge hêng chângahte hian LALPA chu târ lan a nih? Chutianga lantîrna chuan A mîte chhanchhuak tûra Pathian inpeih sâzia chungchâng eng nge min hrilh?

    Hêng fakna hlâte hian A mîte tirâltitu sual sipaite chunga A thiltihtheihna namên lo tak avângin LALPA chu an fak a. Pathian chu Indomî leh Rorêltu ropui A nihna angin Pathian chu a târ lang a. Indomî anga Pathian târ lanna hi Sâm-ah a lang fo va, A mîte hrehawm tuâr mangang âu Pathian chhânna hmanhmawh leh namên lo chu a entîr a ni.

    “LALPAN vân atangin khawpui a rîktîr a. Chungnung Bera chuan a âw a chhuah a, Riâlte leh mei-alh hlâwm te a tla dur dur a. Ani chuan a thalte kâp chhuakin hmêlmâte a tidarh a, Namên lova têk tlâktîrin, anni chu a tiboral a. Tichuan tuifinriat luânnate chu hmuh a ni a, Khawvêl lungphûmte chenin a lo lang a. Âw LALPA, i zilhhâu avângin, I hnâra thâw chhuakin” (Sâm 18:13–15, NKJV).

    Hrehawm tuârte Pathianin nasa taka A ngaihsak leh lainatzia emaw thil tha lo hneh thei a nihna mai pawh hian, Pathian chêt dân rinhlelhna eng pawh a hnawt bo tûr a ni. Chutiang ti tûr chuan Ani chu kan nghah a ngai a ni.

    A tâwpah chuan, Pathian mî, khâng Davida-te ang meuh pawh kha indonaah an che thîn a, chhanhimna erawh chu mihring hmanraw hmanga lo thleng a ni ngai lo. Pathian mîte hmêlmâte dova a beihna tam takah, Lal Davidan Pathian chauh chu hnehna chan theihna hnâr angin a fak thîn. Thil thleng hlawhtlinna leh hnehna a chanah khân, Davidâ tân mahni han infak mai pawh a awl hlê ang; mahse, chutiang rilrû chu a pu lo. A chakna lo chhuahna Hnâr chu a hre sî a.

    ‘LALPAN ka kutte chu indo tûrin a zirtîr’ tiin Davidan a sawi nâin (Sâm 18:34), Sâm khawilaiah mah a indo thiamna a rinchhan thû a chuâng lo. Chuti a hnehin, LALPAN Davida chu dosakin, A chhanchhuak thîn (Sâm 18:47, 48).

    Indonaah a hlawhtling hlê thîn tih hriat a ni chungin, Sâm– ah hian, Lal Davida chu rimâwi tum thiâm niin, Chhanchhuaktu leh A mîte Tungnungtu a nihna angin LALPA chu a fak zâwk thîn (Sâm 144:10–15). LALPA fakna leh tawngtaina chu Davidâ chakna hnâr niin, chûng chu indona hriamhrei dang zawng âia thiltithei zâwk a ni. Pathian chauh chu rinchhan leh chibaibûk tûr chu a ni.

Nangmâ nunah thilpêkte leh thiamna te, hlawhtlinnate eng pawh lo nei la, engati nge chûng lo chhuahna Hnâr chu hre reng tûr i nih? Chû chu i theihnghilhin eng hlauhawm nge awm?

THAWHTANNΠ                                                                          February 5

Hnehchhiahte Tâna Rêldikna

Chhiar tûr: Sâm 9:18; Sâm 12:5; Sâm 40:17; Sâm 113:7; Sâm 146:6“10 leh Sâm 41:1–3. Tûnah ngêi pawh, hêng chângahte hian kan tân eng thuchah nge awm?

    Pathian chuan dinhmun derthâwnga ding mi chi hrang hrang: rethei te, tlachham te, hnehchhiah tuâr te, fahrah te, hmeithâi te, parawl leh mikhualte pawh engtovin, A ngaihsakzia A lantîr thîn. Sâm hi Dân thû leh zâwlneite thû ang thovin, chutiang thû-ah chuan a chiang a ni (Exod. 22:21–27; Isa. 3:13–15).

    Sâm tam takah chuan ‘rethei leh tlachham’ tih tawngkam hi hnam leh sâkhaw thila hnehchhiah tuârte sawi nân a hmang a. Hei hi khawvêl puma mihringte Pathianin A ngaihsakzia entîrna tûr a ni.

    “Rethei leh tlachham” tih hi sum leh pâi thila rethei sawina chauh a ni lo va, tanpui ngai leh dinhmun derthâwnga dingte sawina pawh a ni. Hê tawngkam hian Pathian khawngaihna a ngên a, chutianga tuârtu chuan Pathian chauh lo chu tanpuitu tûr a nei lo tih a kâwk a. ‘Rethei leh tlachham’ tih hian nuntlang leh rinawm, Pathian rinchhana nung a, mahni-inrinchhanna leh mahni-uânpuina ang chî hnar tih a kâwk thei bawk.

    Chutih laiin, endawng tuâr ngaihsakna (Sâm 41:1–3) hian Pathian chunga rinawmna a entîr a. Bible hun laia humhimtu nei vê lote chunga sual chimawm tak tih angte kha (Deut. 15:7–11). Sâm hian mi rinawmte chu hnehchhiahna thlavân hauh tûrin a chawkphûr thîn.

    Sâm hian finna leh himna hnâr anga mihring thil boral leh mai tûr chunga rinna nghah eng mah lohzia a entîr a. Pathian mîte chuan thlêmna dovin, chhandam nâna mihring hruaitûte leh kutchhuakte ringchhan an dodâl ang, a bîkin Pathian kawngte nên a inpersan hunin.

    A khawngaihnain, kan LALPAN Ani chu rethei zînga A inchhiar tel a, chu chu A retheihna zâra kan lo hausak theih nân a ni (2 Korin 8:9). Kristâ hausakna khân sualnain a thlen hnehchhiahna tin rêng laka chhanchhuahna a huâm tel a; Ani chuan Pathian lalrama chatuan nunna min tiâmsak a ni (Thup. 21:4). Isua Kristan Sâm-a thutiâmte chu, chunglam Rorêltu, hnehchhiah tuârte leh, chutiang mîte chunga tihtûr hlamchhiahna tâna rorêlsaktu nihna chu A hlen chhuak ta a ni (Matthaia 25:31–46).

Engtin tak nge kan zînga ‘pachhia leh tlachhamte’ kan ngaihsak a, an tân eng zât nge kan tihsak?

Thawhlehnî                                                        February 6

Eng Chen Nge Mi Fellote Ro I Rêl Dâwn?

    LALPAN Israel hruaitûte hnêna Israel zînga rêldikna vawng tûrin thuneihna A pê a (Sâm 72:1–7, 12–14). Israel lalte kha Pathian duhzâwng ang zêla an thuneihna hmang tûr an ni a. Hruaitûte thil vei tûr chu vântlâng zînga chanchhe deuh zâwkte ngaihsak a, ram chhûnga muânna leh rêldikna awmtîr a ni. Chutiang chauh chuan ram chhûnga mî zawng zawngte chu an hmuingîl thei ang. Lalthutthlêng chu, mihring chakna ni lo, Pathian chunga rinawmna hmang zâwka tihngheh a ni thîn.

Chhiar tûr: Sâm 82. Hruaituten rêldîkna palzût a, an humhim tûrte an hnehchhiah zâwk hian eng thil nge thleng thîn?

    Sâm 82-ah, Pathianin Israel rorêltûte hlemhlêtna vânga A hremna A thlentîr tûr thû a puang a. An ‘pathiante’ (Sâm 82:1, 6) kha ringlote pathiante emaw vântirhkohte emaw pawh an ni lo tih a chiang a; a chhan chu Pathian mîte chunga rêldikna thlentîr tûra tih emaw an ni ngai lo va, an tâna rorêlsak leh hlenchhuah pawh an tithei hek lo. Sâm 82:2″4-a tihtûr târ lante hian Torah dânte min hriattîr a, Israel hruaitûte chu ‘pathiante’ tih an ni (Deut. 1:16–18; Deut. 16:18–20; Johana 10:33–35). Pathianin “mihring fapâte” hnênah fel takin ro an rêl em tih a zâwtin, anmahni hremna tûr puân chhuah a ni a, a chhan chu an fel lohna hmuhchhuah a nih vâng a ni. Hruaitûte chu hriatna nei lovin thim zîngah an petek a (Sâm 82:5), a chhan chu Pathian dân, êng chu an hlamchhiah vâng a ni (Sâm 119:105).

    LALPA chauh chu Pathian a nih thû hi Lehkhathûin a châwisâng a. Khawvêl awpna hnâ thawk tûrin Pathianin Amâ âiawhtu, hruaitû atâna A ruâtte kutah A dah a (Rome 13:1). Chutih laiin, hêng âiawhtu mihringte hian, hmânlai leh tûnah ngêi pawh, an kuta mawhphurhna dah chu an hmang khawlo zo ta a ni.

    Sâm 82 hian mipuite chunga ‘pathiante’ anga inchâwisâng, hruaitu thenkhat chu a nuihsawh a. Pathianin Israel hruaitûte hnênah thuneihna leh hamthatnate pêin, ‘Chungnung Ber fâte’ tih, Amâ âiawhtu tûrte an ni nâin, Pathianin hruaitûte suahsualna chu A dem a ni. Ani chuan anni chu thithei leh mi dang zawng zawngte dânte ang lek an ni tih a hriattîr a. Mî tû mah hi Pathian Dân chunga lêng an awm lo (Sâm 82:6–8).

    Pathianin khawvêl pum pui chungah ro A la rêl dâwn a; Pathian mîte meuh pawhin Pathian hmâah an chanchin an la thlen ang. Hruaitûte leh mipuite pawhin chunglam Rorêltu chu entawna hmangin, Amahah chuan an beiseina an nghat tûr a ni.

Mi dangte chungah eng thuneihna ang chî nge i neih? Chû thuneihna chu eng ang taka dik leh felin nge i kalpui mêk? Chîk takin ngaihtuah teh.

Nilâinî                                                                  February 7

I Thinrimna Bun Chhuak Rawh

Chhiar tûr: Sâm 58:6–8; Sâm 69:22–28; Sâm 83:9–17; Sâm 94:1, 2; leh Sâm 137:7–9. Hêng Sâm-te hian eng rilrû nge a sawi chhuah a? Hêng chângtea rorêltû tûr chu tu nge ni?

    Sâm thenkhatin Pathian chu an mimal leh hnam chunga chhiatna thlentûte chunga phubâ lâksak tûrin an ngên a, chutiang chu Sâm-phuahtute leh an mîte tân pawh a ni. Hêng

    Sâm-te hi a tawngkam dêngkhâwng leh Bible zirtîrna anga ‘hmêlmâte hmangaih’ (Matthaia 5:44) tih thû nên a inkalh avângin ngaih thiam a harsa thei.

    Chuti chungin, hnehchhiahna hmachhawna ngaihtheih loh hi Sâm-phuahtute tân thil pângngai a ni. A awmzia chu, mi dang tam takte âiin Sâm-phuahtute hian thil dik leh dik lo an ngaipawimawh zâwk tihna a ni. Ani chuan khawvêla thil tha lo thleng, Amâ chunga thleng chauh ni lo, mi dangte chunga thlengte hi A engto êm êm a ni.

    Chutih laiin, Sâm-phuahtu hian phuba latû angin a inngai ngai hauh lo thung a. Chû chu Pathian kutah a dah mai zâwk a. Sâm hian thuthlunga ânchhiate (Deut. 27:9–16) min hriattîrin, A tiâm ang ngêia Pathian chu lo che tûrin a ngên a ni.

    Sâm hi Pathian rorêlna lo thleng tûr puân lâwknate a ni hlawm a; Sâm-phuahtute tawngtaina ngawt a ni lo. Sâm 137 hian Babulon chunga chunglam rorêlna lo thleng tûr, zâwlneiten an lo hmuh chu a târ lang a. Babulon mîten hnam dangte chunga chhiatna an thlen kha an chungah a lêt dâwn a. Sâm hian thil tha lo hi hrem lohin a chhuak lo vang tih chunglam vaulâwkna chu a puâng a ni.

    Pathian hremna hi rêldikna leh khawngaihnaa teh a ni a. Pathian fâte chu dik lo taka titûte tâna tawngtaisak tûra koh an ni a, an lo pianthar pawh beisei hiâl tûr a ni (Sâm 83:18; Jer. 29:7).

    Chutih laiin, hêng Sâm thûte hi Bible zirtîrna anga ‘hmêlmâte hmangaih’ tih thû nên dawh rem kan tum laiin, hênga târ lan tawrhna hi palzam lo tûrin kan fîmkhur hlê tûr a ni. Pathianin A fâte tawrhnate hi A hria a, “A mi thianghlimte thihna chu LALPÂ hmuhin hlu tak a ni,” (Sâm 116:15, NKJV) tih a hriatnawntîr a. Chunglam rorêlna chuan Pathian mîte chu thil tha lo zawng zawng dodâla âw chhuah a, Pathian lalram lo thlen famkimna tûr zawng tûrin a fuih a. Sâm hian hrehawm tuârte chu âw chhuahtîrin, Pathianin an tawrhnate A hria a, engtikah emaw chuan rêldîkna a la thlentîr dâwn tih a hriattîr a ni.

Mahnî chungah emaw, hmangaihte chungah emaw thil râpthlâk takte thlentîrtû chunga phuba lâk ngaihtuah châng nei lo tu nge awm ang? Engtin nge hêng Sâm-te hian chutiang chungchânga ngaih dân dik nei tûra min tanpui?

Ningânî                                                                 February 8

LALPÂ Rorêlna leh Hmun Thianghlim

Chhiar tûr: Sâm 96:6–10; Sâm 99:1–4; leh Sâm 132:7–9, 13–18. Pathian rorêlna (hremna) hi khawiah nge a thlen thin a, a chhânna chuan kan tân eng kawh nge a neih tel? Engtin nge Hmun Thianghlim (biak bûk) hian Pathianin thil thalo A chinfel dân hrethiam tûra min tanpui?

    LALPÂ rorêlna leh biak bûk hi a inlaichîn hnâi hlê a. Sâm– phuahtu chuan biak bûk rawngbâwlna hmangin thil tha lote senghawi a nih dân hmang chu a hrethiam a (Sâm 73:17–20). Biak bûk kha chunglam rorêlna hmun, Urim hmanga rorêlna leh (Num. 27:21), puithiam lalber âwmbel hmanga rorêlna (Exod. 28:15, 28–30) chu a ni. Chutiangin, Sâm tam takin Pathian chu biak bûka A lalthutthlênga thû, sual leh thil tha lote vânga rorêl tûra inpeih sâ angin a târ lang a ni.

    Biak bûkah khân chhandamna ruâhman chu entîr a ni a. Ringlote zîngah, sual chu tîsa bawlhhlawh kâi, dâwi thilte hmanga tihbo tûr anga ngaih a ni thîn. A lehlamah, Bible-in sual chu Pathian thatna dân bawhchhiatna angin a sawi thung a. Pathian thianghlimna awmzia chu, Ani chuan felna leh rêldikna A ngainâ tihna a ni. Chutiangin, Pathian mîte pawhin felna leh rêldikna an ûmin, A thianghlimnaah Pathian chibai an bûk tûr a ni. Chutiang ti tûrin, A thianghlimna târ lanna, Pathian dân chu an vawng tûr a ni. Tichuan, biak bûk chu sual ngaihdamna leh felna dinthar lehna hmun a ni a; chû chu Pathian zahngaihna lalthutthlêng leh “felna inthâwinatte” khân a lo entîr a ni (Deut. 33:19; Sâm 4:5).

    Chuti chungin, “Ngaidamtu-Pathian” chuan sual sim duh lote thil sual tih chungah phubâ a la thîn (Sâm 99:8, NKJV). Chunglam rorêlna hmun a nihna anga biak bûkin a entîr, Pathian thianghlimna hriatna chuan Pathian thuthlung angin fel taka nung tûrin a ngiat a.

    Zion atanga LALPÂ rorêlnain a rahchhuah chu felna leh mi suaksualte hnehna a ni (Sâm 132:13–18). Biak bûkin a châwisân chu Rorêltu a nihna anga LALPÂ lo kalna hun ropui chu niin, a bîkin Inremna Nî-ah a ni zuâl. Chutiangin, Sâm hian chunglam Rorêltû lo thlen tûr chiânzia chu uâr takin a sawi a (Sâm 96:13; Sâm 98:9), chu chu, vân biak bûka Isua Krista chu a ni (Thup. 11:15–19).

Chhiar tûr: Rome 8:34. Engtin nge hê châng hian vân biak bûka A mîte tâna Kristâ thil min tihsak mêk chu chanchin lâwmawm a ni tih min kawhhmuh?

Zirtâwpnî                                                     February 9

Zir Belhna: Chhiar tûr: Ellen G. White lehkhabu, Malsâwmna Tlâng-a “Nihlawhna Hluberte,” pp. 10–19, 34–40.

    Sâm hian mihringin rêldikna an ngaihsak lo chu a sawisêl a; anni kha thil tha lo pawm duh lohna an ni. Anni chawkphûrtu chu, phuba lâk châkna ni lo vin, Pathian hming châwimâwi tûra thahnemngaihna a ni zâwk. Thil tha lo chunga Pathian phuba lâkna an hmuh a mi felna an lâwm kha a âwm rêng a, a chhan chu chutiang zâwnga Pathian hming leh A rêldikna chu khawvêla dinthar leh a nih vâng a ni (Sâm 58:10, 11). Sâm hian mîte chu sual dova an âwte chhuah tûr leh, famkim taka Pathian lalram thlentîr dân zawng tûrin a fuih a. Sâm-ah hian, chunglam thlamuânna leh chhanchhuahna tiâm kan ni a. LALPA chu a la tho chhuak dâwn a ni!

    “Mîten an hâu che u a, an tihduhdah che u hunah chuan lãwm ula, hlim takin awm rawh u,” tiin Isuan fuihna thu a sawi. A thusawi ngaithla m>ktute chu zãwlneite lam a thlîrtîr a, ‘LALPÂ hminga thusawitu zãwlneiten tihduhdahna chhel taka an tuâr dân kha entawn atân hmang rawh u,’ (Jakoba 5:10) tiin a hrilh zui zêl a. Adama fâte zînga Kristian hmasa ber, Abela chu martar chang a ni a; Enoka chu Pathian nêna lêng dûn thîn a ni a; mahse, khawvêlin amah an hre lo. Nova pawh kha a hun laia mîten râlkh>l thut chîng leh sâkhaw âtchilh mi ni lek fanga an hriat avângin an nuihzat hlê a nih kha. ‘=henkhatin tihnawmnah leh vuak an tuâr a, a then khaidiata hlina tân ina khung an ni.’ ‘A thenin tihduhdah an tuâr a, thawhlehna nun hlun an neih theih nân chhanchhuah pawh an duh lo,’ (Hebrai 11:36, 35).”—Ellen G. White, Malsâwmna Tlâng, p. 38.

Sawi Ho Tûr:

@Khawvêla thil tha lo awm that lohzia hriatna avângin, LALPAN ro A rêl tak tak lo em ni ang tiin a ngaihtuahtîr a; thlêmna hnuai pawha ding nghet, sâwi nghîn theih loh rinna chu engtin nge kan neih theih ang? Pathian hmangaihna leh thatna leh thiltihtheihnaa rinna vawng nung tûrin eng nge thupuiah kan neih ang? Pathian leh A nungchang chungchângah kraws-in eng nge min hriattîr tûr ni ang?

@Pathian Thû leh rorêlna chiah rinchhan a, rêldikna nei tûra finna hnâr atân engati nge mihring (hruaitû te, thil neihte leh thil dangte) chunga innghah loh hi a pawimawh?

@Biak bûk chu chunglam rorêlna hmun a nihna thutakin a kawh chu eng nge ni?

@Sâm-a tawngkam dêngkhâwng thenkhat hi engtin nge kan manthiam theih ang? Engtin nge chutiang tawng kâuchheh an hmanna chuan a ziaktûte mihrinna manthiam tûra min tanpui?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †