Zirlai-8 2024 1st Quarter

Zirlai 8                                                February 17–23, 2024

FEL TAKA NUN NÂNA FINNA

CHÂNGVAWN: “Tichuan kan damchhûng nîte chhiar dân min zirtîr ang che, finna thinlung kan neihphah hiâlna tûrin,” (Sâm 90:12).

Sabbath Chawhnû                                             February 17

Chhiar Tûr: Sâm 119:1–16; Sâm 90; Johana 3:16; Sâm 95:7– 11; Sâm 141, Sâm 128.

    KAN hmuh tâk angin, Pathian khawngaihnain sual ngaihdamna kawng sialin, sual sim taah chuan thinlung thar siamin, tûnah chuan rinnain a nung ta.

    Pathian Thû pawhin fel taka nun dân zirtîrna min pê a (Sâm 119:9–16). Pathian dân zawm hi dân zawm vânga chhandam nih tumna a ni lo va, Pathian nêna inkûngkaihna duhawm nun neihna, malsâwmnaa khat nun neihna a ni (Sâm 119:1, 2; Sâm 128).

    Chuti chungin, mi fel nun pawh chu thlêmnate tâwk lo a ni bîk lo. Eng emaw chângte chuan mi fel pawh sual vervêknaa thlêm theih an ni a (Sâm 141:2–4), chû thlêmnaah chuan an tlu vê thei. Pathianin A fâte rinawmna (emaw rinawm lohna) chiang taka târ lan a nih theih nân fiahnate lo thlen A phal a. Pathian fâten A zirtîrna leh zilhna an bengkhawn that chuan, an rinna chu thlitfîm niin, LALPA an rinchhanna chu a chak sauh ang. Fel taka nung tûra finna hi, thlêmnate leh chonate kâra Pathian nêna phûr taka nunna zâra neih a ni thîn. Chuti chuan, finna thinlung kan neih theih nâna kan damchhûng nîte chhiar dân min zirtîr (Sâm 90:12) tûra Pathian hnêna tawngtai chuan, finna thinlung kan nei thei ang a, LALPÂ chunga rinawm tlat tûra inpêkna kan neih chu kan târ lang thei ang.

Sunday                                                                February 18

I Thû Chu Ka Thinlungah Ka Thukrû A

Chhiar tûr: Sâm 119:1–16, 161–168. Engtin nge Pathian thupêkte kan vawn ang a, chuta tanga malsâwmna lo thleng tûr chu engte nge ni ang?

    Bible chuan nî tin rinna nun hi A felna kawng zawha Pathian nêna zinkawng zawh dûn angin a sawi a. Rinna nun hi “LALPÂ dân” zawhna (Sâm 119:1, NKJV) leh “I hmêl ênga awmna” (Sâm 89:15, NKJV) hmanga vawn nun zêl a ni. Hêng thil pahnihte hi thil hrang daih an ni lo. Pathian hmêl ênga lêng tih hian Pathian dân châwisâng tih a kâwk a. Chutiangin, “LALPÂ dâna lêng/zawh” tih pawh chu thinlung zawng zawnga Pathian zawng tihna a ni (Sâm 119:1, 2, 10).

    Felna nun tih Sâm-in a sawi dân kawng dang chu “Kawnga mi tha famkim” (Sâm 119:1) tih a ni. “Tihbawlhhlawh loh” tih hian inthâwinaa “hmêlhem lo,” Pathian tâna pawmtlâk (Exod. 12:5) nihna a entîr a. Chutiangin, mimal nun fel, inthâwina nung (Rome 12:1) chu, sual ngainatnain a tihbawlhhlawh loh a ni. Pathian hnêna hlan nun chu ‘kawng thafamkim’ niin, a awmzia chu Pathian lâwmzâwng nun kawng zawh tihna a ni (Sâm 101:2, 6; Sâm 18:32).

    Pathian thupêkte vawng tih hi dân anga chunglam dânte zâwmna a ni lo. Chuti a hnehin, rilru fîm taka dik leh dik lo kâr te, thil thâ leh sual kâr te thliâr thiamna a tel zâwk a (Sâm 111:10; 1 Chron. 22:12); pâwn lama chêtnate chauh ni lo vin, mihring nihphung pum pui a huâm tel zâwk a ni. ‘Bawlhhlawh kâi lo’ nihna chu, Pathian thupêkte vawn leh thinlung zawng zawnga Pathian zawn zêl chu, nuna rilru sûkthlêk thliâr hran theih loh a ni (Sâm 119:1, 2).

    Pathian thupêkte hi khawvêl tâna Pathian thil ruâhman puânchhuahna a ni. Hêngte hian mîte hnênah fing tak leh zalên leh râlmuânga khawsak dân tûr a zirtîr a (Sâm 119:7–11, 133).

    Sâm-phuahtuin dân a lawmna chhan chu, dânin Pathian rinawmna a hriatnawntîr leh thin vâng a ni (Sâm 119:77, 174). “I dân ngainatûte chuan thlamuânna namên lo tak an nei a, (inchhuih) tlûkna rêng rêng an nei lo” (Sâm 119:165, NKJV). Heta ‘tlûkna’ hian chhia-tha hriatna lama tlin lohna a entîr a. Sâm-phuahtu kê atâna khâwnvâr angin (Sâm 119:105), Pathian Thû chuan thlêmnate lakah a humhim thîn (Sâm 119:110).

Engtin nge Kristan Amâ nunah Pathian Thu thiltihtheihzia A lantîr (Matthaia 4:1–11)? Pathian dân zawm duhna thinlung putna atanga lo chhuak thiltihtheihna chungchâng eng nge hei hian min hriattîr tûr ni ang?

THAWHTANNΠ                                                                       February 19

Kan Damchhûng Nîte Chhiar Dân Min Zirtîr La

Chhiar tûr: Sâm 90; Sâm 102:11 leh Sâm 103:14–16. Mihring dinhmun harsatna chu eng nge ni?

    Chatuan hun ngaihtuahin mihring tlu tâte damchhûng chu tuihû ang lek a ni a. Pathian mithmuhah chuan kum sâng khat pawh hi “zân vên khat chhûng ang lek a ni” a, chû chu dârkâr thum emaw lî emaw a ni (Sâm 90:4). Pathian hun leh mihring hun khâikhinin, damchhûng hi thlâwk bo leh mai a ni (Sâm 90:10). Mihringte zînga mi chak ber pawh thlâite zînga a chak lo berte ang lek a ni (Sâm 90:5, 6; Sâm 103:15, 16). Chuti chungin, chû damchhûng hun rei lo tê chu thawhrimna leh lungngaihnain a khat bawk sî a (Sâm 90:10). Khawvêl mî, Pathian ringlote meuh pawhin, damchhûng hun hi rei lo lutuka ngaiin an tahpui a ni ber a, a bîk takin chatuan hun nên khâikhin a, anni an tel vê lo tûr ngaihtuahin a ni.

    Sâm 90 hian mihring harsatna kârah, Siamtu A nihna angin Pathian mîte hi A enkawl zui zêl angin a sawi a. LALPA chu chhuân zawng zawngah A mîte chênna a lo ni reng tawh thîn a (Sâm 90:1, 2). Hebrai tawng ma‘on, “chênna hmun,” tih hian LALPA chu A mîte tâna hliahkhuhna emaw, inhumhimna emaw a ni tih a entîr (Sâm 91:9).

    Pathianin A thinurna fel chu sûmin, A khawngaihna A tithar leh thîn a. Sâm-phuahtu chuan, “Tuin nge i thinurna thiltihtheihzia hria?” (Sâm 90:11, NKJV) tîa uâr takin a sawi a, a awmzia chu mî tû mahin sual vânga Pathian thinurna nihphung dik tak an la tawng ngai lo va, chuvâng chuan sual sim a, fel taka nung tûra finna neitû tân beiseina a awm tihna a ni.

    Bible-a ‘finna’ tih hi rilru fing ngawt ni lo vin, Pathian zahna nei tel angin a hmang a. Kan mamawh tak finna chu ‘kan damchhûng ni chhiar dân’ hriat a ni (Sâm 90:12). Kan damchhûng nîte kan chhiar theih chuan, kan hunte hi a tlêmin, chin nei an ni tih kan hre dâwn a ni. Fing taka nung tih awmzia chu, damchhûng rei lohzia ngaihtuahna nei a, chumi zâra rinna leh thuâwihna neihphah chu a ni. Hê finna hi sual simna leh (Sâm 90:8, 12), Pathian thilthlâwnpêk ngaihdamna, khawngaihna leh zahngaihna (Sâm 90:13, 14) zârah chiah neih theih a ni.

    Kan harsatna tobul tak lo chhuahna hi mihringa siam kan nihnaah ni lo vin, sual atangin, sualin khawvêla thil a rawn thlen atanga lo chhuak a ni. Chhiatna a thlen nasatzia chu hmun tinah, mi tin rêngah hmuh a ni ta a ni.

    Kan mihring nihnaa harsatna chhuahsan theihna kawng siâl a nih tâk avângin Isuâ chungah lâwmthû awm rawh se (Johana 1:29; Johana 3:14–21). Chuti ni lo se, beisei tûr rêng kan nei lo vang.

Kan damchhûng nîte chu ral thuai thîn mah se, Isua-ah chuan eng thutiâm nge kan neih? (Johana 3:16.) Amah tel lo vin eng beiseina nge kan neih ang?           

Thawhlehnî                                                      February 20

LALPÂ Fiahna Chu

Chhiar tûr: Sâm 81:7, 8; Sâm 95:7–11; leh Sâm 105:17– 22. Hêng chângte hian chunglam fiahna eng nge an sawi tel?

    Meriba hmun kha Israelten an mamawhte ngaihtuahsak tûrin Pathian a rinawmin theihna a nei em tia Amah an fiahna hmun a ni (Exod. 17:1″7; Sâm 95:8, 9). Sâm 81 erawh hi chuan a letling zâwnga thil sawiin, khata thil thleng kha Pathianin Israelte fiah zâwk angin a sawi vê thung a (Sâm 81:7). An thuâwih loh leh rinna tlâkchham (Sâm 81:11) vângin Pathian fiahna chu an paltlang zo ta lo a ni.

    Meriba chungchâng sawina hian thuchah pahnih a târ lang a. A hmasa zâwk chu, Pathian mîte hian chhuân liam tâa thil lo tihsual tâkte kha an tinawn tawh tûr a ni lo. Chû âi chuan, Pathian rinchhanin, A kawng an zawh zâwk tûr a ni (Sâm 81:13). Pahnihna, mîte kha fiahnaah hlawhchham ta mah se, buaina an tawh hunin Pathian chu anmahni chhanchhuak tûrin A lo che nghâl a (Sâm 81:7). Hun kal taa Pathian khawngaihnaa chhanchhuahna khân, chhuân lo awm tûrah pawh A khawngaihna A tithar zêl dâwn tih rinngamna min neihtîr thîn. Sâm 105 sawi dânin, khâng harsatna thlengte kha Pathianin hmalam hunah Josefa khân A Thû a rinchhan zêl dâwn em tih A fiahna a ni (Gen. 37:5–10; Sâm 105:19). Châng 19-a Hebrai tawnga Tsarap, “fiah,” tih hian “thian fâi,” “thli fîm,” leh “tithianghlim” tih a kâwk a. Tichuan, Pathianin Josefa A fihna chhan chu amaha Pathian thutiâm rinhlelhna ang chî lâk bosak a, Pathian hruaina chu innghah nâna hmang zêl tûra tihchak nân a ni.

    Chunglam thununnain a tum chu, Pathian fâte tihchak an ni a, Josefâ nuna kan hmuh ang a, thutiam thlen famkimna atâna buatsaih an nih theih nân a ni (Sâm 105:20″22).

    Chuti laiin, Pathian kaihhruaina hnarna chuan luhlulna leh thinlung tihsak zual zêlna a thlen thung.

    “A thupêk âwih tûr leh zâwm tûra chhuanlam eng mah siam lo tûr leh, ringhlel buâi lo tûra Pathianin min phût lai hian; mihringte chu Setana bumna chuan âikaihin a tichawlawl tlat thung a. Eden Huana Evi a thlêm ang bawk khân: ‘Thi teh suh e’ tih tawngkam hmang bawk khân, an rilrû chu a innghahna tlâk lo chhuanlam hmangin a hmin leh tlat thîn a ni. Thuâwih lohna hian mimal thinlung leh chhia leh tha hriatna a tichawlawl a ni mai lo va, mi dangte rinnna thleng pawhin a tihkhawlohsak thîn. A tîra sual leh pawi lian tham tak anga an ngaih ngêi ngêi thilte pawh kha, tih chhunzawm zêl a nih chuan, zâwi zâwiin ngâiah an neih thuai thîn a, mahni inthiamchawpna thinlung ang put thlengin pawikhawihna tha lo vah chuan an tâng ta thîn a ni.”—Ellen G. White, Testimonies for the Church, vol. 4, pp. 186, 187.

Sualin thinlung a tihsak dâna nangmâ nuntawng chu eng nge lo ni? Engati nge chutiang ngaihtuahna chuan, thuâwih tûra chakna kan hmuh theihna hmun, kraws lam min pantîr tûr a nih ang?

Nilâinî                                                                February 21

Mi Suaksualte Kawng Vertherna

Chhiar tûr: Sâm 141. Sâm-phuahtu kha eng dîlin nge a tawngtai?

    Sâm 141 hi chhûng lam leh pâwn lam atanga thlêmnate laka humhim dîla tawngtaina a ni. Sâm-phuahtu hi mi suaksual thang chauh ni lo (Sâm 141:9, 10), anmahni anga che vê tûra thlêmna dinhmun hlauhawmah a ding a. Chaklohna hmasa ber chu thusawi kawnga kâ/lei sûm zawh lohna a ni a, Sâm-phuahtu chuan LALPAN a hmûi/lei kawngkâte A vênsak ang tih a sawi (Sâm 141:3). Hê ngaihruâtna hian khawpui vênhim nâna kulh kawngkate vên him a ngaih thû kha entîr nân a hmang a ni.

    Thlêmna chu Pathian fâin mi fel thurâwn a pawm dâwn nge, mi suaksual thil tuihnâi takte thlêm thlûkin a awm zâwk dâwn tih a ni (Sâm 141:4, 5). Sâm-phuahtu hian a thinlung chu dinhmun hlauhawma ding, indona tak tak thlenna hmun angin a sawi a. Pathian rinchhan chunga bâng lo va tawngtai leh, Amâ tâna inhlanna zârah chiah Pathian fâ chu thlêmna lakah a him thei dâwn a ni (Sâm 141:2).

Chhiar tûr: Sâm 1:1 leh Sâm 141:4. Heta târ lan thlêmna ziârâng verther leh hmasâwn zêl dân chu eng nge ni?

    Sâm 141:4 hian thlêmna hmasâwn zêl dân a târ lang a. A hmasain, thinlung hian thil tha lo a âwn phawt a. A dawtlehah, thil thalote tih a chîng (Hebrai tawng hian tih chîn dawklak leh zawngchhang) a kâwk. Pathumna, thinlungin mi suaksualte thil tuihnâi (eitûr) chu a ei ta thîn a, chû chu thil îtawm anga lang chîn tha lote a pawm vê ta tihna a ni.

    Chutiangin Sâm 1:1 sawi dânin, Pathian fa chu LALPÂ kawnga a kal zêlna dâl tûra thlêmna a lo thleng a; chû chu mi suaksualte kawng zawh a, mi sualte kawnga din leh, hmusittûte thutphaha thut zuina chu a ni. Mi sualte, mi suaksual te, leh hmusittû te: hêng mîte ang hi kan ni vê tûr a ni lo va, LALPÂ hnên atanga an mi hruai bo nih pawh kan inphal tûr a ni hek lo.

    Sâm hian thlêmna hmasâwn zêl dân, hîp dân leh vertherzia chu a sawi a; LALPA rinchhan hmiahna zârah chiah hnehna chan theih a ni tih hi uâr takin a sawi a. Sâm-in thlêmna kâra thusawi leh ngaihthlâk pawimawhzia a sawi uâr a. Mi suaksualte leh mi felte tâwpna hun awm dân tûr hian Pathian hnên atanga finna min zawntîr tûr a ni (Sâm 1:4–6; Sâm 141:8–10). Chuti chungin Sâm-ahte hian, nakina Pathian fâte thiamchantîr an nihna tûr chu a sawi a. Chû chu, ringtûte hi chhel taka Pathian rinchhan a, Amah nghâk fan fan tûr an ni tihna a ni.

Ningânî                                                               February 22

Fel Taka Nun Malsâwmnate

Chhiar tûr: Sâm 1:1–3; Sâm 112:1–9 leh Sâm 128. LALPA zahtûte tân eng malsâwmnate nge tiâmsak lo ni le?

    LALPA zahtûte hnêna malsâwmna tiâmsak tam tak zîngah, a ropui ber chu thlamuânna hi a ni âwm e. Sâm 1-in mi felte chu, ‘tui-luâng kianga thing phun, a hun têa rah chhuah thîn, a hnah pawh uâi ngai lo’ nên a tehkhin a (Sâm 1:3; Jer. 17:7, 8; Ezek. 47:12). Hê tehkhinna hian malsâwmna zawng zawng hnâr chu târ langin, chû chu Pathianin A biak bûka A chênchilhna a ni tih sawiin, chutah chuan Pathian nêna hmangaihnaa inlaichînna chu chên zui reng theih a ni. Buhsî thli len bo mai theih nêna tehkhin, mi suaksualte ang lo takin, mi felte chu hmalam hun atân pawh ngaihgam takin, rah chhuah tûra an tona, Pathian kiang chu niin, chatuan nunna beisei tûr an la nei cheu a ni.

    Sâm 128:2, 3 hian Messia lalram malsâwmna, mi tin mahnî grêp leh theipui hnuâi thut muân theihna chu a entîr a, chû chuan râlmuânna leh hmuingîlna a entîr (Mika 4:4). Jerusalem tâna muânna malsâwmna (Sâm 122:6–8; Sâm 128:5, 6) hian Messian thil tha lo tâwpna thlenin, khawvêl tân muânna a dinthar leh beiseina chu a entîr.

    “Bible chuan chhandamte rochan tûr chu ‘ram’ tiin a sawi a (Hebrai 11:14-16). Chû ramah chuan vân Berâmpu chuan a ran rualte chu Nunna Lui kamahte A hruai thîn a. Nunna Thing chu thla kipin a rah thîn a, a hnahte chu hnamte tihdamna tûr a ni. Tuihna kangchat ngai lo, krustal lung ang maia fîmte chu an luang hiâu hiâu mai a, a kam vêla thing zâr phe siâu siâute chuan LALPÂ tlante kawng chu a tidaihlim a. Phai zâwl cham pût maiahte chuan muâl pâwng mawi tak takte hi a awm a, chutah chuan Pathian tlâng lian pui pui, sâng tak tak leh ropui tak takte an awm bawk a. Chû ram nuâm tak, tui nung luânna ram chu, Pathian mi, hun rei tak chhûng vakvai tawhte leh khualzin lo ni tawhte chuan, anmahni tân chênna tûr in an nei tawh ang.”—Ellen G. White, Indona Ropui, p. 675.

    Thuthlung Thar hian Kristâ lo kal lehna leh khawvêl siam thar leh huna thleng famkim tûr beiseina chungchâng a sawi a (Matthaia 26:29; Thupuan 21). Tichuan, hê leia mi felten malsâwmna tam tak an dawn laiin, Pathian malsâwmna famkim erawh chu, khawvêl tâwpa Pathian lalram a nih dân tûr ang taka dinthar a nih hunah a lo thleng dâwn a ni.

Engati nge kraws leh khata thil thleng kha, Thuthlung Thara chuâng kan tâna Pathianin min khêksak thutiâmte innghahna a nih? Engtin nge tûnah ngêi pawh chûng thutiâmte chu kan thlamuânpui theih ang?

Zirtâwpnî                                                          February 23

Zir Belhna: Tûnlai khawvêl changkângah chuan, hlimna neih nâna finna neih chu thil duhawm niâwm pawhin a lang lo a ni thei. Chuti chungin, Pathian ngaihsakna atanga finna tel lo vin hlimna dik leh nun nawmna tak chu kan nei thei ang em le? Sâm-in a theih loh thû chiang takin a sawi a. Thu lâwmawm chu finna leh hlimna kâra duhthlang tûra tih kan ni lo hlauh hi a ni. Pathian ngaihsaknaa finna chuan hlimna dik a thlen thîn. Hebrai tawnga entîrna tluâng tlam pakhatin lo entîr ta ila. Hebrai tawng chuan, “kâilâwn” hi pakhat âia tam sawina thumal (’ashurey) hi, ‘hlimna’ sawina thumal (’ashrey) nên a inzûl hlê a ni. Sâp tawngah chuan chutiangin a inzûl vê lêm lo va, thuchah pawimawh a sawi thung a: “kâilâwn” chu nun ‘hlimna’ lama hruaitu Pathian kawng a ni (Sâm 1:1; Sâm 17:5; Sâm 37:31; Sâm 44:18; Sâm 89:15; Sâm 119:1). Bible-ah chuan, finna emaw, hlimna emaw chu hmuh theih loh thil ni lo vin, a taka chên theih a ni.

    Pathian nêna inkûngkaihnaa hmuh a ni thîn a, chutah chuan Pathian rinchhan chunga zah, fak leh chakna dawng tih pawh a tel. Sâm 25:14 chuan “LALPÂ thurûk chu amah tihtûte hnênah a awm a, A thuthlun chu anmahni a hriattîr ang,” tiin a sawi.

    “Pathian chuan en tûr milem mâwi takte min pêk avângin A hnênah lâwmthû awm rawh se. Kan en fo theih nân A hmangaihna thutiam lãwmawm tak chu i la khâwm ang u. Pathian Fapa chuan A Pâ lalthutthlêng kalsanin, Setana thiltihtheihna laka mihringte A chhandam theih nân, A Pathianna chu mihrinnain a thuam a. Kan tân A hneh a, mihringte hmuha Pathianin A ropuina A lantîr a, hnam tlu tawh, chhiatna khura sualin a hnuhluh tawh chu A khâi chhuak a, tãwp chin nei lo Pathian nên a inzawmtîr leh a. Tlantu rinna avânga Pathian fiahna tuar chhuakin, Kristâ felnaa inthuâm leh A lalthutthlênga châwimâwinate chu kan ngaihtuah thín atâna Pathianin min duhsak chu a ni.”—Ellen G. White, Krista Panna Kâilâwn, pp. 105, 106.

Sawi Ho Tûr:

@Engtin nge Pathian Thû hi inzirna lek fak ni lo, hlimna hnâr chu a nih zâwk theih ang? Engtin nge Pathian Thûa inchâwm tih leh Thû, Isua Kristaa awm reng tih chu a inkûngkaih (Johana 1:1; Johana 15:5, 7)?

@Mîten hre reng chunga Pathian zirtîrna an hnar zui zêlin eng nge lo thleng thîn (Sâm 81; Sâm 95)? Chû thil lo thlen chhan chu eng ni tûrin nge i ngaih?

@Engati nge eng emaw chângin mi felte thurâwn âia mi suaksualte kawng chu îtawm zâwk anga a lan? (Sâm 141)? Chû chu, mi suaksualte zâwk hmuingîl riâu anga lang thîn hi engti anga ngai tûr nge kan nih ang?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †