Zirlai-9 2024 1st Quarter

Zirlai 9                                       February 24–March 1, 2023

LALPÂ HMINGA LO KAL CHU A ENG A THÂWL E

CHÂNGVAWN: “In satûte lung duh loh kha, a kila lung tangkai ber a lo ni ta. Chû chu LALPÂ tih a ni a; kan mithmuhah a mak a ni,” (Sâm 118:22, 23).

Sabbath Chawhnû                                             February 24

Chhiar Tûr: Sâm 2; Sâm 22; Sâm 23; Sâm 89:27–32; Johana 10:11–15; Kolosa 1:16; Hebrai 7:20–28.

    KRISTÂ mimal nihna leh rawngbâwlna chungchâng chu Sâm hian a sawi a. Sâm-ah hian chhandamna ruâhmana A hna pêng tinte chu hmuh theih a ni deuh vek a. Kawng hrang hrangin, Kristâ nun leh hna thawh chu entîr lâwk leh sawi lâwk a ni a, chutiang chuan a lo famkim thlap thlap bawk.

    Sâm-in a târ lan thupuite zîngah Kristâ Pathianna te, Fapa a nihna te, A thuâwihna leh Pathian tempul tâna thahnemngaihna te, Berâmpu Thâ a nihzia te, mantîr a nihna te, A tawrhna te, A ruh tihtliah a nih loh tûr thû te, A thihna te, A thawhlehna te, vâna a lâwn te, puithiam a nihna leh lalna te pawh a tel vek. Chûng chu tîsâa Isua a lo kal hmâ kum za tam taka lo hrilh lâwk tawhte an ni.

    Entîr nân, rawngbâwla A lên laiin, Emmau kawnga zirtîrte hnênah pawh khân Sâm (Fakna Hla Bû) chu Isuan a sawi lang tel a (Luka 24:44). A nihna finfiah nân Sâm bû thlîr tûrin anni chu A duh a ni.

    Sâm thenkhat Krista lo entîr lâwkna thleng famkim tâ zîngah Sâm 24, 45, 72, leh 101 (duthusâm Lalber leh Rorêltu), 88, leh 102 (Pathian chhiahhlawh hrehawm tuâr tawngtainate pawh a tel a ni.

    Chûng Sâm-ate chuan, Sâm-phuahtû tah hlâ te, lâwmthu sawina te, fakna te, leh rêldikna leh chhanchhuahna thlen tûra âuchhuahnate pawh a tel a; chûng atang chuan khawvêl chhandam nâna Kristâ tawngtaina thangkhâwk chu kan lo hre thei a ni.

Sunday                                                                February 25

Mahnî-Inhlân Berâmpu

Chhiar tûr: Sâm 23; Sâm 28:9; Sâm 80:1; Sâm 78:52, 53; Sâm 79:13; leh Sâm 100:3. Engtin nge LALPA leh A mîte inlaichînna chungchâng hêng chângte hian a târ lan?

    LALPA chu Berâmpû, Pathian mîte chu A hlobet hmuna berâmte an nih ngaihruâtna hian, an mamawh zawng zawng phuhrûk nâna A mîten Pathian an rinchhan a, A mîten a hruaina leh enkawl zuina innghah nâna an hman dân chu a târ lang a. Pathian leh A mîte inlaichîn hnaihzia a entîr a, a chhan chu berâmpûte leh an ran ruâlte hi chêng zâin, berâm mal tinte hi an ngaihsak êm êm thîn a ni. Ran vulh lam ngaihruâtna hian Pathian chu A ran ruâlte neitu a nih theihna kawng hnih a sawi uâr a, chûng chu: thilsiamna (Sâm 95:6, 7; Sâm 100:3) leh thuthlung (Sâm 28:9, Heb. 13:20) a ni.

    Ngaihruatnain chunglam Berâmpu chuan a ran angin Josefa kha A lo hruai thîn a (Sâm 80:1), chu chu thâwi tham deuhin Jakoban Josefa thlah nân a lo sawi a, Pathian chu Israelte Berâmpû anga sawiin, thutiâm ropui leh malsâwmna a ngensak a ni (Gen. 49:24).

    Lalte hi an mîte tâna berâmpû anga ngaih an ni thîn a (2 Sam. 5:2). Chuti chungin, hê nihna hi Pathian chauhin a phû a, a chhan chu mihring lalte rêng rêng chutiang kohna angin an nung vê ngai lo. Isua erawh kha chu Berâmpu Thâ tih a nihna ang takin a nung thung.

Chhiar tûr: Johana 10:11–15. Isuan Berâmpu Thâ a nihna chungchâng eng nge A sawi?    

    Chunglam chhuak Berâmpû leh A ran ruâlte inlaichînna duhawm chu A berâmten A âw an hriatnaah hian ngaihsual ruâl loha chianga hmuh a ni a (Johana 10:4, 27). Tûnlai hun, Bible Ram vêla berâmpûten an ran inawm pawlhte chu an ko hrang mai thîn a, an pûte âw chu hre hrangin, an zui vê mai thîn a ni.

    Eng emawti laite chuan, Pathian berâmten harsatna chi hrang hrang an tuâr a, chû chu mîten Pathian lungnih lohna leh kalsan nih chhinchhiahna angah an ngai thîn. Chuti chungin, Berâmpu Thâ erawh chuan A berâm kal pêngte pawh hlamchhiah lo vin, chhanchhuak tûrin A zawng leh thîn a. Hei hi Pathian leh A mîte inlaichînna târ lanna thiltithei tak a ni. Ani chuan A berâmte tâna thih a hniâl lo va (Johana 10:11, 15), chutiang tak chuan an tâna inthâwina berâmno-ah a lo tang ta rêng a ni (Johana 1:29). Isuan berâm huâng danga A berâm awmte chu ko vin, huâng khatah pumkhatin a la awmtîr dâwn tih a sawi (Johana 10:16).

Engtiang kawngtein nge i nî tin nunah a takin Isua chu kan tâna Berâmpu Thâ a nihna thutiâma hamthatna chu i chên theih ang?

THAWHTANNΠ                                                                       February 26

Hrehawm Tuâr Messia Chu

Chhiar tûr: Sâm 22 leh Sâm 118:22. Chhandam tûra A lo kal chhan (mîte khân) eng ang takin nge Messia kha an lo tih?

    Sâm tam takin hlamchhiah tuâr Messia tawrhna hrehawm chungchâng an târ lang hlawm a (entîr nân, Sâm 42; Sâm 88; Sâm 102). Sâm 22 phei hi chu Messia chungchâng hrilh lâwkna a ni a, a chhan chu hê Sâm-a thu chuâng tam tak hian Lal Davida nên inzawmna a nei lo va, Kristâ thihna dinhmun nên erawh a induh thlap sî a ni. Sâm 22:1 hi kraws chunga Isuâ tawngtaina kha a ni (Matthaia 27:46).

    A Pâ laka tihhran a nihnaa Kristâ tawrhnaah khân, Kristan khawvêl pum pui sualte a phur a, a natzia kha an inlaichînna leh inpumkhatna hmang chauha teh theih a ni (Johana 1:1, 2; Johana 10:30). Chuti chungin, sawi fiah zawh ruâl loh tawrhna meuh pawhin Pa leh Fapa kâra inpumkhatna chu a tichhe thei chuâng lo. Kalsan a nihna hrehawm kârah, beidawnna thûk tak a tuâr chung pawhin, Kristan Ani chu Pâ kutah a inkawltîr thlap a ni.

    “Kan âiawhtu leh kan tâna mawhphurtu Kristâ chungah chuan kan zaa khawlohna zawng zawng nghah a ni a. Dânin thiam loh min chantîrna atâ min tlan chhuah theih nân, bawhchhetua chhiar a ni a. Adama thlah zawng zawngte thiam lohna chuan A thinlung chu a delh tlat reng a. Sual chunga Pathian thunurna te, khawlohna avânga A lungâwi lohna lantîrtu râpthlâk tak te chuan, Pathian Fapa nun chu an luah khat hnehin, A thin an titâwt nasa a ni.”—Ellen G. White, Chatuan Nghahfâk, p. 851.

    Ran-sa hlauhawm ngaihruatna zîngah bâwngchal te, sakeibaknei hâhum te leh uite chu Krista chunga an nunrâwn leh ngaihtheih lohzia entîr nân hmangin, Ani erawh chu A hun hnuhnungah khân pawisawi lo leh khawngaih thlâk tak a ni. Dik tak takin, Sâm 22 hian Pâ hnêna Amâ thusawi hmangin Isua kha mipui pungkhâwm hoten nuihzatin, na tak takin an tawngkhum a (Sâm 22:1, 8; Matthaia 27:43); sipaiten Isuâ thawmhnâw an insem bawk a (Sâm 22:18; Matthaia 27:35). Khatih laia mipuite khân tihhlum dân tûr an zawn mêka kha Tempul ‘kila lung tangkai, a lungphûm tinghettu a ni tih rêng an hrethiam sî lo (Sâm 118:22).

    Chuti chungin, an hnar Messia erawh chu, thihna atanga A thawhleh hnûin Pathian mîte chhandamna Hnâr a lo ni ta zâwk a (Matthaia 21:42; Tirhkohte 4:10–12). Kristan mihringte hnar nih A tuâr a, mahse Pathianin A Fapa chu Pathian Thlarau lam Tempula “Lungphûm” nungah siamin, A châwimâwi ta zâwk a (Efesi 2:20–22; 1 Pet. 2:4–8). Hê Lung, chhandamna kawng awm chhun, hnartûte chunga rorêltu a la ni zâwk ang (Isa. 8:14; Matthaia 21:44).

Thil i lo tihsual tâk rêng rêng kha kraws chungah Amah Isua ngêiin A lo tlâk vek tawh a. Nangmâ tân ngêi A lo tuâr tih thû hian tûna i nun dânah, eng anga nangmâ nuna nghawng nei tûr nge ni ang, chû chu, sual hi engang taka tenawm ti tûr nge i nih ang?

Thawhlehnî                                                      February 27

A Thuthlunga Rinawm Chatuan

Chhiar tûr: Sâm 89:27–32, 38–46 leh Sâm 132:10–12. Davidâ thuthlung kha eng chungchâng nge ni? Eng thilin nge dinhmun hlauhawma awmtîr anga lang?

    Davidâ thuthlungah khân kumkhua atâna Davidâ thlah duhsakna tûr leh, Pathian mîte hmuingîlna tûr a tiâmsak a (1 Sam. 7:5–16; Sâm 89:1–4, 19–37; Sâm 132:12–18). Thuthlung nghehna tûr chu Pathian intiâmna leh Pathian chunga lal rinawmna chunga innghat a ni a. Chuti chungin, khân Lal Davida-te ang lal inpezo takte meuh pawh kha LALPÂ chungah an rinawm zui reng lo tlat mai a. Sâm 89 hian Davidâ thuthlung thutiâm ropui takte chu chân ta anga ngaiin a tahpui ta hiâl mai. Israelte chu beisei bo takin Pathianin a kalsan ta em ni le? A chhânna chu—ni teh suh ê tih a ni!

    Pathian thinurna chu, chunglam rorêlna lantîrna a ni (Sâm 38:1; Sâm 74:1). Chuti chungin, chatuan daih a ni lo, a chhan chu mîten sual an sim chuan, Pathian chatuan hmangaihna chuan mipuite sualnate chu a ngaidam leh thîn a. A thinur chhûng chuan, kalsual mêkte chunga Pathian lungâwi lohna chu a thawk na hlê thung a. Mipuiten an thuâwih lohna nghawng tha lo chu tuârin, an sualna pawizia an hriatphah thîn (Sâm 89:38–46). Pathian thinurna tawrhhlelhawmzia chu hriain, “Eng chen nge ni dâwn?” (Sâm 89:46) tiin an zâwt a. A khawngaihna ‘hre reng’ tûrin Pathian rinawmna atanga beiseina an nei thar leh thîn a ni (Sâm 89:47, 50).

    Thuthlungah mihring lam chu lo rinawm lo ta mah se, mipuite chu Pathian thiltum danglam ngai lo thutiâmah chuan an châwl thei a; chû chu Israelte leh khawvêl pum chhandamna leh felna zawng zawng famkimna Messia zârah a ni. A tâwpah chuan, Pathian chu dingchangin, A chatuan lalram chu dinngheh a la ni ngê ngê ang; chû chu Pathian mîte vâng ni lo vin, Isuâ vâng chiahin a ni ang.

    Isua Krista kha Davidâ Fapa leh Messia chu a ni (Matthaia 1:1; Heb. 1:8). Ani chu “thilsiam zawng zawnga piang hmasa ber/fatîr” (Kolosa 1:15) tih a ni a, chutiang deuh chuan Sâm 89:27 hian Davida kha Krista entîr nâna hmangin, Pathian fatîr angin a sawi. “Ani chu fatîrah ka siam ang a, leia lalte zîngah chngnungberah ka siam ang.” “Fatîr” tih hian Davida kha pian leh mûrna lama fatîr angin a sawi a ni lo tih a chiang a, a chhan chu ani kha a nû leh pâte fapa pariatna a ni (1 Sam. 16:10, 11). Chutiang deuh tho chu Isua pawh a ni. Hê nihna hian châwimâwina bîk leh thuneihna a entîr a (Kolosa 1:16, 20″22). Thihna atanga Isua A kaihthawh khân, Pathianin Isua chu khawvel pum pui chunga Lalber-ah A siam tawh a ni (Tirhkohte 2:30, 31).

Chhiar tûr: Kolosa 1:16, 20–22. Hêng chângte hian Isuâ nihna leh kan tâna thil min lo tihsak chungchâng eng nge min zirtîr? Heta tang hian nangmâ tân eng thutiâm nge i lâk chhuah theih ang?                                                                                                 

Nilâinî                                                                February 28

Chatuan Lalber Thiltihtheihna Chungchuâng

Chhiar tûr: Sâm 2; Sâm 110:1–3; Sâm 89:4, 13–17; leh

Sâm 110:1, 2, 5, 6. Hêng chângte hian Krista chu Lalber a nihna chungchâng eng nge min zirtîr?

    Pathian chu Messia Pa a nihna anga lantîrna hian lalber lallukhum khumtîrna a kâwk a, chutah chuan lalber chu Pathian thuthlunga pawm a ni thîn (Sâm 2:7; Sâm 89:26– 28). Sâm 2:7 hian Kristâ thawhlehna leh châwimâwi a nihna chu chatuan thuthlung lo êng chhuak ang leh, Kristâ puithiam lal nihna angin a hmu lâwk a (Tirhkohte 13:33– 39; Heb. 1:5; Heb. 5:5). Messia chu tû emaw châwimâwina leh thuneihna sâng ber dawngtu angin Pathian dinglamah A thû a (Sâm 110:1; Tirhkohte 7:55, 56).

    “Chûbâkah, LALPA leh ‘hriakthiha’ (Messia) a nih kawpna hian a kawh chu, Amah LALPA ngêi chu Davidâ thlah Messia a nihna hi a ni.   dinglama thû chu LALPA a nih chuan, LALPA chu Messia a ni tihna a ni ang, a chhan chu a hnuhnung zâwk hi dinglama awm hmuh a ni sî a [Sâm 110:1, 5 en la.]”— Jacques Doukhan, On the Way to Emmaus (Clarksville, MD: Lederer Books, 2012), pp. 26, 27.

    A tâwpah chuan, Kristan A hmêlmâte chunga hnehna famkim A chang tawh ang a. Hmêlmâte ‘ke nghahchhana’ awmtîrna hian Bible ram vêla lalten an hneh tâk an hmêlmâte nghâwng an rap thîn chu an chunga thuneihna pum hlûm an neih entîr nâna an hmang thîn kha min hriattîr a. Chuti chungin, heta Kristâ tiâng hi a thinrimna hmanruâ erawhchu a ni lo (Sâm 2:9; Sâm 110:2).

    ‘Tiâng’ hi hmânlai huna hnam hruaituten an hnam entîr nâna an lek thin chu a entîr a (Num. 17:2–10). Kristâ tiâng hi Zion atanga lo chhuak a ni a, a chhan chu Zion hian Pathian mîte a entîr vâng a ni. A tiâng chu chunglam rorêlna entîrna a ni a, chu chuan tû mâ tluk ruâl loha Kristan thil tha lo tâwpna thlen tûra ro A rêlna a entîr (Thup. 2:27; Thup. 12:5). Lal suaksual takte meuh pawh an sualte sim a, Messia hnêna intulût tûrin remchânna pêk an ni (Sâm 2:10–12).

    Kristan a tâwpa hnehna pum hlûm a chan entîrna chu Daniela 7-a Lo Kal Lehna hmâ thilthleng entîr lâwknaah khân hmuh a ni a; chutah chuan ‘Chungnung Bera mi thianghlimte hamthatna’ tûrin rorêlna neih a ni tih târ lan a ni (Dan. 7:22, NKJV). A lalram chu dinngheh niin, ‘a lalram chu chatuan lalram a ni’ bawk” (Dan. 7:27, NKJV). Kraws zârah lalram thutiâm chu a chiang a ni.

    Lalber rinchhantu zawng zawngte tân malsâwmna tiâmsak an ni a, Messia thuneihna leh fel taka rorêlna chungah chuan mîte chu an lâwm a ni (Sâm 2:12; Sâm 89:15–17).

A tâwpah chuan thilthâin thil tha lo a la hneh dâwn tih leh, rêldikna hlen niin, natna leh tawrhnate chatuan atân a bo tawh dâwn tih hriat hi a va nuâm êm! Tûn huna kan mihring thlîrna atang chuan thil tha lo dingchang anga a lannaah hian hê thutak hi engang taka thlamuânpui tûr nge kan nih ang?

Ningânî                                                               February 29

Melkizedeka Awm Dân Anga Chatuan Puithiam

Chhiar tûr: Sâm 110:4–7. Engtin nge Kristâ puithiamna a danglam a, vâna Kristâ puithiamna atangin eng beiseina ropui nge kan hmuh?

    Pathianin Messia chu chatuana lal nihna leh (Sâm 110:1– 3), Melkizedeka awm dân anga puithiam nihna chungnung zâwk a pê a (Sâm 110:4–7). LALPAN A Thû chu thutiâm khûn tak hmangin a chhinchhiah a (Heb. 6:18). Puithiam thafamkim min pêk sût lo tûra Pathian chhechhamna hi A khawngaihna entîrna a ni. Mîte sualnate leh uâlâu taka helnate khân A mîte kalsan tûrin Pathian a tithinrim thîn a; mahse, Pathian chhechham erawh chu danglam thei lo niin, A mî sual sim leh tâte chunga A rorêlna chu Pathianin A khawngaihnain A sût leh dâwn tih tichiangtu a ni (Exod. 32:14; Sâm 106:45).

    Chunglam chhechhamna khân Davidâ thlah Lalber Messia chu Puithiam a ni bawk dâwn tih thil thar a sawi lang a (Sâm 110:4). Israel lalte kha Levia chî puithiamte hnâ thawk thei an ni ngai lo (Num. 8:19; 2 Chron. 26:16–21). Bible-in lalte emaw mipuiten emaw inthâwina an hlan thû sawiin, puithiamte hnêna inthâwina an rawn lâ a kâwk zêl thîn a, a hlan tak chu puithiamte tih tûr a ni.

    Sâm 110 hian Messia Lal chu Israel lalte leh puithiam dangte lakah danglam a nih thû a sawi a. Krista chatuan puithiam nihna kha, Salem (Jerusalem) lal leh “Chungnung Bera” puithiam a nihna anga Melkizedeka hnêna mî a ni (Gen. 14:18–20). Thuthlung Hlui hian Sâm 110-ah chauh lo chuan, Lal Davida emaw, Israel lal dangte emaw kha Melkizedeka awm dân anga puithiam nihna nei angin a sawi vê ngai lo. Sâm hian Israelte chanchina lal-puithiam danglam bîk chungchâng a sawi tih a chiang hlê a ni.

Chhiar tûr: Hebrai 7:20–28. Kristâ puithiamna chungchuân bîknain a kawh chu eng thilte nge ni?

    Chunglam Lalber leh chatuan Puithiam nih kawpna hmangin, Kristan mihring zînga puithiamte leh lalte chunga chungnun bîkna a nei tih a entîr a; chuvângin beiseina kan nei thei ang. Kristan mihring thutiâmte ni lo, Pathian chhechhama innghat thuthlung chungnung chu a tungding a. Ani chuan vân biak bûkah rawng a bâwl a. A puithiam nihna chu mihringte puithiamna ang lo takin sualin emaw, thihnain emaw a tikhaw lo vê ngai lo va, Ani chuan A mîte chu chatuana chhandam tûrin an tân A dîlsak thei reng a ni.

    Puithiam thafamkim leh khawngaihnaa khat a nihna anga Kristan inremna hnâ a thawhna khân, A mîte tân Pathian chênchilh nih reng theihna a neihtîr a (Heb. 6:19, 20). Krista puithiam lal nihna chuan, mîte thinlungah leh khawvêla thil tha lo rorêlna chu a nuâi bo ang. Ani chuan Sâm 2-a thutiâm—Krista Isuan hnam tinte leh rorêltûte chunga ro a rêlna tûr thutiâm chu a hlen tawh ang (Sâm 2:6–9; Sâm 110:1, 2, 5, 6). Isuâ puithiam lal nihna hian A thû kan âwih leh rinchhan a ngiat tlat a ni.

Zirtâwpnî                                                                 March 1

Zir Belhna: Chhiar tûr: Ellen G. White-i lehkhabu, Chatuan Nghahfâk-a “Pathian Kan Hnêna Awm,” pp. 11–20.

    Kristâ tawngtainate leh Kristâ chungchânga tawngtainate a nih angin, Sâm hian Kristâ chungchâng thupuân danglam bîk leh “kan hnêna Pathian awm” (Matthaia 1:23) a nihnaa A tlanna hnathawh chungchâng a sawi a. Isua chu “kan hnêna Pathian awm” chu niin, hlamchhiah leh tawrhna tawngtainate chu a lo hlân a. Ani chu “kan hnêna Pathian awm” niin rêldikna leh chhanchhuah dîlin a âu chhuak a. Isua chu “kan hnêna Pathian awm” niin bo leh beidawng kan nihnaa min hlamchhiah lo vin, rinna zâra hnehna chan dân min kawhhmuh a. Sual vânga chatuan boralna laka min chhandam tûrin Ani chu kan tân chatuan Puithiam leh Lalber a lo ni a. Krista, Davidâ thlah Lalber thafamkim-ah chuan chhandamna atâna Pathian thutiâm khûn takte famkimna chu a awm a ni (2 Korin 1:20).

    Ellen G. White-in mihrinna nêna Kristâ inzawmna chu chiang takin hetiangin a sawi: “Kristâ mihrinna chuan mihringte a khawih a, A pathiannain Pâ lalthutphah a vuan bawk a. Mihring Fapa a nihnaah thuâwihnaa entawn tûr min pê a, Pathian Fapa a nihnaah chuan thuâwih tûra thiltihtheihna min pe thung a. Horeb Tlâng hnim buk atanga Mosia hnêna, “AWMA Ka Ni…. Nangin Israela thlate hnênah chuan ‘AWMA chuan in hnênah mi rawn tîr a ni e,’ i ti tûr a ni,” tia sawitu kha Krista a ni. Hei hi Israelte tân chuan chhanchhuah an ni ngei dâwn tih lantîrtu a ni a; “mihringte anga a lo kal” khân AWMA a nih chu a rawn puang ta a nih kha. Bethlehema nau piang, Chhandamtu inngaitlâwm leh zaidam tak kha Pathian, tîsâa lo lang ta ngei kha a ni. Chu Chhandamtu chuan kan hnênah, “Kei berâm vêngtu thâ ka ni;” “Kei hi vân atanga chhang nung lo chhuk chu ka ni;” “Lei leh vâna thuneihna zawng zawng ka hnênah pêk a ni tawh,” tiin min hrilh. Johana 10:11; 6:51; 14:6; Matthaia 28:18. Thutiam zawng zawng innghahna chu AWMA a ni a, chuvângin, zâm suh u.”— Chatuan Nghahfâk, p. 18.

Sawi Ho Tûr:

@Mipuite an rinawm lo chungin, engtin nge Pathianin A thuthlung chunga A rinawmna chuâi ngai lo chu a târ lan? Chû chuan Pathian fâ harsatna tâwk mêkte tân eng beiseina nge a neih thartîr?

@ Engtin nge Melkizedeka awm dân anga Kristâ puithiamna danglam bîk leh chungnunna khân Pathian mîte chhandamna a tihchiân zuâl?

@Chanchin Tha bûte hian Sâm-a Messia chungchâng hrilh lâwknate Isua Kristaa a lo famkimna an târ lang a. Engtin nge hei hian Pathian Thu dikna an târ lan? Engati nge Pathian Thû kan rinchhanna tikiâm thei rilru putna chu dodâl tlat tûr kan nih?

@Kristâ thu sawi, “Lei leh vâna thuneihna zawng zawng Ka hnêna pêk a ni tawh,” (Matthaia 28:18) tih atang hian eng thlamuânna nge kan neih theih ang? Engtin nge hê thutiâm hi keimahnî nuntawngah kan bel ang?

† ZIRLAI-1 † ZIRLAI-2 † ZIRLAI-3 † ZIRLAI-4 † ZIRLAI-5 † ZIRLAI-6 † ZIRLAI-7 † ZIRLAI-8 † ZIRLAI-9 † ZIRLAI-10 † ZIRLAI-11 † ZIRLAI-12 † ZIRLAI-13 †